大口妹的大檸樂's Profile

久唔久同閨蜜食貴西。朋友揀左舊日航酒店(宜家叫乜千禧乜乜)既Sagano嵯峨野，我大口妹幾時都話食魚生，一係唔食，一食要食貴價，主要因為係生既食物！唔係我特別食得起，不過你計下，茶記宜家都$60蚊碟飯，好平咩？我咁孤寒，平時左慳右慳，其實一個月食餐貴西，都對得住自己丫！你唔對自己好，鬼有男人對你好咩！又叉遠左添嘻嘻！去過京都的都可能知道，嵯峨野及嵐山位處京都西邊，風景極美，食物偏向精緻小量。食Omakase其實都係食新鮮、切功、擺設、氛圍、服務，Sagano統統都做到好近京都味道（當然周圍香港話，你要靠點想像力囉）所有都好到位，最開心係大師傅好傾得好玩得（唔開名嚕）！講真，人地係酒店做廚師發辦既廚師，咩貴客未見過丫，要嘥時間特別招呼你？你邊位？大口妹食過好幾家大嘢，服務周到客客套套，但好似呢位師傅咁融入就極少有。當然大口妹本人都好八面玲瓏人見人愛係車都載，到底人與人之間相處，都係出於真心最開懷既！呢餐，淨係統d大小師傅玩都賺返！…Read More

機場食肆食到厭，搭車過黎東薈城新翼地睇下有咩好嘢食先。見有間台灣牛肉麵，出面排左好多人，伸個頭入去聞下，好香濃湯味，最怕連陣味都唔掂。咁就排隊啦，排左一陣就有位。雖然細細間，都有幾多唔同牛肉麵選擇。又想試佢地牛腩肉，又想試佢地牛筋，我就點左碗紅燒牛筋肉麵。麵黎到，飲啖湯先，湯濃香好味唔鹹。麵就得似刀削麵的粗麵，我比較鍾意陽春麵，奇怪咁快就賣晒，預麵量渣左d播！雖然係粗麵，但都入味易咬唔似一條厚麵粉。好怕食刀削麵就係好韌好難咬牛肉都好稔無渣，牛筋都入味夠稔，整體OK既，未至於超好味，但起碼唔使搭飛機食到少少台灣風味。…Read More

上次食完個厚硬粉漿粟米班腩飯，非常失望，但見到其他食物個樣吸引，都想俾多次機會。今次晚飯時段，人潮就更多聚集係門口，逸東無咩好嘢食，附近幾條邨都應該等到頸都長，先等到有間唔係連鎖店，食嚟食去嗰啲嘢，有間新野突然彈出，實係好多人排隊㗎啦。金針雲耳蒸雞：都等左一段時間，個蒸雞先至施施然咁樣送來，一眼望落去，唔算好油，最怕啲蒸雞油淋淋。你話好好味咩？又唔算，不過啲蒸雞件件老蓮咁大，啲地盤佬裝修佬巴士佬應該賺得飽佢哋。雞扒蛋包飯：雞扒都算大大件，都煎得幾香。但都夠滑，不過晚餐來講，飯量算少。魚香茄子煲：份量唔算大，不過碗飯屹到實一實，女人們可以分兩餐食。味道就一般啦，魚香唔夠，肉垂唔夠，不過起碼熱辣辣囉。試咗兩餐，左啖又一啖，食咗好幾碟嘢，我覺得嘢食正常普通。既然主題係60年代，可以慢慢發展一啲有特色嘅懷舊菜，咁樣先至同幾十萬間茶餐廳有分別，如果唔係，使唔使特登要來食你呢？…Read More

假如真係好想食魚生壽司，我會約friend去食omakase，帶支Sake，千零蚊食好嘢對自己好d，嘻嘻哈哈又一個開心的夜晚。但一兜友，會好隨便食，唔係去元氣就去千兩，快靚正又方便，唔使四圍搵、唔使撞采、又唔算貴，不過一分錢 一分貨，見到咁多人寫腐皮，我真係果句「你要食貴食材，俾千幾蚊食廚師發板啦！」我知，日本東京用同樣價錢食到幾好幾新鮮丫嘛，小籠包係日本都賣到好貴啦，大陸鄉下4蚊八個添。今日去ifc開工後，餓餓地想食刺身，就走去千兩，好采下午茶時段無人排隊，就點左刺身拼盤，一客鮮蝦蟹膏壽司。鮮蝦蟹膏壽司：超愛蟹膏，唔係度度有，$28蚊兩件，好抵又好味！刺身拼盤：$268兩隻大蝦、魷魚及各種魚刺身都有5、6款，真係幾抵食。大滿足，一解想食刺身的飢渴！…Read More

