holidayfever's Profile

講到咁好食，見咁多人係到排隊，Ss唯有排埋一份。當日舖頭得兩個人，一個收銀同一個負責查嘢食，所以差不多等咗半個鍾先食到。肉鬆雞蛋仔坊間少有，所以決定揀啲個試吓。如圖所見，雞蛋仔入面唔多肉鬆，所以Ss覺得唔夠味，唔咸唔淡咁。但男友食咗幾粒，都話肉鬆味ok,睇返，原來佢好手勢都揀到啲多肉鬆嘅。肉鬆分配唔平均，食得唔盡興，所以Ss覺得要等半個鐘唔化算。夾餅都鬆軟好食,不過等咁耐真係要諗下先~…Read More

餐廳午市時可以選擇嘅食品唔多，主食得三四款左右。牛油果蕃茄車打芝士法包三文治賣相正嘅，不過加啲醬汁冇咁dry 就好喇，味道其實都係好普通。不過火箭菜配埋啲意大利醋同芥欖油，個汁調得幾好食，火箭菜又新鮮，冇咩苦澀味，整得幾好。Mocho跟餐需另加十蚊，不過麻麻地，有進步嘅空間。從食品嚟睇，cafe 行台灣路線。甜酸雞球飯做得比想像出色，粉唔算厚，甜甜酸酸好開胃。菠蘿用新鮮嘅，有誠意，唔係茶餐廳貨色。不過杯咖啡帶酸，麻麻哋喇。環境清閒幽靜,令人可以停下來休息一下,蠻喜歡。…Read More

拜訪咗三四次都買唔到，終於琴日咁凍，少咗人買凍嘅芝士蛋糕，這次機會終於屬於Ss喇！！拎到返去就即刻開嚟食，老實講，層次唔係好分明。不過嚿cheese cake 真係充滿濃厚牛奶芝士味，口感好creamy又有少少似食梗雪糕咁，真係好正！份量真係偏少，$180一個唔可以話平，但堅好食，試完真係冇後悔！…Read More

天氣寒冷，食雞煲是常識吧！Ss唔係食辣之人，所以揀咗微辣，但真係微辣到感覺唔到。其實已經冇揀bb辣㗎喇！下次至少要食小辣。二人行揀咗例牌，其實份量足以四人份量，$148真係抵食。雞件新鮮，價錢合理，冇醬油茶芥，唔怪得咁多人排隊食，抵佢咁旺場嘅！打邊爐一定食肥牛啦！驟眼望好似好靚仔，食落就發覺好細塊。初頭以為一兩塊係咁，點知成碟都係咁。切到咁細塊，口感固然係冇。。。Ss寧願佢切大塊啲，食得過癮啲。肥牛係新鮮，肉味夠，唯刀功大大扣分。蠔係冰鮮嘅,初初諗住唔係新鮮,點知唔係WO~鮮甜好食,性價比高。牛肚有D羶,唔太啱口味~~不過D到D侍應服務好好,食物質素CP值高,可以再嚟幫襯!…Read More

天氣咁凍，日日打邊爐食雞煲都唔係辦法。其實食返碗熱騰騰嘅拉麵都好暖胃仲冇咁熱氣添。嚟黑龍本身想食返碗豚骨拉麵，但$88冇蛋食好似冇咁抵，所以就揀咗牛筋black 拉麵喇。湯底一食落都覺得係偏濃，但食到尾嘅時候就會覺得其實係真濃味。尤其是個黑蒜油，食完成晚仲感受到個陣餘韻，感覺麻麻地。湯底係惹味好食，但有啲味精feel。义燒流心蛋普通，冇咩特別之處。精髓係牛筋，炆得超腍超好食，可惜得三四粒，太少了，實在唔夠喉。拉麵方面，Ss揀咗普通，彈牙挺身，掛湯力一流，而且湯底本身濃稠，比較容易掛湯吧!以香港嚟講，啲到嘅拉麵算係出色，有機會會試埋其他款式！…Read More

№126/Marron Chestnut cream and chestnuts @ L'Eclair de Genie唔駛去法國都食到Do姐介紹嘅泡芙。咁啱經過唔駛排隊，而佢又未賣晒啲泡芙，得返一千零一種嘅栗子味，咁啱又係栗子當造嘅季節，實在搵唔到理由唔試吓……XD栗子忌廉充滿新鮮栗子味道，比坊間一般質素略勝一籌，唯Ss比較重口味，覺得可以甜返少少。糖漬栗子好普通，如果有酒香，好似好食啲。泡芙比較乾身，感覺忌廉還忌廉，泡芙還泡芙，冇一種融合嘅感覺。$45一件，實在係貪新鮮先去食。星期日下午四點幾賣淨四五件餅，大家想試就要趁早喇！Ss其實都好鐘意食泡芙，最鐘意食嘅泡芙係Vero Chocolates出品，以前係landmark有，可惜以經close咗。以品質同味道來說，Ss喜歡Vero多一點。…Read More

