gourmetfood's Profile

朋友想食中菜，上OP搵除左酒樓外好似都冇咩選擇，搵搵吓見到呢間中菜位置方便又幾多好評，就決定嚟試下。收工去銅鑼灣行過嚟好近，嚟到先知係咁大間舖。門面同裝修都好摩登，同一般中餐館唔同，入面好寬敞又乾淨，坐得舒服！坐低見餐牌有個二人餐 $488，有羹有海鮮菜有麵，就佢啦！海皇瑤柱羹，好足料，有蝦有魚有豆腐，鮮味十足！牛仔粒好香口又腍，食吓食吓好快食晒！蒸扇貝嚟咗個廚師special！用龍蝦湯飯做底再加扇貝，好有fusion feel！扇貝好大粒，火喉剛剛好！最後仲有個炒芥蘭加伊麵，唔大油都ok，食咗少少太飽食唔晒打包拎走。甜品薑汁糕都唔錯，好香薑味！…Read More

平日行過呢間位於地下街嘅日式甜點店都聞到香噴噴。舖面感覺簡約好日系，放晒啲蛋糕同批，好吸引。今日終於有機會買個招牌青森蘋果批同埋香橙芝士蛋糕做下午茶。原來蛋糕都有好多款式！青森蘋果批$33 拎上手暖烘烘，聞到好香，酥皮幾脆，內餡有蘋果同吉士醬，咬入口酸酸甜甜，唔錯！如果即場食應該仲好味！香橙芝士蛋糕$38有點出乎意料，原來係雪喺冰格，食入口有橙香，芝士味淡少少，但口感好特別，有啲沙冰感覺，好清新。下次經過會encore蘋果批！…Read More

明明唔食羊，都要去試下呢間廣獲好評嘅米線，可能評語會有少許偏頗，各位唔好意思除咗名菜羊肉米線外，仲有豬、牛、雞同餃子選擇。揀咗豬腩肉米線，湯係酸菜豬骨湯底，但唔知點解呷一口湯有陣陣「蘇」味，唔夠酸。豬腩肉份量尚可，味道唔錯，有預先醃過，夠味。如果鍾意食雲南酸辣米線，坊間有更好選擇。…Read More

約左朋友去荃灣食飯，身為牛魔王嘅我地，一早book左食斧頭扒放題，大快朵頤一番。餐廳喺沙咀道，距離地鐵都有段小路程。門面係一般西餐廳格局晚市餐牌都幾多選擇，不過都唔係我地杯茶！因為我地預早訂左斧頭扒放題！每位$298，唔單止有36安士斧頭扒，伸有豬手同埋小食！見到有$10隻生蠔推廣，唔執輸又叫左兩隻試下。兩個紅湯加蒜蓉包，中規中矩，生蠔有驚喜，都幾鮮甜，$10隻好抵食。主角登場。大大份斧頭扒加豬手。以為豬手得幾小件，點知都好大份。皮脆肉嫩，夠皮，好食！斧頭扒要7成熟，剛剛好切落冇咩血水，肉呈嫩紅色，好有牛味又唔靭，推介。小食點左芝士西蘭花，唔記得影相，但有拉絲，濃濃芝士味，正。兩個人冇再encore已飽到上心口，性價比高！…Read More

成日都覺得食韓燒係件好青春好熱血嘅事，我同朋友就揀左一個平日夜晚收工後一起熱血。朋友揀咗呢間旺角韓燒放題，旺中附近十分就腳。原來係110分鐘任食，$258，點都夠時間食到飽。入面嘅裝潢好地道，聽住KPOP聽住「滋滋」聲，好熱鬧好似去咗韓國咁。放題形式，要自己畫食物紙，食物種類都幾多，除咗例牌燒牛、豬、雞等肉類外，佢仲有燒蠔、帶子，蝦等海鮮！好豐富另外有熟食供應，炸雞、餃子、炒年糕、水冷麵等都有，樣樣都想試。飲品櫃，有韓式飲品、茶類，酒要另外收費。肉類醃得幾好，唔沾醬汁都夠味。呢塊薄西冷係必食推介！雖然唔係厚切，但一路燒一路充滿油香，睇住燒剛剛好就拎起，肉先唔會靭。海鮮算係豐富，唔太好燒蠔嘅朋友都encore芝士燒蠔！兩個人叫得唔多熟食，試咗餃子同水冷麵都好味，下次多人啲會試多幾樣。…Read More

好耐冇鋸過扒，朋友知我係牛魔王，介紹我去呢間巷裡小店。位置有小小吊腳，喺旺角moko附近，坐地鐵都要行十分鐘左右。小店門面乾淨俐落，坐落喺呢條小街，又幾有特色，好cozy。門口有個menu，一眼睇晒餐廳嘅signature!Top blade專賣flat iron steak，flat iron係牛肩位置，經除筋處理後特別嫩滑。之前見到推介usda prime 390 days grain feed flat iron，問咗今日仲有就即刻點一份。另外侍應推介Hanger Steak，係daily special，口感有咬口啲，一於試埋。先上個沙律，仲有任添薯條。Medium flat iron，入口好軟好嫩滑。Hanger Steak原來係橫隔膜位置，食落有嚼勁重牛味，配上朱古力汁，出奇地配！最後來個熱情果撻，為今晚畫上完美句號。…Read More

