Spolaw's Profile

灣仔街坊，有時經過軒尼詩道近金鐘嘅永昌大康，見到有間上樓泰菜。喺呢到見無食評，就過門不入。今個星期六終於心血來潮單拖食晏，慶幸無走寶。平日有lunch set，星期六散叫。因為想試完先帶朋友嚟，就叫咗啲“考牌菜”。豬頸肉粉絲，加廿幾蚊轉冬蔭公湯。我怕偏酸嘅冬蔭公，呢到嘅冬蔭公啱晒我，唔會太酸，辣味都啱啱好。豬頸肉唔太肥又唔太乾。炸蝦餅（細），有6塊，好慷慨，新鮮即炸，香口好味。凍泰式奶茶，正常表現。全場得我一個，泰籍阿姐好親善，問我食物啱唔啱口味。問佢生意點，果然只係平日返工食晏時間先多生意，一到平日夜晚和星期六就水靜鵝飛。始終食肆位置唔係人流旺嘅大街，仲要上樓舖，又缺少宣傳，係呢個飲食業搵食艱難嘅日子，真係令人憂心。呢到係會員制，填表入會，下次就可享9折優惠。阿姐好好客，送咗個自家製小小椰汁糕我試，裡面有芋頭粒，比坊間一般嘅椰汁糕口感更豐富。平日lunch set百零蚊，包前菜飲品甜品。…Read More

星期六想食好西。 見呢間嘅食評有笑無喊， 又可以網上訂位， 就呢間啦。Daily Mocktail, 係無得選擇， 淨係問你鍾意甜定酸， 然後按bartender心思而製。 我只知會有青蘋果。 點知， 嚟一杯青蘋果綠茶咁味嘅野嚟。。。 同係一啲餐廳lunch嘅free drink一樣嘅貨色， 好hea ! Tapas方面， 叫咗帶子刺身配白酒啫喱。老實講， 帶子好薄，真係無乜味道， 賣相都好求其， 白酒啫喱亦味道唔出。然後係 黑松露bikini. 呢味係正常，唔會難食， 但亦係無乜功夫可言。隔離嘅係辣肉腸手指。 大大件， 肉腸碎係比鑽石珍貴地少得可憐， 最多嘅係汁， 味道淡到講唔出係乜材料做。。。最後係海鮮飯regular size. 有食評話好新鮮要幾彈有幾彈， well, 好明顯係冷藏貨仲要細蝦是霉的， 青口有啲腥， 尤魚圈un, 蜆肉係超瘦兼有沙！絕對失望！ 咁多正評， 點解呢…Read More

街坊街里食咗無數次. 由一開頭好抵好正, 到疑似轉手之後每下愈況, 又貴又保持唔到水準服務麻麻欠效率等勁耐先有得食. 但由於區內選擇不多, 同時其他食肆都齊齊價升質跌, 有時都要死死氣嚟呢到開餐. 嚟一次後悔一次, 上次有幸目睹有外賣客專程落大雨都落嚟發曬火外賣漏單, 電話唔聽, 仲串串貢的態度. 勢估唔到, 呢次會係最後一次.二人叫咗平時飛佛"喇沙海鮮". 以前試過食參末海鮮中過伏, 從此就改叫喇沙.飲啖湯, 嘩, 賴野! 苦到難頂, 唔知係咪過鹽, 食唔到落去.急急向店方反映, 換來一碗魚湯嚟溝淡喇沙. 我落咗唔少魚湯, 但點溝都係苦. 細心一聞, 湯匙有朕漂白水味, 唔知係咪咁影響味道? 我再比次機會, 唔用隻湯匙. 再夾多注粉絲, 不得了, 濃烈的漂白水味. 我唔敢再食落去, 口都苦埋咩食慾都無曬.(左上果碗係我點食都係苦嘅喇沙, 投降. 左下係店方作為"補償"嘅魚湯)再次向店方反映, 只係話幫我轉過其他野, 完全唔覺得自己有錯. 講真我已經唔想食佢任何野. 我話唔要. 埋單果時當然係要我比足數啦. 為免店方以為我專登投訴食物來食霸王餐, 我照比. 已black list呢間野, 以後唔去.…Read More

