sharrenlo's Profile

今日啱啱食咗午餐，正盤算買咩返屋企好，見到呢間老字號燒味店🔥🥓，橫掂都冇食佢超過10年(近年鍾意食柴灣x桂香🤭)，咁就買返啲外賣返屋企。🤗今次要咗5副燒雞潤🐔🫁同半斤叉燒🔥🥓，叉燒想要燶邊半肥瘦嘅，但店員同我講冇晒半肥瘦，而家係偏瘦嘅，但都有燶邊。😜 咁都唔緊要啦，難得突然間想食。👌返到去打開，望見兩樣外觀都正正常常咁。首先食叉燒先🔥🥓，一咬落去就俾佢嘅糖黐住啲牙🦷，而肉質就係淋到霉咁樣，又完全冇肉味嘅，真係搞唔掂喎⋯🥴咁之後就試燒雞潤啦🐔🫁，嘩～ 又係又乾又實又硬嘅⋯ 仲要乾過啲叉燒添，咁唯有再夾另一舊外表黃色啲嘅，咁呢嚿雖然係好啲啲，但個質地都係好乾，雖然呢舊冇咁硬，但佢嘅粉狀質地漿住咗個口，搞到好難吞落去咁⋯😵‍💫佢比以前真係差好遠，差咗好多好多，根本就唔想食，費事嘥quota～😦😪之後出咗story，咁有朋友同我講原來呢間燒臘店已經伏咗好耐，完全唔係以前嗰回事。🙄😵因為真係好難食，而出面仲有咁多唔錯嘅燒臘店，我相信再幫襯嘅機會真係極低。😬😮‍💨…Read More

今日去超級市場買嘢之前，想食少少嘢，咁啱經過敏華門口，見到下午茶有「夠薑豬膶牛肉湯米🐷🫁🐮」，雖然唔係我最鍾意嘅「漢x麵家」出品，但又唔使專登過灣仔，咁就試吓啦。🤗我叫咗走牛肉❌🐮，因為而家盡量都食少啲牛肉，飲品就要咗最穩陣嘅熱奶茶☕️。嘢食都算快上枱，首先講個湯底先🥣，佢真係有好多舊薑🫚，而且薑味都算出，而豬潤厚厚地咁🐷🫁，雖然有啲嚡口，但起碼佢冇梳打粉嗱嘅味道，兼且亦都冇奇怪嘅內臟味道，包括個湯底，米粉質地亦都爽身唔會腍啤啤🍜，覺得呢碗米粉都幾正氣有益，自我感覺良好。🤭杯熱奶茶都OK啦☕️，雖然硬係覺得太興嘅好飲啲，但明明係同一條配方，唔明點解會有啲分別。🤔總括嚟講，$46有一個正氣嘅下午茶，又夠方便，收貨有餘有下次。😃…Read More

今日要上zoom堂，所以又嗌咗熊貓外賣。💻🐼其實唔係第一次嗌呢間，因為本身食物出品幾好，再加上每次送到嚟，個湯底仲係出晒煙、熱辣辣咁，真係好欣賞佢哋個外賣器皿。佢係一層膠再加一層紙，即係一套膠器皿，外面再有一套紙器皿，兩者套到實一實，所以完全唔會漏亦好存熱。👍🏻😃今晚同樣選擇咗「河內炙燒牛柳河粉🐮🍜」，牛柳可以揀七成熟或者全熟🐮，我就揀咗七成熟嘅，不過今次出品就熟咗少少，好彩佢都唔會韌，亦都保持到幾香口😋。而佢嘅河粉就正常操作🍜，要讚嘅就係佢啲細緻位，佢會跟埋唔少嘅伴食香草🌱、紫洋蔥🧅、芽菜、辣椒仔🌶️、海鮮醬同辣椒醬。而湯底亦都唔係嗰啲勁味精湯🥣，係濃淡適中嘅牛骨湯🐮。呢間餐廳無論堂食同外賣質素都幾好👍🏻，我會繼續支持吖。💪🏻…Read More

