yummykitty's Profile

嚟新都城行下街，原來有間台式餐廳，個名幾特別，門口又有台式飲品賣，就入去坐低試試.....入面嘅環境都好台灣feel，仲有啲書嘅擺設....我估餐廳都諗客人都會叫飲品，所以枱上冇放飲用水，而係餐廳中央位置放咗個自助水吧畀客人自己酙水。咁我吔嚟到台式餐廳都當然會order飲品啦～其中一杯就係芝士奶蓋阿華田，奶茶類就飲得多，阿華田嘅比較少有，所以有嘅話我都會試。講番個味道，真係好夠味，絕對唔同茶記常飲到咁淡，到加埋芝士奶蓋，成杯飲品令人好滿足。另一杯就相對清新啲~ 夏日水漾果茶，水果嘅份量啱啱好，亦係一杯好足料嘅飲品。朋友未食lunch，就叫咗個滷水豬手麵，仲可以揀紅燒湯底，豬手嘅份量好足料，每隻都大大隻，食完真係一定夠飽。另外咁啱下午2點有下午茶 (星期一至五先有㗎)，試咗呢個台式芝士蛋餅，有蛋、芝士同火腿做餡料，暖暖地好味，仲配埋蕃薯條 (地瓜薯條)，惹味得嚟又唔會太heavy，正!所以套餐都可以加錢配小食，$8一款/$15兩款，我吔加咗滷水豆腐、涼拌黑醋茄子、蘿蔔牛肉湯、滷水蛋，四款中茄子同蘿蔔牛肉湯最好味，滷水豆腐就好似硬咗啲。另外再加咗個單點嘅古早味滷水雞翼，咩係古早味我吔就唔識喇，但滷水汁好夠味同入味，下次可以試埋桂花雞翼。…Read More

草莓孆姬 - 個名同實物都好靚，味道介乎純草莓沙冰同草莓奶昔間，fresh得嚟又夠滿足，男女都啱飲。雲頂咖啡 - 看似普通嘅鮮奶咖啡，但飲落真係有啲"雲頂"嘅感覺，咖啡同奶嘅比例啱啱好。三小碟 - 雖然唔係好似台式小吃，但都幾特別，有炸雞，燻蛋，櫻花蝦伴秋葵，每款小小嘅份量啱哂淺嚐，可以試多啲唔同小食。三款之中最正係燻蛋，好夠煙燻味，配埋墊係下面嘅白蘿蔔，口味好夾。沙嗲玉藕帶骨牛小排 - 看似京蔥炒牛肉，但牛肉比較厚身同有口感，再加咗啲連藕，配埋沙嗲醬完全係新奇又好味嘅配搭。紅燒牛肉麵 - 台灣菜中常見嘅菜式，呢度當然都會有，質素可以話不過不失啦，湯味夠濃，牛肉亦好夠淋，再有少許牛筋，食完真係好滿足，如果冬天食會更正。最後到今晚嘅主角.....抹茶紅豆起司奶蓋戚風蛋糕 - 茶本近幾個月新出嘅甜品，一直好好奇係咩，又怕會好大件好滯，原來都真係要試過先知，因為完全估唔到咁好味。模仿奶蓋茶咁係戚風蛋糕上加上奶蓋醬，再加咗啲杏仁片增加口感，因為戚風蛋糕好鬆軟同比較淡，吸哂啲甜甜的奶蓋醬，真係啖啖滋味。另外係蛋糕上仲有一個雪糕筒，令蛋糕無論係外貎同味道方面都更吸引，值得一試再試。…Read More

