janelle_chan's Profile

阿媽生日，作為孝順女嘅我，特登叫埋姨媽一家齊齊食飯慶祝，於是一行12人浩浩蕩蕩嚟到呢間高級食府開餐。平時阿媽睇到電視廣告介紹呢度都會雙眼發光，今晚就同佢豪食「深海黃皮老虎斑宴」，等佢開心下啦！點解會揀呢個餐呢？因為媽子最愛食魚，影響到個家族都鍾意食，個個都皮光肉滑~不過深海魚媽子就比較少整，佢話功夫多喎，出街食梗係要食啲平時喺屋企整唔到嘅功夫菜啦，有道理！首先上枱有喜慶事一定見到佢嘅乳豬全體，皮脆肉滑，大家個胃熱好身之後，就歎返隻鮮雞螺頭燉原隻吉濱鮮鮑魚~阿爸阿媽姨媽姨丈都食到津津有味咁款，話個湯好清甜，完全飲得出係精華所在，而隻鮑魚咬落去好軟滑，成件事好夾，乜事成班長輩當正自己食家咁款~跟住就到主角──深海黃皮老虎斑出場喇！一魚三食，包括翡翠果皮油泡球、荷葉紅棗蒸斑頭腩同埋古法炆斑翅。寫明嚴選6斤以上嘅深海黃皮老虎斑，阿媽話呢種魚好名貴，翡翠果皮油泡球嘅肉紋弧形繃起，話係活魚即烹嘅效果，啖啖肉勁正，大家爭住食，好快畀我地消滅左！而荷葉紅棗蒸斑頭腩又完全係另一種食法，荷葉香氣四溢，斑頭腩面層有好多香蒽覆蓋，食落香口彈牙，份量亦唔少！至於古法炆斑翅好惹味，魚皮有D厚度，入口軟滑起膠，簡直係珍品！食完魚及脆皮龍崗雞之後，就到呢個紅酒燴牛尾，唔揀呢個可以改燒汁金菇豚肉卷~大家好公平玩表決，最後以8比4決定要牛尾。汁香濃、肉軟淋，牛尾滲出淡淡紅酒味。表哥忍唔住叫左碗白飯，話唔可以浪費D咁正既汁喎~食埋個上湯腿絲扒菜遠同蟹肉燴伊府麵，就試到呢個招牌砂鍋炒飯，阿媽勁讚，話少油得黎又有鑊氣，D飯粒粒分明，食落香口入味。呢個套餐位位包兩杯飲品，甜品同壽包都有埋，好飽、好味、好滿足！！！…Read More

公司附近新開左間泰國菜餐廳，個個同事都話好想試，今晚我同阿秘書小姐仲有位新同事好灰咁要OT，一齊走既時候我就提議不如黎呢度食啦，做得咁辛苦梗係要食返餐好少少慰勞自己既~>.<餐廳環境幾有情調，感覺relax，睇睇menu，主打BBQ同一d正宗特色泰菜，分為Smaller同Bigger，應該係份量比較細既前菜同份量大既主菜之分卦~最後我地點左4個菜式齊齊分享~前菜揀左泰式柚子沙拉($88)，酸香既柚子mix入泰式醬料，食得出有檸檬汁同魚露，仲有香菜、辣椒同蒜頭既香氣，而腰果碎就增強左口感，完全係一道小清新，好開胃~見到呢款美食上枱，大家都勁期待，講緊既係D24榴槤Pizza($66)，榴槤呢樣野係泰國特產就唔洗多講，不過鍾意食就好瘋狂，唔鍾意果班就超憎~好興幸今晚兩個飯腳都係榴槤迷，自然可以盡情食~呢度好有創意將榴槤crossover Pizza，同瀨尿蝦溝牛丸一樣有得揮，哈哈~經烤焗後榴槤味四散，攞上手立即拉絲，咬落去係半融化既榴槤肉同忌廉，極度邪惡！秘書小姐就揀左呢款泰式汁煮荷蘭新鮮藍青口($266)，佢話呢隻品種既青口特別靚，之前都係食開西式整法，好想知泰式整法會係點~事實上食落覺得肉質厚肉鮮嫩，味道鮮甜，，海水味濃，用泰式汁煮更覺酸酸辣辣，有提鮮作用。最後黎個盬燒馬友($162)，咁多肉之中女仔比較鐘意食魚肉，感覺較健康，罪惡感都少d~馬友無乜骨，可以話係啖啖肉，呢種食法好食到馬友既原汁原味，肉汁豐富，味道咸香，配特色醬汁更吊味。整體黎講食得出食材新鮮，製作誠意，好大機會會encore，但希望唔好再係因為OT而黎食啦~…Read More