今日要喺AEON呢邊幫人做啲嘢，做完之後經過見到整緊章魚燒，望見幾吸引咁，咁又試吓啦。😊平時好少食章魚燒🟠，因為驚會食到成口都係粉漿，但今次見到呢一間，每粒都會放一大粒章魚入去，同埋見到佢整到好似好脆咁樣，仲要一粒粒章魚燒波波喺度轉吓轉吓，所以就成個小朋友咁即刻要買嚟食。🤭我買咗一個$59嘅套餐，選擇咗：🤗4粒玉子照燒醬章魚燒🟠京蔥大阪燒🥗原味抹茶🍵禮貌嘅店員話要等大約10分鐘，我鍾意食物係新鮮整起嘅，咁當然等一陣冇問題啦。👌果然冇睇錯，章魚燒熱辣辣🟠，外層脆卜卜，而裏面除咗有一大粒八爪魚之外，所謂嘅其他餡料亦帶少少麥味，而且最重要嘅係你唔會覺得食緊粉漿，唔會漿住個口，同埋面頭加咗照燒醬、木魚絲同少少碎蛋沙律，味道都唔錯。😋另外個京蔥大阪燒🥗，我叫佢多蔥，佢都真係有加多啲俾我呢個蔥怪，加上有好多椰菜，亦都冇油淋淋，煎得幾乾身，亦都係唔錯，唯一要講就係飽肚咗啲。😛而杯原味抹茶🍵，佢係用抹茶粉沖出嚟嘅，所以每啖飲之前，都一定要攪吓佢先飲以防抹茶粉沉底，呢杯要嚟平衡一下又唔錯，食咗呢一set嘢都冇罪惡感。😃唔知下次再食章魚燒，又使唔使再等幾年呢？🤔😆…Read More

今日喺灣仔處理完事項，大約下午1:00左右，所以就去雄記睇吓咩情況，我見得一個人排，咁我就排隊，幸好3分鐘後就放另一批客人入座。☺️我每次嚟雄記，都一定要食「煎蝦米腸粉加雞蛋🍳」，但我又想食佢嘅新鮮牛雜🐮，正當猶豫之際，店員提議我食「牛雜撈煎蝦米腸粉加雞蛋」，咁就可以一次過滿足兩個願望。🤭來都來了🤭 順便買埋外賣返去，可惜雞蛋煎蝦米腸粉而家變為冇得外賣，只有堂食，咁就唯有只外賣一個牛雜飯啦，因為餐廳不設加單，要一次過落單。😛大約10分鐘左右，食物就整好。一如既往，「煎蝦米腸粉加雞蛋」外層煎得幾香，加上蝦米腸粉質地亦都軟韌適中，好味。😋而牛雜佢就圍邊放，不過點都有啲整濕咗腸粉，所以下次為咗保障唔影響腸粉最佳嘅狀態，兩樣都係分開嗌好啲。🤔牛雜質素同之前差唔多，都係令我食得乾淨放心，加上佢嘅辣椒油都夠辣，一齊食就惹味啲。☺️離開餐廳嘅時候見到門口條龍，又變返正常的長⋯😛雖然我真係幾鍾意食佢嘅「煎蝦米腸粉加雞蛋」，但我又唔會專登為咗食呢一樣嘢而早啲起身去食。所以都係隨緣，如果下次都係唔使點排隊嘅話先會食，至多下次食夠兩份煎腸粉。😆…Read More

今日撳熊貓🐼嗌外賣，無意中發現觀塘出名嘅豉油雞店，喺鰂魚涌開咗分店，咁第二時就唔使過到觀塘先有得食。🤗今次嗌咗秋意豉油雞飯🐔、招牌口水雞飯🐔、味噌扣雞腳🐤，同埋山楂玫瑰飲🥤。外賣按時送到，見到外賣包裝都幾企理，唔會甩甩漏漏咁。👍🏻一如既往，豉油雞有好香嘅玫瑰露味，肉質軟腍唔會嚡。而招牌口水雞飯亦一樣唔錯，選擇邊一款就要睇個人喜好係鍾意玫瑰露嘅香？定係口水汁嘅惹味？😋而味噌扣雞腳🐤味道就適中，如果炆得腍啲嘅話，會更加適合我個人口味，而個山楂玫瑰飲亦都酸甜適中，包裝就用拉鍊袋裝，雖然企理，但我成日都驚會打瀉。😜而家知道港島區有秋意，兼且仲可以嗌外賣咁方便，相信我會食得密啲。☺️…Read More

今日約咗人喺灣仔活動，所以臨返屋企之前就嚟呢間小店買外賣返屋企。🤗呢間出名嘅豬膶米小店，由深水埗總店，之後到旺角區同港島區都開咗分店，對我港島人嚟講係方便又開心嘅。😃港島區分店，我之前都堂食過幾次，外賣過一次。雖然堂食當然好味過外賣，但都係OK的。👌但唔知點解今次外賣返去，啲豬膶係又嚡又實嘅，而湯底亦都帶少少鹼水味。🫣希望今次只係特別情況，而唔係廚房師傅換咗，否則都唔知邊度再有呢啲平民豬潤米食。🤔…Read More

