安婕婕's Profile

在觀塘開源道想揀個坐得舒服少少既餐廳食早餐，第一時間諗起太興，點知坐低之後發覺坐就坐得算係幾舒服，不過比想像中熱，好似無乜冷氣咁！ 有 A 至 I 餐 10 個選擇：A 香辣肉碎扎肉米粉 / B 火腿生菜絲通粉 / C 雪菜肉絲米粉 拼 炒蛋 / 烚蛋 配 鬆脆多士，炒蛋 / 烚蛋可轉配香草腸或火腿；D 頂級午餐肉滑蛋公仔麵； E 沙嗲牛肉滑蛋公仔麵；F 香煎雞扒滑蛋公仔麵；G 自家製糯米雞；H 脆炸魚柳拼煎蛋，香草腸配鬆脆多士；I 火腿拼炒蛋 / 烚蛋配鬆脆多士；J 香煎雞扒拼香草腸配鬆脆多士。揀左 E 沙嗲牛肉滑蛋公仔麵 F 香煎雞扒滑蛋公仔麵，略嫌滑蛋唔夠滑可以炒得再滑D，沙嗲牛肉既沙嗲醬係幾香，牛肉好冧；香煎雞扒煎得好香口，雞肉好嫩滑。…Read More

原來金寶在九龍城又係有兩間舖，仲要兩間舖係連埋一齊，一間金寶泰國菜館，一間金寶越南餐館，在金寶可以食泰國菜又可以食越南菜。越南菜就留返下次再試，今次試左泰國菜先，食泰國菜又點可以唔叫活蝦刺身，味道鮮甜，肉質彈牙，醬汁開胃！活蝦刺身作為前菜無得彈！主菜：椰汁青咖哩軟殼蟹、菠蘿焗飯，小食：醬爆蝦丸、泰式炸蝦餅！椰汁青咖哩撈菠蘿焗飯真係好夾，辣辣地又甜甜地，口感一流！再有炸既軟殼蟹同蝦丸蝦餅送飯，真係好豐富既一餐泰國菜！…Read More

星期一至四$188位／2小時，星期五至日$189位／2小時，小孩3歲以上及1.3米或以下$88位，設有自助調料吧，最低消費2位$376元，另設加一收費。享用時間為入座起2小時，不設加時，食物供應至晚上11時，營業至12時。羅漢果杞子菊花茶、豆漿、咖啡、奶茶、檸檬茶及各式汽水任飲。火鍋湯底揀左至尊惹味雞煲：走辣，仲可以加雞！真係耐到已經唔記得左有幾耐無食過雞煲仲要係放題！雞係確實幾惹味，雞切到細細舊食下又一舊食下又一舊，好快就要加雞！食物有五十幾種選擇，不外乎都係肉肉菜菜丸丸同丸丸菜菜肉肉，但係一定要一定要一定要叫炸饅頭，雖則饅頭飽肚但係甜甜地炸得好好味，忍唔著食完一個又一個！…Read More

諗起糖水其實都會諗起松記糖水，原來真係細細過就聽過佢個名，不知不覺原來已經開左三十幾年，絕得係「老字號」糖水舖！之前無認真睇餐牌，真係唔知松記糖水既餐牌有5個系列，果皇系列、冰涼系列、傳統系列、經典系列同埋創意系列。研究完餐牌，突然發覺之前去松記糖水一直都係食西式既甜品，從來無試過松記中式糖水，所以終於諗到食乜喇！就係西米露同西米露，一個芒果西米露一個芋頭西米露，一凍一熱！估唔到又幾好食唔錯喎！芒果新鮮又夠甜唔酸配埋凍冰冰西米露無得彈！而熱辣辣既芋頭西米露又有另一番滋味，好濃郁既芋頭香！…Read More

去得荃灣悅來坊都會想去幫襯，首先內在環境設計得幾好，真係有日本既感覺，最特別係坐卡位既話，仲有塊簾可以拉埋，保持私隱度，坐得幾舒服！点寿司主打壽司‧刺身‧日式料理，從各國搜羅優質精選食材，融合日式料理創意新食法，以現點現做的匠心手作，搭配智慧點餐與科技的送餐體驗，加上店內清新的日式風格，呈獻「一點即送」的味覺盛宴。首先一定要提炸軟殼蟹，全隻軟殼蟹酥炸出黎香噴噴又脆卜卜，非常之值得推介！仲有食得出刺身好新鮮，又肥美又鮮甜，一碟完全唔夠喉，三文魚係絕對無令鐘意三文魚既人失望，無論係三文魚刺身、親子花之戀定係火炙芝士三文魚都係一樣咁出色！…Read More

