tttracyyy's Profile

心血來潮去左家人介紹嘅申子食午餐。無介紹錯，不論食物，服務，環境都好滿意。豚肉金菇卷。金菇好大串。豚肉燒得好香。食落十分juicy唔會乾。蓬鬆玉子中間有拉絲芝士。同平時食嘅玉子燒唔同，要用匙羹，每一啖都好滑嫩！牛舌芯係店員介紹。每一粒都好厚，配埋鹽/芥辣更好食！網燒安格斯肉眼定食。全餐飯味道最普通嘅一味。牛無乜味，要靠調味料。肉質ok。申子三色丼。好食，足料。海膽香甜，三文魚籽細細粒，呑拿魚蓉仲多過飯。份量大，最後食唔晒。角切魚生飯都勁足料。服務好。中途多次有人黎斟茶。環境亦都好舒服。卡位坐得好闊落，燈光暗暗哋，同隔離枱有一定距離，所以都幾靜。係食飯傾偈嘅好地方。…Read More

因為有海港城coupon同朋友介紹，今日去左試呢間韓國餐廳。星期六日無得book位，只可以walk-in。等左大約1個鐘。要注意如果過左號碼係無得補飛，要重新攞飛。限時90分鐘。落左單好快上菜。沙律好大份，有牛肉雞肉牛油果等，十分足料！！蕃薯條脆卜卜，個醬個柚子味好出！炸雞勁新鮮，外脆內嫩。個蒜香蜜糖汁好好味！紫菜包飯卷都唔錯，好足料。之後想加單叫埋另一款時已經售罄，要落單要趁早。海膽烏冬真心好食，大推👍。佢同一般海膽忌廉醬唔同，有醬油味，所以唔會膩。焦糖蛋系列飲品有驚喜，特別係咖啡十分配甜甜脆脆嘅焦糖面。放耐左個焦糖會結成一片，建議盡快飲用。紅橙泡泡味道一般，打卡一流。服務一般。味道有驚喜。用海港城coupon後性價比高。有機會會再黎。…Read More

話說，前排行過新紀元廣場，發現開左間新嘅車仔麵店，於是今日就同同事去左試新野。去到門口，有啲人企左喺度，問個員工，又話要排隊無得攞飛。一堆人唔知邊個先邊個後。🤷‍♀️混亂左一陣之後個店員先攞欄杆出黎，大家先排返條隊。之後等呀等，等左成20分鐘先有位。☹️環境OK，坐得係幾舒服嘅。👍落單果陣，已經無晒木耳絲。於是我就叫左香菇雞肉水餃，正氣蘿蔔，蠔油花菇仔，幼麵，滷水汁，同熱奶茶。原本有諗過要叫豆漿，但原來係樽裝，所以放棄左。好啦，落完單又等呀等，飲品到左先。咦？點解得一杯嘅？原來落漏左單。😹重新落單之後好快到，味道正常偏淡。之後又等呀等，等左差唔多20分鐘個麵終於上，已經得返10分鐘食。唔知點解我個麵變左做清湯🤷‍♀️，但真係無時間叫佢再整，所以都照食。幼麵OK。蠔油花菇仔幾入味。香菇雞肉水餃足料好食。蘿蔔頭果2舊係好食嘅，煮得夠淋，第三舊勁多根，有圖有真相。臨走嘅時候聽到隔離枱話連粗麵都無晒😂😂總括而言，味道係可以嘅，服務係比較有改善嘅空間，希望落單時可以認真少少，時間管理係十分差。從未食過咁慢嘅車仔麵。終於知道點解佢要排隊，唔係因為佢多人食，而係因為佢出菜出得好慢好慢。價錢，一啲都唔平。新開張體諒一下，俾個中評。但我下次應該都係去返其他舖頭食算。…Read More