人和荳品廠呢個品牌已經好一段時間，亦都有唔同地方嘅分店，所以已經唔記得係第幾次食嘞。🤗是夜有飯局但未夠鐘，所以飲杯嘢食一碟小食Hea吓時間咁。☺️多數都會嗌無糖豆漿，因為健康得嚟，豆味亦會比有糖豆漿嘅出啲。👍🏻而佢嘅魚肉煎豆腐，亦一如既往咁煎得唔錯，兩面都係香香脆脆咁，唯一要講嘅就係佢嘅魚肉係薄到唔多覺嘅。🤭今次見到隔籬枱有「滷水豆腐豆卜」，望見又幾好，咁下次食素日就可以嗌埋，因為魚肉煎豆腐，雖然唔太感覺到個魚肉，但食素日係唔可以食嘅，咁而家就可以改嗌呢一個。😉今次Hea食就知多一個選擇😃…Read More

一兩年先食一次炸雞髀嘅我，今日唔知點解，無端端突然間想食，去到餐廳睇吓餐牌先，就見到真係有炸雞髀食，咁所以就入座呢間快餐店。😜因為餐牌寫要等15分鐘，咁就知道佢係即刻炸嘅，熱辣辣嘅都唔會差得去邊啦。同埋想講嘅就係，雖然呢間快餐店嘅檸檬類飲品，係用「檸汁」代替檸檬片，但佢嘅奶茶係OK嘅。👌有時食嘢唔係淨係注意食物，有時都會為感覺，而無需時時都食特別嘢，好似今次咁，突然想食啲咩，即時有得食滿足到，就已經令我心情愉快。🥰…Read More

今日要過西營盤買嘢，咁就順便買啲小食食啲嘢咁。🤗第三站嚟到呢間潮州滷水鵝店🪿，我之前淨係喺佢堅尼地城分店買過幾次外賣，今日啱啱經過先知道西營盤呢間先係老店，所以係有信心嘅👍🏻。今次我就外賣咗以下食品返屋企：🤗滷水鵝肉飯🪿滷水鵝肝飯🪿滷水鵝紅🪿滷水獅頭鵝翼🪿送咗兩個例湯🥣🥣同分店一樣，我鍾意佢啲滷水雖然唔係好陳，但不過鹹亦帶鮮味👍🏻，鵝肉質地亦幾好，唔會太硬太嚡，兼且亦有少量鹹酸菜放盒內角位🪿，亦一樣附送例湯🥣。而滷水鵝紅同埋滷水獅頭鵝翼都幾好味，應該都冇嗌錯。😋而家知道原來老店喺西營盤，咁第二時又多一個選擇，唔係淨係喺堅尼地城先買到，幾好吖～☺️…Read More

今日要過西營盤買嘢，咁就順便喺附近買啲小食食啲嘢咁。🤗第二站就試呢間全港共有三間分店嘅車仔麵，佢特別在用潮式滷水做湯底同埋炆牛雜牛腩，所以係好夠味道嘅。👍🏻今次我就試咗四餸車仔麵，而個麵底就加$5轉為蘿蔔底。☺️四款餸菜就揀咗：牛膀、新鮮魷魚鬚、咖喱大魚蛋、同埋好少有嘅豬橫脷。（因為平時只有飲過豬橫脷湯，都冇食過其他方式嘅。）🤭佢每樣餸都唔錯👍🏻，只係個炆蘿蔔加得太多糖，最突出係牛膀同埋豬橫脷，炆到入晒味，而質感亦啱啱好，亦處理得好好，冇異味。😋雖然湯底已經揀咗大辣全部汁，但之後我都另加枱面嘅辣椒油，佢有好多芝麻浮喺面，中等辣度，香香地咁。☺️下午茶時間佢仲有九折，所以加埋一罐飲品加多寶，總共$70。😉食咗牛膀同埋豬橫脷，我覺得對我嘅胰臟好好。😆第時再去開嗰邊都會再食吖。😃…Read More

