travcccc's Profile

Bookmark左呢間餐廳好耐，終於搵到藉口黎一試。餐廳以小木屋做主題，環境昏暗，好有格調。職員態度非常親切，有問必答。知道我地是share dish，更加體貼地安排逐碟上，絕對係加分位。西班牙紅蝦意粉配柚子泡沫（$258）一上枱勁有驚喜。首先賣相勁岩打卡，好有少女心。醬汁聞落好香龍蝦味，食落唔會太咸。紅蝦好大隻，爽口彈牙，如果有2隻就更好。Set Dinner（$428） 餐湯 - 忌廉湯：味道正常，麵包很好食，烘到外脆內軟。頭盤 - 半熟吞拿魚伴三文魚子：超好食！吞拿魚好香好鮮，同三文魚籽和蛋黃醬非常之match😋主菜 - 頂級韓牛封門柳：擺碟好靚😍叫左medium rare岩岩好，淋得黎又有咬口，估唔到超有肉味，好食！甜品 - 麵包布甸：上枱時暖暖的，很soft，而且甜度岩岩好。🌟價錢 - 7/10 🌟回頭指數 - 7/10…Read More

一個人行到累累地想搵個靜靜地既餐廳充下電，今次就揀左Pickabowl。餐廳用左落地玻璃，好光猛，加上素色既裝修，整體感覺好舒服。主打健康飲食，除了default 配搭外，仲可自行選擇鍾意既食材。估唔到呢到既水係西柚羽衣甘藍，味道超級fresh。飯亦除了白飯外，仲可以選擇糙米飯和黃薑椰菜花，健康upupup!Classic Couples（$84）經典雙併即是三文魚配吞拿魚，賣相吸引，顏色鮮艷。魚生經過醃製，但都食得出鮮味，雖然是bite size，但絕對夠曬口感。配菜仍很豐富，有玉子燒、烤南瓜、炸豆腐、菠蘿、蕃茄和毛豆，口感十足。飯就選擇左出面較少出現的黃薑椰菜花mix糙米飯，估唔到又幾夾。🌟價錢 - 7/10 🌟回頭指數 - 7/10…Read More

聽過好多人介紹呢間小店有幾正，黎之前都預左要等位。餐廳位於街市隔離，門口放左d植物，好易搵到而且又好岩打卡。星期六中午等左30分鐘有位，呢到d飛好有heart，張張都係人手畫，好特別～泰式無骨滷水豬手飯（$88）雖然賣相唔太吸睛，但食落一定唔會失望。豬手煮到好淋好入味，而且唔會太咸，食完好滿足。但份量很多，絕對對得住呢個價錢，CP值爆登。泰式燒豬頸肉飯（$78）豬頸肉燒到岩岩好，外邊香脆，但肉質柔嫩呈現粉紅色，非常出色。份量比想像中多好多，估唔到碟頭飯都有十幾件，唔怕食到最尾冇餸送飯。泰式青檸茶（跟餐）呢到既飲品同樣地好大杯，出面的青檸茶都係非常甜，但呢到青檸味好出，甜度岩岩好，岩曬而家咁熱既天氣飲。泰式奶茶（跟餐）唔會似街外飲到既泰奶茶咁甜，反而係偏重於茶底既香味。如果平時嫌太甜，絕對可以試下呢杯。🌟價錢 - 10/10 🌟回頭指數 - 10/10…Read More

一向都好鍾意食burger 既我，今日黎到上環呢間小店，門外的餐牌已經好吸睛，睇相望落已經好吸引。店舖雖然細細，只有數張枱，但環境好舒服，唔會感受到好逼狹。150g薄切西冷漢堡配砵酒洋蔥醬（$105）就咁聽個名已經知道是重量級，西冷份量足夠，完全唔會乾同靭，煮得岩岩好。大量洋蔥和橡木煙燻車打芝士，夾埋酸酸的醬汁，配料青瓜、蕃茄和生菜中和了漢堡的油膩感，整體惹味得黎帶點清新感，非常推薦。黑松露野菌手工闊條麵（$95）估唔到意粉好有驚喜，上枱時超香黑松露味，有大量菇和芝士舖面，望落已經好吸引。入口感覺非常creamy，味道濃郁。手工闊條麵特別有口感，好彈牙。薯條配芝士醬（跟餐+$18）薯條即叫即炸，芝士醬味濃，比一般連鎖店出色。雲呢拿雪糕奶昔（跟餐加配$25）外表好吸引，跟了忌廉和焦糖醬。奶昔打得好細滑，入口好smooth，一飲就飲得出落足雪糕份量，稀杰程度啱啱好。個人特別鍾意呢種口感，唔洗等佢慢慢溶左先飲到。🌟價錢 - 8/10 🌟回頭指數 - 9/10…Read More

