hangryhim的個人專頁

好耐冇岀過食評，但尋日食咗一間好好食嘅潮洲打冷，忍唔住要寫一個。同朋友叫咗10碟餸，全部都好高質。辣酒煮花螺食極仲有，份量好充足。蠔餅、蠔仔粥都係必嗌！仲有韮菜豬紅，炸大腸，鹹雞等等，都好好味。令我印象最深刻係一碟鹹蛋三寶，好新奇嘅菜式。特別係苦瓜，苦瓜嘅少少苦中和左油膩嘅外層，惹味得嚟又取得一個平衡。聽夥計講係佢哋嘅新菜式，原來佢哋間唔時都會有一啲新菜式，令人驚喜。嗌埋啤酒暢飲，和朋友過了一個歡快的晚上。…查看更多

近來太忙都沒時間寫食評！食左呢餐成2個月而家先得閒寫，所以記憶都一般般哈哈。但係感受同味覺呢樣野，係會停留係舌尖上久久不散（好似係），所以依然可以俾到評語。是日大概差唔多2點先到餐廳，餓到就死了，友人說想去日本野於是便來到這間。太肚餓關係我自己食住先，叫左慢煮叉燒拉麵，因為想食隻溏心蛋，唔知點解覺得拉麵一定要有溏心蛋。另外見到佢標榜隻豬好特別所以都想睇下有咩特別。如圖，其實同大部分拉麵都差唔多。質素幾好，起碼溏心蛋真係溏心，叉燒真係好冧，入口即溶又濃味，所以我都幾滿意呢兜野。我食完差唔多飲晒Ｄ湯朋友先到。好彩食左先je!特別一提，佢個正式餐牌設計係好似一份報紙咁，幾得意。…查看更多

有一次夜晚因為趕住返屋企睇電視，所以係呢度買左外賣（外賣會送布甸）。但見到佢話堂食麵豉湯同椰菜任食，所以一直想試下堂食好耐。咁岩呢日唔駛返工，所以就lunch去食。唔算多人，唔駛等就有位。嗌左野食就去自助bar到夾野。椰菜真係無乜特別，好彩只係夾左一小碗。反而佢個麵豉湯唔錯，不過唔記得左影hehe。佢個麵豉湯唔知點解我覺得有少少中式又少少日式咁，但真係自己熬，我覺得幾好飲所以都飲左兩碗。好想食海膽所以嗌左個貴少少既丼，價錢唔係好記得好似係$78，總之都係around呢D價位。以呢個價錢黎講味道係算唔錯。平時唔鍾意食希靈魚既我唔知點解都食到今日呢碗既希靈魚。加$1送番薯仔所以都加左，$1真係抵到爛，幾好食。仲有泡芙做甜品～～…查看更多

如題，其實都想試下大家讚不絕口的美食，奈何人窮，只能吃午市定食。雖然個海鮮鍋都幾足料，但味道好淡，因為得野菌做湯底既關係，食落有少少澀，有點失望。$68再加一，我會寧願去大喜屋食多D，多選擇好多又好食D。太耐之前食所以唔係好記得details，總之我暫時都無諗住再食。…查看更多

自去年開始，每年呢個時候都會陪毅行者行下，晨早由城門水塘出發。今年同舊年一樣，都係好早去到荃灣呢間粥舖，先食個早餐再出發。晨早流流唔想食得太飽，於是吃我最喜歡既豬紅艇仔粥，因為覺得好似多左餸食開心D咁。但一個粥又唔夠，所以叫多個腸粉。同朋友share，佢話想要無餡既腸粉，即係乜？即係齋腸囉！無乜好彈。後記：我地行到大帽山既時候，隊員同support team講想食餃子。但要食水煮既餃子。水煮既餃子??　第一下戚刻諗起水煮魚個D，但無理由呀都無聽過呢樣野。水煮餃子即係唔要煎既餃子....隱約係有個term for呢D餃子......傻豬！咪即係水餃囉！…查看更多