又入逸東附近開工，d茶餐廳茶樓食到厭，竟然新開一間大嘢，拿拿林排隊試新嘢。下午茶時段依然超多人排，無計，新嘢人人都想試，等多陣都唔想食果幾間。我和同事各點了一份粟米班腩飯和星州炒米。星洲炒米：普通、正常囉。還掂都係新開，可以特別d，例如再香口濃味d，改下d陪料等。粟米斑腩飯：個汁OK，個魚，OMG，粉漿厚都算（其實好out，而家多數薄粉漿），最慘係硬！硬到咬唔到落去，Lur都Lur唔切。我唔會咁快判呢間嘢死刑，因為佢地服務好好，裝修都落足心機（雖然有d娘），但我無故意劣評，個斑腩真係好難食。見到格黎食炸雞肶餐個樣唔錯，俾多次機會你，下次食。俾d免費意見你地，還掂sell60年代，點解唔直頭玩懷舊菜式？反正懷舊名任你改，煮法任你變，60年代有錢出街去食飯死淨幾多個丫！你鍾意話60年代嘢食咩款都仲得！…Read More

係元朗收工，搵飯食，唔想食Yoho Town連鎖店，住附近的同事就帶隊，但又怕我地醃醃尖尖食慣好嘢。我地話味道好個人的，最緊要乾淨衛生。去到勝興門口，覺得比我預期的乾淨10倍，食材整整齊齊堆放排列，你話門面功夫幾咁緊要呢。好多熟客入黎，同老闆熱熱鬧鬧傾幾句先坐低。經驗話我知，咁和諧氣氛的食店，通常都好食。你d嘢難食d客會成日黎？唔係成日黎會咁熟落？鵝片墨魚豆腐底：正常，唔突出，鵝片可以再薄d。豉椒炒蜆：新鮮大隻，最緊要無咩空殼。白灼東風螺：新鮮，肉厚。炸蠔餅：好好味，足料，唔太燶，蛋漿啱啱好，口感好實在，唔會得陣風（即係脆卜卜果d）可以為個蠔餅再入黎元朗食。…Read More

去親isquare 睇戲，嘢食都無咩得揀，附近好食都唔敢去，等𨋢上間戲院買埋飛，坐得低都要15分鐘，試過幾次「奔跑吧戴檸樂」滿頭大汗遲睇片頭，都係係返6、7樓食算。你話呢幾間難食咩？又唔係，但係唔會話好想好想再食囉！穩陣又划算，都係幫襯呢間336，食過上海粗炒，OK啦，佬佬好食dd，同正宗上海鋪就無謂比。今次試下午茶餐，$56+10%，有碗麵，有個小食，尖沙嘴算抵啦！小籠包：夠熱，皮OK薄但易穿，肉質肉味OK，湯汁略少，同級來比，佬佬贏。擔擔麵：下午茶份量，麵質手打得好好，順滑彈牙正宗陽春麵，湯底好味唔油，花生醬量適中，辣味適中，贏佬佬（佢地太油）下次睇戲試食其他先！…Read More

每一次我想食餃子，我絕對唔介意特登去西環餃x緣或者灣仔北京水x餃王，因為真係好好食，品質有保證。餃子唔係什麼昂貴佳餚，但好食的話，會覺得特別窩心，好溫暖，有家的感覺，好食一定常常幫襯搵返呢個感覺！雖然餃子是北方人家常便飯，食餃子這文化已經好融入南方家庭，南方人都很喜歡吃！但係，如果餃子好難食，救命，咁簡單的材料都煮得難食，感覺好似家嘈屋閉雞犬不寧，唔想再返去！呢到d餃子未至於難食，但無heart都夠死啦！已經唔係湯上囉窩，個皮都可以咁快淋咇咇溶溶爛爛，一夾，d餡料跌晒出黎！手撕雞一上，嘩，咁既色！碟調料蒜泥唔夠。咬落去凍冰冰的雞肉唔新鮮，OMG，餃x緣好食一萬倍！果陣雞籠味闢唔到，凍左d雞油好似牛油咁彰住條脷，彰住喉嚨，陣油有d噁心，決定放低，睇下點處理！京蔥羊肉餃：完全無羊肉羶味，同餃x緣無得比，人地大大隻羊肉夠香夠多。睇d留言話韭菜水餃必試，叫碗韭菜水餃麵，順便試埋麵質。麵來了，把手撕雞放入湯裡，希望救得返唔浪費嘢食！OMG，暖左d仲難食，仲整衰碗麵添！麵質一般曲曲地上海拉麵，唔係正宗陽春麵。湯好鹹，個韭菜餃個皮一樣差，韭菜味唔出！算把啦，放棄唔食！以後唔黎！bye！…Read More