聞說萬豪機場酒店有點心放題,由12點起食到2點. 平日先有. 呢幾日大陸放假, 係公司無咩做, 前兩日BOOK位食點心放題. 今日雙雙蛇王去開餐.攞到放題紙急急點菜, 畢竟之後要返返工, 緊係要"行動戰鬥化"啦.食物點評松茸燒賣 - 松茸放係頂. 個人認為唔係好夾. 水晶蝦餃 - OK鳳爪 - 正常咸水角 - 一般XO醬腸粉 - 無咩XO醬味, 腸粉質地唔夠挺, 麻麻地鵝肝荔茸酥 - 唔多覺有鵝肝味, 荔茸夠酥, OK啦南瓜蟹肉批 - 南瓜味唔香唔濃, 蟹肉味出D, 個批唔太可口蝦醬雞 - 薄炸雞片, 好香蝦醬味, 幾好食豉汁斑腩 - 必叫. 魚皮好滑, 魚肉都嫩. 份量細, 我地encore咗一次奶皇包 - 好難食, 奶皇好多陣酥味.....個包形唔圓潤. 放棄咗餘下的一個...菠菜餃 - 唔錯喎, 有菇有菜, 味道幾好叉燒腸粉 - 食咗先前上的XO醬腸粉, 再食埋呢碟, 好肯定"腸粉類"係呢到弱項. 叉燒太大陣玫瑰露味, 又切得好碎, 好難食, 都唔知係咪肉唔新鮮要掩飾. 加埋好削嘅腸粉質地, 食咗一條已放棄.北菇雞飯 - 一盅盅上. 飯唔香, 肉好少. 普通任食紙甜品欠奉, 有D失望.環境落地玻璃, 可惜出面個港珠澳工程大剎風景. 裝潢係正常四星以上酒店架局嘅中菜. 坐位間隔寬敞, 幾好坐.服務有禮的. 價格茶芥20元/位. 點心放題178元/位. 加10%. TOTAL 217.8元/位. 住東涌/過開機場就不妨入來, 專誠入去就免了.…Read More

今年仲未食大閘蟹. 即興係青衣城間東海叫最平的$348(兩位起)餐.呢間東海長期有位從未爆滿. 已經預咗唔會係好正. 個餐又最平. 心理自行調節降低要求.講下個餐包咩:蟹粉小籠包1隻鮑魚佛跳牆大閘蟹2隻 (逐次上)蠔皇海參花菇蟹粉蒜茸飽2件濃湯時蔬獵味粒蒸飯薑茶湯圓食物質素方面蟹粉小籠包: 無蟹粉味. 預咗.鮑魚佛跳牆: 超細飽魚仔, 可以啦, 個湯味係冬菇水, 好清, 唔飲曬無損失.大閘蟹2隻 (逐次上):超細隻, 2両吧. 咁細無咩肉無咩膏. 當係攝下牙. 蠔皇海參花菇: 海參有半條, 好爽, 無味. 花菇正常.蟹粉蒜茸飽2件: 飽已經涼咗, 林咗, 蟹粉好油有少少腥濃湯時蔬:芥菜, 一般獵味粒蒸飯: 味唔錯, 幾香.薑茶湯圓: 都OK, 三粒細細粒.服務方面態度沒什麼問題. 廚房一次過出曬同一款食物, 自然影響其他菜式上檯速度. 次序打亂, 食到中段要催.免加一茶芥. 算係咁啦仲想點.雖然主角蟹君唔出色, 但一分錢一分貨, 滿足我樣樣都想試下的慾望, 合格的了. $5XX果個餐就唔駛考慮.…Read More