1881內嘅高級餐廳有唔少，但想試特別啲嘅，上網搵到呢間想試下，好似好有藝術feel咁，嚟到現場又真係喎~首先齋睇枱上嘅餐具已經好正，每一件餐具都有特別設計，連水杯上都有圖案。就連刀叉嘅手柄位都印有餐廳名!而餐牌都加咗幅藝術畫，加埋一啲相關資料。order完就先嚟咗餐包，都係擺得好有藝術咁，連墊住嗰張紙都係藝術圖案。麵包有三款，比較plain啲嘅餐包、提子合桃包、種籽包，三款都好軟棉棉，好少會食哂啲餐包嘅我吔都全部食哂。我吔order咗嘅係set dinner ~ The Harvest首先係appetizer醃製油甘魚，其實就係油甘魚刺身，好鮮味，配埋柚子汁嘅爆爆珠和血橙醬，仲有少許沙律菜，完全係開胃清新之選，好啱炎熱嘅夏天。跟住就到餐湯Lobster Bisque，上菜時先係一隻香脆嘅龍蝦肉意大利雲吞和青豆，然後店員會倒入好濃郁嘅龍蝦湯，龍蝦湯好明顯係真材實料，濃到好似餸汁咁，超正!!到主菜喇，其中一款嘅係以豬梅頭肉做主角，西餐嚟講真係比較少見，煮得好淋，同青蔥萄葡酒汁好夾，仲有少許芹菜蓉令梅頭肉嘅味道更突出。另一個主菜係鱸魚，看似比較普通，但重點在於伴菜，首先魚嘅上面係墨汁脆片，好精緻，魚下面就墊咗啲甘筍同本菇，仲有好鮮味嘅魚湯浸住 食完哂仲可以飲埋啲湯，唯一美中不足嘅係鱸魚煎得比較燶。最後係甜品，可以話係全個set最特別嘅，雪芭浸係少許士多啤梨醬上，再加埋羅勒啫喱同香醋珍珠，仲有士多啤梨片，好fresh~~~讚!!餐茶方面可以揀餐牌上嘅指定咖啡/茶，茶嘅選擇比較特別，我吔就揀咗Chocolate Mint Tea 同埋waiter推界嘅 Blueberry Kiss，可以話係一濃一淡，前者係朱古力配上紅茶，後者係藍莓配上南非茶。仲根據所揀嘅茶分別提供埋奶同糖漿，好有心思。茶具亦都係Van Gough嘅design，就連用嚟計焗茶時間嘅漏斗都有Van Gough 嘅字眼。拎起茶杯仲見到碟上都有"Van Gough"。真係好靚!!離開時發現剛才用嘅茶具可以係近門口嘅商店部分買到，仲有唔同款可以揀。…Read More

位於現崇山商場樓下嘅一間西餐廳，原來內部裝修都唔錯，算係約會/聚會嘅好地方。見drink menu上嘅飲品幾特別，除咗一啲special drinks同milkshakes外，有個Rocher Chocolate Drinks情迷金莎系列，鐘意食tiramisu 嘅我就揀咗Bubble Tiramisu，果然好似tiramisu，咖啡味唔會好濃，如果加埋tiramisu 嘅話口感就更正喇~當諗緊另一杯飲咩好，餐廳經理就提議我吔試下佢吔呢日嘅"Surprise"，佢每日都會配合當日吧天氣或者其他因素調一款唔同嘅特飲，但唔會話畀客人知係咩，想畀客人一個驚喜(surprise)，調完拎過嚟時先會介紹用咗咩材料。呢晚嘅surprise就用咗比較酸同開胃嘅材料 (包括青檸....) 調咗杯酸酸甜甜嘅特飲，適合番近排炎熱嘅天氣。真係又靚又特別又好飲。先叫咗個set dinner，配上是日湯，我吔就加咗$38轉龍蝦濃湯，以呢個價錢嚟講可以話係正常，配埋香脆嘅麵包條，唔錯~唔係話高級餐廳，餐具當然唔係話好精美，但都有濕紙巾供應，對客人都幾細心。除咗餐湯仲有香煎芝麻吞拿魚配芒果沙沙，配埋啲沙律菜，細細碟夠精神，如果吞拿魚煎耐啲就應該會更好味。set dinner嘅主菜揀咗 "香煎美國下肩舺翼板牛扒配青胡椒汁"，第一次見識下肩舺翼板，比一般牛扒少筋同肥膏，可以話係健康同口感更好之選。遺憾嘅係牛扒係上碟時已經砌好，鎖唔到肉汁之餘仲令肉汁流哂出嚟，即刻令呢道菜扣咗好多分。我吔另加咗個黑松露炒什菌嘅配菜，出奇地order完好快就有得食，應該唔似即煮而係將預先整好嘅加熱，加上太多嘅蒜味蓋過咗黑松露味，對呢個配菜有點失望。另外散外咗一個主菜，本來想試特別啲嘅"未來漢堡"，可惜呢晚賣哂，轉試Portabello 嘅，唔可以話有驚喜，但就真係好味，厚厚嘅Portabello令整個漢堡好有口感，仲有烘過嘅麵包，好有滿足感，仲有伴碟嘅粗薯條都值得讚。…Read More

