Small Fish Fish's Profile

第一次去奧海城食飯，除咗吊腳，原來三期仲好難揾，好彩得到友善的商場客服指點，都揾到我一頭煙。泰妮五日前訂枱，食六點都要八點交枱，咁旺，而且坐得都算廹。今日由泰妮發板，米雪做老細，我坐享其成 。一坐低叫個男 waiter 比杯水我，佢望住我對眼好有誠意好肯定咁答 “好嘅”，但等極都唔見杯水:(，最後係點菜時先再叫過。羅馬生菜炸芝士條沙律：炸芝士有好濃的 blue cheese 味道，不過略咸。黑森林火腿、蘑菇、松子仁配芝麻菜脆薄餅：個餅充滿好香好新鮮的麵粉味，相對其他濃味的德國菜，呢個感覺好清新，不過要快食，耐咗會淋。我最鍾意食腸，食自助餐一定試晒所有的香腸，不過呢度D腸太咸，要食多D酸菜解吓，反而洋葱整得好甜好軟，薯仔都煮得剛好。炸豬手：皮過咗火，塊皮變得又乾又硬，D肉冇塊皮咁乾，但都唔合格，而且仲好咸。德國麵包圈：原以為又乾又硬，點知食落原來好軟的，掃走D鹽，個包甜甜地好好味道:)。…Read More

夏日炎炎唔想煮飯，走去食打冷，兩年前食過新忠記，記得D食物大大碟好抵食，今日埋單六個人＄576。我哋食咗胡椒豬肚湯、蠔仔粥、鵝片、蠔餅、炸大腸、炸蝦棗、鼓椒炒蜆、。廚房出菜快，樓面執枱仲快，唔駛一個鐘就埋單走人，出面仲有好多人等緊枱。胡椒豬肚湯，料多但唔夠酸，豬肚一D味都冇，不過湯夠甜，我哋估係味精幫手，但食飽之後冇味精上腦，只有小小口渴，D甜味係邊度嚟？蠔仔粥做得出色，唐芹落得足、仲有土魷絲、炸蒜頭，令到窩粥味道好豐富，每人可以食到兩碗，如果要挑剔就係D蠔仔大得濟，變晒蠔毑蠔公。鵝片味道普通，而且數量較少，反而鵝片蓋著的豆腐香滑有豆味，令人驚喜。蠔餅唔夠味但夠熱夠脆。炸大腸又肥又冇異味、仲有好多菠蘿，大人細路各取所好。炸蝦棗大過粒乒乓波，要趁熱食，凍咗唔好食。鼓椒炒蜆，炒得剛熟，冇咩殼肉分離的情況，但碟底D油多到可以浸死蒼蠅（如果有的話）。而家D通菜靚，食落脆卜卜，好好味。…Read More

以前好鍾意去好彩飲茶，冇論邊間都有好多嘢食，每次一班人叫到成枱嘢，覺得好開心好滿足。但西營盤的好彩，總係覺得點心選擇比較少，而且仲好耐冇轉過款添。三個人食咗七個點心同一碟星洲炒米，好似多咗D呵 。炸鮮蝦雲吞唔油，酥脆香口、醬汁酸甜適中。蘿白糕因蘿白唔係季節，唔夠清甜，但都 OK。咸水角個皮做得好，烟烟韌韌好好食 :) 、但餡料得舊肉，而且略為大咗D。芝麻煎堆仔淋咗，好失望，上次嚟食好好味㗎 :( 。覺得今日D煎、炸嘢唔太油 :) ，OK 喎。跟著蒸嘅點心嚟啦，小籠包D汁比人感覺油咗小小；燒賣同覓菜餃都係隱隱陣陣唔會有特別驚喜。星洲炒米做得唔錯，香辣惹味，亞仔食完仲讚辣得嚟好好味，不過D餸就多咗D，我哋想米粉多D 。呢度已經唔係好夠伙記，做緊嘢嘅就成日時運高，明明見到但原來都睇唔到D客，經理級的職員反應就好好多，但咪做死佢哋囉。…Read More

