NicoleChiu1063's Profile

米線紮根香港幾十年，由最初嘅過橋米線，酸辣米線，到而家嘅麻辣、酸菜魚、蕃茄湯、車仔麵都見到米線嘅足跡，而近年大熱就一定係養生藥膳雞湯米線。食過好多間雞湯米線都麻麻地，今次係同事極力推介，有驚喜喎！👍王子雞店位置隱蔽，靠近學校範圍，平日好易走漏眼。店內唔算大，20個座位左右，乾淨企理。如果平日午飯時間，就要提早啲嚟排隊喇。用QR code掃碼落單，可以慢慢睇清楚圖片，價錢，仲可以加配料，小食，飲品，非常方便。前後去咗兩次，分別試咗兩款招牌米線。姬松茸花膠雞湯米線（$78）一嚟就叫全場最貴嘅試吓😁。 雞湯 好濃（淡黃色），有花膠，姬松茸，蟲草花，木耳，杞子，味道非常濃郁。雞件有6-7嚿，份量足。湯頭鹹淡適中，零味精，飲完唔會口渴。我第一次飲湯飲到見碗底。飲完覺得全身都好補咁。💪😁沙薑雞+雞湯米線（$50）沙薑雞係同米線分開上嘅。一份沙薑雞（例）有1/4隻左右，份量好足，肉質嫰滑，但味道個人覺得偏鹹，如果配白飯就啱啱好。配米線嘅話，可以浸落啲湯度去減啲鹹，但就污染咗啖湯喇！米線方面 - 湯底都係雞湯底（奶黃色），但當然冇花膠湯底咁濃郁啦！口感比坊間嘅彈牙，唔鐘意食米線嘅話，可以改烏冬，菜底（啱健身人士）。服務方面，唔多但啱啱好，有自助飲水區，適合i人嘅我，安安靜靜。總結一下，為咗啖湯，我一定會再嚟，等我！👍[IMG:9]…Read More

我細細個就知道香港有間旋轉餐廳，好高級嘅，成日响電影電視見到嘅。一直都好想去試，但唔知佢叫咩名，到知道個名之後，又好難book位。今日難得有人請食飯，終於圓夢喇！今次book咗窗邊位，原來都轉得很快，食到有少少暈。😅 佢個景唔算對正維港，夜晚嚟睇唔到啲乜嘢，我估中午嚟可能好啲。自助山係傳統嘅酒店buffet，入座有杯 welcome drinks 俾你，餐後又有杯餐飲，其餘只有清水。冷盤海鮮 - 龍蝦、長腳蟹、青口、海蝦、蜆、螺，新鮮爽口彈牙。刺身 - 三文魚、吞拿魚、帶子、北寄貝、油甘魚，全部新鮮。沙律，火腿 ，煙三文魚。熱葷點心 - 蝦餃、燒賣，比一般酒樓好食。咖哩有紅、黃、綠，好香微辣。燉湯有佛跳牆，好鮮甜。鐵板燒 - 和牛，鵝肝，試咗少少，好香。粉麵有魚蛋粉，冬陰冬。甜品有雪糕、各式蛋糕、撻、榴槤甜品、火焰雪山。總結一下，食物質素中上，味道唔錯，服務貼心，但面對國內競爭，始終差咗少少。但個人覺得自助山點都要嚟一次嘅！…Read More

成日返大陸食海底撈，今日第一次响香港食。試吓港版服務有幾貼心。😁星期日中午12點前基本上都係唔駛排隊，而家經 open rice 訂位，下午5點前結賬仲有8折。抵喎！一入座就有萍果+零食禮物包（有瓜子，飯焦，薄脆），好開心呀！自助醬料區，好乾淨企理，有粥有湯水，雖然冇我鍾意食嘅冰粉，但都OK 啦。涼拌菜只有海帶、蘿蔔、雞脾菇，冇涼拌魚皮有少少失望。湯底揀咗招牌蕃茄鍋，麻辣鍋，花膠雞鍋，清水鍋。蕃茄鍋同深圳一樣，服務員會幫客人調一碗牛肉蕃茄湯俾你，老實講，我好鍾意飲，酸酸甜甜，每次都飲3碗。花膠雞鍋就麻麻地，偏鹹，雞肉（1/4隻雞）另上，雞肉新鮮，唔錯。麻辣鍋中麻少辣，打邊爐剛好。基本上全部食材都落晒去麻辣鍋入面。😁火鍋料叫咗毛肚，牛栢葉，牛肉，豬肉，豆皮，食材新鮮，好嘛。金桔檸檬水$15 無限添飲，服務員不停加冰，添飲服務我覺得啱啱好，有需要時會主動幫忙，但又唔會打擾到客人傾計。仲會主動介紹優惠，折扣，贈送小禮物。今日食得好開心，下次仲會再嚟。…Read More

