Chieko's Profile

今日專登來體驗一下一人燒肉。2:05pm左右黎到唔使點等有得入，安排去一人坐位。落單係用手機scan QR code自助落單, 都唔錯。叫左下午茶自選二食（$78/100g). 落左單黎5分鐘左右就有得食，值得一讚👍🏻講返個餐，可能係下午茶關係，份量偏少，男士應該唔夠食。（個餐本來得2碟肉，第三碟是新開張奉送的）肉既賣相亦都一般，雞肉望落去似一堆碎肉咁😵‍💫 味道正常，唔算突出，亦不會難食。服務上有待改善：1. 當日我揹住個袋入去食，全程職員都無提過可以拎個籃裝住個袋，結果全程放左個袋喺大髀食。2. 職員唔會主動提及有水供應，似乎想你直接order野飲。（希望係我feel錯啦）總括黎講，唔算差，亦無驚喜，唯服務有待改善。…Read More

買個腸粉餐，講左魚蛋要唔辣，我見阿姐加左啲辣既魚蛋入去，已經即刻問。撈魚蛋個阿姐仲指住張單話「辣丫嘛」，我同返接單阿姐講，佢就只係識笑。我都同佢地講算數，就咁抽返啲辣魚蛋出黎唔使整過兜。落醬料時話要麻醬，豉油，芝麻，阿姐仲好醒咁問「即係唔要甜醬？」我答「唔要」結果拎到返屋企開蓋，大大pat甜醬喺度.老實講，我都唔係第一次幫但全間舖人一齊發夢都係第一次見，非常失望！講返個腸粉，腸粉同燒賣都正常，係個魚蛋麻麻地唔彈牙的。 附上照片一張（註：我事後有喺社交平台 messager PM 舖頭講過上述事件，但魚蛋哥係零回覆，只好擺呢度俾大家參考）…Read More

今晚大王突然話想食好野，咁佢又提過想食鰻魚三食，所以就黎左呢度。叫左幾樣野：1. 鰻魚飯（$288）： 個鰻魚燒得唔錯，但個湯太甜，同鰻魚飯有啲格格不入。2. 腐皮溫泉蛋：賣相唔算好，估唔到咁好食腐皮燒到外脆內軟，入面既係半熟蛋，超夾！3. 牛油雜菇：無乜特別。但好地地一個牛油雜菇加左黑椒，太濃+搶哂啲味....4. 親子丼： 分量都大，雞肉好多好滑，可以一試。總結：如果係為左鰻魚飯而嚟既話可以免了。如果再來，應該只會試串燒同腐皮蛋…Read More

是晚與舊同事聚舊，5個人揀左呢間打邊爐。揀左椰子礦泉水雞湯底，上菜時侍應真係拎支Bonaqua，兩個椰青同半隻雞過黎，首先倒哂支礦泉水落去，再落埋椰青，再刮哂啲椰青肉落去，水滾就可以落埋隻雞煮3分鐘就可以食 果然煮左3分鐘既雞仲好嫩滑，而個椰青水就好清甜食完哂啲雞同飲椰青水，就加水打邊爐喇。是晚無叫海鮮類，所以唔評價食物是否新鮮。菜單上有好多選擇，剩係手切牛都分三種。我地叫左牛，豬，響鈴，豬肺，皮蛋，生菜，鮮腐竹，雜菇，脆骨腩，墨魚滑，紫洋蔥水餃，花鵰雞件。值得一讚既係紫洋蔥水餃，好清甜食到差不多尾聲，夾起條菜發現了小小強叫左阿姐埋黎佢只係話幫我換過我隻碗個碟，完全無諗過換左我盤未煮既菜（當時仲有大半未食），而且亦無講任何關於安慰你既說話。呢度啲侍應姐姐都好好客，會行埋黎同你講兩句，不過只限係佢自己行埋黎既時候。否則，每次要叫人加湯或加單，都要叫起碼3次先會有人應，應左只係會話轉頭，跟住又無左件事。如是者真係幾無癮 應該無下次。…Read More