高街大部份餐廰 set lunch 都係 ＄98 一位，只不過組合有D唔同，Jaspa's 嘅 set lunch 有三個 courses: 湯或沙律（只可攞一次）、主菜、甜品。好鍾意呢度的沙律吧 :) :) ，有幾款唔同的沙律，每款都好精緻好好味，絕對比得上出面百幾二百蚊一個 set lunch 的自助沙律吧，令我回味無窮。難怪佢哋經理用 amazing 嚟形容。主菜選咗蜆肉意粉，蜆的份量算多，意粉煮得剛剛好有韌度，豐富的蜆汁加上微酸的車厘茄，令人胃口大開；我碟意粉眨吓眼比我消滅咗，李C9剛食完，就影佢果碟比大家睇吓D蜆有幾多。餐廳仲細心地放個碗比我哋裝殼，滿咗好快換個新的碗。今日甜品係 cheese cake，好味:)。我哋加咗 ＄20 叫餐飲食飽後慢慢傾，雖然坐咗好耐，D職員都冇打擾我哋，仲好有禮貌同熱誠，呢度又坐得舒服，睇嚟可以成為我哋的新落腳點。…Read More

舊公司同事聚會，數數手指有D同事十幾年冇見，太空超人話呢次係百年難得的聚會，20位大人7個細路，好期待 :) :) :) :) 。翠絲建議入流浮山明記，話識人好抵食，可以預早幫我哋訂定海鮮，新鮮好味，今次辛苦晒翠絲。去到明記，留咗兩張12人枱比我哋，我哋27人坐太廹啦 :(  ，要求轉其中一張去旁邊嘅14人枱，服務生居然要走出去問先返嚟幫我哋轉。人多真係好，可以食好多好多唔同款嘅海鮮，果晚我哋飲咗湯，食咗蜜糖金蠔、粉絲蒸扇貝、清蒸鮑魚（以上三款各20隻），另外椒鹽賴尿蝦、油鹽焗蟹就各10隻，清蒸石斑兩條，每條斤半左右，仲有豉椒炒大聖子、椒鹽鮮魷、蒜蓉蒸開邊蝦、白灼花螺、清炒菜心、腐乳炒通菜、招牌炒飯、菜膽雞；油鹽水花甲去到話冇貨。湯比較清，未試過海鮮湯會咁清，我果枱大家攞咗一碗都冇再添。豉椒炒大聖子，亞仔好鍾意。第一次食金蠔，原本以為好似海味舖買到的本地生晒蠔咁充滿香濃嘅蠔味，滿心期待，點知係兩件事嚟:(，蜜糖金蠔味道淡咗D喎。粉絲蒸扇貝比咗亞仔食，佢話好好味，初初佢仲唔食粉絲，我話呢D先係精華，叫佢試吓，試咗之後覺得好味到連爸爸果份粉絲都食埋。清蒸飽魚夠諗:)，味道可以。椒鹽賴尿蝦香口惹味，如果D賴尿蝦可以大隻D就更好啦。椒鹽鮮魷夠脆、脆漿唔太厚，小朋友至 like。蒜蓉蒸開邊蝦係我提議嘅，但冇指明要咩蝦，以前食開大小小的海蝦嚟蒸，今日D蝦太細，我唔會攞嚟咁整，有D蝦仲好似霉咗，海鮮唔應該係咁  ，聽到愛妃話粉絲好食，即刻試吓，我個人就覺得咸，雖然係咁，因為係我提議，我好努力食咗好多，減少廚餘，C 先生回程係車度話應該成碟攞返入廚房。白灼花螺好鮮味 :)  ，食咗齒頰留香。條石斑蒸得剛好，要讚吓。清炒菜心冇食，亦聽唔到大家講咩，但D通菜就好爽脆、鮮嫩可口。因為我哋早到，初時上菜好快，食咗一輪，開始人多，廚房就好耐冇嘢出比我哋。咁都好，大家可以落下格傾吓計，唔知係唔係太開心，所以講到口水亁，係呢段時間我已經飲咗好多杯茶。過咗好耐，又開始上菜啦，油鹽焗蟹用奄仔整，而家啱食夠晒多膏、上咗枱好耐食都仲好熱、而且好似有種用碳焗嘅香味 :) 。招牌炒飯唔油但唔夠粒粒分明，不過有D韌度好得意，唔知係唔係佢嘅特色。菜膽雞冇食亦冇相（所有相係太空超人用手機影），但愛妃同婆婆話好有雞味。飯後送咗橙比我哋食，我冇食但估應該 OK，因為亞仔同米雪個姪女不停咁食。返到屋企一家三口仲係超口渴，係咁諗有咩可以解渴，水、茶、東瓜水、橙汁、汽水都飲咗，點解仲咁口渴㗎 :( ？成個流浮山有咁多海鮮酒家，明記呢晚都全院滿座，不過我下次會試吓第二間，因為個人認為應該有仲好D的選擇。但今晚主要目的係見吓大家，好開心咁多人可以出到嚟，最感謝係翠絲一切的安排:):)。…Read More

