JosieLeung0201's Profile

上個周末嚟到依間韓國餐廳食飯，店面好有特色，霓虹燈適合打卡。一坐低，店員就會提供三款前菜（泡菜、黑豆、魚糕），可以任添。今次嗌咗以下兩道菜：🔸原隻雞蔘雞湯：湯底清甜，湯比較濃淍，入面有啲細細粒飯粒。雞肉嫩滑，食完唔口渴，飽肚又暖胃。🔸泡菜煎餅：煎得金黃香脆，泡菜味冇想像中咁突出，味道剛好，食完一件又想食下一件。星期六夜晚去餐廳已經有啲full，店員提議我同朋友坐出面，但冇提及出面可以食煙；以致我哋食咗冇耐之後，隔離有枱食客食煙，我哋要吸二手煙。食物好食，不過覺得服務還有改善空間，而且價錢比較進取，可能以遊客生意為主。…Read More

趁Resteraunt week有優惠，嚟到上環試依間地主打中海菜嘅餐廳。西班牙甜椒有芝士碎，味道溫和唔苦，幾開胃。椰菜花濃湯滑順細膩，帶有奶香同椰菜花鮮味，上面仲配有蒜蓉多士。布拉塔流心水牛芝士creamy，入口軟滑。意大利蘑菇寬扁意粉麵質好煙靭，出乎意料嘅好食， 菇味唔算濃厚，味道係剛剛好。炭烤海爐魚魚皮烤得香脆，但魚肉嫩滑一啲都唔乾，配埋羅勒麵包糠同埋蕃薯片增加成道菜嘅味道層次。紅桑子與百香果，百香果泡沫配紅桑子同焦糖杏仁，味道極酸，酸過杯薑汁檸檬特飲；而且個人麻麻哋泡沫口感。下次會未必會再嗌。Tiramisu甜度適中，入面有咖啡浸手指餅，甜苦平衡。環境方面好好坐，服務好周到，而且店面好靚好有特色，適合打卡。唯一美中不足係因為樓底高，所以少少聲音都會放大，即使餐廳內少人，都會感覺嘈雜。周末晏晝用餐限時一個半鐘。推薦！…Read More

去開旺角又想食拉麵？依間一定係首選，唔洗過百，味道又高質。不過就係太出名，次次都要係出面排隊。食過幾次，都係覺得沾麵最正，麵份量夠多，湯夠香夠濃，食到一半仲可以加檸檬或醋，解膩之如又會變咗第二隻湯底，十分滿足。首先嚟個推薦既魚介豚骨，雖然菜單寫清湯底，但都夠晒濃，又有魚香。再嚟就海老，個湯底同豚骨差唔多，但好重蝦味，啲櫻花蝦又多，鍾意食蝦一定唔可以錯過。最後叫多碟餃子，普通豬肉餃子，冇咩特別又唔平，可以skip🫣…Read More

又到Lunch 時間，想食米線，樓下就有三哥，不過位置少，外賣又會等好耐，咁就緊係用App 落定order，睇下有咩優惠先。嘩，有雞翼送喎，即刻用先，仲有個app 專用餐，3個餸加野飲，可以一張單過，total 56蚊，抵到爛，不過依間真係好多單要等好耐，半個鐘走唔甩。相信睇圖就知咩味啦土匪雞翼味道始終如一，好香孜然味得嚟又有其他香，今次米線硬度都正常，唔會好冧又斷晒，而番茄湯都係至愛，酸酸地好開胃，感覺又健康。…Read More

觀塘收工近近地去鄰近MTR 既東廣場搵食，一樓嗰層類似food court咁樣中間好多位自己揀嚟坐。見到間舖頭幾多人等就試吓佢。叫咗一碗推薦花膠雞米線，同胡椒豬肚雞米線。一嚟梗係試吓個湯先啦，一飲個鮮味突出到，即刻飲多幾啖，係完全可以飲晒嘅Level，雞就正常料，嫩滑嘅，但連埋皮同脂肪一齊食個口感就麻麻哋，花膠同米線冇咩特別。仲有碗就都類似，同款湯底加咗胡椒咁，唔會好辣，都好飲既，前題唔好預佢好似出邊啲胡椒豬肚湯咁重味。其他配料就同上，冇咩特別。但最後為咗個湯都值得嚟試一試。…Read More