話說我有一個朋友，每次同親佢食飯都一定係食韓國野。今次又同佢食飯，當然都係韓國野啦。透過某app訂位，5:30有半價優惠。去到該地址，係第二間餐廳黎。原來兩間餐廳share同一個舖，連啲員工都係share。坐低之後發現我地係第一批客。環境都幾闊落，幾舒服。睇完menu想落單，禁鐘，點解無人黎嘅？原來啲員工喺晒另一邊，無人睇到我地禁鐘。等左一等，終於有人理我地。一開始諗住叫三樣野，好彩個waitree好親切咁話我地知個炸雞份量好大，而且食到最後可以用啲汁撈飯。於是我地就放棄左個薯條。個蛋巻上到黎，真係比佢嚇左一嚇。長度有半張枱咁長，大小應該有普通蛋巻嘅兩至三倍，非常足料。不過講真，味道係普通嘅。以為個蛋巻已經好誇張，點知個炸雞仲誇張。佢有個gas爐喺下面熱住啲炸雞，成個爐佔左半張枱。有大量芝士。有薯條，好彩無額外叫。仲有大量炸雞。啲炸雞同平時韓式炸雞嘅雞件唔同，比較似麥X雞嘅雞塊。味道普通，唔係幾試到玫瑰味。但勝在份量大。我地最終食唔晒，連飯都無加。中途有一次諗住較細個火果陣唔小心熄左個火，個staff都不厭其煩咁幫我地開返。總括而言，味道係比較普通嘅。但價錢平，食物份量大，服務親切，所以好評！！如果係正價嘅話？不了。…Read More

今日同同事食飯唔知食咩好，就黎到呢間餐廳，貪佢夠近又好食。😋 餐廳位於翠華隔離，地點十分易搵。去到無人排隊即刻可以入座。餐廳內座位較少，係一排排長枱，如果3個人以上可能會比較難安排座位。今次好好彩啱啱好有相連嘅3個位。枱上面有齊紙巾、餐具，調味料等，十分方便。👍餐牌中除左有招牌羅宋湯，湯底仲可以揀雞絲清湯或健康嘅紅菜頭湯。而麵方面，就有多款可選，包括常見嘅意粉、上海麵、拉麵等，唔想食麵亦可考慮餐包。可以隨自己口味配搭。另外仲有多款配料、小食及套餐。 一坐低左就見佢新推出左個撈麵，於是叫左個牛腩羅宋湯上海撈麵加半熟蛋。落單無耐個湯就黎到啦。但隻半熟蛋就去左同事碗豬肉羅宋湯度，希望下次伙記落單時小心啲。😅個羅宋湯超級足料，有好多蔬菜同牛肉，蔬菜煮得非常軟。而牛肉可能煮得比較耐，好韌，而且每一件都好大件，食左一半已經放棄左。羅宋湯比想像中辣，很惹味。不得不讚一讚隻半熟蛋，大小比一般雞蛋大，內裡流心，火候掌握得啱啱好，而醬油味十分入味。個湯，啲菜同隻蛋我會比5分滿分佢，但牛肉就要減番2分。😣撈麵都好食！味道剛剛好！同事嘅紅菜頭湯都好味！試左一淡發現原來比相像中易入口。今餐盛惠$80以單品黎講價錢稍貴但可接受。其中一個體貼位係可以分單，同同事食飯唔使夾黎夾去咁麻煩。…Read More

今日同同事食lunch，同事話不如去試下新開果間台灣野，於是我地就黎到呢間鐵牛。上到去。哇！咁多人嘅！😨目測約有20~30人等位。等位嘅位置有長凳，仲有餐牌，可以揀左野食先，安排都算貼心。💕諗住有排等啦，點知15分鐘已經有位。環境都幾舒適，幾開揚。感覺比前身魚X家嘅時候坐得舒服👍落單要寫落單紙，再拎去收銀度俾錢先。不過落單紙上面無備註，如果飲品要少冰少甜等等就記得落單時候講明啦😉落左單後飲品好快到。叫左就凍珍珠奶茶少甜走冰。奶茶普普通通，甜度ok，珍珠都幾好咬。明明係堂食，見到飲品一係紙杯，一係膠杯，好浪費呀！一開始咁樣諗嘅我真係大錯特錯。當我飲唔晒杯野，要拎走果陣，真係120%慶幸佢係外賣杯。仲要其實隻杯有寫明原料並非石油產品。而最最最重要嘅係佢抵到蔗渣咁嘅價錢。當樓下天X賣緊廿幾蚊，the xxxxx market跟餐都$15，佢珍奶熱飲居然只係+$6，凍飲都只需要+$9！等一等，牛肉麵都到左。叫得做招牌果然名不虛傳。首先麵好彈牙！湯底有我最鍾意嘅酸菜，好惹味！而牛肉一咬即溶嘅同時都好入味。雖然份量頗大，但十分開胃嘅緣故，所以都食晒成碗。珍珠奶茶呢，就真係飲唔晒啦🙈咁滿足嘅一餐，都只係$68！真係好抵，好抵，同好抵。一定會再黎食。…Read More