Ss真係好outdated...到以家先第一次去食日式火鍋放題…朋友食過，介紹俾Ss去食，Ss心諗都應該好食嘅。Ss今次揀咗$208澳洲貴族和牛，係openrice 下載coupon,原價$298，服務費收原價嘅10%。湯底加$18揀咗雙湯底，分別係壽喜燒同黑蒜豬骨湯鍋。湯底好普通，黑蒜豬骨湯鍋更加食唔出有咩味…澳洲貴族和牛其實算是不錯，食落口幾滑身，可惜牛肉切得太薄，攪到冇咩牛味，另外亦試咗美國肥牛更是慘不忍睹，好彩冇貪平揀美國牛！豬肉有幾薄.......自己睇..........另外，出面有其他火鍋配料拎，當中丸類選擇很多，而質素都很不錯。甜品亦有十款到，以放題嚟講都算多選擇。甜品質素比較普通，不過有froyo已經好好喇！成個放題得90分鐘，其實食得比較趕。今次埋單，兩個人$500，未算抵食，不過Ss覺得可以一試嘅。題外話，餐廳地下好滑，已經小心行，都仲有滑腳嘅情況，大家如果去嘅話，就要小心啲喇！…Read More

阿二焗薯 @ 叁薯焗薯上面仲有一堆薯蓉，薯蓉上面有芝士、沙律醬，topping加堆蔥花同煙肉。薯仔都玩唔同層次，Ss覺得好有heart。份量唔會太多，剛剛好，$28街頭小食嚟講，水準唔錯，唯味道都係standard,未有驚喜。其實Ss都想試吓其他原隻焗薯，不過企係條街到食，好似有啲狼狽><…Read More

Greenhouse 係時代廣場食通天新開嘅餐廳，走休閒西式fusion 路線，餐廳環境綠化，俾人relax 感覺，印象良好。波多黎各菇真係第一次食！燒完之後都仲好大隻，好多汁，肉厚，不錯吃。醬汁混合咗泡菜嘅辣味，沙律醬同芝士，組合新鮮，又match,熱辣辣上枱，唔好心急食，小心啲芝士跑出嚟辣親咀！ $38一串，至少要order 兩串，圖中為兩串。銅鑼灣→時代廣場→波多黎各菇→只可以講係啲個價位了！炸薯條熱辣辣上枱！雖然好熱氣，不過好正！黑松露蛋黃醬堅正，味道調得剛剛好，黑松露之間又滲出淡淡嘅蛋黃味，好balanced！啲個組合無得輸！因為太好味，前後食咗兩個薯條，食薯條都食咗百幾蚊…虎蝦煙三文魚米紙卷配香醋汁 紫色嘅米紙卷第一次食，不過其實冇咩味。外型靚靚，內在如題有虎蝦同煙三文魚，虎蝦好彈牙，但都冇咩驚喜，$108 五嚿，一啲都唔親民呢～～ 香辣羅勒三文魚意粉$138,好細盤.........羅勒嘅味道太strong.......個人不是太喜歡特色黑松露鮮蝦椰菜花咸蛋薄餅黑松露味濃,但食唔到咸蛋,唔講唔知有,整體比較咸。pizza 可以用脆薄來形容.....法式香蕉黑糖焦糖燉蛋配黑咖啡 啲個甜品的確有睇頭！侍者上餐後，就會點火，估唔到都幾大火，仲燒足成分鐘有多添！！啲火藍藍哋色，又幾靚喎，約女仔嚟食夠誠意！可能又黑糖又焦糖，Ss覺得好甜。但係配埋啲黑咖啡，mix 堆啲酒香味，好食！SS仲有叫蟹餅等其他菜色,總的來說份量都幾少，三百蚊一個人都唔覺得飽～～但openrice 個range明明係$100-200……………Read More

旺角實在離Ss太遠………直到以家先有機會嚟會一會佢～～雖然有好多人對佢嘅評價麻麻地，不過Ss一早已經好想食，所以唔食過係唔會心息嘅！本來想食焦糖爆谷雪糕，但Ss男友覺得價錢一樣，試多隻味值啲，所以就揀咗啲個。雪糕溶得幾快，所以食得有啲急。老老實實，Ss好鍾意食焦糖爆谷，愈甜愈好，所以IFC間爆谷店係Ss飛佛。相比起個間爆谷，sweet monster 嘅焦糖爆谷冇咁甜，不過對一般人嚟講已經好甜，所以視乎你對焦糖嘅喜愛度因人而異。芝士爆谷都幾咸下，質地soft 啲，不過Ss本身唔鍾意咸爆谷，加埋啲雪糕又甜又咸就覺得怪怪地。成杯雪糕超多爆谷，食到底都仲有，爆谷先係主角，不過混堆雪糕腍咗，口感差啲。可惜雪糕本身唔係好出味，雪糕車嘅雪糕好食過佢多多聲，下次嚟買爆谷就好了，$29一盒好似唔係好貴。…Read More

