即溶咖哩's Profile

這是個人飯堂之一，食物水準不錯，麵舖格局但不會很嘈很雜（偶然會細聲播吓宗教歌咁啦）。我喜歡佢不落味精（我對此很敏感），又唔會狂用生粉芡（是超級垃圾食物，很多識食嘅人會敬而遠之），我自己也煮飯所以吃得出材料也算新鮮，在家吃較濃所以出街吃清淡一點比較平衡。…Read More

點解有人食到咪精有人食唔到？唔通味精都有分時段？我食果個係鹹雞加鯪魚球粥，雞同魚球都好滑好味，但粥就好重味精。我係屋企有時會食得好鹹，所以我絕對能夠分別鹽同味精。食完行一陣後我竟然一口氣飲左成支中型水。43蚊味精粥，一定無回頭!…Read More

朋友話新裝修，我就第一次來晚餐。環境氣氛不錯，但上菜時意粉、pizza和酥皮湯均只是微溫，全沒有新鮮出爐的興奮。唔知乜乜雞翼是炸的，竟然是全凍而且連油都開始浦頭，一定是放了很久！個酥皮湯要加錢但酥皮不酥不香不脆，口感和味道全不像樣，酥皮遇著湯又變成吃麵筋的口味，不知材料是否用裝修時的剩餘物料做的＞＿＜…Read More

去完肥彭簽名會，順道來食個T。呢道都食過幾次，無味精又保持到水準，雖然最平都要22蚊，但算是落足料同環境舒適。提醒大家一隻辣椒o既菜式都幾辣（都有加少少花椒），試過見過有對年輕男女叫左兩個麵辣到食唔到，要待應收回去廚房加湯。我就覺得辣得剛好，食多幾次習慣左可能要加辣添！D湯飲晒都唔覺口喝，應該如實是無味精的。另外飲開個檸檬普洱茶都幾好，今次轉一轉試左個糯米香茶就清清地更加好飲。…Read More

第一次來崇潔街搵食，之前有網評話呢道喇沙出名，入到店內看菜牌竟然發現沒有喇沙（當時已經懷疑，「摻摻」就是指喇沙，但小弟一向隨緣，沒有問清楚）。結果最後點了乾咖哩撈麵和荔枝冰。乾咖哩撈麵：乾咖哩香口惹味，好有口感，油麵都幾爽口。配菜主要是芽菜、蛋和蝦仔，蛋ok，但蝦仔肉梅又癡殼，顯然不新鮮，失色不少。碗底的醬油有很多咖哩油，所以食到尾段會成口油，失了乾咖哩的特色。如果乾咖哩係即炒，再減少醬油的份量，及採用新鮮蝦相信會更加好味。荔枝冰：糖水加兩粒大荔枝，以十蚊一杯來計，如果有三四粒荔枝就好喇！整體來說ok，有網友話呢度喇沙抵食過廚師好多，小弟未試過不敢下評，擇日再試。但如果材料好似D蝦咁細隻之餘又唔多新鮮，咁平貴就見仁見智，任君選擇。不過呢度坐位環境都好過廚師好多，當然也是考慮因素之一。…Read More

試過兩次呢度即茄牛麵，和佐敦店比較呢度油太多。雖然比佐敦貴1蚊，但試過食食下有個啊姐熄左中間部冷氣，攪到我食完成頭汗，好心佢就裝番塊玻璃門啦。奉勸大家唔好以為裝修靚D就乾淨D，可能因為黑色桌面的原固，會見到好多油漬反光。呢度會多杯茶比你洗下筷子咁啦。可能因為當中有幾個國內男子打理，衛生做得馬虎，試過一次食完肚疴T-T"…Read More

早左過來，竟然比我發現呢度，唸住食番個鐵板烤雞腿飽餐，點知擺好晒發現個薯條變左舊款！原來個「薯皇」已經無做喇，又唔早響，比廿幾蚊都係為左食你個薯皇，你比番D舊款薯條我，就理應減幾蚊啦，認真係黑店！話明薯皇就緊係好味D，貴D都應該。個人覺得比起薯條，薯皇厚身有質感，少少焦夠香脆，無咁鹹，亦因為夠厚所以唔會咁油。早知去KFC食格格脆薯塊好過，人地而家upgrade緊個image，服務雖然有待改善，但新舖加裝了洗手設施，乾淨了很多。…Read More

呢間野平時小貓三四隻，服務又唔好，恃在有歷史同樓上個景吊命，食過幾次，聽聞舊老板仙遊後品質已大不如前（例如超牌焗骨飯無咁香，唔夠熱濕得滯）。但近來因電視介紹過竟然水鬼升城隍，今日行過驚聞罕見場面﹣排隊入座！講老式茶座呢度服務就比較差，服待唔周到，伙記好似啞剩係識企係到望住人等人點菜，好似欠o左佢咁，「歡迎」、「隨便坐」、「謝謝」呢d野從來未聽過，無客都好似唔休做咁。想到突然間多咁多客，真好擔心服務同食物質素（相信老街坊都有同感）。如欲一試者可等眾人熱情冷卻後再試。…Read More

