lsyjoyce's Profile

與友人想食個早飯，係OpenRice見到全部都係😋，好多正評，於是一日前訂枱試吓。我哋兩位中女5點半左右入座，可能時間真係太早，相信我哋係第一枱客。哥哥先招待我哋入座，繼而姐姐幫我哋落單，兩位都好有禮貌，我哋叫咗忌廉蒜香白酒煮青口拼酥香多士、蟹肉大啡菇、澳洲150天穀飼純種黑安格斯肋眼牛扒，再加一人一杯梳打。忌廉蒜香白酒煮青口拼酥香多士，果然如其他食評人所講好好味，個酥香多士外脆內軟，點汁食一百分，如果menu有淨多士+汁，相信我可以淨係食佢😅，青口大小適中，portion亦好大，我覺得三至四個人當餐前小食都好足夠。跟住嚟咗個蟹肉大啡菇，一碟兩件，再加少少沙律伴菜，都係好好食，雖然個蟹肉有加埋芝士一齊焗，但一啲都唔會膩，個姑嘅水份亦好足夠。由於我哋太多嘢講，食得好慢，食到中途哥哥好有禮貌同我哋講，我哋可以慢慢食，到差不多想上牛嘅時候，隨時可以同佢講，咁個牛就唔會凍咗。姐姐亦適時同我哋換走裝滿殼嘅兜同碟。最後上個牛，賣相好靚，除咗個牛，連D配菜（南瓜、西蘭花、唔太肯定嘅薯蓉蔬菜餅）一啲都唔會因為佢係配角就整得唔好味，連我呢個同蔬菜唔friend嘅人，都覺得好好味，我哋將所有配菜都食晒，當然個主角牛扒都相當唔錯，面層有少少脆，肉汁亦好豐富。後悔冇影相打個咭，其實餐牌上好多菜都想試，可惜我哋得兩個人，唔想眼闊肚窄，叫咗食唔晒浪費，只能夠品嘗三個菜，期待下次可以再嚟試其他嘢。我哋由下晝五點幾坐到七點幾，都係得我哋呢一台，可能由於位置唔夠顯眼，生意好似麻麻，希望只係偶意同埋越夜越好生意，呢間小店值得更多人認識（不過到時會唔會有好難搵位🤔😅）。…Read More