VenniaWai's Profile

最近發現馬鐵石門站附近，開咗唔少嘅食肆，有酒樓、車仔麵店、又有日式豬扒專門店， 一出車站，行兩三分鐘就到，非常就腳! 對正車站A出口位置，有間拉麵店，店面裝潢風格日式，給人一種到咗東京吃麵的感受。每日限定賣麵數量，賣曬就收鋪，質量應該有保證! 今次抱著貪新鮮嘅心態試下啦，結論係一試無妨，再試就無謂啦! 餐點內容很簡單，就是三種湯底口味（ 醬油豚骨, 雞骨, 麻辣) ，仲有一些炸物小食可選擇，價位適。另外，麵軟硬度、湯底濃度、 配料多少，也可以按個人喜好做調整。我揀咗最基本嘅 "叉燒糖心蛋醬油豚骨湯拉麵"， 麵條無論質感同外觀都跟"味千拉麵" 好相似，麵身直而幼，依種麵唔係我杯茶…我比較鍾喜歡曲麵的口感，麵條Q有嚼勁，可有效地吸收湯汁。這個湯底係濃郁有味的，但唔係淆出嚟嘅鮮味，豚骨味欠奉，只有鹹味! 湯頭係拉麵嘅精髓，亦都係最難做得好嘅地方，需要心機長時間淆製，我諗只係喺日本先食得到最正宗嘅！豬肉片較薄，口感一般，但用火槍燒過關係，頗香口；而醣心蛋則不錯，但能再入味一些會更好! 小食方面，選擇咗雞翼同埋餃子，兩樣都係基本嘢但就真係較失望，味道做得不到位!酥炸雞翼，唔滑唔脆又冇乜味。如果唔係面頭加了些七味粉增味，應該完全食唔到味! 至於餃子，本來賣相不錯，但食落去味道好一般，煎得又不夠香，皮太厚，沒有想再食落去食嘅衝動。值得一讚嘅係，店員親切有禮貌! 係香港今時今日嘅香港，食肆嘅服務態度每況愈下，都算難得！…Read More

最近行經大圍積福街，發現這家主打潮洲菜酒樓，提供茶市及晚市。本人頗喜歡潮式功夫點心，但有質素的，係香港選擇不多。今天星期日專登過黎試下，約中午12点到達，門外有5、6人等侯，等候時間10分鐘，比預期中快。內面均一係大枱，我們2人，需要搭桌，在所難免。點心選擇都幾多，除基本款式，還有一些較有特式的。我們叫了6樣點心，即叫即蒸，質素唔錯，食得出係自家做的，非由外面買返黎蒸的，上菜時間也算快蝦餃，燒賣: 一盅2件，熱辣辣送上! 皮薄餡多，蝦算幾大粒、爽口. 韮菜煎餅: 賣相吸引，煎得幾香，唔錯! 芋絲春卷: 內餡係芋絲肉鬆，味道配合得宜! 雪山流沙包: 包身非常鬆軟，奶黄真係好 `流心'，滿意! 芒果布甸: 內有芒果肉，味道正路，但份量略嫌太少, 幾啖食完. 有讚也有彈! 可能係人手不足關係， 服務及衛生方面的確有待改善:(。有幾個侍應態度一般，叫他拎醬料，加單等，總是不太理睬，又冇回應，真係唔知佢收唔收到! 驚嚇嘅係，有位侍應為我們每人遞上一個碟，碟上竟然有明顯清潔劑泡沫，濕立立的，未清洗乾淨就端上客人面前，有點不能接受. 希望酒樓方面應正視一下，人手不足帶來嘅負面影響。 期待下一次再光顧時有所改善，否則再好食嘅食物也枉然! …Read More

小妹第一次係openrice寫食評，原因只得一個，就係唔希望有人同我一樣因為睇完一篇又一篇寫得非常 "引人入勝" 以 "超抵食酒店級甜品buffet" 為題嘅專業食評, 而一心諗住去品嘗一下精緻抵食嘅甜品, 喺酒店舒適環境hea下, 享受一個遊閒嘅下午! 話說2星期前嘅一個星期六下午, 專程同老公搭乘馬鐵去石門站, 去我預早訂好位嘅Momo cafe食甜品自助餐, 3:30pm - 5:00pm, $98/位, 價錢相當吸引! :)一到埗, 首先講講環境, 真的好一般, 沒有其他食評中講到咁舒適, 光線有點不足, 縱然有落地玻璃, 但只有大廈, 馬路景, 沒有什麼觀景可言! 服務方面, 令人失望! 不用說酒店级水平，普通餐廳水準也不及，大部分服務生很生手，應該是炒散吧! 我倆坐下很久，水也沒有一杯，有點被忽視的感覺。 不打緊，食物好吃最重要! 我先去繞一圈, 看看有什麼甜品供應，誰知20秒內行完，只有一個小圈，種類選擇有幾多? 可想而知! 我眼見的款式有朱古力cupcake, 布朗尼蛋糕, 藍莓芝士杯, 泰式西米糕, 窩夫, 豆腐花, 但賣相都不怎麼吸引。我們隨意取幾件蛋糕試下，質地硬硬的、口感粗鞋...每食幾口， 要飲兩啖水，先可勉強吞下! :(我十分懷疑這些真係一間4星酒店嘅出品! 當時已經冇意欲再食落去, 因為真係同沙田另一間河畔酒店質素有都揮, 十分失望! 臨走之前, 試埋食評中推介嘅豆腐花, 泰式西米糕, 同樣失望而回! 最後每人可選一杯飲品，我們揀熱咖啡，沖調都不錯，濃度適中，入口尚算香滑，這是唯一可讚嘅地方! 講真，以每人$98價錢 (留意番，要上載食物相片上酒店Facebook, 加個讚, 先可享優惠!) 下午茶有好多選擇，今次真係中晒伏，好後悔，我寧可去茶記食過豐富下午茶! 我明白, 依個世界邊有咁大隻蛤乸隨街跳呀, 下次唔好輕信人地講嘅野! 影相片不多, 因為真係冇mood影! …Read More