phoebe_0122's Profile

呢間酒樓已經開業左，試咗好幾次，食物質素一般，但係員工態度極差，尤其門口嘅接待員及收銀員。今日我嚟買外賣，叫方魚肉碎粥外賣自取，個收銀問我係咪單點，我答係，佢就收我$80，我好聲好氣問佢，明明餐牌係寫$48 ，點解係$80嘅？佢就好勞氣話我，你話單點呀！我話留意番，我第一句已經係話外賣自取，跟住佢先死死地氣，叫個經理嚟取消張單，然後再幫我落單，仲喺度咿咿哦哦。作為一個收銀員，對啲價錢唔了解，仲喺度賴個客，態度極惡劣，以後都唔會再幫襯！…Read More

其實已經試過用佢個手機Apps order兩次外賣自取，兩次都好不滿。第一次order左盒沙律，個職員就咁遞完比完我之後，連個袋都冇，極冇禮貌。 第二次仲離譜，我order左杯熱抹茶Latte同芝士火腿Lattice。比杯嘢飲我嘅時候，明知係外賣又專登唔吸個飲果個位既細蓋，（專登放盒細蓋既盒係高枱側邊，要個客自己拎自己Come果細蓋），又係唔俾袋，我已經自備袋啦，又唔提我無蓋到，佢遞杯野飲俾我既，張枱就高過我視線，我根本就睇唔到有冇吸實，結果就倒到我個袋一袋都係，個職員睇到我用紙巾狂抹都扮睇唔到，真係好差。杯野好淡味，無茶味，好少奶味，好難飲，仲要唔熱，頂多係微暖。個芝士火腿包中空無餡既，明明叫預熱都係凍曬既，咁既小店無實力無味道無誠意，以後唔會再幫襯！…Read More

簡直係劣食中既劣食...中曬伏...首先食物種類係非常之少...價錢唔平...但都得咁少款好唔抵魚生極之唔新鮮有幾款魚生食完要即刻吐出黎可想像到幾咁劣食生蠔開曬係度毫無新鮮可言仲要係好細隻又無咩海水味青口係苦既...蝦係酸既...龍蝦係無味...唔知食緊D咩咁長腳蟹腳係唯一可取D正常味道...唔夠鮮甜熱食方面燉湯係無得輸既...亦都係唯一唔會中伏既串燒就一般...燒好一疊...再翻熱俾客人所以上碟又燶又黑咁只係靠醬汁搭夠鴨肝都正常...甘香既乳豬都係一般...好油膩蒸魚同蒸扇貝就蒸過龍...好「鞋」甜品方面連心太軟都係好難食...真係好無言食自助餐都係貴精不貴多...呢個自助餐真係食到人火都黎埋...款式唔多...好食既少之又少...性價比低..................全場最好食係個Haagen-Dazs雪糕…Read More

大年初三兼情人節用🐼Apps叫頭盤同甜品外賣自取，真係把鬼火，真係想同間餐廳開年。超中伏！份量細，無賣相，極難食。凱撒沙律（*唔包啤酒，用黎俾大家睇比例）$40（原價$68）買一少堆生菜，麵包粒得三粒，仲要「臨」曬，芝士粉同煙肉碎係完全無。75%朱古力班戟心太軟$54（原價$89）超級難食，班戟韌到咬唔開，心太軟係凍既，極細個，得個曲奇餅咁大。唯一可以食落口米個朱古力雪糕囉。🤬😡🤬😡🤬😡🤬😡🤬😡🤬😡🤬😡🤬😡🤬😡食過咁多間外賣，呢間真係相當離譜，好彩叫左兩樣咋，咁既甜品得罪埋愛人添呀！雖然外賣自取六折，不過咁既樣，非常難食難睇，同埋極之敷衍。😡🤬😡🤬😡🤬😡🤬😡🤬😡🤬😡🤬😡🤬😡🤬…Read More