食即撈海鮮重緊要乾淨衛生，响香港食就比較有信心啲。聽聞千海水產都開咗一年，口碑唔錯，今日就去試吓。午餐時段有180分鐘，好似好耐，其實都要分秒必爭，同時間競賽。跟住 以下步驟就冇錯喇。今日啲攻略好成功。💪🏻攻略1：入會做會員，可以減$20+送超大環保袋攻略2：早到早排隊，入場第一時間，攞鮑魚，蟹，拎去俾人洗，因為要等，遲咗勁多人，有排等。攻略3：返埋位點湯底，點大鍋，唔點鴛鴦鍋。空間大啲，可以多放海鮮。最好揀啲同海鮮配搭到嘅湯底，例如，花膠雞，椰子雞，冬陰功之類。攻略4：出去攞啲熟食（有小龍蝦，點心，涼菜，烤榴槤），火鍋配料（花膠，螺片）用嚟熬湯，醬料，飲品。而呢個時候，湯底同海鮮都差唔多到，可以返埋位喇。攻略5：再次出動攞蝦類，蜆類，可以响自助沖洗區洗一下。唔駛排隊。攻略6 ：有問題搵職員，萬事有商量👍🏻（隔離枱阿姐教嘅）食物方面海鮮新鮮就冇難食嘅可能，鮑魚彈牙，蝦肉爽口。用apps 可以order 牛肉，豬肉，雞肉，種類較少，始終海鮮先係主角嘛！熟食都可以用apps 落單，有鵝肝多士，乳鴿，紅糖糍粑，仲有木瓜糖水都唔錯。環境/服務方面坐位有少少迫，唔算闊落。但服務員收拾執枱都好勤快。有需求都好樂意幫忙。總結一下，海鮮種類唔算多，鮑魚一款，蟹兩款，蝦三款，蜆三款，螺一款。但款款都新鮮嘅。因為主打海鮮，apps 啲肉類同其他食品會比一般放題少。180分鐘要揀海鮮，要煮，要攤凍，要食，要來回攞幾轉，其他都幾花時間，最好多幾個朋友一齊去食，分工合作就最好喇。…Read More

朋友成日推介呢間米線，但係日日都排長龍。今日睇啱時間出擊喇！今日係星期五嘅下午5點左右嚟，唔駛排隊直入。一個人嚟就安排坐單邊吧位，ok嘅，都乾淨闊落。朋友推介話呢間湯雞好正，今日就試吓佢嘅招牌醉雞湯米線啦！菜單上寫明係即叫即整，所以要等耐啲，好期待呀！點知落單唔夠2分鐘就上枱，又話即做嘅？醉雞湯米線（$62）一飲啖湯嘅時候就知道出事喇！啲湯唔夠熱，即係唔係即整啦！味道方面，啲酒係直接倒落去，冇煮過，所以酒味好濃，蓋過雞湯味（亦可能佢本身啲雞味唔出啦）！總之湯底除咗甜味同酒味就飲唔到雞味。至於雞肉就俾得好足（有6-7嚿 - 有翼有脾有胸），仲有豉油辣油俾你任點。但係啲雞肉好柴好老，又唔似煲完湯啲湯渣咁軟糯，而且仲幾油吓。總結一下，雞湯米線的確比平日食嗰啲米線健康啲。但如果係向住「飲靚湯」出發嘅就會有啲失望喇！…Read More

嚟油塘大本營唯一原因係嚟附近拜山，所以一年會嚟一次。每年嚟到都發覺發有唔少變化，食肆年年更新，算係好事啩🙄。今日嚟咗茶皇殿飲茶，貪佢地方大（比樓下嗰間），又寬敞啲，價錢差唔多，就一於試吓啦！睇返啲食評話呢度啲服務態度好差，可能佢哋有留意啩，當日啲服務都好正常，冇話叫極唔嚟或者態度差。我覺得OK 。食物方面，叫咗啲點心，炒粉麵飯，仲有特價花甲王。豉椒炒花甲王特價$68/斤，同街市買差唔多，非常抵食。花甲隻隻飽滿多肉，豉椒汁好惹味。乾炒牛河第一次食咁多牛肉嘅炒河，真係一啖河粉一啖牛肉。味道中規中矩，勝在唔油。點心全部即叫即蒸，其中上湯浸鮮竹卷，潮州粉粿，春卷最出色。蛋散，炸兩就唔係咁得，下次咪叫。😅如無意外，出年應該都會再嚟。…Read More