（深呼吸...... 小弟先要冷靜，免得在食評中發火大罵而有欠中肯。）只怪自己善忘，又再被此食店門外的圖片吸引。成廿幾至四十蚊既撈蒙同湯粉，貴不特止，更貨不對辦，以前試過，今次以為醒目，叫個同樣貴過人地20蚊茶餐減少損失，點知換來一個食唔落既餐，反而損失更大！陷阱一：魔法凍奶茶特別版超大冰粒有成半杯咁多，要快飲，如果唔係會變水！陷阱二：神奇香茅雞翼撈蒙上桌時竟變成湯粉，小弟沒所謂無出聲。但湯既味精味猛然撲鼻而來，已經很久沒有聞到這種味道，當時想不起來喝了兩口，立即口渴（沒錯，是立即），全無香料，是純味精水的味道！香茅究竟去了哪裡？難道她們以為食客連放在上面的是青蔥或香茅也分不出來嗎？至於陳釀雞翼絕對是值得表揚：冷藏雞翼，預先整熟再炸，再放涼很久先吸到汗水然後再風乾，再放湯的滋味會如何大家不妨想像一下（以上步驟可能會重複兩三遍）。皮un肉梅但又咬不離骨，說可能是來自黑市的死雞爛雞也不過份！陷阱三（別注版）：有位亞姑小弟兩次去都見佢係度吹水，同樓面幾位亞姐好熟，熟到竟然可以要豬扒飯時大聲指明要最靚個兩件豬扒，熟到竟然可以衝口而出：「喂，你d豬扒唔掂，已經係最靚o架o拿？」。有位亞姑竟然好意思答肯定是最靚果兩件。熟人說的真心話，竟然是小弟的心裡話，真有意思！一流材料弄得不好吃可以說是技不如人，連垃圾也可以整得好吃可說是技藝「超凡」；但用垃圾做垃圾又是怎樣說法呢？（既然不能給負分，唯有全部項目給最低分！）…Read More

這裡o既手攪麵仍然有水準。茄牛麵+ 菜都只係15蚊，今時今日邊度搵呀？但前幾天心血來潮試下個刀削麵，一字謂之曰「削」，夾三條斷兩條，全無手起刀落果種刃勁，當然已知是機器切成，但河粉都無咁淋啦。第二樣係入口隱約有種化學氣味，似漿糊又似漂白水，連個湯都蓋唔住，都係手攪麵正常D。…Read More

其實佐敦平民化既上海小食唔多，呢間都算幾多人幫襯。昨天來呢度試無鍚排骨麵，味道算不錯，不過排骨太瘦（瘦肉太多），雖不至於癡牙但亦不遠矣。另外份量唔夠，用薑片同菜托底攪到大碟D，只不過得兩件大小小既排骨。肉地唔得反而骨感一流（唔係講街口果D），軟骨部份口感爽脆不會太軟。麵和湯完全吃不到同唯一麵家有甚麼分別。另外是這兒提供既桂林辣椒醬好似唔多辣，落左5匙都唔多出汗，不過就咸到抽筋！22蚊碗麵，豆漿仲要加6蚊就好貴；人地「唯一」下午茶時段都全包啦，裝修又好過你，地點又旺過你......…Read More

話說小弟上次來到憧正星期四食閉門羹，今次真係好彩有開門喎。嘩，貼滿好多網評，都好揚je！心裡擔心會名不乎實，不過原來又話唔做，膽粗粗都要一試啦。入到有客剛走，嘩，專人服待呀！望下個厨房都好乾淨，厨師都幾型格，有少少藝術家feel（同行？）。叫了：羊扒喇沙同銀菊露羊扒即煎，肥膏好香口，個喇沙好靚，麵、米線、羊扒、葉呀香料呀一層層疊上面，好大碗好full既感覺。最精係個汁，慢慢辣起又不嗆候，吃完所有材料竟然一口氣飲剩五份一，仲想拿番屋企撈飯。通常食星馬泰菜D汁飲完會好口渴，呢度就唔會。銀菊露：出乎意料地好，與喇沙汁有chemistry，口感好特別。與涼茶舖飲既唔同，呢度會傑傑地，好有菊味。食時聽到個厨師切野拍拍聲，落刀沉實同好有信心，一時攪下呢樣，一時攪下個樣，又訂喇沙葉又訂銀菊，也不假手於人，煮野夠專注，熟練又不流於表面，唔錯。本來有感冒未清，食完竟然暢順番晒，擇日再試。原來個厨師都識講笑。希望厨師兄整好隻腳會返來啦。…Read More

本來早上清潔樓面是好事，也見裡面的待應很落力，但我就見過裡面有人把所有地毯直接擱在數張食桌上（為了方便拖地），雖然舖面很細可理解，但地毯在我心目中係極奇糟之物（就算是全新再經10萬次消毒的也是）>_<"由於是落地玻璃，本來想拍低做個證明，但待應也看到我而果度又無角落位....其實以上係今年年初見到，但係真係好可怕，震憾到而家都記得（因為從未想過可以咁做），見到有人寫開就寫埋一份。…Read More

僅試飯類，無乜風味，材料一般（又少，又無獲氣）。奶茶竟然夠膽落左糖先，仲要係超甜，如糖水無茶味，都唔知係咪有人飲過。整體似亳無經驗的家庭作業，欠缺專業水平。…Read More

小弟遠道從沙田走來，車錢都好金。到門口時發現落了閘，以為午市後小休準備晚市，點知望真原來佢會於每隔一周的星期四休息。頂！買六合彩又唔見我中！從北角走回沙田，車錢都好金....…Read More