a789523's Profile

本身嚟食之前班fd就send左呢間餐廳啲圖嚟睇，見到都已經覺得伏，所以抱住冇期望就冇失望嘅心態入嚟食，點知真係難食到冇下次。  首先因為10個人嚟食，所以叫左全隻蠔仔安東雞，份量係多嘅，但質素係仲衰過中式雞煲。首先一上到嚟個賣相已經吸引唔到人食，每舊雞都有大量碎骨，啲肉質好「鞋」，食落又得辣味。配料佢有薯粉，薯仔同蠔，呢啲反而仲好食過佢個雞。然後個黃金芫茜炸雞嚟到，一碟有7舊左右（唔記得影相），都算大舊，但放入口就出事，炸雞嘅雞皮係有好大陣香料味，食得出係後期先加，但一咬開雞肉係冇味，又冇肉汁，完全係輸哂比其他韓式炸雞。之後加左個個海鮮煎餅，呢個算係全部野食之中算係最好食，但份量都算少，得6舊好薄嘅餅。最大問題係食落唔知點解同日式大阪燒隻味一樣，再加上係食唔出海鮮味同海鮮嘅料，所以其實呢碟都係失敗。班fd見冇呢餐冇咩主食所以加左個炒媽麵，但點知又係伏嘅。呢個麵88蚊，但佢嘅配料又少又唔好食，然後啲麵嘅質素係同去food court果啲日本餐廳食嘅日式炒拉麵一樣味，但講緊人地30蚊就得，而呢度要80蚊。成碗麵完全唔知食緊啲咩，到最尾難食到食唔到落去。差唔多食完都發現冇人夠飽，所以就加左個豚王生菜包。簡單嚟講就係一塊豬腩肉比啲配料你，然後比啲生菜你等你包住嚟食。首先唔知點解係比鉸剪我地剪開佢，明明用刀係會易用好多，可能係韓國文化而我係唔識所以冇深究。塊肉都算大舊，但食落係會覺得脂肪，冇咩豬肉嘅味，變左成舊肉會比佢啲油脂味搶哂，唔太食到本身塊豬嘅味。之後仲有叫到其他野食，但我自己冇咩點試同影相就唔係度評論。埋單10個人1166蚊，但間餐廳竟然係淨收現金，變左要左搵右搵先搵到1000以上嘅現金，呢個有啲不知所謂嘅我自己覺得。本身對韓國野都冇咩好感，食完呢餐覺得唔會再食呢類型嘅韓國野食，呢間餐廳真係食完都唔知食左啲咩，同埋成班fd係食完都唔太夠飽，份量都比較少。…Read More