話說，呢間炸雞舖，一開張果陣排勁長龍，果陣貪新鮮但又唔想排隊，所以買左外賣返屋企食。果陣對佢嘅印象係：好食😋但貴💸今次行過，見到佢完全唔使排，就決定試下佢嘅堂食。一入到去，店員叫我隨便坐。坐低之後好快俾左杯水我。落左單之後勁快，5分鐘左右就上菜。選擇困難嘅我揀左呢個餐，一次過滿足兩個願望。啲雞呢。第一件食落口，雞皮炸到脆卜卜，內裡熱辣辣，一股雞嘅香味同肉汁湧埋黎，一個字，正👍。可惜，質素未能做到統一。多汁嫩滑嘅炸雞中間居然夾雜左一件乾身鞋口嘅失敗品。但係唔好誤會。即使佢無咁好食，都已經算係一件中上嘅炸雞。另外果3件簡直拍得上日本水準！另外，提提大家要盡快食。我食得慢，最後一件雞嘅皮淋左，好食度即減20%原味雞固然好食。柚子胡椒雞都唔錯，但偏鹹。最重要係果3隻醬。完全係畫龍點睛。時令滋味醬有啲似炸豬排醬。果香鹽味醬有啲似牛陣魔法鹽。蒜蓉醬有濃濃嘅蒜蓉。正！飯呢，一般，有啲太多水。椰菜呢，超大份，但味道都一般。麵豉湯，都一般。食到9:30，店員叫我埋單先，但可以繼續慢慢食，有道歉，態度良好！人龍消失嘅原因好多。熱情冷卻，地理位置當然都係好重要嘅因素。又唔係米芝連3粒星，邊個得閒特登黎黃大仙食炸雞？味道同服務我覺得係ok嘅。不過比一開張時水準下降都係事實。可能一開始有日本人喺度睇住真係質素有保證啲。最重要都仲係價錢問題。4件雞收60幾蚊。黃大仙嘅舖頭，中環嘅價錢，咁樣點得呀？但係咁，啲炸雞真係好食，同啲服務都幾好，所以我都係俾好評佢。…Read More

話說同事話之前見到有間餐廳幾靚，想去試下。於是我地就去左試。12:30去到餐廳，人唔多，唔需要等位。餐廳裝修深色為主，裝飾靚，啲杯碟等餐具簡單得黎又特別。最重要係啲位十分闊落，坐得好舒服。未食之前個環境已經俾好評👍👍👍Lunch set包湯或沙律，主菜，同飲品。飲品除個別樽裝飲品同pour over之外，其他都可以揀。當日餐湯係甘荀忌廉湯。甘荀味唔重，非常易入口。連唔食甘荀嘅同事都話ok同事嘅沙律黑松露野箘意大利飯。好評😋😋😋啲飯嘅軟硬度啱啱好。芝士同野箘份量十足，配埋個黑松露汁，香味濃郁。海鮮龍蝦番茄汁意大利粉同卡邦尼意大利粉。同個飯相比真係比較普通。不過不失。Iced peach tea。叫左少冰都仲有好多冰。但味道唔錯。偏甜。同事叫嘅chocolate。拉花好靚。同事話唔夠濃郁。但見到個拉花好有小驚喜，令人心情愉快😌最後連張單都好特別咁用木盤裝。加分👍👍3個人，每人150蚊左右。呢個價錢，呢個環境、服務、味道，非常可以接受。有機會一定會再黎。…Read More