一出𨋢就明點解間餐廳拎曬獎，一個字「靚」！而家好少有Cafe有咁高質既環境，入面除左裝修好有心思，連杯杯碟碟同擺設都睇得出係精心挑選。餐廳以綠色作主色，配搭木色的櫃，好似入左個森林一樣咁賞心悅目。一入門口仲有隻大熊貓歡迎你光臨～～滿分！環境靚，食物都好正！物有所值，碟碟大大份，目測都有三四個人份量，我地兩個人係食唔曬要打包既～小食美式甜辣香脆雞翼，整得外脆內嫩口，勁好食，自己係屋企整唔到，推介大家叫黎食。牛油果忌廉蟹肉意粉，好足料，蟹肉有一個網球咁多，舖左一整個牛油果係中間，緊住有芝士片同意粉。食落個感覺好豐富，醬汁唔太多，唔會蓋過食材既唔同味，又唔會感覺太膩。主菜「慢落豬」（慢煮西班牙冰花酸梅黑毛豬串燒配甜蕃薯角），上菜已經聞到香味，慢煮豬肉好入味，味道剛剛好，肉質有油香，煮得好「臨」，伴碟既甜蕃薯炸得好鬆脆，可以refresh下味蕾。…Read More

首先入門口，接待員已經好有禮貌招呼你，已經好加分。入到去地方好闊落，雖然我地坐吧枱，但都唔會覺得好逼，服務員會不停收碟、加水、服務好好！食物方面，其實選擇唔多，不過貴精不貴多，尤其唔限時，慢慢逐樣逐樣試。汁煮鮑魚：最好食係一個只會送一次既前菜，個醬油入味得黎又唔會搶個鮮味，炆得好「臨」。刺身：第一輪可以order（每樣要小小），師傅會跟人頭每樣兩三片，刺身都好新鮮，不過就唔算好重魚味。釀蟹蓋：麻麻地。鐵板鴨肝：強烈推介，好肥美甘香（好邪惡！）日式炸豆腐：好一般。鐵板帶子：睇個樣就知唔多掂啦～迷你手卷：好食，海膽甘甜，魚子新鮮脆卜卜，不過手卷飯比較多，食得多好飽。炸物：一般。鹽燒海老：唔新鮮。天婦羅：好多麵粉。雪糕：好似係店舖自家制，好好食，又多款。榴槤大福（炸）＋榴槤糯米糍：榴槤都多，好香。…Read More

之前食過一次，覺得ok，都唔係好高質。今朝打電話去問下有無位，接電話個職員態度極差，極冷漠咁答完一句無位就up線，以後Bad List！就算無位都唔需要咁惡劣既態度，仲要咁無禮貌up線！唔好影衰曬香港d日式餐廳，呢度唔係淨係得你一間，服務極差，已經有唔少負評…Read More

新年既時候買左呢間既團購卷外賣盆菜好正，決定試下佢出名既麻辣雞煲Order左之後，等15分鐘就有得食啦，成個雞煲淨係聞都覺得好惹味啦，半隻雞份量都中規中矩啦，兩個人食岩岩好。成個雞煲比較乾身，小小唔同既係無咩醬汁浸住既。D雞食落好嫩口又入味，抵讚食完雞煲，我地叫加湯，侍應姐姐就幫我地加左麻辣湯底，唔係清湯黎架。滾起之後，陣陣濃烈既麻辣味開始包圍住我地。我地叫左內蒙肥羊、鮮冬菇、響玲、自家制韭菜餃同油麥菜肥羊好好食，好「蘇」好有羊味，加上厚切，啖啖肉好正鮮冬菇足秤呀，$28大大件，夠吸味，同D麻辣味好襯響玲就一般啦，$36有五條，唔夠脆有小小「臨」，所以浸完麻辣湯會韌，質素麻麻地，所以呢個價錢唔係好抵自家制韭菜餃好好食，大大粒，夠實淨，唔會一煲就散曬，同埋都係好入味油麥菜好食既，尤其係加左辣之後，勁吸味，食得辣既朋友就岩曬啦，我地有小小嫌太辣啦額外追加：韓國灰活蜆，$58超抵食，有十隻，煲完之後入面既蜆肉同個五蚊銀差唔多大，第一次落海鮮落個雞煲到，感覺幾新鮮，同埋好惹味，推薦俾大家…Read More