之前係呢度買過三文治早餐返公司食覺得幾好味，今晚男朋友接我放工之後四圍搵野食，經過見到有個2人晚餐好似幾好，即管試下先。沙律3揀1，我地揀左雞絲粟米蛋沙律，食落好新鮮新fresh，麻醬又開胃；小食可以揀兩樣，揀左雞翼同芝士薯條，雞翼放係咀唇邊已經feel到熱辣辣，入口非常香脆，雞肉又嫩又多汁，芝士薯條都係好邪惡，極脆口。主菜可以揀一款三文治同一款意粉，三文治揀左韓星天使，不過太急住食唔記得影相>.<，意粉就係白汁煙肉蘑菇意粉同白汁洋葱蜆肉意粉之爭，最後要猜包剪揼決定，白汁煙肉蘑菇意粉勝！意粉幾彈牙，最鐘意個汁調得好好味，配料又夠多，yummy!!!仲有甜品同飲品，呢個心太軟伴鮮果雪糕都相當有水準，心太軟入面d朱古力呈半溶半暖狀態，好sweet，雪糕好清新透心涼，成個口都refresh晒!食完成個餐好full，$198，價錢好合理~…Read More

剛剛係日本旅行完返黎，心情仍然好亢奮，所以要繼續食日本野延續果份快樂……拉麵以外，今日同朋友share左三款小食，第一款係胡麻溫室蕃茄，好適合而家呢d咁熱既天氣食，又健康，番茄已經砌成一份份，好方便食，麻醬開胃，溫室番茄味道特別清甜，成個dish感覺好清新。第二款係富山手羽，將雞翼輕輕放係咀唇邊，已經感受到果種即叫即煎既熱度，香脆外皮充滿芝麻香，入面肉嫩juicy，我食得快，所以食左三隻，哈哈哈。仲有一款係餃子，好鍾意食金黃脆底既日式煎餃，餡料主要係椰菜、豬肉同韭菜，口感特別香脆同豐富，點埋餃子汁更加好食。…Read More

明明入左韓燒店，點解會有Pizza食既？朋友話呢個係芝士泡菜煎餅，十足十薄餅一樣，同樣有好多芝士做餡，拉絲拉極都唔斷好勁！泡菜本身帶咸味，混合埋芝士就更加滋味，咬落係煙韌香口， 味道濃郁。配左杯魔法梳打特飲，齋聽個名完全唔知係乜東東，飲落又幾清新特別喎，唔會太甜，有少少酸，口感好涼快。原來入韓燒店都唔一定食韓燒既~~~~~ …Read More

