lazymochi's Profile

經過旺角一帶，就決定去試下朋友推介嘅大勝丼! 雖然係平價刺身丼飯，但見到OpenRice都好多人話好食，令我對佢嘅信心同期待都多咗。一行人一共叫咗三個自選丼飯。點餐紙有大約三十款食材可以揀，五花八門全部都好似好吸引咁！選擇困難症嘅我地都揀咗5分鐘😂我自己就揀咗三文魚腩+油甘魚腩+碎蔥吞拿魚腩。滿滿嘅厚切魚生鋪係飯面真係好過癮。第一啖就試吓單食魚生，口入面滿滿魚嘅油香味，加埋厚切魚生嘅結實口感，真係好正好好味！完全冇諗過咁親民嘅價錢會有呢個質素。吞拿魚腩都好鮮甜，加埋白醋飯同豉油一齊食真係錦上添花。最後實在係忍唔住加多一客三文魚腩刺身，個魚香味真係令人回味無窮。大力推薦！…Read More

打開個餐牌就俾佢嘅卷物吸引咗，最後決定叫兩個卷物+自家製玉子。首先嚟嘅係自家製玉子，味道適中，口感彈牙，上面嗰醬唔會太多，整體表現不過不失。之後就嚟咗我哋叫嘅兩個卷物: 紅粉佳人同火焰紅龍卷! 先講紅粉佳人，上面嘅吞拿魚蓉同粉紅色嘅外皮放埋一齊好有少女感😂 餐牌上面寫係辣味吞拿魚、辣味三文魚、蟹柳同牛油果組成。但就食唔出有辣味，淨係食到吞拿魚腩嘅味道。不過份量十足、食材都好新鮮，當佢係普通吞拿魚腩卷物都好有滿足感。之後就食火焰紅龍卷，呢個卷物真係有驚喜！炸蝦口感酥脆，上面清新嘅吞拿魚中和咗炸蝦加芝士嘅邪惡感，一口接一口停唔到! 下次再嚟都會試有炸蝦嘅卷物！…Read More