知道諾士彿臺出名飲野傾計，原來weekend呢度都有brunch供應，可能近排少咗人嚟尖沙咀，呢個周六嚟都唔太多人。都其他分店好似，室內好多豬嘅佈置。Bar台上仲有一大隻豬裝飾。逢周末及公眾假期就有一系列嘅早午餐供應，每個餐配咖啡或茶。另外都有A La Carte揀。我吔兩個人就分別揀咗一個brunch和一個a la carte喇。煙三文魚牛油果水波蛋配多士 (brunch) - 鐘意食Egg Benedict (呢度都有得揀) 嘅應該都會鐘意呢個，分別在於英式鬆餅轉咗多士、冇咗荷蘭醬清新啲、多咗牛油果，加埋伴碟嘅沙律菜，啱哂比較細食嘅女仔。至於全碟最重要同最有難度嘅水波蛋都冇令人失望，蛋係半熟嘅，咬開時要一口吸住啲流心蛋黃先唔怕流哂出嚟，有水準!Brunch另加$28有Soup of the Day，呢日係蘑菇忌廉湯，味道好夠濃郁外，仲好夠份量，似係平時正價$50以上嘅size。以跟餐嚟講都可以話夠兩個人飲。另一個就揀咗mushroom risotto，好似比較common嘅菜式，但有咁多什菌嘅就真係比較少見，蘑菇同冬菇都有，加上冇咁creamy，食落唔怕太滯。份量方面亦好夠，好啱愛食飯嘅男士們。Brunch本身包飲品，但我吔見餐牌上嘅飲品好吸引，都忍唔住叫嚟試下。Blueberry Cheesecake Shake - 雖然係cheesecake味，又可以唔要cream，加埋新鮮藍梅，好味得嚟又唔會太邪惡。另一杯都揀咗Blueberry.....Blueberry Blast - cinnamon+orange juice+ginger ale，特別得嚟亦真係好fresh，啱哂炎熱嘅夏天。…Read More

喺黃埔新天地行完街，搵個地方坐下歎個下午茶，想坐得舒服又特別啲嘅選擇唔多，Greyhound可以話係最佳選擇，平日關係人唔多，又有梳化位，仲有下午茶餐。下午茶餐$58 起，包指定飲品一杯，我吔每人叫咗一個餐，配泰式凍奶茶，詢問之下原來泰式奶茶比常見嘅港式奶茶甜，於是我吔就揀咗一杯正常一杯少甜，果然，正常嘅真係好甜，叫少甜好飲好多。另外，個杯都比較特別，有啲似泰國大牌檔用嘅飲品杯，舒服嘅環境配上泰國風味，讚！兩個下午茶餐我吔分別揀咗一個麵類一個甜品，一次過試哂佢嘅主食同甜品。泰式豬肉丸湯河 - 看似好普通嘅湯河，比預期中足料，以$78嚟講真係抵食，有啲似手造嘅肉丸配上粗河粉，惹味得嚟又唔會太膩。更特別係配上四款調味料，紅色同橙色兩款係辣嘅，紅色係比較常見嘅辣椒碎，橙色嘅就好特別，自家制嘅熱帶水果汁加上辣椒，真係清新得嚟帶點辣，好開胃。而另外兩款調味就係粗鹽和魚露。甜品方面當然要試佢吔嘅招牌椰子千層蛋糕，又係比預期正，薄薄嘅pancake皮夾著忌廉同椰子肉，椰子肉嘅份量比預期多，唔會只係啖啖忌廉，令每啖都好香椰子味，$58一個餐嚟講確實好味。…Read More