前一日約左fd食呢間但見冇得book位就早啲嚟walk in，一嚟到見入面一個人都冇就問接待果個員工係咪唔使等位就入得，然後個員工就話「唔使等？我比張飛你慢慢等啦」咁諗住一早拎定咁多人就早啲開始等啦，點知過左15分鐘就叫人入，然後同佢講未齊人話可以讓比其他人入先，可以將自己張飛同其他人交換，然後個員工又話唔得，一定要重新拎過。好啦咁我地4個人終於到齊就入去啦，一入到去話完食放題每人268+1食90分鐘嘅，有唔同肉，每兩個人一碟仔芝士同薯條，同埋個fd就like左fb post送二人份量海鮮一碟。先唔講野食質素如何，一入到去個網已經係黑色嘅，個爐係細到仲窄過部iPhone ，然後左右邊火力完全唔同，基本上每一次燒好少野個爐就full哂，好似迫住你冇得食第二round咁（事實上真係冇encore過野咁濟）到員工態度問題，當嚟野食嘅時候啲員工淨係識係同一邊上菜，係咁叫我拎比對面枱果兩個fd。我心諗你識唔識行過對面？仲要我地係坐最側邊而唔係啲中間位，行多兩步都唔識？請問而家我係度做定你係度做？到食到真係頂唔順覺得有炭味就叫佢換網諗住會冇左啲黑色野，佢一嚟到就話碟牛頂住換唔到，冇講到其他野。大佬碟牛你放嘅，啲野你擺嘅，而家卡住左就話換唔到就想叫我地拎？都係果句你係度做定我係度做？到換左個新網，前後換左兩次都係黑色嘅，唔識洗野不如唔好洗啦，比啲咁嘅網人。到野食質素，首先杯野飲話就話係xx味梳打，我地叫左4杯唔同但4杯都係一樣味，大家都啖到死，而啲肉全部un到痴牙，豬仔骨完全燒唔到，啲牛更加冇味，而碟海鮮一拎出嚟已經係又臭又腥，最尾一啖都冇食過。啲海鮮臭到咁想散走啲貨就唔該唔好咁樣呃人叫人like完塞比人呢間野一開始打住無煙嘅噱頭嚟吸引人同埋有放題，但連最基本嘅服務態度都差成咁，好似完全唔想做你生意咁，而食到75分鐘埋完單諗住坐夠90分鐘果陣一開始接待處個員工就走嚟話「夠哂鐘啦好走啦」，大佬而家原來唔可以坐夠90分鐘？要食完就趕人走？咁學咩人做放題？好彩拎住張單同佢講清楚入座時間到果陣根本未夠90分鐘佢先行開，仲要個員工唔覺自己有問題早左叫人走。呢間野真係唔使再食，服務態度差，野食又唔得，放題食到好似趕人走咁（事實上見到有其他枱遲過我地入嚟食放題但比同一個店員迫佢地早走），不如唔好再做啦，建議大家唔好再食呢間野…Read More

見到有廣告話呢間野呢幾日會有拉麵買一送一，再加上遲啲去北海道都諗住試呢間嘅本店，就去左尖沙咀果間食。排隊都算快，5分鐘都入得到去，一坐低女朋友就叫左個原味蝦同鹽嘅粗麵，而我就叫佢個特濃蝦汁叉燒伴麵，兩個都係88蚊，我果碗再加30蚊要3片叉燒，等左一陣兩碗野就嚟到。兩碗野個味道都聞到好香，而食落都好濃蝦味，但最大問題係個伴麵啲叉燒係碎上，令到本身集肥瘦於一身嘅日式叉燒變到一粒肥一粒瘦，瘦果啲食落口咬仲要好硬，令碗野扣好多分。但另一碗普通拉麵就因為係原片叉燒就冇出現呢個問題。食完碗野係會覺得非常口渴，因為佢個湯真係好濃，起碼飲左7杯水。味道係唔錯嘅，但價錢真係太貴，北海道本店都係連埋稅56蚊碗，但香港連埋加一就要成差唔多100蚊碗，講真如果唔係買一送一真係未必會再嚟。…Read More

上網見到話呢間野元朗排長龍，見屯碼開分店咪嚟試下，一去到見幾乾淨，諗住唔會點伏就排隊諗住試下。望住個menu見到啲野飲都有寫可以要凍或熱，同可以揀少糖少冰，咪叫杯熱嘅黑糖珍珠奶茶嚟飲，點知個店員同我講冇得要熱，話啲奶一定係凍嘅。之後我問咁要少冰得唔得，佢又話一定要加冰，我問要少糖得唔得佢又話啲甜度係fix嘅。姐係咁，佢咩都唔得，熱又冇，少冰又冇，少糖又冇，如果本身menu冇寫嘅咁我都唔係咁嬲，但佢寫到明呢3樣都可以嘅咁真係唔抵幫，最後咪死死氣咁要杯凍嘅野飲。等左唔夠5分鐘，杯野出到嚟，係我見過最細杯嘅野飲，仲要冇黑糖味，但價值25蚊。講真呢個大細，呢個服務，呢個味道，唔值得再去試。…Read More