angelc712's Profile

搬走咗幾年，返嚟探屋企人，每次返嚟都會買，但因為收九點，有時食完飯先買就收咗。最近呢幾次去，有個姐姐好好笑容，桂花糕好好食，絕對唔會好甜，大人小朋友都啱食，有好多隻味揀，非常推薦，多次回購。但以前成日食的南瓜糕就冇咗，唔知會唔會有機會出現返呢？:):)…Read More

我哋今次唯一後悔，就係冇即時報警，諗住俾機會佢地處理。我哋當日有同 Kingsley CS聯絡過，佢哋選擇唔處理事件，不回覆，不處理。貴公司呢位女員工（中長黑髮，戴眼鏡，當日全場唯一女同事），其實同放咗個炸彈，喺餐廳冇分別，隨時爆炸。——————————————————————話說早幾個禮拜，我朋友返香港，帶咗佢去呢間餐廳度食嘢。每次轉主題，我都會去嘅。荃灣分店未開嘅時候，我次次喺旺角分店排隊。都算係忠實fans，亦都唔係西客。雖然服務態度一向麻麻，但從來都冇咩特別事發生，都會繼續支持。我對佢哋啲員工，句句唔該前，唔該後。但今次估唔到，食餐飯，要受啲咁嘅屈辱。佢咁嘅態度，我以為我地冇俾錢，入嚟乞食。以後真係唔敢再嚟，費事自取其辱。今次新年前發生咗呢件事，我以後都唔會再去啦，一來令我朋友好唔開心，二來令我好失望。同埋發生過一次不愉快事件，第二次仲去，就係自己攞嚟衰。——————————————————————事情經過如下，當時我經WhatsApp聯絡咗佢哋CS，想問清楚究竟發生乜嘢事？事件剛剛在餐廳發生，我們入座的時候，有一位女員工（中長黑髮，戴眼鏡，當日全場唯一女同事），負責帶位。我的朋友告訴他「兩位」，示意我哋坐低。然後他用非常不禮貌和呼喝的語氣，同我朋友講：「全場得呢兩個位！」其實當時都俾佢d態度嚇親，但都有坐低，只係心諗：使唔使咁惡？當時我們見到有三張吉枱，他話，「全部都有人預訂，只有呢兩個位。你唔想坐， 就一個鐘頭後返嚟！」其後，店中有另一位男同事，經詢問後，願意安排我們坐旁邊牆壁的卡位。後來食緊嘢中途，帶位小姐察覺我哋掉咗位，突然走去我哋後邊，發左好大脾氣，幾聲巨響，拍枱，拍凳，拍雪櫃。係好大聲，嚇到成個人彈起嗰種。可能想恐嚇我哋？可想而知，呢位員工情緒有幾不穩定？可能有嚴重精神問題，心理困擾。因為我哋根本都冇嘢得罪佢，唯一問過佢嘅嘢，就係可唔可以調位？亦都係好有禮貌咁樣問，唔係呼喝或者點樣。可能係人善被人欺啦！之所以話唔會再去，唔係講吓就算。因為我再見到佢，都會諗返起件事。而最內疚，係令到我朋友好唔開心，呢間餐廳係我提議去。再講，佢情緒咁唔穩定，對客人都有好大的困擾，都唔知佢下次情緒失控？會攞乜嘢武器？或者直頭襲擊？攻擊客人？絕對唔係冇可能。呢間餐廳選擇唔處理事件，同放咗個炸彈喺度冇分別，一個隨時會爆炸嘅炸彈。——————————————————————同埋我哋都要澄清番，我們從來冇激嬲佢，挑釁佢。佢係真係無啦啦突然之間發脾氣，想搵人出氣？洩憤？係咁嘅環境食嘢，都覺得好危險及不安。如果我哋嘅嘢食，唔係嚟咗，我哋會即刻走。因為我哋真係冇做錯任何嘢，仲要對佢哋啲員工好有禮貌。我都有幫佢諗埋藉口，會唔會係好忙？做到火滾？但我們入座的時候，確實有三張吉枱，也有卡位，並不是非常繁忙時段。反而，仲幾空閒。題外話，呢兩個位，其實在兩張四人枱的中間，就是4+2+4。次次嚟都係比呢個位，其實兩個人嗰啲，都係影幾張相，食完就走，唔會阻你好多時間，通常唔夠一個鐘都已經走，食完就算。你次次都比呢個路邊位，影張相都唔會靚，喺路中心，仲要比八個人夾住，人哋下次點會嚟？你真係冇位都冇得好講，有幾張吉枱，你都比啲咁嘅位，即係有心趕客。同埋個帶位小姐講，全場已經 fully booked，並唔係事實，有人講大話。因為有兩位上咗年紀嘅老人家，冇預訂，佢都帶佢坐卡位。結論係，你對人有禮貌，人哋咁對你。何必再去呢間餐廳，自取其辱？因為我地已經搵咗經理投訴，搵埋客戶服務部，全間公司都冇人覆你，亦唔會跟進，處理事件。下次有事，都係即時報警吧！…Read More