琴日經過sogo,仲係有一條好長好長嘅人龍，起碼五、六十人。點知係街頭遇到新開嘅半熟工房，仲要得幾個人排隊。Ss排咗一陣就買到喇！$22一個，比Bake貴少少，但份量亦比Bake 多。即場食，芝士流心一流，不過芝士都幾酸吓，友人話有啲似乳酪咁。餅底比Bake 紮實，Ss較為喜歡。不過總的來說，Bake 啲芝士調得好食好多。不過唔駛排咁耐,當然試吓啦~…Read More

秋風起，鍋物又係時候出動喇！第二次去上品打邊邊，都知上品係行中上價精緻火鍋路線，不過今次有啲小失望。二人行打邊邊都預咗唔會平，所以湯底就冇揀貴，蕃茄牛肉湯底，湯底主要靠蕃茄膏出味，甜甜地都係幾好食。奄仔蟹，$98一隻，都有手掌咁大，都算多膏，算抵食。肥牛有好多款，今次揀咗手切肥牛，少少肥，有牛味，幾好食，八十幾蚊，份量實屬普通。雙拼蕃茄湯包同手打芝士蝦，$98得幾粒………唔抵食。而且蕃茄湯包浮起咗，烚咗好耐，入面啲豬肉都係紅色…初初以為係蕃茄啲色，但烚吓去佢又會變返色，同男友食咗四隻都係咁……好不安……芝士蝦得兩隻，一上枱已經見到有啲雪包住，好唔新鮮咁……所以烚耐少少驚唔熟……點知好似食咁橡筋咁，冇鮮味又勁韌……好失望………仲叫咗個菜、魚片、竹笙、嘢飲就六百蚊落樓。二人行打邊邊都預咗唔食得多款同貴少少，不過啲質素下降到咁……都係去任食算喇………Read More

終於等到同事生日，食到佢喇！！ 個綠茶cream 好豐厚，夠晒滑，濃味得嚟又唔會太甜，有甘香亦未至於苦，拿捏得好好，讚！綠茶海綿蛋糕夾有紅豆同黑芝麻醬，亦不錯，不過個cream 較濃味，佔嘅比例較重，同海綿蛋糕一啖食嘅時候，cream 嘅存在感強烈好多。食完，搵到理由買返個返屋企自私食！！…Read More

掛住去泰國旅行嘅日子，所以就食返餐泰國菜，安撫吓……～ Siam 28新開冇耐，時日食飯，都唔見有好多客人，所以餐廳環境比較寧靜。大蝦袖子沙律，袖子唔算多，反以紅蔥、泰式蝦米同其仔香料比較多，食食吓都幾辣，不過同時都幾開胃。大蝦啖啖肉，鮮味普通，尚算幾好。炸蝦餅：味道實屬普通，$78五少塊，唔算平，早知份量偏少，會揀其他。黃咖哩牛腩:咖哩唔辣，仲幾甜添，友人覺得甜咗啲，但Ss都喜好甜咖哩，反而幾鍾意。薯仔行爽嘅路線，唔啱Ss。牛腩炆得淋又不失口感，好食，唯份量偏少。好食嘅總係想食多啲。去泰國時，每日都會食返個芒果糯米飯當宵夜。係香港，仲未搵得返啱心水嘅代替品。嚟到Siam28, 當然要試下，睇下大家夾唔夾啦！煎糯米飯第一次食，熱烘烘上枱，傳來陣陣煎香，好吸引。糯米飯沾上蛋汁，唔會痴鑊，食落去有啲煙韌，不過會比較硬身，點上又咸又甜嘅椰漿，幾好食。椰漿嘅調味同泰國幾乎一樣，正！不過Ss個人唔太鍾意沾蛋汁，正如煎年糕沾蛋汁一樣。Ss比較喜歡吃原汁原味多啲。芒果以家已經唔當做，不過Siam 28啲芒果甜而不膩，有小清新感覺，有誠意。Siam 28嘅食物都係行精緻路線，幾個女仔慢慢食住傾計，係一個唔錯嘅選擇。…Read More

下午六點鐘去到，諗住臨近晚飯時候，應該會少啲人，但都有十個人排梗隊，等咗半個鐘，終於入到去喇！京林屋嘅食品都會加入牛奶，調和茶味，令茶嘅甘香淡咗。作為牛奶控同抹茶控嘅Ss,當然好歡迎，因為Ss兩範都好ok。而Ss男友平時唔太特別喜好抹茶嘅，都like,覺得個味道mild啲。焙茶啫喱其實冇乜味，配堆雪糕食，多個口感。睇相就見到內容豐富！有抹茶雪糕、白玉、紅豆、寒天、蕨餅、生茶啫哩等，每樣少少，已經湊成一大份，食完都好飽肚。抹茶雪糕，加入牛奶，充滿牛奶香味，令雪糕更滑。蕨餅比想像中有口感，有少少嚼勁，但冇想像中好食，比較普通。其實總體水準唔錯，但冇咩好特出 ，試完未有好滿足嘅感覺。京林屋嘅環境比起中村一定係冇得比，要海景冇，要空間冇，不過卻一室日本裝潢，幾雅致。但講到最like 嘅係等候時間，半個鐘其實唔算短，但係半個鐘係等唔到中村，多個選擇真好！…Read More