前言寶貝生日, 知佢鐘意Sangria, 就帶佢來呢間主打特色Sangria的新店試試. 如果唔係成功爭取到靚景, 又如果唔係靚仔經理適時補救下屬過失, 係絕對會比個喊樣呢間餐廳. 服務 (2.5分, 5分滿分)訂位:打去訂位, 已經唔覺得接線嘅女子好有禮貌, 聽見係唔咸唔淡廣東話, 當佢係講慣英文唔係串咀吧!訂位時有要求坐室外, 得知室外位無得預訂, 先到先得. 問佢如果叫甜品可唔可以加happy birthday等字眼, 佢話得, 我就留咗言.過幾日我打去要求修改慶賀嘅句子, 同一位接線員亦好清楚咁記低. 我問切餅費幾$, 知道係$120. 我無表示自己係一定會帶蛋糕.用餐前一日, 有另一女子打來confirm booking.用餐當日:早咗半個鐘到, receptionist好似搵唔到我個Booking, 攪錯係另一人, 到我再講多次自己咩名幾多位, 佢先彷然大悟咁. 我有即時問有無室外位, 佢話full曬. 我見到出面有一張高檯, 可以share幾pair人, 但佢無出聲問我地要不要. 帶咗我地去唔駛book位都有嘅室內吧位(見唔到任何風景的)壽星妹忍不住問咗句:"點解我地一早訂位都比埋D唔駛book的位我地?"個receptionist知衰地帶我地去二人檯. 無幾耐, 有一個貌似阿太嘅女人(似係已經來過一次)同一個貌似中產嘅阿叔坐我地隔離. 佢地都有要求坐出面, 同一個receptionist竟然話可以坐室外的大高檯同其他人share, 個阿太拒絕咗. 而呢兩位客, 不時都有經理招呼, 新手的侍應係唔會埋佢地身. 果種服務上的差別太明顯.............呢到嘅侍應質素參差. 後生果D一係就講野好粗魯, 一係就唔主動; 老少少果D, 有好好manner的, 也有黑面的外籍女子, 亦有態度唔好的. 黑衫經理級就好好態度好醒目. 係一間叫做懶高檔懶有格調嘅餐廳酒吧, 整體服務質素唔合格.(容後再講)係點餐後, 我地有要求一位manner好好的中年侍應, 如果出面有檯比我地轉出去, 佢有好nice解釋, 通常D客好早來先有出面位, 建議我地食完野之後轉出去飲野, 到時有位機會大D.我地點咗的飲料, 食曬野都未來, 催出兩次先有. 而漏單的一件小食VIC(黑毛豬忌廉球$22), 到最後都係無來, 回家時才想起, 但已計落張單到, 好彩加埋一只係蝕了$24.2, 自己太大意了.....講起漏單, 我有催架, 有好明確講係黑毛豬忌廉球, 個侍應跟進完之後, 竟然糾正我"係黑毛豬唔係黑松露" ....無言! 自己攪錯仲好似你唔識野講錯咁.....我地食曬第一round野, 我就親身出去室外行一圈, 睇下有無位. 見到有兩張雙人檯. 我就即時入番去, 要求轉檯. 本來個侍應話"睇下出面情況", 我即刻話我睇到有吉檯, 佢就只好比我地出去了 相信唔出呢招, 佢地實永世都唔會比我地轉. 阿侍應仲好笑, 命令口吻叫我地"你自己攞番住杯野飲" ...真係O咀........係室外, 我地又叫多round野. 甜品上來時, 完全無照我要求寫上任何生日字句 .......我唔想佢地攞番入去寫又攪一輪, 就算了. 埋單前我有專登同某靚仔經理反映, 佢有道歉, 話會處理. 我話唔駛了算啦只係想佢知道咋, 就叫埋埋單.估唔到佢隔了一段時間, 攞了寫咗我當初要求的生日字眼嘅甜品比我地, 免費架! 呢樣野即時加番分! 同一時間, 我地隔離一大檯人食完野轉了去另一邊坐. 我竟然聽到兩個侍應的對話....A:喂, 班人去曬邊?B:佢地出去影相喎...B: (語帶不屑) 下, 比咗$未架佢地?!! 好心喇.....咁大聲比其他客知道....唔係幾好囉............食物 (3分, 5分滿分)Fresita (Half Jar, $190)坊間無咩rose wine調嘅Sangria. 呢個Fresita係用玫瑰酒+士多啤梨調嘅, 粉紅色, 甜甜地似雜果賓治, 酒味唔強, 好啱港女飲 XDDDDD. Half jar可以倒到4杯啦Suckling Pig (兩件, $95)好細件, 皮肉相連, 幾乾身下, 唔太impressive.鴨肉火腿士多啤梨三文治 ($55)約6-8"長的包, 唔係好覺有鴨肉. 亦係食了唔係記得咩味的. Seafood Cocktail Salad ($140)超唔抵, 千祈唔好叫! 細碗到(約5")好似前菜. 所謂的海鮮只係用白汁撈埋一小團的八爪魚碎+蜆肉碎..........Chicken Croquettes (一件,$16)一件食咗都唔覺有雞肉嘅炸物 煙肉包帶子(2件, $98)帶子算大粒, 但也是沒什麼特色可言. 偏咸Mango Brick ($65)芒果味的橡膠, 會有幾好食?Rice Pudding ($45)土耳其style, 玉桂味, 有D飯粒你咬下. 我OK架.雲呢拿Tube 不知價錢. 好彩係送. 插住支朱古力醬, 聊勝於無. 個咀咁幼, 吱出來都食唔到咩味.....兩條野好膠下. 好似食緊小學時好興用的擦膠筆條膠XDDDD環境 (4.5分, 如果坐出面)坐唔到出面, 真係無point要來呢個餐廳! 不過好凍下, 帶件外套喇總結食物唔覺有幾西班牙 (無食個海鮮飯, 唔通係唯一一個令你feel Spanish的食物???)唔係細碟就係Tapas掛???甜品超唔掂 (無最西班牙特色的炸油條) 尖咀靚景係好Feel服務同格調不成正比, 除非你係咩著名食家或參加食家攪的飯局或貌似富貴人家啦…Read More