新開所以特登去幫襯，以前一直喺觀塘食開，但因服務態度質素實在太低，太差，冇必要委屈自己，所以冇再幫襯。見到呢間新開好開心，終於可以再重新試下。整體來講幾好食，肉燥娃娃菜好食，但可能落得太多胡椒？好辣。雞湯依然一樣咁好飲，推薦。希望遲吓可以外賣手工素麵線，咁就太好了。好期待。鍾意春水堂嘅朋友，值得一試。…Read More

之前在北角食過，非常好，食物及服務質素都好。咁橋見到奧海城原來有間新開，我同個friend去馬莎買嘢，買完就去咗奧海城呢間食。我強調返投訴嗰間係奧海城，北角嗰間非常好，好有禮貌。本來都好地地，我睇睇下Menu，然後我朋友問個路過的男侍應：「今日有冇午餐？」，個男士就講咗一大段嘢，話我哋：「過咗兩點就冇，set 唔set lunch都係一樣錢，啲嘢都係一樣，（下刪3000字⋯⋯）」我唔知佢係有心串我哋？定係工作經驗少？講咁大段嘢，講咗成分鐘嚟串我哋，真係用心良苦。我解釋返點解我朋友會問有冇set lunch呢？因為呢間野係我想食，佢唔知有乜好食，佢唔想諗，求其食乜都得，所以先話求其要個set lunch就OK，唔係貪平。何況set lunch個價錢係貴過 tea set。如果真係貪平就食 tea set，佢只係純粹唔想諗，求其揀個A B C D就算數。所以個男 waiter 咁樣答我地係有啲問題。再講，我都係問你有冇set lunch ？你答我有定冇就得啦，講成分鐘教訓我，唔使掛？本來佢串完我個 friend，我都算，當佢冇心，可能工作經驗唔夠，唔識講嘢，唔識表達。好衰唔衰，我臨走之前，等緊佢同事攞張單過嚟埋單。佢同身邊一個女同事，細細聲喺度講，「呢兩個人真係怪怪地」，企喺我張枱隔離。擺到明係話我哋，咁明目張膽企喺個客張枱前面，講人是非，真係第一次見。我自問都係有修養嘅人，我就唔會企起身，大大聲指住佢，問佢頭先細細聲喺度講乜嘢？講個客壞話？奉勸一下個男 waiter，我唔知你下次有冇咁好彩？遇着啲客真係唔係好似我咁有品，即刻企起身鬧你喺度講乜嘢？係你自己冇面咋。我就選擇喺呢一度，用最斯文嘅方法去表達我對呢個男 waiter 嘅不滿。我都唔敢帶其他朋友嚟食啦，啲服務態度咁樣。我介紹個friend嚟食，仲要俾你串？我都冇晒面啦，介紹間咁嘅嘢俾人。anyway，奧海城呢間以後唔會再去，impression 太差，亦都唔敢再介紹人去。有需要可聯絡我索取圖片，以作證明。…Read More