諗住搵一間靜靜地冇咩人既餐廳同朋友傾計，無意中就發現左呢間西餐廳。我地提早左一日book 位，估唔到店員好貼心安排左我地坐最入既位置。餐廳裝修得好舒服，座位闊落，職員態度好好，完全唔會趕你走。Lunch set 都算多選擇，價錢合理，包了前菜、主菜和餐飲。如果你搵緊間餐廳同朋友聚會，食物又唔差，價錢唔貴的話，呢到絕對係好選擇。Starter - 迷你法國雜殼麵包配黑醋及沙律&酒香蟹肉龍蝦湯（+$40)麵包：岩岩烘起，外脆內軟，可以配橄欖油和黑醋，好難得成條食曬，如果可以refill就好了。沙律菜：好新鮮，全部都爽脆蟹肉龍蝦湯：飲落超級香濃龍蝦味，唔會只係死咸既味道，蟹肉份量都唔少，整體非常creamy，絕對超越$40的價錢香煎龍利魚配帶子，水瓜榴忌廉汁（$108）龍利魚煎得表面金黃色，肉質很嫩滑，完全唔腥。帶子大大粒，同樣地煎到岩岩好、爽甜。伴菜既薯蓉勁幼滑，再配埋忌廉汁，非常推薦。烤美國雞胸配牛肝菌忌廉汁（$108）開頭都擔心雞胸會好鞋，但原來好滑，真係估唔到，一改過往的印象。牛肝菌的味道好特出、好惹味。配菜都食得出有心思，唔會hea你，CP值好高。🌟價錢 - 10/10 🌟回頭指數 - 10/10…Read More

一放假就會想食下邪惡餐，今次揀左位於長沙灣的小店。星期六中午黎到都要排隊，由於只有8、9張枱，加上又有限聚令，都得左30分鐘以上。雖然舖頭細細，但職員數量比想像中多，落左order後都唔洗等好耐。由於是即叫即整，上枱時溫度都偏熱，唔似其他店會凍冰冰。由於漢堡份量好大，店員都好貼心另外比左張紙包住黎食。雙層芝士牛肉漢堡（$52）芝士份量好足夠，但可惜食落芝士味冇想像中咁重，唔太突出。牛肉也是偏乾身，冇咩肥肉，唔算重牛味。另夾左大大塊洋蔥和生菜，中和左漢堡的油膩感。雙蘑菇黑松露醬芝士漢堡（$54）未食就已經聞到好香黑松露味，蘑菇加了洋蔥片一齊炒，口感更豐富，食落好juicy，一路食一路滴汁。雙色薯條（跟餐另加$18）雙色薯條是指薯仔條和蕃薯條的混合，呢個組合較少見。有兩種口感，一個係偏乾身，另一款是帶甜帶濕，蕃薯條出乎意料外有驚喜。🌟價錢 - 7/10 🌟回頭指數 - 7/10…Read More

呢間餐廳用雞翼做賣點，有數十款味道供選擇。餐廳細細間，所以就算平日黎食都一定要訂位。Lunch set 包左8隻雞翼、湯/沙律、薯條和飲品。即使係lunch，雞翼選擇都有好多款，如果約幾位朋友黎既話就可以一次試多幾種味。👉🏼黑椒檸檬味好濃既黑椒味，再隨自己既喜好加落檸檬汁，呢個配搭好開胃。👉🏼新加坡辣蟹味呢款好惹味，舖滿左大量炸蒜、辣椒和蔥，食落都辣辣地，岩曬鍾意重口味既人士。👉🏼巴馬臣芝士蒜蓉味整濃味，芝士控一定要點，再配上大量生蒜，又一重口味人士必叫。👉🏼黑芝麻海鮮蜂蜜屬於濕身雞翼，味道甜甜地，主要食到蜂蜜味，咁多款中屬於較溫和。👉🏼跟餐薯條超大盤，岩岩新鮮炸出黎熱辣辣脆卜卜，同雞翼超夾🌟價錢 - 7/10 🌟回頭指數 - 7/10…Read More