今年經歷咗一次重生！為隆重其事，要好好慶祝一下。阿妹話請我食好嘢，絕對唔會令我失望。嗯！雪舟果然好得。聽店員話店鋪轉咗手，所以菜單都轉埋。晚市有4個套餐$1588 / $1488 / $888 / $788，分別在於和牛質素同份量，海鮮種類。今次揀咗最貴嘅$1588 套餐，有龍蝦同埋厚切西冷和牛。另加一款小食，飲品，鵝肝多士。由日籍廚師親自操刀。前菜煙鴨胸 - 好嫰，肉味濃郁。醋漬八爪魚 - 微酸，八爪魚熟得啱啱好，仲有鮮味。炸芝士 - 外脆內暖，好開胃。烤焗三文魚用錫紙焗嘅三文魚，一打開個錫紙包，真係好香。三文魚好嫰好鮮味。刺身三文魚、油甘魚、牡丹蝦。新鮮嘅食材就乜都唔需要，刺身食出鮮味。鮮蝦蟹籽牛油果沙律牛油果好creamy，蝦肉爽口彈牙。鐵板龍蝦（配龍蝦汁）龍蝦爽口彈牙，肉質結實，鮮味濃郁，個人覺得鹹咗少少。鐵板鮑魚（配鮑魚肝醬）平日唔食鮑魚肝，估唔到咗鮮味，原汁化原食，配合鮑魚一齊食，好鮮味呀！鵝肝多士（套餐外）見隔離情侶食鵝肝多士，越望越想食。。。 果然好好味！鵝肝入口即溶，多士脆卜卜。必食推介。厚切西冷和牛和牛配柚子醬油、炸蒜片、岩鹽、特製醬汁（青色酸酸地唔知咩醬）。個人覺得配岩鹽最突出牛味，柚子醬油就解膩。和牛本身牛味好濃，油脂充足，厚切都好嫰，啖啖肉好滿足。龍蝦頭味噌湯（另+$30）用龍蝦頭煲嘅味噌湯，一字記之「鮮」，仲有啲甜味。食開龍蝦必加。和牛炒飯年紀大，總係要食啲碳水化合物。炒飯收尾最好。飯炒到粒粒分明，和牛粒同炒飯融合，飯有肉味（好味）。好完真心好飽。甜品：菠蘿雪葩+蕨餅菠蘿雪葩非常清爽，蕨餅微甜，好滿足。店員服務貼心，適當時候出現，唔會妨礙客人傾計，但又會照顧到你嘅需要，非常好…Read More

屋企人接受唔到螺獅粉，唔可以响屋企煮，咁唯有出街食啦！問題係香港嘅螺獅粉店少之又少。好彩仲有秋香。之前响葵廣成日俾人話，咁嗰邊通風又確實唔好嘅。而家轉咗地鋪就乜問題都冇啦！ 店內裝修簡潔乾淨。幾張4人枱，坐得好舒服。價錢同之前一樣，仲多咗啲小食套餐。炸蛋螺獅粉（$46）食螺獅粉就一定要配炸蛋（我話嘅），炸蛋吸飽湯汁，等到最後食就真係滋味無窮。螺獅粉比米線Q彈，加埋啲配菜（豆角、酸笋、炸腐竹、花生），唔駛加餸都好豐富喇！豆筍套餐（$20）套餐包一罐飲品，一碟小食。豆筍就似涼拌腐皮，唔辣嘅，好清爽。終於食到心心念念嘅螺獅粉喇！好滿足。下次再去幫襯。…Read More