我去試呢個廣告賣得咁恆既漢堡，緊係唔係因為鍾意聽佢唱歌、演戲、廚藝啦，我覺得要讚賞、介紹或者批批評一樣嘢好唔好食、一間餐廳掂唔掂，一定要自己食過先至有牙力。好似今次去試老麥「安格斯煎蛋免牛漢堡」，完全要證實日前食灣仔FG的漢堡，難食過麥當勞！結果⋯⋯包黎啦，熱辣辣，打開，包皮好挺實唔淋咇咇，牛肉比老麥其他平價包的牛肉明顯好食多！煎蛋太熟，如果漏黃啱我多d，我知，生嘢會怕賴嘢丫嘛！免牛醬，出奇地好食，我原本準備點寫衰佢！哈，驚喜！但，我會覺得老麥暫時最好食，依然係「安格斯芝士蘑菇漢堡」喂FG，老麥賣$35蚊咋，好食過你窩，好意思賣咁貴！…Read More

香港鬼佬多，西餐係亞洲區數一數二好食，漢堡包店多過米舖當然唔例外！我係隔黎啱啱食完蛇羹，見到咁多朋友都講，個肚仲有d空間，就決定食飽d，今晚食少d！店面好闊落，成間diner咁！紅白撞色好搶眼！Little Size都要$65，我地呢d珠璣算盡的城市大胃妹，緊係有大食大啦！$85，睇下你咩料！揀左Cheese Burger：十幾種配料免費任加，我揀左蘑菇、洋蔥、番茄，費事太多個口無咁大！包黎啦！唔熱既？暖咋窩，接受唔到！肯定因為個包攤開晒等放牛肉關係！打開錫紙，嘩，個包淋咇咇既？淋到索唔住d番茄汁漏出黎。塊牛肉厚就夠厚，但煎得乾左d，個肉面又唔係煎到脆窩！老實講，老麥個Angus Beef Burger好食好多！知d牛肉靚d丫嘛！但煎成咁、淋成咁，$85蚊個包，唔得囉！慳返唔使試其他包！…Read More

嘩，終於等到香港得8‘c啦👏🏻可以着靚褸之餘，羊肉煲、蛇羹廣東美食真係等到頸都長！我以前食開銅鑼灣間蛇王椅，太多大陸Gip臣粗粗魯魯，而且越食越貴，伙計呼呼喝喝，頂，貼錢買難受咩！5、6年前一次係灣仔玩具街買嘢，丫，有間細到乒乓波枱都放唔落的蛇羹舖暱埋一邊。幾張舊名人相貼左係店外，記得當時一碗蛇羹價錢比很多店平。一食就食到宜家！蛇羹固然是主打，但空住肚黎的，不妨試試佢地套餐，好抵食。雖然蛇羹一碗$68唔算好貴，但套餐連臘味糯米飯、一碟油菜都係$89，我每次都會double碗蛇羹，先至$127，又飽又暖又好味！蛇羹：湯羹唔杰塌塌又唔稀啷啷，啱啱好，唔鹹又夠配料，成碗翅咁好料。主角蛇肉量夠，有咬口彈牙，唔腥唔滑澀澀好似未洗過咁！食咁多年，係試過一次有條骨！糯米飯：好食、唔油，因為唔係主打，唔係話好特別！其實除左糯米飯仲有好多煲仔飯選擇。我偏向鍾意糯米飯，因為唔使等，同埋搵糯米飯食難過搵煲仔飯。蛇湯：今次無飲，有時會點這湯，尤其浦完飲完想補補身！油菜：咪油菜囉，不過，我唔要蠔油既，因為佢地菜的清甜真係食得出！食過唔想食蛇王fun、蛇王椅！…Read More