本來, 係想訂另一家更出名的網上蛋糕店的蛋糕的. 但最快要11月中先有貨. 都明嘅, 識公關手段識搵人氣食家試食, 唔熱賣就奇忽然想起荃灣有間工廈蛋糕私店. 一日前訂, 第二日就可以攞. 即刻打去訂.馬卡龍蛋糕, 一眼就睇中, 寶貝實鍾意. 又蝴蝶又馬卡龍, 中曬唔少女人心. 好靚, 好feminine, 好浪漫怕自己路痴搵唔到路, 就做足功課search下點行. 哈, 小店的網頁好清晰咁圖文並茂講解點去, 仲有個幾貼近現實嘅地圖添.預早半個鐘去, 竟然係好順利無迷路嘅情況之下, 準時十二點到達!我太準時嘅關係, 未攞得. 一個後生斯文女攞杯水出來請我飲, 話麻煩我等等, 因為佢同事仲寫緊個生日字, 佢地係會即日寫好新鮮咁話 XDDD我問起佢特別設計嘅朱古力生日牌(5日前預訂)嘅野來打發下時間. 佢都好好笑容同禮貌同我傾.佢話3D蛋糕又貴又甜, 做個靚靚生日牌, 你想點都得. 我好認同, 我都整過3D蛋糕, 根本係色素+忌廉+雜果清蛋糕, 好睇唔好食居多, 亦好膩. 店裡有display一本蛋糕書, 曾經我係書店見過, 亦有衝動想買. 咦, 睇落阿姐姐仔個樣有幾分似書上的糕餅師. XDDD 所有生日牌的設計和製作都係由另一位後生女設計師負責.我assume佢地網頁/publication都係出自佢手筆. 真係好用心好體貼蛋糕係雜果清蛋糕, 唔係好甜, 我雪咗十二小時都唔會好死實. 忌廉都唔甜, 雪咗咁耐都唔硬, 深夜先食減少罪惡感 XDDDD收禮者好開心呀, 佢真心覺得個蛋糕好靚好華麗, D馬卡龍都OK喇我好肯定, 我將來會再幫襯的, 亦會推薦比朋友…Read More