真係食到好嬲既餐廳，以後Bad List佢事緣係經過灣仔，見到D食評唔錯，又有咁多明星幫襯既相，諗住應該唔錯啦，點知中曬伏我地叫左個雞煲，湯底係一半麻辣(微辣)，一半清湯。上到榙果陣係威係勢，個煲就好有睇頭啦，有龍頭係兩邊，不過滾起既湯底完全無香味，試過個湯底都係無味既，兩邊都係似滾水加味精粉咁，真係我去超市買個小肥羊既清湯包都好過你。仲有講起D雞先嬲，又細又「鞋」又老又多碎骨，仲要勁多雞頸，完全唔入味既，根本係度渾水摸魚，伏到喊，唔合格。我地食左一兩件雞，大約係十分鐘到，個煲少左水，D侍應即刻加水，加完之後仲淡味，之後要叫人加辣加醬先似返個湯底，真係曬曬D時間同你「淆」湯底，仲衰過買現成湯包好多。成個煲收$118半隻雞，好似唔太貴，不過無味，份量少，個人就覺得極之唔抵。我地之前唔知佢個湯底咁差，仲叫左一份美國肥牛($108)同內蒙肥羊($98)，先講肉質，只能夠講唔韌，不過牛同羊都無乜味。份量方面每份十片，勁薄更幼，睇圖就知幾唔抵啦。仲有份冬菇($13)先小家，同包紙巾一樣size，都係煲左好耐都唔入味。好彩D串燒幾好食，叫左兩串羊同雞皮，仲有送既串燒蝦，不過食完個雞煲都無曬Mood啦，仲食咩，即刻埋單，無食過D咩都$444，我地轉去食返個$44既麥當勞仲好食過好多，唔怪得門面貼曬明星相都無人排隊，全晚得兩三榙客，侍應仲多過客人，下次都係睇真D先幫襯。錢都係事少，野食無質素事大…Read More

星期三係要同同事食好野金鐘係個食晏似打仗既地方，所以一星期前Book左榙，所以可以舒舒服服唔使等位。入面裝修好靚，金黃色為主，古典歐陸既風格，座位都榙都好寬闊，一坐埋位已經有人serve你，感覺好好。成份lunch menu都係英文唔使怕，侍應會好細心咁用中文同你講一次今日有咩食，呢個服務真係好貼心，因為一個打工仔最唔想連食晏果一粒鐘都要同你咬文嚼字查埋字典先知道食咩。Lunch Menu有平有貴，$208 & $288，主要分別在主菜同有無前菜，無論你叫咩餐都好，都會上熱辣辣既麵包俾客人既。麵包好軟熟，好香。個牛油仲要加左紫菜同芝麻，加埋一齊食好夾，同埋令到個麵包更加好食。$208＞無前菜＞主菜都有兩款，我揀左海膽汁炸生蠔意大利Pasta。首先講賣相，感覺上好清新好簡單，不過食落就知唔簡單。首先講最頂既炸蠔，好新鮮，咬落好juicy，Menu話係日本蠔黎架。呢隻Pasta都幾特別，好似意大利飯咁，煙煙韌韌咁，食得出好似生米既一粒粒質感，不過又無生米咁硬既。D米煮得好入味，每一粒都食到好濃味既白汁，但係又唔覺得好膩，撈埋中間既海膽汁就更加錦上添花啦。$288＞前菜／湯，朋友揀左湯，試左幾口，幾creamy既蔬菜豆湯，夠fresh令人想飲多幾啖＞主菜都有兩款俾你揀，朋友揀左牛卷，朋友share左小小俾我試下，牛肉夠juicy，不過唔算多牛味，同埋都有小小韌。醬汁都唔錯，唔會蓋過牛既味。茶可以揀menu suggest或者其他$85既茶，一睇花多眼亂，同朋友都係lunch menu各揀一個算吧。我揀左薄荷茶，用一個比較大既金色壺上榙，可以沖大概4-5杯，第一杯當然有濃郁既薄荷味啦，慢慢就會沖淡左，不過都帶D果香。沖出黎既茶唔太深色，屬於淺綠茶類，可以一路食一路飲減膩，同埋refresh下味蕾。甜品可以揀是日精選同埋店面甜品櫃內既任何一件，我同朋友各揀左一件，兩件都唔錯，用茶葉入饡，味道都幾特別，好似放左塊茶葉入口咁。整體份量岩岩好，唔會太飽，食埋甜品剛剛好，所以見到同場好多OL幫襯。加埋餐廳環境寧靜，裝修又靚，服務同食物都高水準，所以值得俾滿分…Read More