聽聞呢間餐廳好出名，都開咗一段時間，個個女仔都嚟呢度打卡影相，所以我先慕名而來，特登入荃灣食嘅。其實喺門口已經見到大家都好忙，所以在門口等帶位，見到三個女服務員都落緊單，所以諗住喺門口等吓先，等佢哋得閒先行過嚟帶我哋入去。跟住中間落緊單嗰位同事，離遠指住我哋兩個個頭，然後再指着量度體溫嗰部機，示意我哋度體溫。其實有咩唔可以行過嚟先講呢？我哋又冇講要即刻入去，何況唔等都等咗咁耐啦，我哋當時喺門口都等咗2-3分鐘，所以唔介意佢落完單，先再行過嚟同我講兩句，會唔會比指住我個頭好呢？點知佢指完一次，又再指多次。度完體溫之後，佢都係唔肯行出嚟，唔知係咪真係忙到咁？佢又再一次，直接指住我哋兩個個頭，再指向一張枱，叫我哋自己行過去坐低。當然我明白你哋係忙，我哋喺門口亦都已經等咗好幾分鐘，其實真係唔爭在等你真係得閒，先帶我哋過去坐低。其實就算茶餐廳，而家都好少咁樣指住啲客個頭叫人哋坐低同埋度體溫。更何況，呢度平均消費最少$150 per head，咁嘅服務質素，做到咁，仲「好」過茶餐廳，真係出人意表。咁公道講句，食物真係好食嘅， pancake同埋紫薯鮮奶都幾好。但服務質素嘅關係，我就唔想再食，亦唔會再幫襯啦。我自己就真係未試過，食一餐飯，俾人指住個頭幾次，指來指去，指手畫腳。我諗總有啲人真係唔介意嘅，但我自己感覺就非常不良好。以上句句屬實，有需要可出示當日相片証明。…Read More

我的家人打算普通吃一餐飯為我慶祝生日，父母一早去餐廳霸位，大約6:00 ，他們同我父母說冇訂位只可坐中間，旁邊的卡位全部有訂座。後來發現，佢哋寧願俾遲來的人坐，都不比最早到的我們坐。我哋係頭幾張枱入座，就係諗住冇訂位，早啲嚟搵個好位，點知最早嚟原來係坐最差嘅位。因我地得四個人，所以冇打算叫片皮鴨。店員建議我哋叫隻鴨，我哋話得四個人應該食唔晒，然後侍應用非常冇禮貌及不屑的語氣及眼光，個個都係咁食㗎啦，兩個人都係咁樣食，個個都食得晒，點會食唔晒呀？咁可能你哋會諗，會唔會係我哋食埋啲平嘢，人哋先咁樣串我哋？我地埋單都九百幾蚊，近一千。我哋唔係冇錢食，係想叫多幾個餸，代替左隻片皮鴨。因為佢冇得叫半隻，叫咗一隻片皮鴨，其他嘢都唔使食，個個都飽哂。由於佢哋嘅服務奇差，無論係侍應定係收銀，啲嘢雖然係好好食，比五粒星，但係真係唔敢再幫襯，啲員工非常之得人驚，好趕客，可能覺得自己間野大把人嚟食，唔稀罕少幾個客，最好唔好黎，唔使做得咁辛苦。我要求嘅服務態度只係正常人一個，我絕對唔係嗰啲要求好高，好麻煩嘅人。我知做餐廳個個都好忙，所以我冇要求過佢哋做啲乜，冇麻煩過佢哋。但由頭到尾餐飯，啲人對住我好似好唔想做我生意咁，食完仲唔開心過未食，咁何必要浪費成千銀去食飯，激親自己？…Read More