每次經過如心廣場的轉角位都有留意呢間西餐廳，星期六日行過，好多時都見到要等位。今次揀咗平日中午嚟，出乎意料外唔使等位。Lunch set選擇都幾多，有10幾種。餐廳座位闊落，每台都擺咗一大支水、鹽、黑胡椒。呢度採用左自助下單，scan QR code睇menu，好方便。香脆魚柳全日早餐（$85）呢個all day breakfast睇落普普通通，冇咩特別咁，但食落非常之有驚喜。魚柳係新鮮炸起，熱辣辣外脆內軟，唯一不足就係size偏細。炒蛋超香，非常嫩滑，比魚柳更加出色，必試。香菇都用咗蒜蓉炒，食落好惹味，蘆筍、蕃茄、沙律菜都好新鮮。菠蘿冰紅茶（跟餐附送）由於食物太出色，飲品相對地比下去。味道偏淡，只有輕微嘅菠蘿味，整體來講唔算太甜。🔸🔸🔸🔸🌟價錢 - 7/10 🌟回頭指數 - 10/10…Read More

荃灣海之戀開左唔少新餐廳，行過一樓見到呢間門口好吸引，放左好多醬料，忍唔住望左幾眼。餐廳採用開放式，望入去裝修都唔錯，再加上陽光射入了舖頭，好relax，座位都寬闊，坐得幾舒服就入左去食。原來3點後就有tea set，選擇都唔少，甜品就佔左一半。帕爾馬火腿蕎麥薄餅（$72）第一次食呢種蕎麥薄餅，蕎麥味都香濃，淡淡地咁，有別於平時既薄餅底。Parma Ham 有4塊，味道偏清淡，冇咩鹹香味。芝士唔算溶得透，中間有隻生蛋黃。另外都有沙律菜，減輕油膩度，整體味道似普通薄餅，可以一試既。但以呢個價錢黎講就有點偏貴。🔸🔸🔸🔸🌟價錢 - 5/10 🌟回頭指數 - 5/10…Read More

位於鰂魚涌主打日式家庭料理既小店，星期六中午黎到都要等幾張枱先有位。舖頭坐位寬闊，採用左木枱木凳，有種日本小店feel。食物選擇都好多，主要有定食、丼飯、咖哩、烏冬、沙律及小食，每款種類都有約十款選擇。價錢都相宜，難怪長期有人排隊。豬軟骨野菜咖哩飯（$69）豬軟骨煮到非常軟淋， 冇牙都食到。味道好出色，煮到好入味，但絕對唔會過咸，食落仲有膠質的感覺。配菜份量都好多，軟硬適中，再配埋帶有微甜既日式咖哩。個飯係混雜左粟米粒和蕃薯粒，甜甜地好好味。蘿蔔牛肋白味噌定食（$76）有好多舊牛肋條，煮到好淋，唔會乾爭爭。白味噌味道很濃郁，白蘿蔔煮到好淋，味道清甜，沒有苦澀味。定食配左沙律菜，新鮮爽脆。跟餐附送既味噌湯唔會過咸，有別於出面既日式餐廳。🔸🔸🔸🔸🌟價錢 - 9/10 🌟回頭指數 - 10/10…Read More

原來牛角出左lunch set, 價錢好經濟實惠。可以選擇任選數款肉類或者懶得諗直接叫盛合都得。今次叫的set 包埋沙律、飯和飲品，仲可以免費升級做牛角飯。牛角飯舖滿左滿滿既紫菜，夾埋燒肉的油脂，完全係絕配，必試！加上牛角飯既份量好大碗，食完非常滿足。Set E 牛肋肉四品燒肉盛盒（$159）包左4款唔同級數既牛肋肉，份量唔會過多，lunch 食岩岩好，唔會有好大罪惡感。當中有牛肋肉、上級牛肋肉、美國SRF和牛牛肋肉各2件及4粒網燒一口牛，可以一次過試曬唔同level，就算最低級既食落都唔會好差，絕對可以接受。Set F 牛角特選牛五品盛盒（$135）有5款肉類，每款各2件，包括左牛肋肉、腹胸肉、厚燒牛舌、牛舌和肩脊肉，岩曬有選擇困難症既我。其中最鍾意既就係厚燒牛舌，色澤呈粉紅色，入口好香之如又好軟淋但又不失口感。🔸🔸🔸🔸🌟價錢 - 9/10 🌟回頭指數 - 10/10…Read More