因工作需要來到這裏用餐，環境OK，坐得都叫舒服。揀左個SET LUNCH，因為出公數關係梗係叫貴少少啦，於是就揀左扒了。另外叫左個青口一齊share。價錢我真係唔太記得因為唔係自己俾錢，如圖份量都好大份。Starter我揀左湯幾好飲不過無影。個扒普普通通，我覺得唔算特別標青，肉質唔係特別好，味道亦唔係特別濃。至於青口就更失望，可能舊年去紐西蘭旅行既時候D青口實在太好食，我仲諗住係香港一D貴少少既餐廳可以再食番，點知都係唔得。青口細細隻咁，味道無乜特別，可能真係我本身expectation太大。明明個餐有甜品我諗住叫，但唔知係唔係因為跟老細叫左野飲，所以無左甜品。可能係2選1我無留意啦......聽番同事講話留意到隔離枱食個甜品好似幾正，唉真係錯過晒！…查看更多

有野做搞到成差唔多十點先食得飯，係附近拿拿林搵左間茶記醫肚。揀呢間主要係因為個價錢，$38 ja!　同尋日食既價錢係一樣，不過我想食東江鹽雞，所以就入左黎食。有例湯送，當然個湯同尋日個間無得比。但係雞係好正的，肉質好嫩，個味都OK。不過可能我餓過飢既關係，我居然食唔晒！佢D飯份量又多，齋食呢個無D汁落肚又爭D既。唯有食埋D雞同菜埋單啦。熱飲不用加錢，凍飲就加$3。真係良心企業呀T_T…查看更多

每星期都有一日落元朗打拳，打拳前唔可以食太飽又唔可以食辣野又想平，諗食咩都死左唔少腦細胞。之前一直食開許祥昌/盅頭飯/譚仔/梁記，食左咁多次都開始厭了，所以諗住去發掘第二D舖頭。咁岩係拳館附近發現呢間價錢好似唔錯，所以今日就黎左呢度食。間舖叫得麵棧，相信都係食麵既，不過今日想食飽D所以叫左最平個個飯($38)，茄子煎蛋肉燥飯。夜晚呢度仲有得食雞煲，不過可能太早既關係，唔係好覺有人食。座位不多，但呢個時間無乜人所以都坐得鬆動，兩個人可以霸張4人枱。飯來了，賣相還好，份量也夠。茄子好香夠冧，其實都正正常常，唔講咁多。影埋呢張係想示意隻蛋黃真係流，原本仲諗住佢應該會煎到熟晒，戚刻加番少少分。加野飲要$3定$4，慳錢既我當然無加，好彩佢都送例湯。個湯飲唔到有味精，仲好足料，算係唔錯。下次有機會試下佢D米線先。…查看更多

又係行完山，所以人在港島區要找野食。朋友食素，所以要揀一間有素食既餐廳俾佢，係香港實在不容易。正值下午茶時段，星期日得4個餐，好過無。($45，飲特別野加2蚊，要加一)我叫左個海南雞飯，原本以為份量得好少，因為佢話迷你，但絕對係一個午飯既份量（講緊D飯）。雖然騎呢地用碗裝住，但雞其實都唔少，醬都係正常俾3款你咁，仲有杞子雞湯，下午茶黎講其實好好。好好食當然稱不上，不過都唔差，不過不失就是了。朋友叫了星星魚腐喇沙，因為無乜特別所以無影，不過絕對無違反商品說明條例，D魚腐真係星星形的，至於份量就都足夠。因為下午茶沒有素食，所以吃素的朋友單點了一個上素喇沙($78)。賣相很靚。吃下去才知道一邊係瀨粉一邊係檬粉，幾得意雖然唔知點解會咁。星星個碗都係一樣。朋友說上素喇沙連個湯都係淡D，試左啖，又試左星星個碗，唔覺得有咩分別，同平時個D都無乜分別。可能佢慣左淡味了。食素的朋友不夠飽，所以臨尾叫多左個餐。佢食左咖央多，我地就幫佢食雞翼。個雞翼麻麻。…查看更多