今日同朋友食午餐。去左呢間以咖啡☕️聞名嘅cupping room。呢間分店有2層，之前黎過幾次，都要先喺下層等位，再喺上層用餐。好啦，講返今日，同朋友等左餐廳等。去到居然唔使等位，只要齊人就可以上樓。我當時心諗咁好彩嘅？🤔但我忘記左，通常上天俾你食一啖砂糖之後，都會逼你食一pat。。。💩我地大概1點10分上到去，一坐低就決定左食咩，好快就落左單，朋友叫左egg benedict with smoked salmon，我叫左house cured salmon on toast，想睇下呢2個究竟有咩分別。我地坐低左無耐，隔離枱就有人落座，再過一陣，隔離隔離枱都有人落座啦。隔離食飯又關你事？當然關啦，因為呢個世界，有比較就有傷害。😢落左單後我地開始吹水，吹吹下隔離枱嘅2個意粉🍝黎左，我地仲偷偷地話個意粉睇落好正。明明隔離枱遲過我地落單，我地仲好天真好傻咁以為可能意粉煮得快啲。再繼續吹，吹到1點半，開始覺得唔對路，隔離枱個意粉都食左一半，隔離隔離枱仲未上菜，但至少都已經上左野飲同餐具🍴，一望，我地張枱都仲係空空如也。🤷‍♀️我地就問個waitress，個waitress check完電腦之後先急急上餐具，再急急走左落樓🏃‍♀️，過左一陣上返黎同我地講幫我追左。到35分，野食都仲未到，我同朋友都係叫一樣嘅野飲，但好奇怪咁淨係上左一杯。🤷‍♀️於是我又問個waitress啦。我：其實係咪落漏左單？waitress：唔係。係部機有問題，落左嘅單無印到出黎。我：咁大概幾耐會黎？⏱waitress：十幾分鐘。。。(我望下時間，佢上菜果陣我應該啱啱夠鐘走人啦😥)。。。幾分鐘我：可唔可以幫我睇下，如果仲未開始整就麻煩幫我取消佢。於是個waitress就落左樓。過左一陣佢上返黎同我地講下面問緊。我果下真係O左咀。😦大佬呀，即係點呀？咩叫下面問緊呀？咁你啱啱落去做左啲咩呀？咁你整緊，咪話我知整緊取消唔到；未整，咪幫我取消佢，再話我知取消左囉。點解要咁含糊？🤷‍♀️咁如果你整唔切，都要俾時間我去下面7仔食個撈麵架，唔通要我喺度白等啦喎？又再等左陣，另一杯飲品上左黎。當我諗住如果1點40分都唔黎就走嘅時候，佢1點39分終於黎到。之後我地立即狂風掃落葉咁食。可能因為心情唔暢快，所以覺得佢嘅野食特別普通。個toast好韌，切/咬好耐先得。隻蛋🍳有啲熟得濟，其實可以唔使煮咁耐，早啲上菜。食完想埋單。見到其他枱都有單，直接拎落去埋就得。得我地枱無單。而全層都無waiter/waitress，要等佢地上黎先問到佢地攞返張單。🤷‍♀️服務真係差到一個點。最燥嘅係個waitress一啲歉意/誠意都無。係，我知，部機壞左唔係你嘅錯。但你落完單後係咪要攞餐具俾我地呀？😡你見到2條儍仔對住張空枱坐左成廿分鐘係咪應該關心下呀？😡你知道部機有問題係咪要交代一下，而唔係淨係話我地知追左？😡答問題可唔可以具體啲？😡特別係果日人唔多，follow up係咪可以做得好啲呀？😡 做錯唔係問題，應對嘅態度先係問題。😡😡😡好啦。公平啲。有彈嘅地方當然都有讚嘅地方。第一樣要讚嘅當然係佢嘅咖啡。☕️叫左mocha，好飲。拉花靚！👍第二樣就係野食嘅賣相。啲擺盤，顏色配搭得好靚，令人一望就覺得好似好好食😋😋，食慾大增。當然賣相同味道係2回事。但唔食得，都睇得呀嘛。👀等三樣係佢嘅環境。首先裝潢好。👍用左好多木制品。令人覺得簡單自然舒服。另外佢嘅燈光真係不得不讚。影啲相係非常靚。連我呢的手殘都可以影到啲咁靚，閃閃發亮嘅美食照，就知佢燈光有幾咁靚。綜合以上三點，就知呢度真係一個IG打卡呃like勝地啦。👍👍👍其實我幾鐘意呢間餐廳。但今次真係令我好失望。😔😔我相信今次係個別事件，希望服務有所改善。…Read More

同同事去餃子園食餃子。雖然隔離排晒長龍，但餃子園都係同平時一樣，入到去即刻有位。👍坐低叫左個蕃茄雞蛋餃轉酸辣湯底，黎左個白菜餃。算啦，😌白菜餃都好食，就照食啦。首先講下個環境先。其實同普通麵店一樣，比較迫。餐具有少少唔乾淨。原本每人比左一隻碗，我地無用到隻碗啦，但佢之後居然無問我地，就咁攞左隻碗去其他枱。真係有啲啼笑皆非，佢究竟有幾唔夠碗用？😂😂落左單無耐就上菜啦。👍酸辣湯底好正😋，好足料，少少辣，我呢啲食唔到辣嘅人都可以食到，👍鍾意食辣嘅人可能就要失望啦。😌餃子都有好多，💕多到食到中間我已經唔記得要數。餃子餡都好足料，咬落啖啖肉，白菜切得細細，食落爽口，同平時食開淋身嘅白菜感覺好唔同。淨係食餃同飲湯都夠飽。👍雖然足料又好食，但鑑於價錢較貴同環境、服務普通，所以我都係比中評嘅🙈。有機會會再黎食。…Read More