我下星期生日，老公要出差，佢話訂咗枱係 Tiffin 同我慶祝，亞仔冇份。真係一分錢一分貨，Tiffin 的自助餐從冇令我失望，就係因為D嘢太好食，顧住食冇影到相。我食自助餐通常都係食沙律、冷盤、甜品。沙律雖然款式唔多，但果日D羅馬生菜好鮮甜:)，一路食一路諗點解D生菜咁甜，忍唔住食咗兩轉；係咖哩果邊仲有泰式沙律，醒胃提神。龍蝦超級鮮味，D膏又香又軟:)；凍蝦、花蟹都好鮮甜。牛仔肉味道可以，但羊架今次就乾咗D。食咗五件風乾火腿配蜜瓜，蜜瓜其實可以砌細件D。老公話鵝肝好好味、雜肝 cold cut 仲帶有烟鴨的味道喎。甜品係我最愛，大部份都試咗，樣樣都好味，只係鮮果撻乾咗D、桂花榚硬咗D同甜味俗咗小小；雪糕簡直係好有水準:):)。老公食食吓行開咗，短時間就有五位服務生要收起佢碟未食完的食物，服務較率一流:)，但當知道碟嘢未收得時，綜觀三位女服務生的態度同反應係比另外兩位男同事優勝好多。…Read More

難得亞仔去咗串門子，兩公婆二人世界，即刻揾新嘢試吓。見到間舖係謝斐道樓上舖，心諗星期日晚應該水靜鵝飛，點知全院滿座，好彩有訂枱。我哋叫咗夫妻肺片、涼拌木耳、擔擔麵、椒麻腰花、老麻抄手、水煮牛肉、一罐可樂。唔知係唔係漏咗單，等咗半個鐘都冇得食，見到人哋遲嚟嘅都上咗菜，問吓服務員，轉頭D餸就上啦。夫妻肺片帶甜味；涼拌木耳微酸微辣好清新 :) ；擔擔麵老公唔記得攪一攪，覺得淡咗小小，但都OK，下次再試清楚 。老公鍾意食麻，佢覺得椒麻腰花、老麻抄手好味到冇朋友，我覺得腰花本身的鮮味欠咗D，同食到一片有壓味，而老麻抄手真係幾好味:)，而且麻到成個嘴痺晒。水煮牛肉好好味，好耐無食過覺得滿意的水煮牛，呢度我哋覺得好啱胃口 ，特別鍾意裏面的薯粉（希望冇寫錯）、菇、瓜片，如果牛肉可以多小小就好啦。埋單送甜品紅豆沙，紅豆沙冇起沙，仲應該落咗生粉水，但甜度可接受；以往食完川菜都想食雪糕中和下，但今次食完紅豆沙後，竟然想食雪糕的慾望無咗。因為D食物啱胃口，老公話原諒上菜慢一事，整體來說除咗落單果位先生好似不在狀態，跟著 follow 我哋的女服務生都好有禮貌。已經 What's App 咗比D朋友約埋再嚟食過。…Read More