上次厚福街無左間唯一，去到荃灣又見到，叫左份香茅豬扒擔擔麵：麵量夠，麵不是正宗陽春麵，略粗又淋身d，擔擔麵竟然無花生醬濃湯，換來稀薄的開洋碎混了好似肉碎辣椒絲，好怪異但都好味，不如唔好叫擔擔麵，直頭叫開洋乜乜麵仲好啦！北京餡餅：皮薄厚實足料唔油，好食，贏左荃灣街邊店。我覺得香港好多食店，就好似呢間唯一咁，唔係唔好食，不過就求其生存到，無heart！宜家全世界人食嘢都好掩尖，因為有要求，如果為左填肚餬口，食麵包公仔麵就搞掂！你開得舖賺人地錢，就要對自己有要求，盡量煮到最好食。成本分分鐘一樣，好似呢間店，如果用煎北京餡餅的heart去煮其他嘢，一定會好好食！講講下，好懷念好多年前厚福街間烏煙瘴氣的唯一老店！咩都好食！…Read More

去油麻地睇戲，早左好多四圍貢，行到渡船街附近，口痕，見到有間餅店仔，櫥窗d蛋撻好靚仔，嘩，$3.5一個，香港仲有咁平既蛋撻既咩？入去發現阿姐分開一盤酥皮，一盤曲奇皮，就買各1個試下，唔理大街大巷，一大啖咬落去酥皮蛋撻，嘩，直頭打低好多稱皇稱霸既蛋撻店！酥皮蛋撻：size算比一般的細dd，個酥皮層層疊的，塊塊鬆脆香口，又唔會油淋淋到成手成嘴油。個蛋心又滑又燙嘴，彈性和厚實度啱啱好！👏🏻曲奇皮蛋撻：size同酥皮一樣，蛋心一樣好食，個曲奇皮OK，未至於似個酥皮咁驚喜！老婆餅：都好食，唔會太甜，但元朗的實在太好食。加油！睇完戲立即掛住個酥皮蛋撻，即刻行返去買半打俾屋企人試。兩個都係$7蚊雞，抵到爛，等如果d名牌蛋撻1個，最緊要好食好多！…Read More

唸住去食唯一上海麵，搵極唔見，明明記得係肥仔滷味隔離。原來變左呢間光榮冰室，招牌紅紙都未撕，又食新餐廳。順便講下貴租累死每一行，尤其香港飲食業。香港政府睇住d租係咁加，無能力又無智慧去處理，一早收空置稅，肯定唔會淪落到如此田地，9成香港人都活係呢個壓力底下，食碗粥都難過登天，賣廿幾蚊碗粥，點俾幾十萬租金？以前厚福街真係口福街，平貴都有得食。宜家連唯一麵檔都無埋，真係嬲到想爆粗！伙計放低張單，仲係用緊唯一的單，我估係轉型吧，茶餐廳易做d掛！唉！講番嘢食，午餐有好幾種揀，試下蔥油雞扒飯。正常茶餐廳嘢，雞扒都夠大塊新鮮，飯夠熱夠量，蔥油咪蔥油囉！OK既！但度度都有茶餐廳架啦，俾返唯一上海麵我啊，俾返我啊，俾啊，唔制啊！…Read More

去開果頭，順便食個便飯。唔想食連鎖餐廳，捐捐下就去左逸東隔離馬灣涌村，感覺好似細個時去camp。行過幾間好多地盤佬的飯店，有一間零零舍舍係條路仔邊，對面仲有間穆斯林教會。入去感覺好親切，全是舊式地磚牆磚，真的好似細個學校去粉嶺上水camp的營地。午餐$45一餸，靚湯白飯任裝。伙計遞來張紙仔，上面有廿幾種餸揀。幾個人一人點一種share。鹹魚煎肉餅：碟肉餅拎緊黎，已經香味撲鼻，一放低都唔顧禮貌，即夾，嘩，好食到啪啪聲👏🏻👍🏻肉質新鮮堅實，略為炸少少再煎，超香口又唔太燶太油。鹹魚量啱啱好，唔會過鹹！淨係呢個煎肉餅要攞米芝蓮1星！紅棗雲耳蒸滑雞：雞滑新鮮，雲耳爽，好多油，我唸係雞油，倒咁d會好樣d！咖喱牛腩：咖喱不辣香口，牛腩好淋但量太少，牛筋就好多，雖然好味但唔係牛腩窩！嘻嘻…Read More