話說約左朋友食意粉，呢間餐廳係同事推薦嘅。雖然店名寫係Italian restaurant，但不難發現一啲日本🇯🇵嘅影子，例如餐牌等。叫佢日式意大利餐廳好似會比較貼切。其實我之前食過幾次，每次都好好地無事。但今次唔知係自己時運低，定佢嘅服務水平真係差左咁多。😩坐低拎個menu睇下先。咦？點解濕嘅？😳再睇下，原來張枱都有水。估計係有人倒瀉水。呢下已經勁無奈。😥圖中左下角朋友連埋我，總共3人，一個遲黎一個早走。好啦，我認我地係好麻煩。🙈🙈於是要早走嘅我就自己落單先。落單果陣個waitress已經黑面🌚，問其他人幾時黎。朋友叫左hot tea，仲同佢confirm過，點知最後黎左杯hot lemon 🍋tea。咁好啦，落完單佢就攞啲餐具過黎。救命呀，勁大條菜痴左喺隻湯羹度，有圖有真相。叫個waitress幫我換羹，一啲都唔過份啦。點知佢居然收左我隻湯羹之後同我講：你可以用餐羹💁。喂大佬呀，咪玩我啦，湯羹喺圓嘅，餐羹喺尖嘅，邊忽一樣呀？你不如叫我唔使用羹，直接掂口飲啦。😡😡😡可能我啲怨氣震懾左佢，佢幾分鐘之後有攞過隻羹比我。綜合以上幾點，只能得出服務好差嘅結論。🙅雖然服務差，但意粉都仲係同之前一樣幾唔錯。😋我每次黎都會叫Tarako，即係鱈魚子。因為佢個醬真係好鬼正。鱈魚子分量勁多，多到食完個意粉仲剩返好多醬，完全唔需要慳住食。👍👍👍不過呢個醬要盡快食，唔係就會結做一pat。🙈朋友叫左八爪魚，🐙望住個顏色以為會同個餐湯差唔多味道啦，但原來係完全唔同味。朋友都覺得好食。👍而另一位朋友就叫左蝦，🦐呢款係凍嘅意粉。意粉之外，餐湯一般，咖啡幾好飲。☕️價錢有少貴，但倘可接受。雖然服務好差，但食物真心唔錯，所以今次比中評。希望下次黎服務會有所改善。…Read More

今日一個中學同學特登由灣仔過黎中環陪我食飯。因為佢時間緊迫，所以約左食另一間，點知去到有勁多人排隊，要等30個號碼，極度懷疑lunch time完左都唔會排到。於是我地即刻openrice下附近有咩好野，就揀左呢間睇落唔錯嘅法式漢堡店。🍔同一般漢堡店一樣，都係要先點餐，再搵位。一開始都有啲擔心買完之後會無位坐，好彩買完之後剛好有位。長枱嘅座位係一條條長櫈，所以要同其他人一齊坐，會比較擠迫。😣因為唔知邊款好食，所以點左同餐廳同名嘅漢堡，諗住應該唔會差得去邊。點完可以先返座位等，食物準備好會有人送過黎。👍👍我點左同名漢堡加罐裝可樂，而中同就點左同名漢堡套餐，即係漢堡、飲品同薯條🍟。其實套餐係幾平，比飲品貴少少，但多一大個薯條，可惜我近排好細食，所以無叫到套餐。個漢堡叫左medium，一咬落口已經爆晒啲肉汁出黎，肉質細嫩，一啲都唔老。個芝士好正。🧀咬一啖之後可以拉到勁長！茄乾🍅個味道好出，酸酸地，好開胃，正好可以平衡返牛肉同芝士嘅油膩。😋粗薯條外脆內軟。外面啲調味料都好惹味。茄汁可以自己攞，唔驚唔夠用。漢堡加飲品份量啱啱好，服務都唔錯，有機會會再黎。👍👍…Read More