早幾日7月29號，我特登由機場收工出尖沙咀食個西瓜蛋糕，諗住叫杯嘢飲，渡過一個下午茶時間就返屋企休息。大概三點至四點左右去到鋪頭，我入到去就有個人截住我，就問我＂小姐幾多位＂。我話一位，跟住佢就話咁你坐呢度，因為我有個喼，其實真係唔方便坐喺嗰度，我唔想阻到其他人，又驚隔離話我阻住佢，我就話＂咁我去high table 嗰邊坐，可唔可以？＂佢就話，＂嗰邊有人＂，我就話＂高枱嗰邊喎？＂因為我見到另一邊係三張高枱，一個人都冇。嗰時我都未sense到佢其實唔想做我生意。之後我就坐咗喺是但一張 high table，睇完Menu之後近10分鐘都冇人同我講一句說話，我以為佢哋忙緊，唔想吹佢哋過嚟落單，點知真係一直冇人過嚟。直頭連眼尾都唔想望我一眼，真係冇誇張。當時見到有三個員工，一個後生高大男仔係入邊水吧，佢旁邊有一個女仔，㕔面有一個男仔戴眼鏡，就係問我幾多位嗰個。當時有三枱客，我唔知咁樣對佢哋來講是否已經好忙？但10分鐘都冇人問我一句，我就真係覺得有啲離譜。當然，你話我可以主動嗌佢哋，但係佢哋連望我一眼都冇，我都唔知點樣先叫到佢哋幫我落單。我身邊亦從來冇人經過。我當日真係覺得好無奈，而且有啲無助，諗住都係高級餅店，唔通要好似茶餐廳咁樣落單？要我大大聲大叫落單咁樣？我唔知係咪歧視我攞住個篋，但係我只係用一個細的行李箱，可以完全收係 high table 枱底，不阻住人的，而且我係揀最少人下晝三四點冇乜人的時段先過嚟，多人我都唔敢帶埋個行李篋過嚟。到最後10分鐘都冇人理我，我就慢慢走了。…Read More

食物非常靚，賣相一流，食落去都OK ,唔係好好食亦都唔係難食。 淨係食個外貌影相仍覺得值得，但係服務真係非常低級。咁靚嘅食物，但係咁嘅服務質素，真係會令人不敢再次幫襯，令人卻步。簡短講講發生嘅事，話說當日係我生日，特登着到靚一靚去影相，叫咗兩個pancake ，兩個茶，當時約三至四點下晝。位於尖沙咀，逢星期六日交通超級繁忙。所以遲咗10分鐘左右去到。當然我都知道自己遲到係唔啱，亦唔記得咗打電話返去，叫佢幫我留位。去到鋪頭嘅時候，我唔知自己原來已經遲到，所以我就話，姓林，留咗兩位，唔該。一個面約30歲應該係類似老闆嘅女士行出嚟，用好串同冇禮貌嘅態度同我講，冇人訂位喎呢個時間！由於我冇發現自己當時已經遲到，所以我就話，咦，我哋真係訂咗位架。之後佢就再扮翻查紀錄，然後就講，哦，你哋遲咗15分鐘，我地冇再留位俾你地。跟住全間餐廳嘅人都望住我哋兩個。其實我都係欣賞佢哋嘅蛋糕同埋食物，生日特登過嚟幫襯， 但佢哋餐廳嘅服務質素實在有待改善。我只希望服務員有基本禮貌，尊重。每個人平均消費＄200 ，兩個人夾埋$400食個 tea，如果咁樣俾人對待，真係會失望。生日本來都係心情靚靚，但係比服務員咁樣對待就真係好掃興。…Read More