今日要過西營盤買嘢，咁就順便喺附近買啲小食食啲嘢咁。🤗第一站就嚟到呢間小店買糯米糍，之前見人介紹過話呢間小店歷史悠久，橫掂唔使排隊，咁就買兩盒試吓，一盒俾媽咪嘅，而令一盒就俾自己。😃分別買咗：黑豆豆沙糯米糍、花生糯米糍、腰果糯米糍、同埋最想試嘅開心果糯米糍。食後感：佢嘅糯米糍唔會好甜👍🏻 ，餡料都足夠，正常份量咁，不過所有餡料啲味都唔係好出👌，而個糯米皮都柔軟，不過薄返少少就好啲啦。😛而每粒價錢就由$5至到$8不等，係平嘅。👍🏻總括嚟講：各方面都正常可接受程度，對港島人嚟講係方便嘅。👌 不過可能前兩個禮拜，先啱啱食過大埔熟食中心嗰一間天花板糯米糍，以致就被比下去，兼且我唔可以食得太多糯米嘅，所以都係試過就算，我嘅糯米quota，都係留返俾大埔天花板，同埋利x酒家嘅棗皇糕啦。🤭😆…Read More

素年係一間唔錯嘅素食店，雖然每間分店餐牌都有少少分別，但總括嚟講都係唔錯嘅，而今次就係我第一次叫熊貓外賣送嚟。🤗今晚嗌咗以下呢啲🤗素年經典不可能芝士漢堡🍔番薯條🍟十九幾種蔬菜藍莓鬆餅全日早餐🥗🥧熱京都宇治玄米茶🍵斯里蘭卡伯爵茶🥤我覺得叫不可能漢堡俾男士食係最適合嘅，因為像真度夠高，而且又夠飽肚。🤭🍔番薯條送到嚟，雖然係淋咗，但都一樣又香又甜，好過食薯條。😃🍟而十九幾種蔬菜藍莓鬆餅全日早餐就真係有19款蔬菜喎！😆 而個藍莓鬆餅同埋士多啤梨果醬，其實都幾好味，不過佢就咁放咗喺沙律面，就整淋咗一半，否則當然更好。😜🥗🥧熱京都宇治玄米茶有玄米味嘅香味，正常水準。😀🍵凍斯里蘭卡伯爵茶就出乎意料地香濃，吞咗落肚個香味仲逗留咗一陣。☺️🥤總括而言：質素維持，會繼續支持香港食肆。😋💪🏻…Read More

當然唔係第一次嚟呢間懷舊冰室，今次主要食佢嘅懷舊沙翁同埋飲奶茶。🥧☕️沙翁大約有手心咁大，都算幾大隻，個面鋪滿砂糖，外觀都幾吸引。✋🏼☺️切開時feel到空氣感十足，裏面差唔多係空心嘅，但又靭靭地咁，只係靠一啲類似麵筋嘅物體連住。😳不過食落就發現個皮係一啲都唔脆嘅⋯ 🙂‍↔️ 同埋油油地咁⋯🙂‍↔️而奶茶就夠滑，但就冇咩茶味。😝食咗俾錢時順便問個收銀：「我比較少食沙翁，但頭先食嗰個，面係唔脆嘅，請問沙翁本身係咁？定係啱啱出爐先會脆？」😳收銀回覆：「沙翁本身係咁㗎，好似油炸鬼咁，係唔脆㗎。」👀咁我唯有答佢：「哦～ 原來莎翁係唔脆嘅⋯」😳其實我心諗：油炸鬼都有分脆同唔脆㗎喎⋯🤔不過佢咁答，我咪咁聽囉⋯🫠…Read More

今日全日去咗HKU參加成果分享會，咁就簡單啲買外賣返屋企。🤗其實唔係第一次幫襯呢間外賣滷水鵝店，今次因為鵝肝賣晒，咁就買咗一盒滷水鵝肉飯，一盒滷水鵝腸飯+$15鵝片，兩件滷水豆腐同兩隻滷水蛋，一共$145，好抵食。👍🏻鍾意佢啲滷水雖然唔係好陳，但不過鹹亦帶鮮味，🪿鵝肉嘅質地亦幾好，唔會太硬太嚡，兼且亦都有少量鹹酸菜放盒內角位，🥣附上兩碗小例湯亦多料同無味精。🥚滷水豆腐同滷水蛋亦都正常操作。無論落單收錢嘅女仔，又或者師傅都係好有禮貌，唔介意我要多汁而有面色，仲好有禮貌添。👍🏻另外同場加映一隻可愛狗狗🐶，佢初時坐喺度唔郁，我仲以為係公仔，後尾佢眼瞓轉為趴喺度，我先知道係真狗仔。😜…Read More