同事推介下來了烏蠅館食lunch，未黎到以為間野叫烏英館或者係第二D同音既名，點知原來真係飛個D一隻隻既烏蠅，到而家都唔知點解要改做烏蠅館，亦唔需要深究。係一樓，一出lift已經有人排緊隊，裏面座無虛席，估佢唔到。好彩早黎，都叫排第二，之後忽然又湧入一大批人，想不到如此受歡迎。時間關係，我地拎左落單紙諗下食乜先。原本諗住和同事叫雙人餐，好似多D唔同種類既野食會開心D，但原來lunch hr係無雙人餐既。無晒火鍋寬粉，所以就點左如圖個6樣。丸既話每樣有2粒，其餘既大概有4塊左右啦。我以為土豆粉即係薯粉，但原來同平時吃既薯粉不同，佢咬落有D似烏冬但口感又有嚼勁少少。湯底真係唔錯，因為我唔知咩係藤椒，但佢有少少刺激咁，幾開胃(個種刺激又唔可以叫辣，又未至於麻，唔知點形容)。總括而言，除左湯底，其他野都普普通通，份量太少，一碗細細碗就$48，性價比不高，應該不會來再吃了。…查看更多

是日同朋友去小夏威夷徑行山，落到黎就係科大，於是去左科大搵野食。上一次去科大應該都成8年前左右，完全唔認得路亦唔知邊度有野食。望下地圖其實選擇不多，於是就走去最平既canteen LG7度食。呢度其實有幾個suppliers，同朋友不約而同都食拉麵。如圖。其實唔會好難食，不過亦唔係好食啦當然。唯一特點就係平，我雞扒加豬軟骨拉麵$30，朋友個個都差唔多上下。D枱都幾污糟，可能因為星期六黎，無乜員工返工清理。見到隔離枱食一個好頹好頹又唔覺有咩料既烏冬，我相信個碗野應該係成個canteen最難食既野，但見到都有幾個人食緊，十分驚奇，好想知係咩黎同幾多錢。俾喊喊，係因為有中大既canteen做比較，中大的話除左當年UC can同franklin，真係是但一間都高汁過佢。…查看更多

上一次黎呢間餐廳已經係一年前，當時lunchtime門堪羅雀亦好似無燒肉食。一年過去，呢度已今非昔比，熱鬧非凡。唔單止有基本既日本餐食，仲有燒肉揀。燒肉平均五十幾至七十幾一個set。既然呢度係專攻燒肉，當然要試一試佢。原本諗住都係d普通貨色，而且價錢咁平都係D幾塊，點知黎到，牛舌有4塊、兩種唔同既牛肉各有3塊，仲有一塊茄子同一塊菇，十分驚喜。飲完麵豉湯(印象中好似仲有個前菜，又好似無總之印象唔深刻)就開始燒了。秉承係牛X學返黎既燒牛肉時間，拎埋部電話出黎計時，每片大概燒1-1.5分鐘就可以吃了。價錢平一半，但質素不比牛X差！！仲有茄子同菇可以係每一round中間隔一隔，很加分。同事鍾意厚D個舊牛肉，我就鍾意薄D個款多D~~~除左呢個牛舌+2款牛肉既set，仲有其他選擇，不過呢個set $68 ja!!　如果想叫野飲，每罐都係$5。佢仲有中午放題時段($118 90min)，晚市就$178(早訂價)。不過我覺得食set已經好夠，食晒個牌既quota了。心滿意足地離開，最緊要係咩?　連加一都唔駛呀！…查看更多