去會議展覽中心唔知食乜好，見到有間港灣茶餐廳有唔少人排隊又肚餓，就一於排隊試下，估唔到有驚喜！以為港灣茶餐廳只係一間好普通既茶餐廳，開得係會議展覽中心並唔係一間普通既茶餐廳。必吃推介「銀芽雞絲脆麵」，真係讚不絕口，脆麵炸得好脆卜卜，銀芽清脆，雞絲鮮嫩，又多芡汁連埋脆麵一齊食，食完一碗又一碗，滋味十足！「乾炒牛河」不得不被比下去，不過「乾炒牛河」同樣值得一讚，名乎其實乾炒，炒得完全唔油，好少可「乾炒牛河」係唔肥膩，仲有每一舊牛肉都係腍既唔韌。…Read More

成日經過屯門市廣場見到 Terrace in seaside 已經想幫襯，終於有機會！Terrace in seaside 有少少韓國 cafe 既影子，一行入去感覺好 relax，好似去左度假咁，再加少少幻想真係會覺得去左韓國！Terrace in seaside 招牌係柑橘，但係並唔係咁想試柑橘，反而想試「開唔開心試咗先知嘅開心果蜜糖窩夫」，睇個名已經引起好奇，開唔開心試咗先知，睇個名已經開心左，窩夫即叫即整，外脆內軟，甜而不膩，搭配濃郁開心果醬，仲有開心果碎，口感真係好豐富。…Read More

朋友介紹樂富有間唔錯既酒樓，所以特登去試下，果然朋友真係無介紹錯，絕對值得專程去！唔係連鎖式酒樓有唔係連鎖式酒樓好處，食既野無咁罐頭，比較有特色！餐牌上有廚師長好推薦、精選小菜、漁皇之選、時令蔬菜、明爐燒味、主食、精選生猛海鮮、精品海鮮、佐酒小食、口甜舌滑。揀左廚師長好推薦既招牌脆脆咕嚕肉、漁皇之選既生劏深海龍躉兩味：翡翠炒龍躉球 & 古法龍躉頭腩、精品海鮮既薑蔥焗桶蠔（桶）。招牌脆脆咕嚕肉真係招牌同埋真係脆脆，甜甜酸酸既咕嚕肉唔肥又瘦炸得香脆內嫩，第一味餸招牌脆脆咕嚕肉已經盡顯食棧師傅功架。翡翠炒龍躉球 & 古法龍躉頭腩之中，比較鐘意翡翠炒龍躉球，因為係完全無骨係起左肉既龍躉，色香味俱全，食唔停口！古法龍躉頭腩有骨無起肉不過龍躉肉質同樣無得輸，龍躉肉夠晒滑！嫩滑結實既肉質，油脂豐富味道鮮美！薑蔥焗桶蠔每隻蠔新鮮肥美肉嫩脹卜卜，炸至金黃色賣相吸引，啖啖蠔都鮮甜多汁，蠔汁完完全全鎖左係蠔入面，食過番尋味！…Read More

荃灣廣場 HOW TO LIVE WELL 被餐廳既環境吸引左入去，落地大玻璃採用自然光，成間餐廳好光猛，係度用餐感覺好放鬆！揀左明太子忌廉汁煙肉意粉 - 黑蟹籽，意粉有唔少明太子忌廉汁好香濃，每一啖意粉都有好多汁，配上鹹鹹地既煙肉同埋魚絲，仲有矜貴黑蟹籽，啖啖都咁好味！再揀左 CHEESE BURGER 薄餅，CHEESE BURGER 唔係只得芝士，有煙肉、免治牛肉同蕃茄，尺寸有 9” 同 12” 任君選擇！凡惠顧主餐牌 主食／意粉或飯 +$15 配湯或沙律及餐包，南瓜湯香甜濃郁滑順，絕對值得 +$15 要一碗。…Read More

