or#tm66520411's Profile

遙食評應承咗師姐請食飯，揀咗良辰吉日找數，朋友介紹咗一間土瓜灣開業咗13年，性價比高嘅居酒屋，我同師姐都係喜歡日本飲食嘅朋友，所以趁做嘢食好嘢。 第一次幫襯嘅客人都會好奇一件事，「點解老闆係韓國人，唔開韓國餐廳，會開日本居酒屋？」 原來愛屋及烏嘅老闆喺香港住咗將近20年，了解香港人喜歡日本菜，所以投其所好。佢喺韓國老家修讀酒店管理，之後喺酒店嘅日本餐廳工作，所以老闆係日本菜同埋日本清酒嘅專家，因此我哋呢一餐就交畀老細發辦。 同師姐傾咗冇幾多句，就上咗牛油果大蝦沙律，呢道沙律賣相看似普通，其實一入口就會見真章。首先感受到沙律菜嘅新鮮爽脆，車厘茄粒粒飽滿，大蝦口感實淨，牛油果嘅軟硬質感啱啱好，唔會過熟或者過生，係多咗少少沙律醋，整體感覺吸收緊源源不絕嘅大自然嘅能量。 跟住上嘅就係居酒屋必備嘅串燒，老闆幫我哋揀咗白鱔、雞腎、牛舌、同埋黑豚蘆筍卷。食材新鮮，上菜嘅食物幾乎都係原汁原味，只係牛舌配芥末籽醬。白鱔爽脆，雞腎爽口。坊間嘅串燒牛舌，喺一款容易燒到輆口嘅一道菜，師傅突出牛舌嘅味道，加埋芥末籽醬，係平常日本菜以外嘅食法。黑豚蘆筍卷，黑豚燒肉片不油不膩，包住幼嫩嘅蘆筍，係一個味道同賣相都精緻嘅組合。 食完串燒，當然要體驗遙嘅招牌刺身，因為係公事會面，所以刺身組合比較簡單，包括三文魚、油甘魚、帶子、生蠔、同埋大蝦。日本直送嘅新鮮刺身，果然名不虛傳，三文魚同油甘魚都係提供優質部位，感受到滿滿深海好Omega-3 滋養。新鮮帶子、生蠔同大蝦，帶子清新，質感柔軟。大蝦肉質彈牙，分開蝦頭同蝦頭嘅時候食嘅時候，蝦膏仲爆曬出嚟。最有感受就係隻生蠔，感受到大自然嘅海洋營養，口感creamy，加埋秘製醬汁，喺呢餐飯嘅一個高潮位。 老闆預計我同師姐未夠飽，所以推介咗招牌菜牛舌芯丼，呢個牛舌芯丼認真不得了，牛舌係一款好講究功夫嘅食材，師傅首先挑選牛舌芯嘅部份，跟住薄切牛舌，厚度就好似牛肉丼嘅牛肉片差唔多，之後加汁燒。第一口牛舌片，口感細滑，完全唔覺得係食緊牛舌，好似食緊上乘嘅牛肉片咁樣，丼上面嘅新鮮雞蛋黃、秘製醬汁、椒絲同蔥花，呢個丼飯確實係招牌擔當，係另外一個高潮位。 最後俾我呢位為食朋友搵到紅豆冰卷呢度甜品，而家天時熱熱地，嚟一度冰涼嘅甜品實在係賞心樂事。呢個紅豆冰卷特別嘅地方，就係冰卷嘅餡係紅豆蓉再加綠豆蓉嘅組合，我請教老闆點解係紅豆加綠豆嘅組合，老闆話綠豆嘅口感會比較清爽，打破咗日本紅豆配綠茶嘅固有印象，皆因高人氣，餐廳開幕到而家紅豆冰卷就已經長賣長有。本來我師姐已經食飽，都忍唔住試呢個冰卷，仲要外賣四件返屋企開心share！ 原來遙係土瓜灣嘅地區招牌，交通便利，土瓜灣港鐵站B出口一到地面就見，目標係提供性價比高嘅日本菜，13年來韓國人老闆已經同當區居民建立咗非一般嘅感情，一早超越老闆同食客之間嘅關係，相信同韓國人老闆能夠講流利廣東話，喜歡同客人小酌一杯不無關係，喜歡居酒屋飲食嘅朋友一定要拜訪！ 我同師姐深深感受老闆嘅對客人嘅溫柔細心，同老闆傾偈簡直如沐春風，之所以遙嘅飲食咁得客人歡心，皆因老闆用心經營，會不停Review 遙嘅菜單，務求客人能夠享受飲食嘅快樂。今次實在感謝朋友嘅推介，令我同師姐無論身體同心靈都得到滿滿嘅滋養。#遙 #土瓜灣 #居酒屋 #日本菜 #日本居酒屋 #刺身 #串燒 #牛脷 #空運到港 #日本直送…Read More