hahahahasiu's Profile

本身好鐘意食台灣野，一於就去食好近地點站的一葉台灣料理，疫情關係，環境衛生都做足夠，好乾淨利落~首先食左個三杯蛋豆腐，宜家d天氣，見到個煲仔上，熱辣辣，食落真係好暖！豆腐好滑，個醬汁係整三杯雞個d味道，送飯都真係一流，又健康營養。之後再上左宗棠雞球，雞係有炸過，外面少少脆，咬開啲雞肉仲有肉汁，唔鞋。口感好正，又嘢味，送飯真係一流，個汁真係會食多2碗飯。食完飯，會送一客甜品，真係一個完美endding.…Read More

二人限聚令下同朋友喺銅鑼灣食炸雞，本來以為好少人，點知上到去都差唔多full曬。第一次食呢間，餐廳裝修好有型格，幾有feel。當然有韓國最出名嘅炸雞同啤酒，不過朋友話想食烤雞，無咁熱氣，所以我哋就嗌咗一份烤雞。香蒜焗烤雞即叫即焗，拎上手熱辣辣，聞到好香嘅烤雞味。唔好望住得幾片蒜片以為無乜蒜味，舊雞完全醃製得好入味，除咗好香嘅蒜味之外，仲有濃嘅醬香味。雞皮好好味，仲有少少蜜糖嘅甜。雞肉好嫩滑，亦都好多汁，一啲都唔鞋，就連雞骨都好入味。隨雞附上迷你垃圾桶，手套。醃蘿蔔，酸酸甜甜，好醒胃，一解烤雞嘅膩。見到餐牌有牛骨湯，每次去韓國必食，所以都叫咗一份。牛排骨湯牛排骨有成五六大塊，仲有啲大葱，金菇，冬菇同粉絲等，好足料。牛排骨肉好軟淋，骨肉好易分離，湯都幾清香鮮甜。…Read More

約咗朋友太子食飯，經op搵到呢間容記小菜王，啲餸菜好似幾吸引咁，就walk-in入去食。入到去見到每圍枱都有嗌招牌菜燒肉，所以我哋都嗌咗一份細嘅燒肉。原來燒肉拎咗米芝連燒肉肥瘦相間，好明顯嘅五層，忍唔住即刻食一舊，啲肉好軟滑，外面層皮燒到卜卜脆，仲要一啲都唔係死咸，好好味，難怪會拎獎，真係有啲後悔無嗌大份。見到餐牌推薦蠔皇鮑魚扣鵝掌，要咗兩份。鵝掌炆到好入味，夠淋，呢個價錢嚟講鮑魚都算幾大只，起碼唔會係一口鮑，有咬口，又吾會韌。見到沙薑雞腳就好想食雞腳好大只，本身已經幾夠咸香，再點少少沙薑蓉，好好食。沙醬蓉磨得好幼滑，好香。最後叫咗個花甲煲，見到餐牌有花甲龍躉煲，未試過甘嘅組合，試吓先。味道有啲似水煮魚，花甲好大只，好厚肉，又無沙。估唔到龍躉同花甲煲係咁夾，肉質好實，又掛汁。辣得好過癮，令人停唔到口。等疫情過咗我會帶屋企人過嚟食，多啲人可以嗌多啲餸。…Read More

同屋企人過去mega box買嘢，途經見到門面裝修幾簡約風格嘅飲品店，無留意係飲咩就入咗去啦。原來係一間主力賣堅果奶蓋嘅飲品店鋪，芝士奶蓋就飲得多，堅果奶蓋反而未聽過，好好奇到底係咩味道，即刻叫兩杯試吓。有好多款口味可以選擇，仲有唔同嘅甜度同冰度，而且店鋪好乾淨整潔。見到有夏季限定嘅芒果🥭就叫咗一杯芒芒堅果奶蓋茶。芒芒堅果奶蓋茶微糖走冰除咗上面嘅芒果肉粒，杯底係由好多芒果肉打成嘅茶底，每飲一啖都食到啖啖芒果肉。堅果奶蓋好濃密好厚身，密度咁高，所以呢個奶蓋可以話係用嚟食而唔係飲，而且好重nuts味。店員提醒可以用呢舊嘢去不啲奶蓋食，賣相好得意。繽紛火龍果堅果奶蓋茶走甜走冰走甜反而更加飲得出火龍果本身嘅清甜味，水果好新鮮，全部都係真材實料，果肉好多，堅果奶蓋又好奶香好滑，配搭水果又可以解膩，出奇地夾。仲好細心咁貼咗張紙教人點飲，下次再試吓堅果奶先。…Read More