食完另一分店嘅鹹豬餐廳覺得唔錯，今晚嚟到鯉景灣又想幫襯下......唔單止食物以豬為主打，連餐碟同餐巾都印咗佢嘅Logo，望望下原來枱上嘅盆栽裝飾都有，真係好有心思。雖然我吔唔飲得酒精飲品，但望落個酒吧枱好似都係個適合飲酒傾計嘅好地方。更特別係....酒吧旁嘅洗手間，原來門上都印有豬仔圖案表示係男/女洗手間。Soup of the day ~ 好濃郁嘅蕃茄湯，讚!!先來個招牌燒雞胸沙律，以為呢度只出名食豬肉，原來雞肉都唔遜色，一般雞胸肉都會好"鞋"同冇味，呢個沙律上嘅雞胸肉全完係比預期中"淋"同滑，雞蛋亦係糖心蛋，比餐牌上寫嘅烚蛋更出色。我另加$58配咗隻Scotch Egg，係烚蛋加上豬肉外層再炸，雖然$58有啲貴，但試過後係值得嘅，比得上我之前係英國食嘅Scotch Egg，蛋本身唔會太熟，令加咗肉都唔會太滯。整個沙律清新得嚟又有豐富蛋白質，正!小食我吔揀咗Crispy Chicken Wings，好夠脆，好夠辣，完全係惹味之選，但真係要食得辣嘅先好揀喇~主菜當然要試下呢度最出名嘅慢煮脆皮豬腩，用精緻嘅焗盆裝住，配上薯仔沙律、烤甘筍、豆角，仲有香辣醋汁，中和一下豬腩肉嘅油膩。唔好睇少呢件豬腩肉，最頂層係好脆嘅豬皮，全件都真係好夠肥美，一層脂肪一層肉，啱哂愛肉之人，但對於女仔嚟講就可能會太油膩喇。…Read More

唐記包點主打點心、蒸包、蒸飯.....另仲有啲大眾化嘅客飯，每日亦有款特價飯....可以話滿足到鐘意去茶樓同茶餐廳午餐嘅人!今日我吔一家三口就簡簡單單每人買個飯當午餐，可以話係方便之餘仲好好味。雞蛋牛肉飯 - 實物似係煎蛋配肉餅飯，煎蛋係全熟蛋，簡單得嚟又唔馬夫喎。滷蛋滷肉飯 - 好夠味，仲有一整隻滷蛋 (常見嘅通常只有半隻)，只係覺得啲滷肉有點太油膩。咖喱雞飯 - 睇落好似只係好細份，原來都有唔少雞肉，咖哩汁亦好夠濃味，真係估唔到做開蒸飯嘅唐記都有咁好味嘅咖喱飯。…Read More

知道D2 Place又開番荔園餐廳，充滿住童年回憶，就好有期望地趁佢啱啱開就嚟朝下聖.....門口靚之餘，連等位嘅飛仔都好有特色....成間餐廳分咗民園麵家同賣點心嘅流金歲月兩邊，下午茶關係，我吔就只叫咗一杯凍柚子蜜同一客拼盤 - 荔園動物反斗城......餐具都有啲特色，每位有一個玄米茶茶包，自己再熱水沖泡。落完單等咗一陣.....嚟咗杯柚子蜜，但我吔叫嘅係凍，嚟到嘅係熱，即刻換啦。而更甚嘅係......等咗半個鐘都未見拼盤到，一問之下先知我吔叫嘅拼盤已賣哂，但一直完全冇人話我吔知，完全係白等咗至少半個鐘，如果我吔冇問就可能坐到晚市都冇得食!!!!仲要原來過咗4點半係冇得再order點心，要到晚市6點先再有供應，即係想改叫其他點心都冇!!!!我吔想問個究竟，但店員們一句話冇就冇。好多人嚟都係想食點心，但好多都係入座後先知過咗4點半冇點心供應，好多人都白行一趟。…Read More