見團購做緊$108/位, 有得食雞煲+打邊爐+串燒+飲品 (任飲+$10). 按原價收取加一服務費 ($23), 星期五至日、公眾假期及其前夕另加 $11. 計過條數一位$142, 一試無妨. 到埋單時發生了誤會. 此乃後話.BOOK咗星期五食8:30果輪. 好快有位. 一入去經理已熱心檯檯都推介任飲青蘋果冷飲. 我地唔想要色素飲品, 就寫紙仔叫了一杯凍菊花蜜. 點咗奇味辣雞煲, 小辣. 味道可以, 雞都唔算好少. 邊爐料如之前的食評講咁, 麻麻地. 墨魚滑有異味, 食一啖唔敢食. 黑椒牛丸好假好大陣五香味, 食咗一啖無食. 貢丸正常. 響鈴算OK, 雖然一滾即林曬, 但味道唔係太差. 魚皮餃正常. 八爪魚鬚唔新鮮. 送的龍蝦肉明顯是霉的. 雞肉豬肉麻麻. 串燒相對來講比較好, 但當然唔係十分好食. 叫做比較好食係燒矮瓜. 黑椒腸有陣肥肉味怪怪, 好油, 但由於無咩好叫, 都有叫多次. 雞軟骨好乾. 芝士腸好乾. 冬菇OK. 豬腩肉無味. 我地細食. 食完一ROUND, 叫第二ROUND. 發現第二ROUND的燒野遲遲未來. 有少少懷疑係專登. 第二ROUND邊爐野我地入紙時順手追第二ROUND串燒, 追了兩次再等了等先有野來(其實我地點好少). 經理解釋係師傅做唔切, 咁都算啦. 埋單了, 已到以下張單我係驚訝的. 即時問經理, 究竟為咩我只各叫了一杯仲收$10任飲(以我理解, 團購個MENU有飲品一項, 然後提及加$10可享任飲), 為咩11元星期五六日及假期前夕變了10元, 又為咩明明已每位收$23服務費(聲稱是原價的加一), 仲可以再收4元服務費? 佢解釋係團購公司列出的細節唔清楚, 已經有其他客有疑問, 話團購餐係唔包野飲所以一叫野飲要收$10任飲費, 然後又話$4服務費是任飲的總費($20)+假日費總費($20)的10%!講真, 呢D時候口到鼻嘈. 既然店方口口聲聲是團購公司誤導, 我就自然向團購公司投訴了. 即場只好付款.最後係$154/位. 比預算多收了$12. 今晚我即EMAIL去團購公司. 回覆我個團購餐唔包飲品(但廣告列出飲品, 再用括號講想享用任飲就+10元), 又話廣告上寫的"假日額外費"11元其實是10元+1元(10%). 而既然我叫了野飲(那怕是一杯), 就要比10元再加一即1元...所以TOTAL是4元的加一服務費....既然團購公司咁覆我, 我都無話可說. 本身我以前都有團購過其他餐廳的優惠, 但呢次之後, 我唔打算再買任何飲食團購.  大家買團購前或未用前最好打去店方問清楚, 以防萬一…Read More

屋企人即興飲茶, 圓方得呢到有位, 室外.室外多西人, 又有西式餐飲又有梳乎厘, 環境亦係西人所愛, 連洋名都係直譯. 見有人話呢到服務好好, well, 負責室外嘅某員工, 倒倒下茶, 要傳菜, 可以發晦氣一野凌空得個茶壺落來, 仲要有人未有茶未倒完就走開去另一經理醒目D但都無咩笑容好cool下.最離奇係有廚房內部員工見無人傳菜, 走咗出大門叫人傳 呢D都叫酒店式服務我無野好講. 定因為初四D人未醒未有MOOD返工???定因為已經2點所以D人懶懶閒? (但明明室內要2點之後先有位, 咁如果落場就唔會咁講掛??)講下食物質素. 貴就貴喇, 但完全唔值.蝦餃好的式, OK啦. 燒賣都OK, 流沙奶皇包又係好細個, 但唔流沙只係普通吉士餡.想叫和牛酥, 話無喎. 想叫蝦多士又話無, 但明明睇住幾分鐘前隔離檯西人有一碟食緊個上湯豆苗好咸鮑汁鵝掌面好濕, 屋企人唔多食, 得我一個人食 -_-"" 超普通貨色XO醬蘿蔔糕, 無咩XO味, 糕好濕無咩蘿蔔.....唔明點解有人讚成間野我唯一想到的賣點是西人喜歡的中國風+西式餐飲甜點+室外可以吹煙. 簡單講扮野囉聽聞好多人讚嘅港島廳係姐妹店. 唔通D野來到九龍就變質?唔會再來…Read More