一向都好鐘意食shari shari嘅刨冰，因為每一啖都有味，而且唔係死甜。今次試芒果椰子味配乳酪泡沫，椰子味淡淡哋，同芒果嘅味平衡得啱啱好。冰入面有啲花生碎，配埋乳酪泡沫，好多種口感！🍧每人最低消費$50，所以另外加配咗兩份甜品試吓。🍰日本柚子蛋糕清新又唔會太膩。焦糖燉蛋表面焦糖層薄薄哋，燉蛋滑嫩細膩。兩份甜品都好食，但未有刨冰咁出色。假日去都要排一陣隊，但食過唔同主打刨冰嘅甜品店，shari shari係我覺得一定要去食嘅其中一間。…Read More

🔸美國西冷牛扒　配阿根廷青醬　薯條美國西冷牛扒嗌咗medium，外層有好靚嘅烤紋，肉質厚實嫩滑，配阿根廷青醬帶有清新草本香氣。美中不足係接近脂肪位置有筋，少少靭。薯條炸得香脆唔油膩，有啱啱炸起嘅熱氣。🔸意大利肉醬貓耳朵意粉肉醬味道濃郁帶香料味，好夠味又唔會過鹹。貓耳朵意粉口感煙韌有彈性，份量適中🔸墨西哥雞肉薄餅（Quesadilla）芝士同啲餡料好豐富，碟旁有酸忌廉同番茄辣醬，令味道更加多層次，食完好滿足。今次坐咗喺戶外，傍晚時分會提供有盞枱燈，更添氣氛。旁邊有風扇，唔算熱，用餐時亦冇遇到昆蟲。不過侍應唔多，請侍應斟水同埋單都叫咗兩次先serve到我哋，以依個價位嘅餐廳，覺得service有改善空間。…Read More

🔸雞白湯拉麵 $148聽聞座銀雞白湯拉麵好出名，決定一試。🍜雞白湯拉麵面頭有一層雞湯奶泡，係幾特別，但味道上覺得有同無分別唔大。上面有炸牛蒡作為配菜，幾香口，份量都多到食唔晒。至於湯底本身，我個人覺得偏濃，食到最後會覺得鹹咗啲啲，不過第一啖入口嗰下都幾驚艷。拉麵軟硬適中，亦掛湯。雞肉片口感極好。整體成碗麵入面所有食物都配搭得好好。店面較細；服務幾好。朋友食沾麵，店員有主動offer話凍咗同佢哋講，可以幫我哋熱返個湯。星期六晏晝去都唔使排隊。推薦！…Read More

🔸馬拉盞通菜脆口，馬拉盞味道帶啲鹹香，好惹味，餸到飯。🔸炸蝦餅皮脆，蝦味幾突出，唔油膩，同埋六件都好大舊。點埋甜辣醬食更加惹味🍤🔸金柚子沙律酸酸甜甜，柚子肉夠汁，配合花生、紫洋蔥同小魚乾脆，口感層次豐富同味道清爽，幾開胃🔸馬沙文咖喱雞柳味道濃郁，有少少椰香味，唔會太辣，雞柳肉質嫩滑。同埋好欣賞佢係一個煲，下面有火一直熱住煲咖喱👍🏻另外叫咗個蒜茸包點咖哩食都好夾環境方面，卡位幾好坐，但中間非卡位位置就麻麻地。餐廳有時會泰文歌，幾有feel🇹🇭…Read More

🔸鹵水拼盤 $140有紅腸、豆腐、豬腸、鵝腸等，滷汁香味突出，每款食材都滷得入味，分量十足！🔸潮洲凍蟹(時價) $140蟹身色澤新鮮，蟹鉗同蟹腳都完整，蟹肉雪白彈牙，冇腥味。🔸白灼東風螺 $80螺肉爽口彈牙，份量唔少，每隻都肥美，簡單白灼已經帶出海鮮味。加埋甜醬、辣醬味道即刻昇華咗。🔸炒蜆 $80蜆肉好肥美，有鑊氣，又大大碟，極抵食，冇咩沙。環境方面，唔係咁好座，同埋衛生麻麻，張枱好油。但係老闆好好人，上菜又快手。依個價錢食到咁多好食海鮮，絕對值得再嚟。…Read More

