lamkyi63's Profile

好耐冇食過日本菜，今日同朋友行完街喺附近搵左呢間大山日本料理食晚餐。呢間日本餐廳裝修都唔錯，掛左一排排燈籠，好有和風style，最啱用黎打卡。鐵板牛油帶子，帶子好大隻，用牛油煎超級香，加少少檸檬汁帶出鮮味。豚肉泡菜鍋，泡菜好醒胃，豚肉爽嫩，最正係泡菜湯，飲左幾碗😆d湯嗦哂肉汁鮮味，小小辣，唔食得辣嘅我都食到！蒲燒鰻魚飯，鰻魚醬汁調味啱啱好，唔會太甜、太重口味遮左鰻魚鮮味，鰻魚幾肥美，油脂比例均衡，唔會太油膩。極上北海道帶子丼，呢個魚生飯超級正，有帶子、甜蝦、三文魚同三文魚子。帶子大大粒，好鮮甜；蝦刺身夠新鮮；仲有我最鍾意食嘅三文魚子，入口一咬即爆，用黎撈飯最正😋最後食埋件北海道芝士蛋糕非常滿足，蛋糕幾香滑，口感輕盈唔膩，做飯後甜品最啱！幾高質嘅日本餐廳，食材新鮮，價錢唔貴，值得推介！…Read More

朋友介紹尖沙咀呢間泰國餐廳泰國菜唔錯，所以黎試下。餐廳裝修得好有特色，門口有一對大象，入面有好多泰國擺設佈置，充滿泰國風情。泰式去骨海南雞一定要試呢度嘅海南雞，可以話係我食過數一數二好食，雞皮鮮黃爽滑，雞肉超級嫩滑，雞味鮮美，配薑蓉同泰式辣醬，更加突顯到雞肉嘅鮮味。燒西冷牛扒牛肉肉味濃郁，肉質鬆軟多汁，牛扒只係用鹽同黑椒簡單調味，就已經突出牛扒嘅原汁原味。泰式青咖哩我地揀左青咖哩配雞肉，青咖哩上菜已經聞到好香，青咖哩汁唔太杰身，香料嘅味道香氣撲鼻，辣度同椰汁分量均勻，顯得青咖哩更加惹味，啖啖雞肉軟嫩充滿咖哩汁，用黎送白飯一流！朋友叫嘅椰青，仲可以刮到椰子肉食。三色冰，椰汁味幾出，唔會太過甜，仲有三色啫哩喺底。…Read More

朋友由外國番黎，當然要帶佢去食好野啦！去左同事介紹呢間韓國餐廳，好多人等位，好彩一早book左！韓式炒牛肉粉絲牛肉用醬汁醃過，加埋紅蘿蔔同彩椒炒好香甜，最正係粉絲，口感煙韌，嗦哂汁料勁入味。韓式海鮮煎餅超級大碟，好似pizza咁，啖啖都食到魷魚同蔬菜好多配料，一定要配埋佢個醬汁食，辣辣地好惹味。黃金鹹蛋脆雞呢個係同事重點推介，叫我地一定要試，外層好脆，好有蛋黃咸香味，入面雞肉好嫩滑，加檸檬汁感覺清爽唔溜。…Read More

好耐冇食過放題，今日同朋友去將軍澳popcorn商場食韓燒放題，其實之前去過旺角食呢間Running燒覺得唔錯，所以試下將軍澳呢間。Popcorn商場去到popfood上二樓，店員安排左我地坐卡位，卡位坐位枱面都好寬闊，坐低scan左QR code order先。肉有牛、雞、豬、羊，我最鍾意烤肥牛同雪花牛仔肉，大大塊、啖啖肉，肉質仲好鮮嫩。豬頸肉都好正，燒到油脂融化，肉質又香又脆！海鮮都好新鮮，種類都唔少，有生蠔、扇貝、帶子、蝦、魷魚等等，芝士生蠔好好食，不過我地唔係好識分熟唔熟，燒耐左，但味道都仲好鮮甜，加d蒜蓉好惹味！帶子同扇貝都大大粒，好鮮美，好有磯燒元貝feel!除左燒肉、海鮮，仲有唔同熟食可以點，點左兩件柚子味炸雞，都幾好食。其他熟食仲有烏冬麵、冷麵、餃子、溫泉蛋飯等等。有自助區可以自己攞d蔬菜配料，有好多種蔬菜，攞左d燒汁、醬油同蒜蓉，燒肉加蒜蓉好正！有各款甜品、雪糕、飲品，仲有湯，攞左碗養生雞湯飲，幾滋潤清甜。食埋杯芒果布甸真係好飽滿足！…Read More