之前搵緊MK有乜食既時候發現左呢間標榜「一碗可以連湯都飲埋既米線」，今日專程嚟試係味真係咁正正值午飯時間，人未算多但要搭檯。坐位唔算闊，肥少少都未必坐得落。叫左椰子雞米線，嚟到比想像中細碗，男士食既話建議加小食，如果唔係應該好快餓講返個米線，除左雞，仲有腐竹，冬菇，菜同埋蔥，個湯飲落去唔算濃，但真係無味精既清雞湯。椰子味唔算重，只有一到點味道，我懷疑那一丁點椰子味係面頭果一茶匙椰絲黎.....雞就好滑，但分量唔多，亦都無雞味. 但總體而言碗米線係有heart可言，畢竟喺香港地要搵間零味精既實在太難. 收你$43仲有雞食，希望佢真係做到落去啦。…Read More

是日食完晚餐，好飽咁經過Ice Puff, 見到佢標榜用日本麵粉整雞蛋仔，雖然個肚腩已經好大，但仍然買黎試雞蛋仔即叫即整，原味雞蛋仔$18，雞蛋仔之中佢算偏貴，但用料靚既話一定抵返。落完單，姨姨會俾張號碼卡你，等叫號碼就可以了😊等候時間約5分鐘，算快。雞蛋仔望落同一般見到既有少少分別，較硬身。心諗唔會係伏掛？😨點知一試有驚喜！佢個質感係外脆內軟而且蛋味好突出！趁熱食真係不得了！一底雞蛋仔，兩個人行到街尾已經KO哂唯一有小小美中不足係個雞蛋仔凍左個皮會變得硬左少少，所以大家要食快啲同趁熱～呵呵總體而言，雖然$18係偏貴，但真係好足料。喺支持小店既前提下我會返轉頭…Read More

今日去左佐敦拎報告，順便食埋個飯先走。 見到呢間門面望落ok 就入左去。當時12:20pm左右。一入去，全場得3個人食緊野，個侍應哥哥知道我兩位，就叫我平排左吧檯位算，我明佢想番返啲檯俾其他人，我只可以怪自己早過下兩個入黎又可以正常對坐既人.....Lunch set餐牌, 大部分around $50既價錢。叫左海南雞飯餐，凍奶茶少甜。阿叔就話奶茶無普通奶茶，得泰式奶茶。ok, 照要！ 話要既時候佢先講每杯加$7....個海南雞夠滑，而且去左骨，都ok. 油飯既形狀係金字塔咁款，特別就夠特別，不過個飯好淡。湯都係一樣係偏清淡。食緊野既途中，阿侍應阿叔喺後面行來行去，又開聲叫你坐埋去少少. 食完同個fd 繼續傾左陣，傾多兩咀阿叔叔就過黎話收碟。我前後加埋食坐左半個鐘姐...出面又無人等位，何必要這樣呢？任你啲野再好食，除非你唔休做，啲服務咁樣點留到客？…Read More

星期天的晚上，喺諗緊食乜好既時候，發現左呢間小店！全因我家大男孩愛吃crepe, 就抱住一試既心態落左黎！結果係：呢間野可以encore!! 😍😍😍小店唔大，剩係可以坐到廿人左右。到埗時已接近9點（佢收9半！）所以無乜人，難得兩口子可以喺Soho 區享有寧靜既一刻👍🏻講返正題，打開餐牌，選擇唔算多，小食、Salad, Pasta 同埋Crepe 都各有3-5款既選擇。是晚叫左Caesar Salad, Carbonara 同一個叫Pearland 既Crepe.Caesar Salad 正常，唔算驚喜，不過勝在啲菜夠新鮮，但麵包垃就淋左，扣少少分Carbonara 好夠忌廉味，個汁又唔會太杰身！兩個人好快就將佢消滅左！食完仲唔會滯Pearland (Crepe) 間野叫得Insta Crepe, Crepe 一定係主打。叫左pearland, 有蜜糖煮過既梨，焦糖醬，朱古力醬，花生加上即叫即製既Crepe. 食既時候好想大叫好味道！😆總括而言，此店乃用心之店，食物都用心製作。我會返黎再試埋其他野食架，等我啊…Read More