睇過食評, 心中有數熱食普通, 甜品質優. 未食LUNCH, 二人叫咗全日餐, 貪佢咩都有. 熱食叫咗一個味噌叉燒拉麵, 一個溫泉蛋烏東. 結果兩個都係喬麥麵, 如果無烏東嘅大可以講聲如果鍾意味濃, 呢到湯淡就唔啱你. 勁落七味粉先叫做有D味道.麵質OK, 偏林.預咗叉燒唔會係出面拉麵店的貨色, 所以無咩唔高興溫泉蛋蛋白水樣, 蛋黃半生熟掌握得唔錯. 跟餐沙律只係菜絲+幾粒粟米+勁少芝麻汁, 因為預咗係咁所以無感覺.飲料跟餐飲料, 各叫了蘋果茶芒果茶. 聞到果味, 但完全飲唔到果味, 絕對唔係之前某食評講到咁正甜品戲玉. 跟餐甜品, 叫咗綠茶蛋卷, 檸檬味和綠茶味馬卡龍.蛋卷質地比出面的濕和黏, 氣孔好密, 無粉粒跌出嚟, 淡淡綠茶味, 好好食!我本身唔特別鍾意食馬卡龍, 嫌太甜太硬. 今次同人一半, 蛋白餅外脆內有少少黏牙, 唔錯喎. 我自己鍾意檸檬味, 佢就鍾意綠茶味意猶味盡, 單點綠茶芭非, 士多啤梨蛋糕.綠茶芭非層層解構: 威化餅---> 一個綠茶雪糕球 --> 六粒以上的綠茶葛糕 ---> 稠厚的奶油 ---> 綠茶啫哩塊 --->忌廉 ---> 粟米片以上各項都好食!士多啤梨蛋糕, 質地味道似台灣義美蛋糕:) 可能掛住食芭非, 覺得蛋糕被比下去 服務超出想像咁差!人手嚴重唔夠. 當日下午3點多, 主要做野嘅有一個中年四眼女人, 一個廿幾歲女仔, 一個男人.態度最差嘅係男侍應, 佢個款似茶餐廳侍應, 講野又粗聲粗氣, 問多句都唔耐煩. 態度最串係中年女侍應. 見有個女仔單拖入來, 野都未叫, 中年女已經先聲奪人 "呢到淨飲坐低最低消費要65蚊架喎" 睇得出個女仔有D shocked. 我自己唔見MENU有講最低消費架. 中年女侍應D口吻幾串下, 駛唔駛先. 廿幾歲果個都唔叫得上好態度, 普通啦, 有落錯單結論: 唔駛試熱食, 甜品真係正, 服務就唔多"日本"啦 XDDDD. 我會選擇買走甜品唔堂食, 除非我好想食芭非 XDDDD本來想比笑臉, 但服務一環太差, 所以比OK …Read More