畢業之後都好少黎新蒲崗，今日同朋友咁啱經過呢邊，所以係附近食埋晚餐。新蒲崗真係多左好多食店，最後揀左呢間叫醉標泰粵小廚嘅食店，門口嘅餐牌好似唔錯咁。我地叫左蒜蓉包、肉碎生菜包同埋老板介紹嘅酸菜魚。泰式蒜蓉包好香蒜蓉味，沾左蒜蓉粒粒，外層烤得非常香脆，內裡鬆軟，作為餐前小食唔錯。酸菜魚份量非常足，入面有大量去左骨既魚肉同埋酸菜。湯底非常正，酸辣濃郁，酸酸辣辣非常開胃，用黎送白飯一流！酸菜好爽脆，份量好多，中意食酸菜既朋友唔好錯過！魚肉好嫩滑彈牙，非常入味，大啖大啖魚肉咁食好爽！肉碎生菜包肉碎好香，帶少少辣，好惹味，加生菜包住可以中和辣味。最後叫左杯椰汁，係自家製，椰香味好濃，質地好滑。酸菜魚真係好好食，重點推介！…Read More

陪朋友去旺角買波鞋，買完之後食晚餐，佢話想食火鍋，所以響附近睇下有咩火鍋店，網上見到呢間火鍋店就黎試下。可能黎得早，未有咁多人，餐廳有一排窗，景觀好開揚，呢間餐廳好似雞煲好出名，不過朋友想食火鍋，所以下次先試佢地嘅雞煲。有醬油配料自己加。叫左個招牌螺片濃雞湯鍋，加$10有雙拼湯底，所以加左招牌鮮魚湯鍋。一來即刻倒碗湯飲先，湯煮到奶白色，好鮮味，好好飲。手打墨魚丸大大粒，好彈牙，好鮮味，食得出好有墨魚味。西班牙頂級黑毛豬腩片豬腩肉一睇就知肉質好新鮮好靚，雪花條紋分明，厚薄適中，果然肉味香濃，好好食。叫左個菜菜籃，入面有好多蔬菜，有唐生菜、小白菜、金菇、蘑菇等，都幾豐富。稻庭烏冬，幾爽口彈牙，唔會太軟身。…Read More

星期六去捧朋友嘅手工皂檔場，下午係荔枝角附近食，見到呢間餐廳門外終極漢堡幾吸引所以入黎試下。我地叫左一個終極漢堡套餐、黑毛豬扒餐。餐包外層脆脆地，內裡好軟熟~西蘭花薯蓉湯，非常有質感，有幾塊細麵包伴住食~好味~終極漢堡漢堡扒好多肉汁、肉味亦唔錯，好香~煙肉香脆，芝士好滋味，再加埋焦糖洋蔥，生菜，口感豐富。另外可以自己加醬：黑松露野菌醬、秘製辛辣醬、法式芥辣醬同埋茄汁，非常很惹味！薯條香脆內軟，充滿薯仔香。烤西班牙黑毛豬扒黑毛豬扒大大件，扒嘅脂肪分佈平均，肉汁juicy，肉味油甘氛香，肉質嫩口。質素好高，烤蕃薯亦都炸得非常好~荔枝青檸梳打天氣咁熱，呢杯微酸嘅清涼凍飲好消暑，入面有青檸粒粒。…Read More