早排天寒地凍，三五知己約食飯，有咩好得過去打邊爐！是晚一行四人去左邊爐重鎮九龍城。朋友介紹呢間邊爐店好企理，料又新鮮，坐得舒服，一於呢間啦。門口都見到好闊落光猛。去既時候仲早，未有客，食食下就坐晒人。湯底好多選擇，揀左一胡椒豬肚湯同四川麻辣，滿足晒各人口味！前者好濃胡椒味，厚切豬肚有咬口，剩飲湯都正！後者比我地想象中辣，而且幾麻下，越食越香！牛肉不可少！極上牛拼盤有五款牛，牛白肉好香又滑，牛肉粒好有牛味！自家制手打丸，一個芝心蝦丸一個芥辣墨魚丸，超級彈牙，有鮮味！呢個風沙豆腐要特別推介，外脆內滑，咸香十足，食到停唔到口。椰菜餃好食!其他都係大路野，勝在食材好新鮮! 四個人連野飲，埋單一人四百到，以呢個環境同質素黎講真係唔錯呀！…Read More

友人公司附近開左間新西餐，我見就腳，就決定去試下。餐廳喺油麻地地鐵站附近，原來同一幢大廈好多食肆。一上到去有個好靚嘅餐廳標誌。餐廳主打bar and grill，有酒飲有扒食。環境唔錯，好有情調。入正題，兩個人，點左一份prime sirloin, 一份帶子前菜、湯同埋素漢堡！黑松露露荀帶子，好香松露味，面微grilled，入面仲好軟好鮮。一個人食左粒半唔係好夠喉。蟹肉牛油果忌廉周打湯，呢個係神來之筆，有成匙牛油果忌廉好creamy，蟹肉都幾多。安格斯西冷有成10安士，要medium剛好，有牛味又香，兩個牛魔王三扒兩撥KO左。最後上portobello素漢堡。漢堡包面變成大啡菇，包餡有紅黃椒，青瓜，難得味道唔寡，唔錯！埋單一人$400幾，鬧市中要靚景情調餐廳都係不錯嘅選擇！…Read More

有晚九點幾，誤打誤撞嚟呢到食烏冬，食咗一次之黎成個星期心思思想再去。決定一個食評寫晒兩次嘅食物。店位於巷仔隔離，店內位置唔多，成個裝修同環境感覺好日本。食物當然係主打烏冬，主要分冷、熱、湯、撈。首先嚟個鍋燒烏冬，熱辣辣！湯底好清，撈左蛋花，好鮮甜！呢個鍋有冬菇、獅子狗、牛肉金菇等，好豐富，烏冬超彈牙，食食吓清埋碗湯！朋友叫掛煱烏冬，原來個汁係熱架！另外佢叫左流心蛋同炸雞，流心蛋好美味！雞件炸得juicy香口，正！第二次去想試咖哩烏冬，但可能太夜賣晒。咁就試下廣島蠔烏冬。碗入面加左漬物魚干，酸酸地幾開胃。重點出場，$118嘅烏冬有廣島炸蠔有五大隻，絕不欺場。仲要每隻都皮薄，入面都咁juicy! 讚！兩個人share五隻剛好，一個人就略嫌小小膩！不過性價比好高，推介！…Read More

台式飲品開到成行成市，成日都心癮發作，一星期總要飲兩三次。今次食完晏就行過去觀塘海濱長廊試新野。未行到去點茶，已覺得環境眼前一亮！加上今日涼涼地有陽光，超舒服！茶店裝修好文青，turquoise色摺窗、彩色小旗加埋頂嘅木/竹？條子，感覺好休閒。正題，睇下有咩飲先。呢到幾好，分兩個sizes，有時想過口癮又唔想飲咁大杯就啱晒。三個人，各點咗杯推介茶，買完之後覺得中杯份量剛好。三杯短評：嫩仙草奶茶：奶茶好香，仙草份量多，唔會太甜；珍珠奶茶：珍珠好有咬口，茶底一樣，夠香；玫瑰青茶：有驚喜，好香玫瑰味，好清新，感覺健康啲。…Read More