傳說一: 友善多咀朋友話呢到D人好多咀, 好friendly. 睇埋其他食評, 都有呢個評價. 飯局兩星期前行經旺角順便上門訂位, 仲打算即場試味先.上到去恒隆大廈, 感覺已經麻麻, 沒所謂啦食餐飯咋嘛. 搭LIFT上4樓再行番落去. 見未到6點. 照樣推門睇下咩環境.裡面係超簡單的樓上CAFE格局. 老闆係廚房, 佢D鄉里睇緊戲. 唔知係咪我太早上門, 佢地唔係好友善咋喎既然上得來, 咪訂埋位囉. 老闆都係無咩表情, 語氣都唔見得好,仲好似覺得我太早訂咁 -_-""好啦. 到咗飯局嘅日子. 準時上門. 今次得番老闆, 同埋一個香港女仔.入到去坐低, 見到已經有兩檯客, 兩檯都係兩人. 一對係年輕男女, 一對係中年夫婦.無人比餐牌, 我自己出去攞.老闆同女侍應都係沒有預期嘅好多野講好NICE. 有D COOL至真. 可能唔夠人手掛.中年夫婦賣曬口乖話自己仔女食過讚好, 佢地又大讚食物好正. 個女仔先開始友善. 中年夫婦開口問起土耳其糖. 個女仔比咗D佢地試食.另一對後生拖友, 就無呢種待遇喇. 當然我地呢檯埋單時都無啦(此乃後話)我自己所見, 佢地並唔係其他食評講到咁好氣氛, 亦都唔一定有糖送 有可能係人手唔夠+開始有人識, 所以此情不再?傳說二: 食物幾正唔知係咪曾經食過土耳其媽媽, 加埋睇完呢到D食評+朋友意見, 我對呢到嘅食物有期望. 所以, 好自然會有D失望 XDDD飲品方面, 叫咗一杯凍土耳其蘋果茶 ($48), 一杯鹹乳酪 ($48), 一杯朱古力奶昔, 一杯焦糖奶昔土耳其蘋果茶....唔通凍飲同熱飲好唔同??? 為咩我唔覺得佢似用茶葉沖嘅...似係台式蘋果紅茶果種假到喊嘅甜味 -_-"" ....鹹乳酪, 正常貨色.兩杯奶昔都係MK CAFE果種口味, 好甜.乳酪薯條($88)....嘩, 咁嘅質素, 真係好貴喎!!! 薯條係林唔係脆嘅, 勁少乳酪 (後來要求比多D) 茄子都勁少.....呢碟野嘅價位, 貴過美式餐廳! 唔知D人咩事, 咁都讚? 燒烤拚盤二人份 ($288). 並沒有如餐牌講附送包包.....算....成個拚盤有雞肉, 有羊肉餅, 雞翼. 唔食羊的她, 都接受到. 烤肉有淡淡香草味. OK啦. 肉質都OK. 份量亦多.特色醬汁烤大蝦 ($158). 大概有8粒蝦啦. 個汁OK但又唔覺得有咩咁特色, 印象不深. 另外仲叫咗雞肉沙律. 雞肉勁少....同埋烤牛排, 有DD生, 火侯唔錯, 不過塊牛排無咩味, 原汁原味掛.係另一間土耳其連鎖店食過米飯布甸. 我覺得OK架. 係呢到又叫一個來試.奶味+飯粒. 間間都差不多吧?埋單, 4個人成$1175....(無留意有無加一)真係好唔抵.....呢個價錢食其他野好過........至少糖, 我地無問起, 當然無人送啦 XDDDD ....要食土耳其野, 我會去番"媽媽"到 …Read More

服務:(無人指示攞籌, 唯有自行排隊. 無人維持秩序, 有些混亂不知究竟條隊係邊. 負責派籌的女侍應唔積極.眼見店內有起碼兩個二人位, 女侍應都不懂走位安排, 叫籌號明顯無人回應, 都仲唔識即時執生安排下一個入. 入到去坐低, 完全無人識得比餐牌. 要開聲問先有.想試軟雪糕/乳酪新地中的綠茶味, 侍應話部機壞咗今晚無得供應. 唯有叫咗個自製曲奇雪糕的新地然後再叫多個桂花奶凍食物桂花奶凍.....成杯來講, 有半杯都係忌廉 -_-"" .....好搵笨.....忌廉唔滑唔香.....桂花糖好甜, ....其實只係普通奶凍+桂花糖漿仲要個奶凍無咩奶味, 亦都係唔香滑.........後悔叫來試果個曲奇雪糕新地....係自家製我信架, 因為無味嘅, 完全唔甜.....曲奇味都唔突出....成杯最多係粟米片....起碼半杯....真係好賺........D小丸子, 細細粒, 唔軟唔Q, 硬架, 仲有少少唔熟, 食得出有少少生粉....埋單成$65....WELL....被佢嘅裝修同扮日本甜品店風格引咗入來, 原來係不知所謂:( 無下試…Read More

