DarrenChan's Profile

本身諗住去傳承食牛腩，去到見到打晒蛇餅即刻掉頭，之後喺女人街路過根本唔知哩間咩料，總之有位就唔諗，入去坐；裝修一般啦，不過環境都算舒服，總算唔係一百呎要擺廿張枱嗰種先啦。價錢正常啦，濃湯有驚喜嘅，比想像中好，夠濃味夠熱；麵冇梘水味，不過偏少，基本上我四五啖就食晒，可能我口大啦吓；叉燒係薄叉燒，又淋又滑；我個人嚟講係欣賞，不過話係好出色又未至於，喺香港食到嘅抽麵嚟講佢真係算合格以上，我個人口味嚟講係起碼會可以再試。…Read More

話說同老婆諗住食自助餐，見將軍澳有咪試吓囉，上Kxxxk睇見五舊幾一位，酒店嚟，點都唔會太差掛？就佢啦！一入到先講環境，裝修係冇忽似酒店，基本上佢只係爭部電視播埋賽馬直擊嘅話就直頭茶餐廳嚟咁！啲枱櫈擺得密到差唔多行唔到！嘢食種類少，唔點refill，味道茶餐廳級數，生蠔係生於第三世界級別咁細，全場唯一一樣好食少少嘅係kebab！服務態度仲勁！係一班著廚師衫嘅阿姐以對乞衣派飯嘅級別！最後我想講，食乜都好！睇open rice評語先好決定！因為我俾完錢先上嚟睇，一睇完已經知瀨嘢！…Read More

見你客多，生意好，我都覺得高興；不過大哥個場食唔落咁多圍，不如真係唔好夾硬嚟，去燒嘢食燒到衰過去咗大排檔咁，平均每人只得番1米乘1米嘅活動空間，淨係咁我已經怕咗你，冇下次！嘢食仲勁，可以連條腸仔都咸過人，肉就仲過癮，扒類一包包，打開攞出嚟係肉條嚟（豬扒雞扒都係！）又算，燒烤包係咁㗎嘛！海鮮冇一樣嘢唔係霉嘅！又算！BBQ場係咁！地點吊腳，不過唔好攪錯，人哋賣靚景，係！景的確係好靚好靚，有靚景又設備齊全係咪難得先？不過我竟然可以被安排喺個位係一天黑就連自己燒緊乜都睇唔見嘅位！總結：我錯！我唔應該大時大節喺大哥你最多客嘅日子嚟幫襯，真係唔敢再嚟。…Read More

路過哩條巷，於是入去試試；一個二人set，有烤雞有pizza，咪叫嚟試吓囉，仲要加夠廿蚊upgrade做「香腸大戰」，一擺上枱，嘩！同餐牌張相落差好大下喎，pizza面嘅腸仔完全冇烤焗過嘅，話係烚腸都唔覺過分，批底勉強我用「暖」嚟形容，其中一忽仲要係冰凍嘅添，佢哋用咩方法整pizza我唔敢猜想，總之我就唔會再試pizza。還好佢烤雞的確係唔差嘅，不過哩個二人set埋單三舊幾，總結係令人失望，個pizza太太太差！…Read More

今次第二次同太太嚟食，上次食湯底火鍋，今次人生第一次食粥底火鍋，食餐嗰隻，一上枱，海鮮睇落好普通，都係蝦呀、蟹呀、魚呀咁，結果食落一D都唔普通，蝦唔算大隻，但隻隻都好鮮味，蟹又唔算大隻，不過多膏，正！開頭成個餐嘅嘢嚟齊之後仲會懷疑唔夠食，想加嘢，結果都係睇定少少，食一半左右先叫啦，最後我一食個響鈴就即刻決定唔洗加嘢，一舊響鈴大得嚟又厚又脆，食半舊已經好充實。最後清晒火鍋嘢之後職員就幫我哋攪埋個粥膽，想個粥食得好，唯一最麻煩就係食緊火鍋料嘅時候要不停攪攪攪攪攪攪攪..........雖然個粥好好食，可惜我哋已經飽到頂上心口，食唔到幾多。但喺哩個時候仲上個甜品，總之我喺哩度勸大家，食得哩個餐，唔好亂加火鍋料，真係未必食得晒。總結：職員態度極好，火鍋料睇落普通，但食落絕對唔係普通嘢，唔係任食火鍋hea大家嗰種級數。絕對值得一試！P.S. 掛住食，冇影相，Sor....BTW...環境其實好好，衛生亦一流，俾少一粒星佢原因係唔知點解食食下好熱.....…Read More

今日路過見有位，就坐底試下，結果食到一肚氣，先唔講食物，我相信食開哩間嘅都知咩料，大部分人都叫外賣，因為原來堂食喺哩間嘢嚟講係次等分流，全部出單都做外賣先，結果等佢出晒外賣，我碟飯等足足半粒鐘先出，全程係俾幾隻烏蠅嬲住咁等，冇錯！喺冬天都有烏蠅嬲！不過好食嘅就當然唔怕等啦。一碟魚餅炸札肉飯，係食個豉油味嘅啫，炸札肉係得油「益」味，魚餅得香茅味，你要我等半粒鐘就係食咁嘅嘢？！唔係掛？我真係勸各位抱住試好嘢嘅心態嘅朋友，有等待同食垃圾嘅決心先好嚟試！…Read More

從來甚少食放題，亦可能我應該抱住「商品說明條例中嘅合理期望」嘅心態去試哩間嘢。老實講，由樓下派傳單到樓上所有侍應都好有禮貌。但我提提大家，你要抱有合理期望嘅心態去食嘢，由刺身、壽司、炸嘢、燒嘢、湯、飯、麵....所有嘢都係凍嘅！而最新奇嘅係....佢攞上枱時係有煙出，但食落時都係凍架！神奇......而當中最出色嘅，可以算係「韓式牛肋條」，不食落竟然係鹵水牛仔骨嚟！松葉蟹棒？！我心諗，兩舊水一位有哩d嘢食？一上枱，嘩！大佬呀！樓下街市28蚊一pack嘅蟹柳嚟嘅？！....唔緊要！香港人記得！咩叫合理期望....同時我希望大家睇完哩幾隻字之後...都要抱住合理期望先好嚟食嘢！…Read More