好耐冇食過蒸氣鍋，今日放工特登約朋友出黎食晚飯，去左呢間酒樓食海鮮蒸氣鍋。粥底有三選一，我地揀左淮山雞粥。乳鴿同貝殼拼盤係定食黎。自選海鮮揀左鮑魚、元貝、龍躉、海蝦。呢度有自助醬料區同埋自助飲品區，自己攞醬料同飲品好方便。先上乳鴿食住先，脆皮燒乳鴿都幾大隻，皮脆肉嫩，正！全部海鮮都好新鮮呀！開始蒸海鮮，侍應姐姐幫我地蒸貝殼，好鮮甜，姐姐教路唔駛點醬汁，直接食最鮮味。海蝦好大隻新鮮，蝦肉鮮甜。鮑魚好新鮮，肉質彈牙。元貝大大粒，仲有香蒜同粉絲，點d醬油食好正！龍躉件肉質超嫩滑，味道鮮甜！仲有好多其他任點配料，有蟲草花蒸雞、手切和牛肉、手製肉丸、蔬菜、糕點等，都幾豐富。最後食嘅淮山雞粥，煮到好軟好綿，好易入口，味道鮮甜。幾唔錯嘅海鮮蒸氣鍋，海鮮非常新鮮，值得推薦！…Read More

同朋友係荔枝角行街，黎到呢個商場，見到呢間拉麵店門面幾靚所以試下。門口有個夾公仔機，店入面都係和風裝修，地方整潔，坐得非常舒服~~我叫左個札幌螃蟹拉麵，湯底選左味噌湯。大大碗拉麵，配料有蔥、粟米粒、昆布、糖心蛋。湯底夠香濃，麵質爽口彈牙，蟹棒啖啖肉，味道幾鮮甜。糖心蛋香甜，粟米粒都幾多。整體黎講都幾好食！朋友叫左個牛油拉麵，要醬油味，試左啖湯，味道都唔錯，唔會太咸。小食就叫左燒多春魚同埋自家製手包餃子。餃子外皮煎到金黃色，非常香口，皮薄肉質鮮味多汁。多春魚燒得香脆不膩，非常好味，成條都食得唔駛吐骨！招財貓飲品原來係蜂蜜梳打，冰甜十分好喝，個樽印左隻招財貓好得意！…Read More

放工同朋友黎呢度食晚市放題，已經唔係第一次黎呢度食放題，仍然係咁高質，地方大、裝修靚，環境寬敞舒適。而加已經轉左用手機落單，掃一掃個qr code就得，方便快捷又環保，真係值得其他餐廳仿效。自助飲品區有好多飲品揀，啤酒、汽水、果汁，種類繁多。黃金焗葡撻一開始就出去睇下有咩野食拎先，見到d焗葡撻好似好好食咁，攞左幾件，葡撻皮好鬆脆，每層分明，焗得啱啱好。蟲草花膠魚翅雞腳湯呢個湯真係好正好好飲，香濃靚湯，我記得上次我都飲唔少，今次都飲左三大碗。芝味鰻魚板壓壽司飯粒壓得恰到好處，非常有水準，真係好芝味！迷你海膽手卷海膽好鮮甜，細細件唔怕膩，必食！芝麻雞翼炸得好好，金黃脆皮，內裡雞肉嫩滑，好味！溫室南瓜天婦羅、北海道牛乳炸鮮奶，炸到脆卜卜，皮薄薄地啱啱好。鐵板銀芽炒雜菜食太多肉要食番d菜，蘆筍好食又健康。有玄米茶雪糕、沖繩海鹽雪糕，第一次食，好特別！整體黎講食物水準高，環境正、服務周到，係而加少數嘅高質放題。…Read More

今日去牛頭角搵朋友，朋友帶我去佢屋企附近茶餐廳「食好西」！朋友係熟客，成日黎呢間茶餐廳食下午茶，原來呢間茶餐廳仲有一間同名嘅分店開響附近。我同朋友黎嘅時候啱啱好夠鐘食下午茶時間，朋友推介我試下呢度嘅奶油厚切西多士。奶油厚切西多士，真係超級厚！上面淋上煉奶，抹上牛油，十分吸引！咬落非常香口，搭配花生醬餡料，口感一流，實在唔可以錯過！加左杯冰凍檸檬可樂。朋友叫嘅全日早餐All day breakfast。…Read More