🔸煙三文魚菠菜煙肉忌廉意粉 $68有碎煙三文魚、菠菜、蘑菇同煙肉，配忌廉汁；意粉軟硬適中，但忌廉汁唔係好濃味，不過勝在大碟，睇落已經好有滿足感，食完真係夠飽。🔸鮮車厘子黑森林蛋糕(餐) +$35好食，蛋糕濕潤，唔會乾爭爭。夾層仲有新鮮車厘子，Cream唔會太膩或太甜。不過個人覺得外面層Cream厚咗少少。平日lunch去，店員會安排坐餐廳出面（商場中庭）嘅位置；QR Code落單，收加一服務費，埋單$113.3。意粉不過不失，CP值一般。…Read More

🔸魯肉飯 $41魯肉飯每粒飯都可以沾上油香肉汁，飯同魯肉份量控制得恰到好處。魯肉肥瘦適中，入口鹹香，味道非常出色。🔸刈包 $37刈包配料有芫茜、花生碎、肉。肉油潤軟腍，三種味道融合得幾好；包皮入口鬆軟，層次豐富。🔸蚵仔煎 $40蚵仔煎蚵仔分量多，幾乎每啖都食到蚵仔。而且煎得啱啱好，外層粉漿唔太厚。加埋醬汁，甜中帶鹹，味道地道。🔸QQ紫薯地瓜球 $38最推薦！地瓜球上枱時仲係暖嘅，外皮炸到微脆，入面口感軟糯。餡料用真材實料蕃薯茸，每啖都有蕃薯甜味，食到食材本身味道，極推薦。🔸洛神烏梅汁 $23叫咗半糖版本，入口甜味偏重，酸味感覺唔明顯，如果鍾意酸味可能會覺得不夠突出。整體感覺偏甜解渴感一般。餐廳入面會播台灣歌曲，幾有feel。平日夜晚唔使等位，得閒經過都會去食👍🏻…Read More

🔸湯酸辣炸醬紅薯粉條+芝士魚豆腐+煙鴨胸 $45紅薯粉條偏軟，有芫茜、酸菜同肉碎，成碗幾足料。酸味適中，落單時仲可以自選酸度，不過整體味道我覺得唔太出色。煙鴨胸比較好食，肉質嫩滑，份量十足，抵食！芝士魚豆腐味道都唔錯，加分！🔸尖椒皮蛋 $20皮蛋蛋黃質地比較實，味道同傳統皮蛋有啲唔同，未必適合每個人口味，賣相一般。下次會想試下其他小食。雖然味道個人覺得一般，但勝在價錢實惠，係平日食lunch好選擇。…Read More

今日試咗佢嘅午市套餐，包晒主菜、沙律、湯、飲品同甜點。🔸牛柳粒黑松露燴飯 $88燴飯每粒飯都煮得軟糯但分明，有細細舊雜菌同洋蔥增加口感。醬汁夠creamy但不會覺得膩，可惜黑松露味略嫌淡咗啲，味道上冇預期咁突出。牛柳粒肉質唔韌，但牛味唔重，好似冇特別醃製過。沙律係沙律菜加芝麻醬。蘑菇湯可以飲到有粒粒蘑菇，味道唔淡但係好稀。另外馬卡龍甜品，外皮輕脆，作結尾幾滿意。平日午市時段人流幾多，雖然用餐時間限70分鐘，但店面環境舒服，坐得自在。用 QR Code 落單，會收加一服務費，埋單$97。食物質素屬於穩陣，份量夠，但CP值未算特別高，比較適合同事飯聚。…Read More

🔸魚介豚骨醬油叉燒拉麵套餐🍜（$73）： 今次揀咗濃湯湯底，飲落唔會死鹹但感覺魚介豚骨味偏淡少少，期望再濃郁啲就完美。拉麵份量十足，麵質偏軟但唔算腍。叉燒大大片，厚薄啱啱好，肥瘦均勻。成碗拉麵配料豐富，有紫菜、蔥花、竹筍同海帶，賣相吸引。不過紫菜有一半浸咗湯度，上枱時已經淋咗，有啲小可惜。🔸雞軟骨餃子🥟： 好奇心驅使第一次嗌雞軟骨餃，賣相幾討好，煎到金黃香脆。外皮香脆。不過望落比較多油，食落可以接受。下次可能會試下其他小食。鋪頭位置比較隱蔽，細細間但乾淨企理，環境好舒適好好坐。平日lunch time去都唔多人。以呢個價錢食到咁大碗拉麵、餃子同飲品，真心覺得抵食，下次一定再幫襯！👍🏻😋…Read More