而家薄餅越來越貴，如果想平平地食薄餅，其實薩莉亞真係一個平靚正既選擇！外賣自取一個「煙肉菠蘿薄餅」只係 $34，質素唔差，有唔少煙肉菠蘿，$34 物超所值！薩莉亞用既煙肉係意式煙肉粒，唔係一塊塊既煙肉，而係一粒粒既煙肉粒，質感柔軟、口感豐富，味道濃厚鹹鮮。明太子海鮮意大利粉 $40，明太子配搭鮮甜蝦仁，仲有魷魚鮮味十足，加上薩莉亞自家製白汁，高質之選！之前真係唔知薩莉亞在澳洲有自家工場生產白汁，白汁主要原料為牛奶同牛油，口感順滑，味道細緻！…Read More

之前去榮．冰室都係食早餐，終於有機會試下榮．冰室既午餐，睇中左焗飯好耐，不過一直未有機會試下！焗飯有 8 款選擇，必食豬扒、必食雞扒、薄牛扒、龍脷柳魚、豬頸肉、黑牛、叉燒、雜菌香草腸，選配汁：特濃拔絲芝士汁／芝士鮮茄南瓜汁／芝士咖喱／夏威夷汁，配：飯／意粉／通粉。特濃拔絲芝士汁好吸引，鐘意薄牛扒，所以揀左一個飯一個意粉，飯係炒飯底，如果問飯同意粉邊樣好食？真係好難揀，揀唔到，因為兩樣都係咁好食，特濃拔絲芝士汁實在太出色，無論配飯定係配意粉一樣咁好食！薄牛扒都係有質素既薄牛扒，唔會韌！…Read More

一放假又去下午茶，對下午茶唯一要求就係要有甜品，係門口見到餐牌有「熔岩提拉米蘇梳乎厘班戟」絕對岩哂我！熔岩提拉米蘇梳乎厘班戟，梳乎厘外脆內軟，每一啖富有空氣感之餘，提拉米蘇入口即溶，仲有大量既爆谷係梳乎厘班戟上面，真係食到停唔到口！幾乎唔夠食！有甜品仲要有煎炸野，如果唔係下午茶又點夠邪惡！小食拼盤有 5 款唔同既小食，最鐘意雞翼，平時會話雞翼炸得好香脆，今次係會加強文字既語氣話雞翼炸得超級無敵香脆，同雞翼對比之下其他小食無雞翼咁出色，不過全部都係新鮮炸出黎，好香口！…Read More

去海洋公園最鐘意就係 O SO SWEET 既焗豬扒飯，$70 一個焗豬扒飯係主題樂園黎講絕對唔算貴，難得既係質素唔只係唔差，而係好味，色香味俱全！首先賣相同圖片有些少出入，圖片只供參考！雖則焗豬扒飯實物賣相並唔係特別吸引，不過新鮮熱辣，一打開已經香噴噴，聞到就忍唔著想食！焗豬扒飯醬汁不多不少，味道都算香濃，份量十足，一個人幾乎食唔哂，最值得一讚係豬扒，唔薄又唔厚，口感十足，完全唔韌仲係好腍，唔需要咬好耐就可以吞！…Read More

天氣熱有時真係無胃口唔知食乜好，爭鮮外帶壽司真係幫到我！平平地一盒飯其實已經可以係好豐富好滿足既一餐！爭鮮外帶壽司有好幾款飯 $36 - $55，包括：三文魚帶子丼飯、三文魚丼飯、鴛鴦大丼飯、三文魚沙律拌飯、幸福鰻遊丼、鯖魚丼飯同三文魚親子丼。$48 鴛鴦大丼飯係我個人既首選，有三文魚同油甘魚，三文魚同油甘魚既質素無因為係丼飯既關係而覺得差左，同平時刺身無乜太大既分別，仲有 4 種唔同既配料撈飯，蜜汁蝦酥、中華沙律、蒜味螺肉同埋雞蛋絲，又魚生又配料成個丼飯都唔會無餸撈飯，性價比真係超級無敵高！…Read More

賀苗記包點在元朗都算係幾出名，經常大排長龍，大多數人為既都係招牌生煎包，$20 有 3 個，價格親民，唔少元朗既學生街坊成日幫襯！聽聞一個好味既生煎包，皮薄底脆、汁豐肉鮮缺一不可。賀苗記包點既生煎包絕對稱得上係一個好味既生煎包，皮唔只薄，非常軟熟，而且個個生煎包既底都係煎到金黃香脆，個個生煎包一咬都爆汁夠哂汁豐，生煎包入面既肉餡鮮甜，新鮮出爐，熱辣辣，味道濃郁，口感層次豐富，一個人食 3 個生煎包好似都唔夠！…Read More