難得過黎紅磡，梗係要幫襯下懷舊小店啦。去到已經有人龍啦，好彩小店流轉得快，等一陣就有位啦。入到去小店完全唔同曬，新裝修後變左茶餐廳風格，闊落左光猛左。小店主打豆漿餈飯，最岩我地呢D想食得輕盈D既人。我地叫左個熱咸豆漿、凍豆漿、餈飯、鍋貼、炸餃子同茶葉蛋。逐樣講下：＞熱咸豆漿：第一次試，初初以為係熱既無味豆漿，但原來加左好多餡料，如蔥花同油炸鬼等等。食落去個口感都幾特別，小小咸又有小小豆香，不過豆味唔重，都係叫返甜豆漿好飲D＞凍豆漿：好好飲，豆味重，亦唔係好甜，幾健康既飲品＞餈飯：餈飯上到榙熱辣辣，入面有好多油炸鬼、酸菜等既配菜，煙煙韌韌幾得意＞鍋貼：新鮮包寧舍好食，入面D肉汁好juicy又唔乾＞炸餃子：出乎我意料之外咁好食，出面炸到脆卜卜，入面餡料又足料，點日式沙律醬應該會更好食＞茶葉蛋：一般，唔夠入味呢整體黎講都唔錯，咁多年都保持到個水準。依家係香港真係愈黎愈難搵到上海老字號既小店，見到小店由以前得幾樣食品，加到依家又有麵食，又有碟頭飯，都知生意難做。希望大家多D支持本土小店啦…Read More

望穿秋水，28居酒屋終於開返啦，星期六8:30pm過黎試，真係少年我太年輕啦，小店出面已經大排長龍，OMG咁岩果日返風，呢條小街都頗食風既情況下，等左一粒鐘多D終於有榙啦 T.T一行四人叫左壽司、刺身、串燒同小食＞壽司：海膽夠新鮮，塊紫菜脆架。芥辣八爪魚好足料，好爽口。其他壽司都好新鮮，不過舊壽司飯都好似機整咁，一夾上黎就散曬。＞刺身：三文魚腩好肥美，帆立貝夠大粒夠新鮮，真係大件夾抵食＞串燒：燒翠肉瓜、茄子、雞軟骨同菠蘿都燒得好好食，係冬菇燒得未夠火候，同埋和牛粒有D韌＞小食：燒雞泡魚乾比較乾身，但又唔太夠魚味，如果燒耐多小小時間會較好小店比起以前舊舖少左幾張榙，侍應得返兩個新面孔，只有老闆還在收錢。難得既係出品高水準，拍得上出面幾百蚊一位既日式店，同埋真係抵食夾大件，放題式咁叫，人均消費都係大約二百蚊有找，咁良心小店係邊度搵？不過店面細左係好影響流轉速度，加埋西環既街坊食得比較休閒，如果下次去食一定要訂榙。…Read More