慶祝生日，想食好啲，貪心啲。想打邊爐，又想食放題，又想食甜品。。。 思前想後，今次去牛之鍋。牛之鍋店舖空間唔算大，所以自選區唔多，只有火鍋配料，火鍋醬料，飲品，少量甜品＋蛋糕。所以大部份都係坐定定，用apos落柯打就得喇！火鍋配料同醬料區，冇乜特別，都係啲菜、蕃茄、蘿蔔、丸類、菇菌類。醬料都係啲普通醬料。飲品區，相對就有誠意好多喇！有三款玻璃樽裝汽水（可樂、 雪碧 、忌廉），仲有自家製手打檸檬茶、羅漢果茶、地們果汁、罐裝汽水、台灣罐裝飲品，仲有幾款啤酒。套餐方面分A, B, C 餐。A餐最平，相對少啲嘢食，只有肉類。B餐有海鮮，有燒鮑魚，相對CP值高啲。C餐貴多少少，就有燒蠔，當然肉類質素再高啲啦！今次揀咗中價位嘅B餐。刺身泰式生，甜蝦，帶子，三文魚，油甘魚，赤貝，八爪魚，仲有其他幾款魚類都算新鮮。我哋叫咗兩轉。火鍋牛肉有安格斯，牛肩胛，羊肩肉，雞件，特選豚肉。牛肉，豚肉無限call 真係食肉獸天堂。海鮮有鮑魚，海蝦，青口，韓國肥蠔，大白蜆，魚片。鮑魚，肥蠔，大白蜆超正。炸物芝麻雞翼，每人至少2隻。串燒絕對唔可以錯過，店內有爐可以熱住啲串燒，保證串燒熱熱地。牛舌，菠蘿，雞脾肉，五花肉，肥牛，羊肉，台灣腸都好食。而且密密燒，效率高，又少漏單，抵讚。最後，真心推介佢啲甜品好少見放題有咁多甜品款式，而且仲要好食嘅！除咗自選甜品區有啲小蛋糕，布甸，雪糕，雪條外，仲有雪糕窩夫，幾款芭菲，糖水，燉蛋白，連芋圓，綿綿冰都有，真係頂呱呱。店員大多係年青人，手腳勤快，有活力有禮貌。唔怪得佢而家星期六都爆場啦！…Read More

姪仔DSE 放榜，家人高興之餘，預早BOOK 定炙和味。話之前食過Lunch set 都唔錯，份量足，唔駛食放題。因為住附近，所以就專登走過嚟留枱，已當面講明book 7位食套餐，但店員話7位要落$500訂金。心諗，可能人多就要俾訂金啦！之後就安心等食。去到入座後，就俾QR code 落order， 但係放題menu，於是就叫店員俾過個套餐QR code 我哋。店員一聽到我哋食套餐就變臉，話要叫經理搞。個女經理一嚟就黑口黑面。訂座時有誤會大家都唔想，又唔係話你有錯又唔係拗著數，駛唔駛先下口為強，一直响度強調你哋規規矩咁咁咁…… 「要放題先可以book位，套餐定食冇得book 位，要响出面等位。」咁我問：而家點呢？我哋唔食放題，要食套餐。個女經理諗咗一陣，答：「你哋唔好坐呢度，坐另一張枱」，於是我哋就轉咗去隔離枱，其實真係唔知有咩分別。女經理強調：「你哋食套餐得60分鐘咋，話你知。」簡直係三等公民嘅感受 。食物質素 份量足，一個人食絕對夠飽。魚生都算新鮮。鍋物烏冬係普通嘅即食烏冬。牛柳粒就係平日常見嘅一口和牛。牛味一般。壽司飯鬆軟彈牙。套餐平均$100一個，格價同品質相乎，CP值一般。飲品方面 選擇幾多，有台式飲品（各款珍珠奶茶），又有港式檸茶，奶茶。味道都唔錯。最後，到食完埋單俾錢時，個女經理仲講：「下次食套餐冇得book位，要响出面等位。」放心！絕冇下次。🤬 而且食完呢餐，真心覺得食套餐定食就夠，食放題就去第二間好過。🙏🏻…Read More