前幾日夜晚同朋友去食飯，天氣轉冷，大家就決定去食火鍋。😋餐廳喺朗豪坊最頂層最裡面非常唔起眼嘅地方。去到之後大概排左半個鐘先有位。入到去發現其實都仲有空位。每人可以自己叫一個湯底，我就叫左昆布湯底啦。趁個鍋未到，緊係要去攞野飲。有汽水，檸檬茶等等。攞完野飲就去攞野食，蔬菜同丸類任食，攞野食嘅地方好乾淨企理，差唔多無就會再添上。望住啲新鮮食材真係會令人心情愉快。😌😌返到埋位，個鍋已經黎左，喺度煮緊。而肉都已經到左。可以開始大吃大喝。🍽🍽牛🐂、雞🐓、豬🐖肉都幾好食，又唔肥，又唔韌。蔬菜都好有水準，特別係娃娃菜真係好好食。丸類呢 ，就推薦芝士丸🧀。值得一提嘅係服務真係幾好，叫加湯好快會加，叫左肉之後都好快上。我地最後食到超時，個staff仲提我地雪糕🍦可以拎走食。最後每人$175埋單。野食好，服務好，仲要價錢平！值得推介！👍👍缺點只係等候時間較長。不過都提提大家，加一隻雞蛋要加$10。…Read More

今日又同同事食飯。因為同事話自己好手緊。於是我地就去左食沾仔記。😌一落到去完全唔使等，立即有位。👍餐廳裝修比一般麵店有誠意，全部四四方方嘅木製枱櫈。樓面大，難怪咁快就有位。👏一坐底就有人過黎問要食乜。講真，餐牌都未睇完真有少少壓力。😐叫左雲吞鯪魚球麵。落左單5分鐘都唔使就上菜。效率滿分。💯雙拼雲吞鯪魚球，分量多到見唔到啲麵咁濟。雲吞啲蝦好彈牙，有蝦味🦐，皮薄。鯪魚球勁大粒，🐟從來未食過咁大粒，都幾彈牙。啲麵呢，梘水味有啲重，不過落左淅醋之後就好左好多，軟硬都適中。湯味濃郁。女仔剛剛好夠飽嘅分量。今次盛惠三十幾蚊，呢個質素黎講堅係平😋😋，就係環境壓力比較大，唔敢慢慢食，整個用餐過程唔超過半個鐘，食完仲夠時間去隔離買杯珍珠奶茶。下次月尾唔夠錢嘅時候再黎啦，哈哈。…Read More

果日同同事諗住去吉吉打邊爐啦， 點知吉吉居然無晒位，😩經過一番考慮我地決定轉投富臨嘅懷抱。🕺雖然係星期五晚，但去到都唔使等，即刻有位。👍一埋位就叫左個芫茜皮蛋湯底。芫茜味幾香，但我地食食下就食晒啲芫茜，如果要加就要額外加錢。💸💸飲品同醬料自取，分量可以自己調節。叫左啲野一次過到左好多。肥牛好食，🐂一啲都唔老，同埋勁大方，一次已經上左好多，食到最後都唔使再加過肥牛，唔似某啲酒樓要加無限次單。蟹柳🦀好鮮甜，話咁快食完再叫多左round。龍蝦丸好正！勁多蟹子，同埋彈牙得黎好鬆化。強烈推薦。墨丸🦑都係勁彈牙。而芝心丸🧀就同出面賣嘅唔同，係圓形嘅，細細粒，煮左之後就變到同平時一樣大，裡面啲芝士好流心，好正！👍👍其他仲叫左菜、炸魚皮🐟、魚皮餃、豆腐等。叫左生菜唔知點解變左西洋菜，分量大。炸魚皮催左無限次先上，分量大，好食。魚皮餃真心麻麻。豆腐叫左一份，比左成板我地，食極都食唔晒，味道麻麻。服務呢，認真麻麻，🙊野食呀、加湯呀，催極都唔黎。😡但有個姐姐對我地勁好，以上問題全部都係佢幫我地解決，仲成日會過黎問我地「啲野到齊未呀」，「gas就黎用晒啦，幫你攞支新嘅過黎啦」，「啲湯就黎無晒，幫你地加啲湯啦」嘩！人間有愛呀！即刻比姐姐治癒晒。😍😍因為我打邊爐主要係食丸同肥牛，所以呢兩樣好食我就覺得可以。價錢方面，我地3個人，每人$138埋單。加上有姐姐體貼服務加持，我就覺得價廉物美，會再黎啦。👍👍不過我其中一位同事就嫌佢唔乾淨，同服務差，仲反問我覺得邊樣好食。🤷‍♀️Well，咁每個人唔同口味，我食開平民邊爐，真心覺得幾好食，同埋唔算污漕，好多幾百蚊嘅日式火鍋都係差唔多質素。服務差，係嘅，但公平啲，一分錢一分貨，呢個價錢，我會比好評佢。…Read More