星期六晚同朋友shopping完去左永年士多食車仔麵。店內好新淨好光猛，坐得舒服。叫完野食等左陣間就有喇！香噴噴嘅車仔麵非常大碗之餘，餸嘅份量都好多。湯底好濃好香，烏冬好彈牙。菜心好嫩，再夾埋個湯底非常開胃，魚蛋非常彈牙，仲有好多粒，好抵食。鍾意食流心蛋嘅真係要點黎試下，大大一隻，咬開一半D蛋汁流出來，好滿足。豬紅粒粒都大大粒，口感軟嫩同有香甜味。蟹籽丸入面料好足，好好味。菠蘿冰係推介飲品，冰涼透心，味道非常好，仲有大大粒菠蘿肉。朋友食嘅車仔麵同抹茶紅豆冰，睇落好正咁！呢間車仔麵店真係食過咁多間黎講數一數二嘅必食推介，會再次黎幫襯！…Read More

今日同朋友去街，黎到呢間馬拉茶啡室食晚飯。餐廳裝修行懷舊風，大門係古式木門，店內有唔少壁畫裝飾，幾有特色。一黎到侍應就送上肉骨茶，肉骨茶色澤深，帶有藥材幽香，味道甘甜，非常好飲，仲可以添飲。招牌老鼠粉，老鼠粉即係銀針粉，銀針粉口感爽口，唔會太腍。配料有肉碎、肥肉、葱花，撈勻食，有肉碎醬油香又有肥肉油香，香濃得黎唔會太咸。咖央多士，椰香濃郁，咖咉味道香甜。冰凍桔仔梅子水，酸甜開胃，口感清爽。馬拉沙嗲串燒，沙嗲醃得入味，可以選豬、牛、鷄肉串燒，幾惹味。招牌芽菜雞飯，芽菜雞外皮有薄薄一層啫喱，肉質嫩滑；金黃色嘅油飯香口不覺油膩；配菜有芽菜、辣蘿蔔、黃瓜，味道有點似泡菜，辣辣地幾開胃。餐廳食物味道唔錯，而且價錢合理，特別係餐廳嘅肉骨茶非常好飲！…Read More

好耐冇食過韓國燒烤，所以約朋友黎到旺角呢間Running燒韓式燒烤店食，第一次黎食覺得唔錯。餐廳環境幾好，地方寬敞，店員安排我地坐窗邊位，仲有電視睇。一坐低就送黎幾碟韓式前菜，辣泡菜辣辣地幾開胃，芽菜同海帶唔辣嘅都幾好食。點餐紙有多種肉類選擇，我地呢d食肉獸當然乜都點黎試下。除左肉類仲有蔬菜、湯、麵、飯。醬料可以自取，攞左d醬油、蒜蓉、辣椒醬、豆瓣醬。飲品櫃嘅飲品除左酒類都可以自取同任飲。道地冬瓜茶、菊花綠茶，清熱解渴，食燒烤飲最啱。有調過味嘅薄切西冷牛扒，色澤睇落好新鮮，厚薄適中，好快可以燒熟，味道唔錯。叫左唔少肉類、蔬菜同湯，好豐富。水冷麵賣相唔錯，味道都幾好。韓式湯烏冬，烏冬幾彈牙。午市時段仲有優惠，抵食好食嘅韓式燒烤。…Read More

同朋友經過佐敦去附近食埋晚餐，上網睇到呢間多國菜餐廳好似唔錯，所以入黎試下。一坐低侍應小姐攞左碟小食俾我地，好薄脆嘅烤餅，配有綠色嘅醬汁，有少少辣，都幾香脆。餐廳主要有印度菜、土耳其菜、墨西哥菜、意大利薄餅等等。我地點左一個什肉薄餅、一碟洋蔥烤餅同一碟咖哩雞。什肉薄餅，幾啱我地兩個食肉獸，餡料當然全部都係肉，有火腿、香腸、辣肉腸，邊邊仲脆脆地，加埋芝士好香口。咖哩雞，第一啖覺得唔太辣，食落都辣辣地，雞肉幾多幾入味。洋蔥烤餅，送上黎已經非常香，咬落幾鬆軟，加埋咖哩汁好正。幾有驚喜嘅異國風味餐廳，值得推介。…Read More