GraaWong's Profile

同家中老人飲早茶，盈圖乃平靚正之選，值得推介！開咗鐵觀音，並非茶包貨色，而係非常濃味嘅真正靚茶葉，茶香撲鼻，入口濃郁，兩老非常滿意！叫咗三個早晨孖寶，每份$36.8，只牛肉腸粉稍為遜色，其他五個點心好好味，鳳爪排骨飯係濃濃嘅蒜香，飯粒分明，香煎蘿蔔糕有一條條嘅蘿蔔絲，潮州粉果包皮同埋筍粒花生餡嘅比例適中，比奧海城嗰兩間貴價茶樓傑出，味道亦比添好運優勝，不過入座後要等咗一陣先有夥計埋位招呼，呢個就要扣返少少分，部份點心忘記影相，大家有興趣不妨試吓，我真係覺得相當之唔錯。…Read More

北角港運城對面開咗間新嘅餃子店，坦白講門面真係毫不起眼，非常之平凡，不過個餐牌上面有句野好吸引：花膠淮山豬骨湯底，仲强調話係絕無味精！見價錢唔貴，隔離間間堆滿人，就入去叫咗個鮮肉韭菜餃同鮮肉白菜餃雙併加菜底，同一個海鮮餃米線，果然入口d湯真係非常非常鮮甜好味，我哋飲晒成碗都唔口渴同滯胃，應該真係冇花冇假嘅真豬骨湯，正正正！今次試咗三種餃，餃皮稍厚但喺可接受範圍，餡料又係真材實料，兩種鮮肉餃都充滿新鮮豬肉嘅鮮味，喺街舖以此平民價錢食到呢種味道，真係超乎想像！海鮮餃雖然稍淡口，但係有一陣淡淡嘅鮮蝦海鮮味，蝦肉鮮甜亦有點彈口，如果喜歡食物原鮮味嘅話，呢間小店真係值得一試。.......我試此店，真係有d驚為天人，因為呢間店真係唔多客，可能係比佢嘅平凡外表呃咗，我都冇諗過小店嘅湯底同埋鮮肉餃嘅味道竟然可以咁高質，如果店主之前將間店嘅門面包裝下，生意一定不止於此！而家諗定，下次又要試下其他味道嘅餃子喇！…Read More

店舖位於屯門屋苑角落，店內見有2位印度人（？），1男1女，我估個女嘅應該係大廚。今日幫襯，叫咗個咖喱牛肉，咖喱蝦，薄餅，羊肉薄餅，好有印度家庭咖喱嘅特色風味，價錢唔貴，牛肉不錯，蝦就稍鞋，羊肉薄餅較硬，冇餡嘅味道薄餅好好多，點咖喱汁食味一流，但係整體而言，算惹味，再濃味d更好味，但係呢d就係家庭風味嘅特色，我覺得好味過賣大路野嘅屯門咖喱屋好多添。值得推介。…Read More