又俾團購吸引左，所以買左最平既$108(日式火鍋 1 人 90 分鐘特選 Shabu Shabu 放題 - 美國進口牛肉火鍋)黎試下。去到已經見到人頭湧湧，證明都唔錯。我地三個咁岩坐到張卡位係拎野食既榙附近真係好正，refill左一定見到同拎到。就算坐得唔近都唔怕，侍應都refill得好快(雪糕例外)。各式各樣既食材都好新鮮，最驚喜係有西蘭花。雖然我地食最平既牛肉餐，但D牛肉都唔韌，同街市買到既肥牛差唔多，都OK。另外豬肉都幾好味。想讚既係唔使加錢下都可以揀兩個湯底，我地揀既甜豉油同蓄茄湯底都好好味。吧榙既醬料亦都好齊全，同埋侍應都好好，見到一有污糟都即刻去清潔。雪糕係令人期待既Milk Top牌子，有三隻味，抹茶，芝麻同牛奶。其實一開頭個湯底未到前，已經見到抹茶個盒已經見底咁濟，所以我地食左雪糕先。抹茶味好重奶味同好軟滑，入口即溶，抹茶控一定會好鐘意。到我地打完邊爐，見到侍應refill盒新既牛奶雪糕，我地更加鐘意食牛奶味，因為更軟滑，比起大牌子既雪糕，Milk Top既甜味較淡，但更顯出佢既奶味。唯一美中不足既係，三隻雪糕兩隻勺，侍應無乜換「畢」雪糕勺既水，搞到成盒雪糕都會有唔同既顏色。最尾我地見到有盒新雪糕，但個雪糕勺又勁污糟，我地拎左盤熱水去沖一沖先乾淨，再「畢」雪糕先開心架嘛。其實三盒雪糕，放多一隻勺已經唔會搞到個賣相咁噁心。整體都唔錯，值得一讚係食物吧榙上放置既擺設，有心思同靚。性價比高既打邊爐。…Read More

平時放工肚餓都會去呢間飯堂食壽司，貪佢平日無咩人排隊，同埋質素都唔錯，不過今日有小小失準。我地叫左好多款壽司，有紫菜包住既壽司都差左，主要應該係廚房放得太耐，塊紫菜都「臨」曬，好影響賣相同觀感，即係唔係新鮮整，係一早整左放入雪櫃／轉左唔知幾多個round果D。另外，大滿足既$10赤海蝦好腥臭好唔新鮮，好似食緊坑渠D垃圾咁。同樣係$10既三文魚腩好薄，仲好大陣雪味。炸蝦卷入面既炸蝦一樣中左伏，似翻炸再翻炸咁，食落有一陣油「益」味。最後有樣好既係炸八爪魚，差唔多係食完曬壽司先黎，可能無咩人點，所以相對新鮮。炸粉少同入味，炸得都幾好食，但$37得4粒炸八爪魚，性價比低。甜品係會員送既泡芙，還可以啦。整體都一般，用呢個價錢食壽司都唔可以要求咁多。值得一讚既係呢間元氣師傅比較大方，每一樣既份量都相對較多，所以都會再試下既。…Read More

見呢間新開張，又係公司附近，所以貪平買左團購卷($138位)，咁就煩啦，因為真係好難book，聽電話果位男士仲要粗聲粗氣咁，我無欠你架喎:(一開始已經印象麻麻啦，去到間餐廳，一半都無坐滿，都覺得伏味濃。我地兩個食果個叫精選五道菜，甜品係任食，不過唔可以一開頭就食甜品，要跟住次序食先得既。湯龍蝦湯同忌廉湯都似係煲，唔係粉開出黎既頭盤煙三文魚凱撒沙律：好好食，菜夠新鮮，煙三文魚夠大塊，個沙律醬酸酸味味好開胃法式田螺薯蓉：正如其他食評咁講，係用原隻薯仔打成薯蓉，唔係粉開出黎已經誠意可嘉啦主菜美國特選西冷：我地叫左三成熟，不過出到黎都係七成咁，韌而無咩肉味蒙古烤羊脾扒：幾好食，烤得夠香口，入味岩岩好，入面都好juicy伴菜薯條：生左小小既粗薯，無咩薯仔味指定甜品心太軟：外脆內熱，好食火焰雪山：燒得唔係好燶岩岩好，入面既雪糕幾好食任食甜品北海道焦糖布甸：幾好味宇治抹茶奶凍：一般，奶味太重，無抹茶味意大利咖啡奶凍：一般我地叫左一round任食甜品已經無再encore，同埋walk-in入去都係每位$158，買團購只係平左$20，但D主菜無$158咁多選擇，仲要兩三星期前book定都幾煩，性價比低既團購想提一下係餐廳既洗手間，都尚算乾淨。不過經過既時候，會見到廚房入面，真係唔睇好過睇(大家自己幻想下啦)，同埋地下好「扇」，真係好驚會仆親。…Read More