朋友今晚帶左我去長沙灣試新野，好彩佢同我一齊行，如果唔係間餐廳有啲難搵，喺長沙灣同荔枝角地鐵站之間。行到去門口，又有另一番風味。門口有個舊行李箱放住餐牌，隱約見到店內有啲懷舊voyage裝飾。裝潢好別緻，細睇之下，牆兩邊都有screen播住旅行片段。screen上有行李架，感覺好似喺東方列車一路行車一路食飯。menu以西餐為主，兩個人，點左個前菜，一個沙律，再加個好多食評都推嘅西班牙海鮮飯同一杯smoothie。前菜黑松露露荀，黑松露好香，咸咸地，健康送酒小吃！右邊係烤雞牛油果沙律，沙律菜好新鮮，咬口入「索索」聲。隻糖心蛋恰到好處，烤雞份量夠多，加埋牛油果，飽咗一半。個dressing 酸酸咪咪，好清新。左邊係西班牙海鮮飯，一上台已經好香！海鮮有魚、蝦、帶子、青口，足料。啖啖飯都有海鮮咸香，唔錯！呢個盒係用嚟裝張單架！兩個人食左三樣野加杯野飲，埋單4百幾，論食物質素同環境，性價比不錯！…Read More

身邊有幾個牛魔王朋友，無牛不歡。今日就約左朋友二人同行去挑戰任食牛扒。初時心諗free flow牛扒一係就好貴，如果唔係都應該質素麻麻地，不過佢話食過唔錯，咁就試下啦。餐廳位於大角咀，見到個名即刻哼句starry starry night。入到去都幾有情調，平日夜晚七點幾，食食下坐滿人。朋友一早訂左呢個T骨扒free flow，價錢$298，包side dishes，任食喎，勁抵。不得了，呢塊T-bone有我一隻半手掌咁大，相當巨型！上菜時有陣陣焦焦地嘅肉香。由於怕血，又驚咁大塊扒會靭，點左medium。切開都唔會太過火，亦冇我最怕嘅長流血水。件扒牛味好濃，而且有嚼勁，加左鹽烤既皮脆脆地帶咸香，讚！不過食到一半已飽！好彩冇貪心，side dish只係點左一樣cheesy fries，如果唔係就太浪費，cheesy fries嘅芝士又係烤過，好焦香，份量唔吝嗇，有影相最鍾意嘅拉絲！今餐真係超滿足，性價比極高，雖然係任食，我地都係食左一塊已攬住個肥肚走。走前問下老細，通常係咪都係點一塊就飽晒，佢話見過有兩個女仔，一人食到塊半，再加side dishes！大胃王真係必訪！下次試下呢個，我見都幾多人叫！…Read More

一向好鍾意食餃子，今日食晏就黎到駱駝漆大廈呢個卧虎藏龍嘅地方食餃子。入到去舖仔細細，一般工廈食肆樣冇咩裝修，但都坐滿人。店內除左賣餃子，仲有日本鹿兒島進口豬扒等凍肉。個人都幾鍾意賣得好專，冇咩選擇嘅餐廳。呢度食餃子只有兩款，分白菜同韮菜，12隻同15隻，仲有就係厚薄皮。今日有啲肚餓，叫夠15隻雙拼厚皮，$48蚊，價錢中規中矩。醬料有自制豆瓣醬、日式餃子汁同芝麻醬，感覺好日式！味道方面，厚樣其實都唔算好厚，反而幾有口感。餡料好香豬肉味，唔會太咸，而且爆汁，韮菜好香。店員建議第一隻食唔好加醬料，食左真味先。但我都係鍾意豆瓣醬加醋，正！…Read More

平日下午一點幾，一個人在荔枝角，好想食刺身丼，立即上openrice搵下有咩好食，見到呢間食評唔錯，就黎試下。地點唔難搵，地鐵站出口行兩分鐘到。已過午飯時間，都仲有幾枱客。普通家庭日式料理格居，半開放式廚房，感覺好似乾淨啲。午市定食都好多選擇，由壽司、魚生飯，去到咖哩定食、拉麵等都有，價位大概$70起跳。好想食魚生飯嘅我揀左個雜錦魚生飯，$100，包麵鼓湯，沙律及熱飲。$100嘅魚生飯麵唔會期望好高質，雜錦黎講都幾多款，大路三文魚、油甘魚、吞拿魚、劍魚、半粒帶子、一小撮海膽、北寄貝，甜蝦同蟹柳等，尚算豐富，但有幾件不夠新鮮，微腥。麵鼓湯唔夠熱，飯酸度適中，份量都算係咁。…Read More

我係澱粉質怪，最愛漢堡薯條芝士意粉pizza，今日lunch就黎試新野。呢間舖有兩邊入口，一邊經商場，一邊係巷口。巷仔入口有露天位，好天時坐喺到食住漢堡飲住梳打吹下水唔錯。講返食物，主打漢堡薯條肥仔餐，餡料有牛、雞、豬同菇可選。適逢世界盃仲有多款小食，有我最愛嘅芝士通心粉！事不宜遲，點左個the Classic moo, 加芝士肉醬薯條同蜜桃冰茶，點完嗰下已開始好滿足。開放式廚房，一路等一路傳來煎漢堡扒香！出場，一人份午餐。經典漢堡$58，包面外脆內軟，手打牛肉漢堡扒好多汁，加埋半溶芝士、蕃茄生菜，一口咬落去熱辣辣，正。$38，芝士味好濃，加埋肉醬同新鮮熱辣粗扁薯條，食上癮。另份量都幾多，最後食唔晒。…Read More