近日突然想食豆花先發現原來而家連豆腐花都好難搵。。。尤其係港島區 繼日前ｏ係佐敦食完，今日試中環的夢想豆花。看openrice其他食評, 原來呢度老闆上過tvb賺嬴左創業基金.放工黎到中環已經8點,沿半山扶手梯上擺花街, 再沿擺花街往威靈頓街走1分鐘左右就見到間舖. 因為舖位較細同埋無突出既招牌, 各位要特別留意小心行過左都唔知.入到去姐姐好招呼. 買左原味熱豆腐花($20) 同埋咖哩魚蛋($15)外賣. 熱豆花係即叫即滔出黎, 糖既份量可以因應個人喜好添加.返到屋企因為要食飯既關係,擺左個豆花入雪櫃, 食左個魚蛋先.魚蛋較為結實, 少少辣, 不過無乜咖哩味. 不過鍾意食咖哩魚蛋既大人又話好好食. 結果豆花雪左個零鐘先拎出黎食. 本身無乜期望, 點知一食落去好滑同好有豆味估唔到雪左落雪櫃拎返出黎都咁滑~ 話說回來, 此豆花已經由$18加到$20. 好坦白, $18 一個豆花黎講已經算貴. 我肯俾係因為佢位置O係中環. 不過我都會返黎幫襯. 因為有HEART既小店已經唔多, 唔想再多一間消失.…Read More

今日同媽媽做完shopping 完，媽媽話肚餓，又見到呢度有間上海野，咁就黎左食...點知中伏叫左3樣野：1. 煎鍋貼鍋貼上檯夠熱，個樣都幾飽滿，賣相合格。食既時候啲肉汁都夠多，只係鍋貼皮實在厚實，就算個底煎到金黃色都唔覺得脆，扣分！2. 雪菜肉絲炒年糕呢樣算正常，只係雪菜同肉絲真係比較少有圖有真相，無驚喜3. 豆沙鍋餅牙力少啲都咬崩牙既一道菜。毫無鬆脆感覺之餘，咬落去係硬既...完全唔知想點埋單$137. 好難返轉頭…Read More

同Honey 去完QE 探病, 諗緊食乜野之際, 我地就齊諗到之前燉奶佬個位間新店!  一於入去試下咩料!!!店面裝橫新店關係, 新裝修, 店面係新派茶餐廳格局, 望落都幾高雅同乾淨. 店員帶左我地去坐卡位.餐牌一睇餐牌, 比佢D choice嚇親, 超多選擇. 由Pasta, 意大利飯, 普通茶記應有既碟頭飯, 到一人一鍋既火鍋都有價錢仲只係由$39 既碟頭到$7x 既risotto, 齋睇餐牌係幾抵~!食物我地叫左扒鴨胸意大利飯($73) 同埋蜜糖芥末汁煎豬扒配薯菜 ($68)另外叫左熱檸茶同凍奶茶少甜. 少甜有別於其他茶記,真係做到少甜, 好amazing  總括而言, 呢間可以encore!…Read More

久聞藝人林子善於大坑開左間龍鳳冰室, 又話說老闆專誠學炒滑蛋同沖奶茶云云. 一直未有機會試, 適逢龍鳳冰室開分店, 卒之有機會試下~此店位於春園街中間位置, 在本身已經有很多食店既春園街而言, 由莊士敦道望入去毫不顯眼. 要行入少少先會見到佢既icon - 大大個龍鳳冰室既招牌. 幸好本身招牌底色是紅色, 注目度提高了不少.未入到門口, 已有伙計來招乎再安排坐位. 不錯.內裡裝潢方面, 秉承大坑店既風格, 燈光光猛, 彩色磚牆配大大塊簽名板, 簽名板上盡是名人簽名. 店面不大, 全店大概可坐40人. 繁忙時間應該要等位吧? 是次試左招牌特餐 - 厚多士配炒滑蛋+秘製雞翼通粉+熱奶茶. ($48)一黎到, 我塊厚多士個樣唔太靚仔, 牛油搽得唔渾. 不過眼見友人o個一塊又ok, 可能我o個塊係"特別版"掛~ 多士上檯仲係熱既, 烤得剛剛好, 連皮都係脆的! 好驚喜 滑蛋賣相亦不俗, 上桌時仲見到d蛋汁"浪下浪下". 食落滑係好滑, 但欠缺蛋味, 是加太多牛奶了嗎?最令人大喜的原來係個通粉~!! 雞翼夠大隻, 亦好入味, 但又唔會滷到淋哂~! 通粉仲有彈性唔會太淋~呢一點好多茶餐廳都做唔到, 我好耐無食過仲有彈性既通粉了~ besides, 湯底加入左粟米湯, 令通粉食落甜甜的, 好好味~最後係奶茶. 聽聞洪爺(林子善於喜劇之王既角色名) 專誠學沖奶茶. 一試便知龍與鳳. 奶茶不俗, 好滑. 以本人飲左咁多年奶茶而言, 個人覺得茶可以再濃一點點. 不過重點不在此, 是次奶茶唔夠熱係致命傷. Overall黎講$48 o係春園街算係貴. 而且食完特餐又唔覺超特別. 不過似乎甜品係佢既另一主打, 我會再黎試下佢d甜品~!…Read More