打開信箱有張灣景商場的傳單和新店優惠卷. 見開了一間西餐廳. 後來又見雜誌一小角介紹. 家住深井的我, 放工又無聊的星期五晚, 就嚟呢到試菜.第一次去灣景商場, 一入去就見有電梯落保齡球場. 而眼前就係NOVA了. 唔似一間餐廳, 似係CAFE多D. 黑色的籐椅黑色圓桌, 空間好寬闊. 新開張 我6點就到, 真係好安靜. 呢到係先到櫃位落單比$, 然後侍應會捧餐. 免收加一. 拿住晚市的$20元卷, 用$108 (原價$128)叫咗個SET DINNER.飲品可以選汽水或花茶. 我叫EARL GREY. 估唔到唔係茶包係茶葉! 驚喜架, 即時覺得好有心, 對之後嚟緊嘅食物有信心. 湯同前菜二選一. 我要火腿哈密瓜水牛芝士. 細細粒芝士和火腿唔算好正, 但呢個價錢我唔會要求太多. 我收貨的. 主菜二選一. 我要卡邦尼. 隻蛋好靚呀. 好多餐廳嘅做法係白汁濃過蛋汁, 食幾啖就好飽. 呢到的卡邦尼是蛋汁為重, 淡口味D. 汁唔杰比較水. 意粉的軟硬度適中. 我覺得卡邦尼係可以睇到一間餐廳嘅功力嘅. 呢個卡邦尼, 我自己就覺得過關喇. 呢到人手唔多夠. 我見一路都無人上埋甜品, 見老闆娘(其實落單都係佢)捧餐行過, 我就叫佢上埋甜品喇.嘩, 三件咁多! 以為得一件我選咋!嘻! 真係抵. 第一件白色的, 我食完都唔記得係咩味 -_-"" ...留唔底印象. 無咩特別第二杯迷你蘋果撻. 我鍾意喎. 蘋果片好薄, 清新呀. 個撻唔係死死實實, OK架.朱古力餅, 我就食唔出有咩特別. 可以啦呢到係一間有心嘅餐廳. 價錢又合理. 希望佢地旺場啦. 會再來的.…Read More

約咗人係金百利等. 專登自動傳單睇下有乜好食. 見有間叫開心廚房晚市D餐幾抵, $68或$88有湯, 有前菜, 有主菜有飯或甜品. 打算試下.上去之前已經專登來開飯網搵下料, 但見開心廚房已經執笠. 就無再深究. 上到去先知原來叫用心廚房:(...如果用呢個名再八下, 見到咁多喊樣一定唔上來.....入到去見成間野得2檯人, 各自坐了一個外國人, 已經有D不妙....算啦都上到來就....明明勁多位, 我地想坐開D, 個男經理竟然叫我地坐正係近窗的外國人隔離 我即時黑面. 佢見我咁即改口串我"哦咁你坐番呢到啦, 不過之後你地都咪又係要轉位" 聽見真係火都來埋. 你咁吉點會忽然間勁多客先! 我地得兩個人食得有幾耐佔你個位呢?好喇心情已經唔多好.....睇餐牌睇來睇去唔見街招講果個晚餐....感覺唔多老實專登要人問先肯比個MENU出來的下等招數....我攞了2張傳單問, 一張話晚餐$88, 另一張又話$68或88, 內容唔同, 究竟邊張先真阿叔侍應都攪唔清, 要問其他人先知. $68/88果張先真. $68個湯是栗米羹, $88是燉湯. 我地叫$88 SET. 但家陣個SET唔送甜品. 算了.要了2種燉湯 --- 我飲海底耶無花果響螺雞腳, 佢飲螺頭煲雞. 我果個完全無海底耶無花果味, 味精湯, 好假. 佢果個佢覺得OK小食叫了一個油菜一個水晶肉. 水晶肉普通啦, 2塊仔.主菜, 柚子骨, 味道可以, 肉質可以. 虫草雞, 都係可以的. 總體來講, 非常一般食嘅時候見果位經理大大聲叫兩個熟客定真係老闆做老闆. 又問人開唔開支酒. 之後就見佢地坐係卡位開餐. 果位經理完全無做野,哈哈呢到D服務, 唔計阿經理, 都認真麻麻. 只有阿叔係好好多. 成間野只得經理識少少英文, 果兩個外國人叫野有D雞同鴨講咁叫SET飲野要另外加3元熱飲, 5元冷飲. 當然無叫啦呢一餐真係錯咗一次, 唔會有下次…Read More

筲箕灣安利出名，就來試試魚蛋墨丸河($28)和魚片墨丸河($28)。每碗附送香脆魚皮，本應沒魚片的那碗也附上兩塊魚片，很窩心。然而魚蛋墨丸魚片並不怎麼樣。試一次滿足了好奇心，就算了。…Read More