聽聞呢間豆漿大王嘅秶飯唔錯，於是買外賣返屋企食。要咗一碗咸豆漿同秶飯，全加料。秶飯經過大半小時嘅車程返到屋企，我都對佢無乜太大期望，點知一食，超級驚喜！舊油炸鬼脆到不得了，好似食緊超級薄脆嘅餅乾甘，仲有好香口。最外面嘅層糯米飯，好薄，飯煮得好夠乾身，又有咬口，好煙韌。炸菜好爽口好碎，同肉鬆嘅形態好似。咸豆漿，第一次飲，口感好得意，好多櫻花蝦，仲有油炸鬼，不過今次嘅油炸鬼浸咗落熱豆漿咁耐淋曬了。我覺得都幾好飲喎，雖然話咸豆漿，但飲落一啲都吾算咸。可惜新蒲崗太隔涉，如果唔係就可以多啲買嚟食了。…Read More

同屋企人睇完戲過嚟呢邊搵嘢食，見餐廳係食泰菜，就入嚟試吓。冬蔭功海鮮湯泰式肉碎生菜包肉的醃料偏咸蜜糖烤豬頸肉保持到嫩滑嘅質感泰式併盤菠蘿最好味，好甜好juicy。龍蝦意大利飯龍蝦都算大只，幾彈牙嘅。燒焗鮮魚配泰式辣汁魚好鮮甜多汁，一啲都唔乾，肉質好滑。如果你係想食新派啲嘅泰菜，可以試吓嘅，但我覺得唔係太啱自己口味，可能我都係比較鍾意食返正宗泰國菜嘅風味。…Read More

灣仔鬧市中嘅泰國小店，lunchtime都要等一陣先有位，得四張枱，見好多人都係嗌外賣。我叫咗個豬頸肉炒飯，米飯炒得粒粒分明，但又唔會令到啲飯乾真真。有洋蔥粒，肉碎同菜，好香口，菜炒得好青綠。豬頸肉好食，幾juicy，幾推薦大家嗌呢個炒飯。…Read More

以前成每次想食台式麻辣火鍋就會好自然諗起佢，因為性價比高，又平又正，任飲任食一個人先$158。例牌都係叫麻辣同芫茜皮蛋湯底有得揀兩種辣度，我哋要辣啲嘅，都係可接受範圍內。用顏色分別肉的部位，幾細心，起碼你食過鍾意想再嗌都知道係邊啲肉。其實啲肉都幾有牛味，我最鍾意嘅係白色碟嘅牛五花，好有咬口，又有小小肥嘅油脂。蝦都幾彈牙，今日啲聖子仔有沙，白鱔片好滑同新鮮。…Read More

慶祝週年紀念，入咗嚟愉景灣，因為我嘛嘛哋西餐，所以見到呢間食中菜就打算求其食一餐算啦。一上到餐廳，全場full曬，等咗一陣先有位。叫咗個二人套餐，跟例湯。咕嚕肉炸得乾身，有鍋氣，酸酸甜甜好開胃，好食😋醬燒茄子茄子好軟滑，唔單止得肉碎，仲有啲碎菇粒，夾埋肉碎食，又多一重口感，好食😋炒小棠菜相比前兩個餸菜，呢個就比較普通遜色咗啲啦，好清淡，基本上好似係淥菜。另外叫咗半只北京填鴨好好食，我本來以為應該嘛嘛哋，點知同出面主打食填鴨嘅餐廳水準差不多，好有驚喜，肉滑，鴨皮好有油脂香，但唔會太多肥膏。砂鍋雲吞雞見隔離枱食得好滋味，我哋都忍唔住叫咗半只。半只雞，雞肉都ok嘅，但偏小小鞋。雲吞好食😋仲有好多娃娃菜，好有咸香嘅火腿肉，個湯好好飲。仲叫咗一碗四川擔擔麵面嗰層油係偏辣，再撈匀最底嗰啲花生醬，中和返個辣度，好好味，個麵唔會太淋，而且都有幾多菇。如果下次再入愉景灣，我一定會再返嚟食，食咗咁多個餸，每一樣都好有水準，真係覺得好有驚喜，價錢同食物質素完全成正比。…Read More