是日中秋節. 跟朋友去沙田睇中秋晚會之後先發現原來自己冇食晚飯~咁o岩地鐵24小時, 就決定出旺角食野.成夜晚11點半先黎到, 入面得3~4檯客. 是晚叫左以下既野:1) 三文魚腩刺身: 一上檯o個下已經勁開心. 三文魚腩好新鮮同夠肥美. 每一件都有魚油o係面. 一入口魚油既味道充斥口中, 真係勁想大叫: 好好味呀~~~!!!2) 加州卷: 一客6件. 加州卷唔會唔好味, 再加上本人一向對加州卷既喜愛, 好快就清左呢碟野.3) 汁燒豬頸肉: 上檯時個賣相已經唔太靚. 趁佢仲熱住既時候食一件, 好鹹. 燒汁太多了, 完全食唔到有其他味. 再者因為係鐵板上既關係, D肉去到後尾煮到老左, 開始靭 因為本人實在係太餓, 所以大部分都係朋友睇住我食. 唔知有冇嚇親個朋友呢??? XD埋單$173.…Read More

懶洋洋的星期日, 就因為媽媽之前俾左張$3 coupon我, 就黎左呢度食個下午茶~一去到因為tea time o岩o岩開始, 所以比較多人. 不過好在都唔使點等位, 只係等野食一如以往係比較耐.今日order左南瓜雞肉通粉餐 ($26), 連蘑菇雞肉庵列, 牛油厚方包 + 飲品. 是日叫左熱奶茶.一拎左個餐返埋檯就O左咀.... 真正見識到咩叫百物騰貴. /____\南瓜雞肉通粉o個d南瓜蓉只得一茶匙分量, 雞肉得3-4片.真係唔影低留念都唔得. 味道方面普普通通, 咁少南瓜蓉預左冇乜南瓜味. 而雞肉就比較乾, 似乎是煎得太耐了. 通粉一樣係煮得太耐, 有d 爛....反而個牛油方包同庵到都ok. 方包夠新鮮, 仲食到係軟. (p.s. 個人建議食之前請自行將入面d牛油搽開, 因為本身d牛油係搽哂o係側邊~! )而庵列就係野食中最好味既一樣. 入面d雞肉同蘑菇都夠juicy. 為呢餐挽回一點點既分數.不得不讚一下那杯熱奶茶 黑白奶沖既奶茶超級滑. 奶同茶既味道又冇被搶走. very good! 總括而言, 呢一餐非常有改善空間. 既然個餐係用南瓜雞肉做主打, 就請先做好主打呢一味菜, 主打的做得不好, 配菜做得幾好都冇用. …Read More

因為夜左小小收工, 所以同個fd黎呢度食. 雖則話呢度主打台式小食, 不過睇menu似乎乜都有d. 定位唔係咁清晰. 不過屋村小店, 唔會要求咁多. 是次叫左豬頸肉石鍋飯. fd就叫左鯛魚定食. fd o個個就冇影相, 不過個fd就讚不絕口, 話可以翻兜喎~下次我會試下.講下我個豬頸肉飯, 上菜時好夠熱, 個樣都見得下人. 不過一食落去, 個豬頸肉唔係煎, 係炸既. 仲要炸過左火, 攪到好似食柴咁. 不過個飯幾好味, 我冇食哂d豬頸肉, 但係個飯撈左燒汁都幾好味. 下次黎試下第2 d, 俾多次機會佢啦~!…Read More