留意左呢間cafe 好耐，難得平日放假終於的起心肝搭個幾鐘車黎。估唔到平日的11點幾都咁多人，排左大約20分鐘就有位。French Toast ($94)French Toast 係呢到既signature dish～賣相比常吸引，味道都很出色。厚厚的多士，多士邊係香脆，切落去就感受到軟淋淋，配埋果仁碎、食落好有口感。加埋cream、糖漿、肉桂粉、層次更加大增。難怪有9成客都叫左，完全係會為左呢碟而搭咁耐車黎食🥰Smoked Salmon on Sourdough Rye ($102)睇落雖然細細份，但煙三文魚份量完全唔姑寒，舖滿曬整片既酸種麵包上。加埋火箭菜同乳酪芝士，整體好夾好清新好好味。Buckwheat Granola Bowl ($75)上枱時比想像中細碗，但原來食落都好多。Granola 份量有好多，食落唔會太甜，加埋椰子碎，好夾。但以呢個價錢黎講有點貴，除左岩打卡外，整體都比較普通，可以唔洗試都得。Chai Latte (Large $48)放係枱就已經聞到印度奶茶既香，飲落口好滑好易入口，香料味唔會太搶，茶和奶既比例岩岩好。Coffee Tonic ($50)朋友話呢杯好高質，飲得出tonic water 係自製既，唔似出面個d咁酸。🔸🔸🔸🔸🌟價錢 - 7/10 🌟回頭指數 - 10/10…Read More

之前經過如心廣場都留意左呢間cafe，餐廳採用左落地玻璃，天氣好既話，陽光超好。等左陣就安排左住窗邊，環境一流，好chill。先係cashier order 後，食物會由店員送上。火雞胸蕃茄三文治配希臘乳酪醬（$79）三文治份量好大，有點驚喜，絕對唔洗驚食完唔夠飽。麵包烘到香脆，每件有5-6件既火雞胸，再加埋蕃茄和沙律菜，好難一啖食曬。再配上微酸的乳酪醬，一d都唔會漏。伯爵茶鮮奶巧克力（$44，lunch set 以$10加配）呢個配搭好少地方見到～朱古力味好濃郁，但配左伯爵茶，減低左朱古力既油膩感。今次揀左平日既時間黎，唔算太多人，但都有限90分鐘的用餐時間。但店員於60分鐘後就開始收拾枱，並於75分鐘趕交回枱，這一點對cafe 來說絕對是不足。🔸🔸🔸🔸🌟價錢 - 7.5/10 🌟回頭指數 - 6/10…Read More

我一直都好鍾意飲魚湯，見到呢間以魚湯做賣點，冇理由唔黎試下啦。星期六一點多黎到，店內都坐滿左7成客人。位與位之間比較窄，出入都要小心唔好撞到隔離枱。另外，餐廳張貼左不會供應茶水，這是不足的地方。吉烈豬扒魚湯手打烏冬（$85）鯛魚湯呈奶白色，魚味未至於非常濃，但絕對係唔腥，飲得出冇落味精。烏冬係稻庭烏冬，彈牙易入口，亦都跟左幾種配菜，份量足夠。吉列豬扒好大件同厚，炸得非常鬆脆，但唔會好油，以呢個價錢絕對是超值。雞塊唐揚魚湯手打烏冬（$75）雞件熱辣辣，食得出係即叫即炸。原本都擔心會唔會好乾，食落很有驚喜，很juicy。同樣地，份量都好足夠，有大概十件，很抵食。🔸🔸🔸🔸🌟價錢 - 9/10 🌟回頭指數 - 9/10…Read More

餐廳位於昌寧商場地下，地點有點難搵，門面唔算顯眼。餐廳細細地，室內得6-7 張2人枱，户外就有張bar 格，假日黎既話就要預返少少時間等位。雖然舖頭細細，但環境好舒服。Egg Benedict （$78）選用左酸種麵包，食落好脆口，唔似用muffin 咁淋。水煮蛋時間煮到岩岩好，輕易做出流心效果，再配埋滿滿荷蘭醬、加埋好香既煙肉，食完好滿足。伴碟既沙律菜好新鮮，仲有少少藜麥，口感更豐富。慢煮雞胸Bagels（$60）呢到既Bagels上面係有罌粟子，食落更加有口感。雞胸用左慢煮，絕對唔洗擔心好鞋。除左雞胸外，仲有cream cheese、baby spinach 、蕃茄和洋蔥，全部都好夾。Hojicha Latte ($38)Earl Grey Latte ($38)2杯Tea latte都做得幾香，味道不算香濃，奶味偏重。🔸🔸🔸🔸🌟價錢 - 7/10 🌟回頭指數 - 7/10…Read More