2018年5月20號下晝約四點半食下午茶，叫咗一份二人 high tea set ，椰汁雞湯，兩杯凍檸茶，雞絲扎肉金邊粉，埋單近＄300。首先，我係叫類此英式兩層 high tea set，佢就已經嚟錯左，變咗三碟好大碟嘅嘢，唔知係乜，我見到咁樣就知道梗係錯左，因為唔係兩層 high tea 架，就話唔好意思喎，好似錯左，我地 order 係 high tea set，之後佢哋就講咗句唔好意思就換咗，但係睇到佢哋嘅表情係黑晒面。其實咁樣我都冇嘢嘅，起碼佢哋係有講唔好意思，我覺得可以接受，都有禮貌嘅。之後你嗰個雞絲扎肉金邊粉，就變咗河粉，由於費事個waiter 又俾人鬧，我哋食河粉都OK ,就冇再叫佢轉返。結果埋單大概0515 pm 左右，有個戴眼鏡中年阿嬸 aged around 40 years old，用非常不滿嘅態度同埋不耐煩嘅眼神，比張單我哋。我哋食咗接近＄300 ,但係佢竟然全程一句唔該，或者多謝都冇，仲要係非常唔好脾氣，好似覺得我哋好麻煩或者阻住佢。我哋係比信用卡，無論係收卡，還返張卡俾我哋，同埋簽單，呢三個過程係一句多謝都無。餐廳裏面後生仔嘅都尚算不錯，有基本禮貌，但係二個中年女人 waitress 就真係一啲禮貌都無，我唔知呢啲落場時間係長工定炒散。但係我覺得咁樣都唔應該成為一個完全冇禮貌嘅原因。我都覺得奇怪星期日下午茶時段一個人都冇，原來啲態度差到離晒譜，比＄300食個下午茶仲要受氣，我諗我以後都唔會再黎，因為成個環境氣氛都非常之唔舒服。而且仲要係冇乜客嘅情況之下，都咁嘅態度，令人非常難以接受。食物嘅質素固然重要，但員工如果態度如此差，食物再好亦都難以再次吸引客人光顧。另外值得一讚嘅係傳菜嘅姐姐非常有禮貌，非常好。…Read More

今日係星期日，我哋訂枱係三點半，準時去到。因為見到食評好多人都話環境好好，服務好好，嘢食都好好，所以特登去咗赤柱試吓。結果大失所望。我諗住呢間餐廳咁出名，滿懷希望一試。今日有三個waitress，外國人侍應比較好，另外一個識講廣東話嘅侍應就非常差，佢年紀係比較大少少嘅。年輕後生果個侍應就還好。唔知係咪因為星期日嘅關係，服務差。我哋叫咗 assorted seafood bucket HKD 188，但由於我朋友唔食青口同埋蜆，我哋叫咗淨係要蝦，價錢完全一樣，都係HKD 188, 我哋要咗龍蝦汁。本來係一個bucket 變咗係一個 plate 。個年紀比較大嘅廣東話waitress 就話因為你淨係要蝦，所以就係會咁樣上。態度已經唔係咁好，不過都冇放喺心上。我唔知佢係唔夠用具定係點，都冇理由是但搵隻碟幫我擺起佢就算。如果你真係要咁樣嘅，我落單嗰時你應該講清楚，我可以考慮要其他食物。之後發現我飲果杯野裏面有昆蟲，我費事大聲講有其他人聽到，就諗住叫佢埋嚟先講。佢就不停話等陣等陣等陣。態度非常之差。好似覺得我阻住佢做野咁。我自己都係做服務行業，明白佢哋係好忙，我唔需要佢哋即刻過嚟，但係佢回答嘅態度真係太差了。就連一句請稍等都唔識講，淨係識得講等陣等陣等陣。最後佢5分鐘之後過咗嚟，我就同佢講杯野裏面有昆蟲。佢就咁講話幫你換過杯，一句sorry都冇。兩次都係嗰個年紀比較大嘅廣東話 waitress。最搞笑係換過第二杯返嚟，我又發現第二隻昆蟲係入面，當然我唔係搞事嘅人，唔想人哋覺得我好麻煩，我第二次已經冇叫佢換。好彩我依家返咗屋企都冇肚痛。所以總括嚟講，六百幾蚊咁嘅服務態度同埋食物質素，實在係大失所望。食物其實係一般，唔叫做好差，都係可以接受嘅範圍。但係服務人員嘅工作態度真係非常差，我諗如非必要，下次都唔會再來。真係太失望了。…Read More