黃大仙冇乜高級餐廳，但老牌小店就真係唔少，呢間可以話係最出名之一，雖然已經係黃埔開咗分店，但呢間老店依然唔少人幫襯，仲依然用比較舊嘅木枱同圓櫈，好有風味。最出名嘅當然係擔擔麵，有傳統版同改良版(即係多咗啲肉碎)，我吔當然試番傳統版先啦，個湯好夠味，好彩叫咗少辣，否則對於我吔嚟講會太辣喇。麵質真係上海風味，淋淋的，而唔係某啲菜館會用上嘅北京拉麵。本來想食沙窩雲吞雞，可惜可能太夜，已經賣哂，下次可能訂定好啲，我吔就唯有揀沙窩津白，又比想像中豐富喎，除咗津白外，仲有幾件豬肉丸、火腿、雞肉、豬肚、粉絲.....都真係食呢個窩都飽幾成，湯本身又唔會好重味精，真係又暖又飽。呢度都有唔少餃子同包類嘅小食，抄手都有幾款，我吔都係先試最常見嘅紅油抄手先，首先唔會好似某啲菜館咁完全唔夠味，而係好夠辣之餘仲加咗啲麻醬，更加香口，每隻都可以沾滿“紅油”汁，如果啲雲吞皮淋啲同滑啲就更正喇~…Read More

經過附近想食點心，又唔想去啲大型連鎖店，openrice搵到呢間好似幾特別，嚟到又唔太多人，那些年碗仔翅 - 好懷舊feel，好似街頭小吃，味道唔錯但就唔太抵食喇~椒鹽鮮鮑魚 - 呢個可以話係我覺得呢度最好味嘅，惹味之餘又保持到鮑魚嘅鮮味，鮑魚本身又唔會煮得太韌。上湯金魚餃 - 賣相好靚好特別，誇張啲去表達就似金魚喺度游水，晶瑩嘅皮包住蝦肉，湯中仲有蛋絲同菜苗，連個湯都好清甜，讚!杞子棉花雞 - 呢款點心而家真係比較少見，竟然呢間相對摩登嘅點心店會有，雖然唔係傳統嘅用籠裝住，但都有齊“棉花”同雞，亦好夠味，味道比賣相好。颱風雞包仔 - 主要因為佢個樣得意所以order嘅，嚟到係有啲裝飾甩咗，但整體嚟講個籠同包嘅樣都好特別好得意。包方面就中規中矩啦，包本身有點乾身，但雞肉餡係唔錯，唔會太油，算係比較清新嘅包點。鮑魚糯米雞 - 好足料，但唔係好夠味，而份量係比想像中大隻嘅，有雞肉同冬菇等餡料，相比下隻鮑魚如果大隻啲就更好喇。松露天鵝酥 - 實際上係松露芋角，味道唔錯，冇常見嘅芋角咁油膩，只係賣相就有啲失望。…Read More

嚟T.O.P行街，原來又多咗唔少食肆，今次行商場外圍地舖，就發現咗間專賣雞翼嘅小店....舖頭唔大，門口係落單嘅，入面拎食物，堂食就只有一張企位bar枱，同埋門口嘅長櫈，好有街頭小食店feel。我吔揀咗套餐包飲品，兩款凍飲同兩款熱飲中款揀咗Peach Tea。(雞翼比較惹味，揀凍飲係好啲嘅) 唔會好甜之餘亦有啲果肉，算唔錯。Total有8款口味，每份4隻，我吔兩個人就試咗4款.....呢度有膠手套同膠叉供應，最特別最有趣係每份雞翼上都有個牌仔“不要儀態...只要吃雞翼”，咁即係話當然用膠手套食係最滋味啦～黑松露蒜香 - 黑松露嘅味唔算好出，但就好香口好惹味，真係有別於平時餐廳/小食店食到嘅雞翼。玫瑰 - 加咗好足料嘅蜜糖，即刻帶出好香玫瑰味，旁邊仲有啲玫瑰花瓣，甜甜吔好特別。(食得太滋味，食咗一隻先記得影番相，total係有4隻嘅)鹹檸七 - 呢個真係超特別，都係有啲蜜糖加上鹹檸七，旁邊就加咗一小片鹹青檸。店員話呢份啲雞翼比較細細隻，所以畀咗5隻我吔 🙂避風塘蒜香 - 呢個係四款裏面最惹味嘅，炸辣椒加上炸蒜蓉，好夠辣，好香口。除咗好味，呢度都好環保，枱上面有個位回收紙盤，而其他垃圾就可另外丟棄係垃圾桶內。…Read More