今日行開新都會，見鮮芋仙冇人，就第一時間想試吓！原本心情好好嘅。。。因為我今日去shopping，所以左一袋右一袋，見店內冇人就想坐咗入去擺低啲嘢先，再諗吓食乜咁啦！點知行到坐位前就俾個店員截住咗，話要點咗餐先好入嚟，我見店內冇人，問一個去點得唔得，佢就話：唔得，要點咗先可以入座。無語！但如果規矩係咁冇都辦法。點知，點完餐坐低後，見到4-5個外國人走入嚟坐低，店員冇截人之外，仲好好服務咁俾個餐牌佢哋慢慢睇。咦？咪即係差別對待囉！講返食物質素，今次點咗佢嘅招牌 --- 布丁Q麻糬牛奶冰。一上枱只見一座冰山。兩個人絕對食唔晒！座冰山係冬瓜茶味（個人覺得），上面有奶茶布丁＋雲妮嗱雪糕＋勁多珍珠，再淋上花奶，焦糖漿。口感豐富，味道討好。味道方面，刨冰本身唔算好甜，冰粒都幾粗吓，個人鍾意綿綿冰多啲。而珍珠QQ彈彈，奶茶布丁茶味濃郁，互相配合得幾好。雲妮嗱雪糕屬平價貨，非常一般。兩個人奮力食咗差不多30分鐘先食晒，食完凍到打冷震🥶，建議叫返杯薑母熱飲舒緩一下。另外，我哋又叫咗一杯芋圓冬瓜茶。味道清爽，甜度偏甜。芋圓細細粒，好有咬口。可惜我哋唔係叫熱飲，食完刨冰真係雪上加霜。🥶…Read More

今時今日點解仲要留港消費呢？🤔係愛❤️呀！為咗留港消費，今日嚟咗好耐都冇行嘅青衣城。好開心啲舊鋪仍然响度，但新鋪都有唔少。近期生煎包好hit，有幾間仲係長龍店。排隊就唔好喇！隨緣啦！行行吓就嚟咗堅信號，今日冇人排隊就一於試吓。眼見店內有幾張枱無人，加上門口冇人安排坐位，所以就直接行入去。點知俾個店員大大聲講：响出面撳飛仔呀！好啦！可能係規矩係咁，出去撳飛，唔駛半分鐘又入過去（我覺得多此一舉）。但行入去後，店員冇安排坐邊，我哋見有卡位就坐啦（因為買咗啲嘢，有一大袋）！點知店員又大大聲講：坐埋一邊。想轉去坐張細嘅二人枱，咁啱又俾人坐咗。算啦！算啦！唔知係咪錯覺，覺得啲店員個個都西口西臉，黑口黑面咁。Apps 落單，唔駛再面對啲店員，幾好！今日點咗幾款招牌。堅信號生煎包 包底煎得好脆，皮有啲厚，入面堅爆汁。又熱又爆，建議最好篤一個窿攤一攤，攤15分鐘左右先好食。肉餡結實，湯汁味濃，的確好食，難怪係招牌。灌湯小籠包皮薄爆汁，入口唔算好熱。一啖食滋味無窮， 個肉餡同生煎包一樣 ，所以味道，爆汁度同生煎包同樣出色。紅油韮菜餃子 紅油有少少麻辣，但配韭菜餃子，皮太厚個人覺得有啲怪。配返薄皮雲吞（抄手）會好啲。上海粗炒（套餐）麵條炒得乾身唔油膩，鹹味適中，一個人食絕對夠飽。套餐包一款小食（2個小籠包），凍飲 ＋$3。單戀豆乳仙草凍就係豆漿加仙草凍，兩者配搭冇驚喜，唔明點解叫「單戀豆乳」，好肉麻。😅總結食物質素係好嘅。但服務就強差人意喇！面對強大嘅競爭對手，除咗要食物質素外，仲要有服務態度。身為香港人固然對服務冇咩期待，但態度呢？可唔可以客氣少少，唔好將你啲壓力怨氣反映俾我哋「享受」得唔得呢？…Read More