朋友請食燒肉，bk咗星期五晚7點，到埗嗰陣餐廳都坐咗一大半。我哋加咗每位38蚊任食澳洲m5和牛。刺身任食，其中我最推薦係馬刀背，好爽口。m5和牛唔好燒到全熟，七八成熟就好perfect，一入口充滿油脂香，食落好柔軟多汁。因為無牌寫住係咩部位嘅牛肉，好難知自己食緊咩，但肉質都唔錯。刺身幾新鮮，仲有小食同串燒，日本蕃薯仔好甜 飲品任飲…Read More

今日同fd去apm食飯，試下呢間本陣～有燒肉定食&燒肉放題揀，因為我地啱起身冇耐唔想食太多，就揀左燒肉定食。牛肉三品燒肉定食$98有3款牛肉，屬於偏瘦的肉，還可以，仲有個豆芽前菜，飯，海帶蛋花湯，配一個飲品～餐廳入面仲有個沙律bar，可以任食沙律🥗而且種類都幾多下，有椰菜絲，生菜，青瓜，粟米，紅腰豆，蟹棒～全部好新鮮，出面食個沙律都要6，70所以呢度好抵食！…Read More

譚仔，一個月總會食到五六次，特別係一個人嘅時候，快靚正。套餐就係乜餸都有啲，豆卜，竹苼同菜索曬啲辣湯底，好入味，通常散叫我都會嗌呢幾樣餸。譚仔同三哥嘅炸醬味道都幾大分別，個人鍾意食譚仔炸醬多啲。…Read More

平時係觀塘呢頭返工，不時都黎工廠大廈呢頭搵食。今日去到駱駝漆大廈三期呢度食餃子，呢到好特別，本身係淨係買凍肉嘅，之後賣埋餃子，但出奇地多人黎食，同事地食過都話好食，今日我終於都一齊黎食～原來佢呢到得2款餃子🥟賣，分別係韭菜豚肉&白菜豚肉，肉餡係用黑豚肉整嘅～皮就分左厚皮&薄皮，個人鍾意食薄皮，就叫左薄皮雙拼～ $52蚊15隻餃子都幾大隻下，韭菜餃好多汁，新鮮，唔似平時食嘅急凍餃～白菜餃就味濃dd，皮薄多汁，的確唔錯～…Read More

一人晚餐，就決定食拉麵🍜方便又快捷。餐廳好大，座位都幾闊落，有好多唔同種類嘅食物，咖哩牙，壽喜燒嗰啲都有。叫咗一碗赤豚拉麵🍜加多份燒牛舌。拉麵水準都唔錯，濃底小小辣粉，唔算得上辣，仲食得到豬骨湯底嘅味道。麵嘅軟硬度係我鍾意嗰種，唔太硬但又夠淋掛到汁。豚肉反而有小小偏乾，木耳絲幾爽口，夾埋麵食口感會豐富咗。燒牛舌牛舌無乜太多嘅調味，滴幾滴檸檬汁上面更加好食，燒得幾好，入口吾韌。仲有就係店員好有禮貌。…Read More

水煮魚就食得多，酸菜魚之前食過一次，印象好差，就無再食過了。朋友話帶我去食十二味，會令我改觀，一試無妨啦。因為之後會去食糖水，所以就只嗌咗一份酸菜魚，本來都驚會唔夠飽，點知一上菜係好大一份，香氣撲鼻，我就知道無中伏了。我哋叫嘅係中辣，但食落口又唔覺太辣，反而好夠酸，酸菜好開胃，用嚟送飯一流。魚好滑，唔腥。下次再嚟嘅話，可以再嗌多啲其他餸。…Read More