餐廳名似係食美國菜嘅，但其實佢係唔同類嘅西餐都有，有burger同steak之餘亦有egg benedict。枱用咗好耐冇見嘅瓷磚仔，好特別，仲有一杯仔糖果，幾有趣，連碟都好靚。先揀咗兩個湯，龍蝦湯 & 牛肝菌湯，配上一小片蒜蓉包，只係件包有點過鹹，兩款湯都好足料好夠味。小食方面都有唔少選擇，我吔就揀咦個抵食啲嘅小食拼盤，有大同細size，細size for 二人用就啱啱好，炸雞翼、洋蔥圈、魷魚圈、蠔，薯角，每樣都唔錯。主菜揀咗兩個.....見有egg benedict都想試下，店員話原本用嘅ham賣哂，轉豬肉腸on side，另再配上沙律菜、烤蕃茄、炸薯餅。整體賣相唔錯，但豬肉腸比一般嘅淡味，烤蕃茄嘅底部亦有點過燶。講番個poached eggs，果然似美式嘅餐廳做出嚟係有啲差距，蛋黃係全熟嘅，完全冇poached egg嘅流心效果。真係有啲失望.......另一個主菜就揀番個美式啲嘅羊架，果然有質素啲，咩烤得生熟程度啱啱好，加咗啲沙律菜同薯角，好味 !…Read More

未入去食，已經知呢度係出名食釜飯啦～仲要係即叫即整嘅.....另一特別之處就係同餐廳名有關......岩鹽，連餐廳入面都放咗一大塊粉紅色嘅岩鹽。而枱上面亦有一樽岩鹽粒畀你調味。揭開餐牌第一版就見到我最鐘意嘅燒玉子，仲有少見嘅黑松露味，份量比一般嘅少咗一半，但就好足料，除咗蛋漿中加咗黑松露，玉子中間仲有啲什菌，主要係金菇同本菇，連我朋友平時唔太鐘意食燒玉子嘅都話好味，我吔最後仲要encore多一份。第二樣吸引我吔嘅就係炙燒小牛排，鐵板牛柳之類嘅就好常見，呢個特別在就係炙燒，即係生牛肉再燒下佢，基本上係比生嘅更香口，好精緻，如果份量多啲會更滿足。當然唔少得釜飯啦，我吔揀咗蒲燒鰻魚釜飯，除咗鰻魚同飯，仲有少許毛豆同菠菜，另再配有醬油(因為飯本身係冇汁嘅)，食到一半就可以加埋茶製成茶漬飯，所以有兩種食法。本身啲飯好夠香之餘，仲有飯焦，怪不得畀咗個飯“殼”。總之真係好好味!另一比較特別嘅小食..... 日式煮鮑魚，看似冇咩特別，但原來個精髓係個汁，似係用鮑魚嘅內臟煮成嘅汁，又唔會蓋過咗鮑魚嘅鮮味。最後一個.....見門外嘅推介有個茄子田樂燒，加上好鐘意食燒茄子，就一試咩係田樂燒，個樣唔錯，食落似係味噌醬加上燒茄子，而茄子亦係用上圓碌碌嘅品種，食落更有口感，茄子皮又冇燒濃，可以食埋。…Read More

行過幾次話開日本餐廳，呢日終於見到佢開咗喇，選擇都唔少，最出名好似係壽司漢堡。先試個鰻魚玉子燒，同常見嘅有啲唔同，玉子部份比較鬆，鰻魚汁滲入每蛋皮中，果然係自家製，配埋鰻魚粒，玉子同鰻魚嘅份量啱啱好，只係比預期中細份咗啲。既然出名，當然都要試下壽司漢堡，揀咗鐵板牛肉嗰款，本來諗住用手當一般burger食，原來係唔可以㗎..... 佢唔係好sticky嗰種，拎起好易散，所以其實係要用筷子當一碟飯咁食，mix埋啲配料，牛肉飯嘅另類食法，幾有gimmick !串燒都有好多選擇，本來想試拼盤，可惜賣哂，就隨意揀咗三款，雞胸軟骨+青芥末雞肉串+泡菜豚肉串，味道竹特別得嚟亦燒得唔錯，唔會太乾身。最後試埋銀鱈魚有馬煮，西京燒就食得多，用有馬煮就第一次見，原來係用肉燒汁嘅醬汁煮成，味道比西京燒濃，但又唔會遮蓋鱈魚嘅味道，值得一試!…Read More