許祥昌由中學食到而家，當年會特登走過黎，一張廿蚊紙就可以食到一碗車仔麵，對學生黎講簡直係恩物。而家已經加價加到26 28 30 (中、大、加大)，但對比出面市區依然算平，而且好食D份量亦夠。(係出面食一碗車仔麵有時都要40幾50蚊，心諗駛唔駛呀......)印象中食左十幾年都無飲過D冰，雖然大家極讚，但十幾蚊一杯，黎得呢度食就係想慳錢哈哈，所以無試過。每次都叫足5個餸，見有D post話一碗有晒十幾樣，我就真係未試過，唔知點做到，可能十幾年黎都蝕左。我通常都係揀豬紅、豬皮、豬腸、蘿蔔，最後一樣可能會搭下魚蛋或雲吞或什麼的，但前4款感覺車仔麵一定要有，而且呢度係最地道最好食(唔知係咪由細食到大食慣左)。麵一定揀油麵，因為細細個已經好鍾意食油麵，而油麵係呢個世代好似買少見少咁。如圖，D餸多到"責"住晒D麵，要食得好小心，唔係D湯會飛落件衫度。湯底會有少少"辣味"，個"辣味"岩岩好唔會辣到食唔到但又有D調味(用引號引住個辣味係因為佢唔係真係辣椒個種好辣既感覺，唔知點形容總之試下就明)。有人鍾意食永年，但我係元朗咁多年食永年既次數應該兩隻手數得晒，基本上食永年既人都係鍾意食永年既辣。當年青春期唔想食咁辣既我應該無真係試過永年既辣，所以唔會特別想去食，尤其係當年佢唔會標D餸幾錢，每次叫完都好驚碗麵會好貴.....反而朝早去食腸粉就試過兩次。講咁多廢話都只係想講我會去食許祥昌多過永年。…查看更多

同事帶我黎呢間古早味食lunch，一入門口就見到架木頭車，好有特色。侍應帶左我地去卡位坐，靠窗十分光猛，座位亦好舒服。侍應好細心咁講解餐牌，價錢都係五十幾六十幾，唔算貴。猶豫左好耐食拌麵好定酥炸雞好，決定食拌麵然後搶同事一兩舊酥炸雞吃！野食未到飲品先至，每杯上面都印左一條IQ題，有D已經聽過又或者好易估，不過都幾得意(答案都印左係杯面度，要細心搵先搵到)。野食終於到啦！味道一般。同埋唔知點解同事既前菜三款都唔同，但我就得兩款(有一款重覆左)。酥炸雞係幾正，不過好熱氣。份量都夠既。臨走侍應見同事杯熱飲仲未飲晒，主動問駛唔駛幫佢外賣拎走，我覺得呢個服務好貼心。同埋收餐盤前佢會問客人仲要唔要，我覺得呢樣看似基本既野唔係間間餐廳都做到。我覺得如果餐盤上空無一物就咁收走都算，試過食到後尾諗住休息一陣再食，點知侍應以為食完就極速收走左，嗌都嗌唔切，個下真心嬲。所以總結，味道唔係特別好味，但起碼係一個愉快既用餐體驗。…查看更多

是日參加完行山event，係大帽山落黎就係荃灣搵野食。一行人肚子空空，又唔知有乜好去處，見到亞萊o麥o麥，筆者曾經在元朗吃過，味道不錯，於是便提議試食荃灣呢一間了。不用等太耐就有得入座，正合我們意。友人想吃生蝦刺身但沒有了，算是一個缺憾。侍應態度很好，他提議我們吃豬手，問要半隻定一隻，我地完全沒有概念，佢見我地6個人又話一隻都係多十幾蚊定點所以我地就要左一隻了。豬手果然沒令我們失望。肉很冧，冧到一夾就碎咁哈哈。蟹肉香芒炒飯，正正常常。都係個D炒菜，無乜評論。冬蔭公明爐魚，可能係我唔識食既問題，總係覺得冬蔭公同個魚好分開。就咁飲個湯不錯，加左落個魚度，本身有D汁就溝淡左無晒味，可能最好既食法都係夾Ｄ魚落Ｄ湯度會好Ｄ。仲叫左炒金邊粉、生菜包同芒果糯米飯，不過掛住食所以無影，味道都不錯，埋單好似每人around$120到，包友人叫的兩杯野飲，所以其實價錢都OK。筆者呢幾個月猛咁食泰國野，呢間算唔錯，起碼好過上次係大尾督食個間，上次個間又貴又唔好食。不過數到筆者最愛，都係粉嶺聯和墟附近既泰好味，真心超級好食又平，搵日再同大家介紹。…查看更多