做得朋友當然要啱咀型，食野喜好要差唔多，我同best fd都最鐘意食雞，所以黎呢度食左個芝士酸辣味炸雞同埋韓式粉絲雞煲。芝士酸辣味炸雞的炸漿厚度好適中，脆得黎唔會好硬，肉質都幾嫩滑，唔會炸到好乾，份量兩個人share好足夠，加上滿滿的粟米及芝士，撈埋一齊食幾有新鮮感，唔會淨食雞咁齋，不過炸雞食得多始終容易膩，旁邊的醃蘿蔔就正好平衡一下喇。食得炸雞，又點可以少得飲酒呢？輸液酒既玩法，係店員幫我地將兩支酒快速將瓶口上下交接，啲酒會隨著流向自己溝埋，好好飲，下味道豐富有層次。再黎一個韓式粉絲雞煲，類似食開的安東燉雞，一碟有齊洋蔥、馬鈴薯、紅蘿蔔、青蔥同辣椒，味道甜中帶辣，雞件嫩滑，粉絲完全吸收湯汁，灑上芝麻更香更吸引。…Read More

入到黎未諗食乜好，見到隔離枱叫左碗大良燉鮮奶加兩粒湯丸，覺得好有新鮮感，因為通常湯丸都係加係流質糖水入面架嘛，所以就跟黎試左。成碗野白雪雪好趣緻，芝麻湯丸脹卜卜好飽滿，外皮Ｑ彈，流心芝麻餡甜度適中；而燉奶就好似豆花咁滑，邊食邊聞到一陣陣奶香，美味又養顏，作為飯後甜品好滿足呢！…Read More

一行入店內見到裝潢已經先聲奪人，牆上掛左好多好靚既油畫，仲有唔少充滿藝術感既擺設，例如彩色馬匹、花鹿頭、水晶燈等等，並以木製黑色枱配sharp色梳化，設計玩味十足。食物方面唔少得招牌薄餅，Pizza Crudo既主要配料有意大利風乾火腿同芝士，睇到d火腿鋪到咁滿，ham lover必吃！餅底做得好香脆鬆軟，食材亦食得出好新鮮。另外點左Carbonara，好多本地餐廳都鐘意整到d意粉好淋，話係迎合香港人口味，而呢度既意粉偏硬兼彈牙，係比較正宗既做法，意粉同煙肉沾上濃度適中既忌廉汁後，幾滋味。…Read More

經過灣仔道，不經意留意到豎立在街角的「易拉架」，見這間名字奇怪的餐廳正在試業中，於是帶著好奇心爬上殘舊的樓梯‧‧‧‧‧‧店舖面積不小，下午兩時仍然坐滿九成食客，環顧四周的裝飾和擺設，都甚為古舊，歷史感很重。午餐選擇約有十款，都是台灣熱門美食，例如三杯雞飯、滷肉飯、豬腳飯、紅燒牛肉麵、豬腳麵線、擔仔麵等，價錢方面由$65-$75不等，飲品另加$15-$25，不設加一。其中滷肉飯套餐相當有驚喜，因為一碗滷肉飯配上一碟份量相當充足的滷水拼盤，有豬耳仔、豬腸、牛展及豆腐，滷得相當入味。牛肉麵亦是非常出色，喜歡濃味一點可以選紅燒，想清淡點亦可選清燉，牛肉的份量亦是非常多，而且很軟嫩，無骨啖啖肉，連湯及麵一起入口，十分滋味。這裡的午餐上枱時都會連同前菜一拼放在盤內，賣相精緻，置於鋪了特色枱布的餐桌上，真偽文青都一定很喜歡，還會瘋狂的拿起手機拍照放閃。…Read More

好開心喺鬧市之中又多左個貓迷聚腳\點，大家一邊傾下貓經、一邊歎下美食，坐下坐下咁就待左成個下午，好relax，最重要係見到班可愛貓咪，個心就會好甜，佢地真係好治癒呢~趁呢排天氣暖返d，所以order左個冷稻庭烏冬，重點當然係自家調配嘅鰹魚昆布汁，味道食得出好天然，濃度恰到好處，唔會太咸、亦唔會稀到好似水咁，掛左落烏冬度入口，特別清甜順滑。另外仲歎左杯凍Cappuccino，因為冇加冰，所以飲落特別「原汁原味」，香中帶濃，口感好rich。…Read More