想食平價上海菜，又唔想出九龍，通常都會諗起蒲東小館。 佢响葵興KCC，搭地鐵行過去，全程响商場入面，真係黑雨都唔駛怕。最難得嘅係，佢開足7日。今日係食套，套餐有前菜、主食、飲品， 價錢由60至到100蚊不等。今日一行六人食咗以下嘅菜式。涼拌茄子（套餐） 個人唔鍾意食茄子， 但同行人話味道唔錯， 食得出有醬油，醋，味道酸酸地，好開胃。蒜泥白肉（套餐） 醬汁同涼拌茄子一樣， 蒜泥唔夠多，就唔夠香。小籠包 小籠包皮薄爆汁， 肉質有啲鬆散，但係整體合格有餘。酸菜魚拉麵 湯底酸辣適中，麻味好重，加上魚片好滑，估唔到响呢度可以食到唔錯嘅酸菜魚。排骨擔擔麵 湯底花生味好濃，有辣味但唔會好嗆，比夏X館出色。排骨炸得酥脆，但就乾咗少少。雞肉燴麵 湯底係雲吞雞湯同款，鹹鮮口味， 菜比雞肉多，算係清淡口味。要注意佢嘅麵量係最多嘅，一個人應該食唔晒。蒲東小館炒飯 醬油炒飯，炒飯粒粒分明，味道鹹味適中。雞扒菜飯 無骨炸雞扒食落去好脆口， 菜飯一般般。 問題係成蝶菜冇汁，食過去好乾。雞絲涼拌麵 啲麵上枱已經結埋一沱，要花好多時間拆鬆佢。雖然叫「涼拌」，但啲麵係熱嘅（暖暖地），唔好以為係冷麵。 調味醬有好濃嘅花生味，食落都幾香口。環境方面去嘅時候客人唔多，唔知係咪想慳錢，好似冇冷氣咁， 越食越熱一路流汗。之後人多咗老細先肯開返大啲冷氣。希望下次可以改善吓啦！…Read More

今時今日想堂食漢堡包，真係好難。 牡丹樓長期冇位座，啲人坐响度過世咁。去餐廳食又貴又要加一俾小費。好彩仲有Shake Shack。佢响新都會廣場入面，店內寬敞。坐都幾舒服。可能大部份店員都係外國人嘅關係，店內唔係好多人，當日外國人，學生客多。價錢走中高價路線（個人覺得），比牡丹樓貴，比美國餐廳平。幫襯咗兩次，點個啲招牌美食。Shake Burger （單層 $58/雙層 $81）有芝士、牛肉、生菜、蕃茄、酸瓜、洋蔥。麵包係正常size （牡丹樓大），單層都飽飽地，雙層啱男士多啲。牛肉嘅牛味超濃，加埋半溶芝士，好Juicy。酸瓜酸味溫和，連平日唔食酸瓜嘅朋友都食到，洋蔥甜甜地唔辣。整體配搭剛好，兩次嚟都有點佢，唔怪得放响餐牌第一行啦！Hamburger (雙層 $71）牛肉、生菜、蕃茄、酸瓜、洋蔥。配料同Shake burger 差唔多，只係冇咗芝士。冇芝士感覺就冇咁膩，但就比較乾，要啜多幾啖汽水，或者加啲茄汁。芝士狼牙薯條大大條，脆卜卜，係好兒時最鍾意食嘅粗紋薯條。淋上鹹鹹地嘅車打芝士醬，唔駛點茄汁都夠味。士多啤梨奶昔味道唔太甜，有士多啤梨味，但個人鍾意牡丹樓多啲。服務方面我要強烈讚揚，我未試過响香港食肆，有咁好咁細心嘅服務。知道我同朋友傾計，竟然主動提出調低音樂聲量，怕嘈到我哋。又主動幫我哋refill 汽水（唔知原本可唔可以 refill ) 。好感動呀！多謝你Mandy。🙏🏻…Read More

日式燒肉（日燒）同韓式燒烤（韓燒）最大分別應該係醃料同配菜。日燒一般都係冇醃製過，全靠本身原汁原味，所以肉質係關鍵。而另一分別係份量，日燒適合「孤獨的美食家」，韓燒就適合「合家歡」。今日嚟到燒肉一番就係日燒代表喇！佢哋主打平價親民，所以有好多學生幫襯。今次都係由家中後輩介紹過嚟。👍🏻燒肉一番嘅肉類分為100g / 200g / 300g，可以散叫肉類，或者加少少錢叫套餐，套餐包括前菜、麵豉湯、白飯（可加$升級丼飯，湯烏冬，加$享半價飲品），另外套餐包一款小食或者50g 牛胸腹。套餐價錢由最平嘅$49 起，自由配搭，豐儉由人。肉質方面，因為本身冇醃製過，主打一個原汁原味。老實講一分錢一分貨啦！牛小排，牛板睷雖然貴少少，但肉味比較濃郁。牛胸腹似一般肥牛，肉質較粗。推介係牛舌，厚切豚五花，五花腩肥肥地，燒起嚟好香脆。價錢唔貴$6X 就食到。環境舒服，空間夠大，唔會一屋油煙。服務一般般，唔好咁講究，主打一個輕鬆自在，嚟多幾次都唔會有負擔。…Read More