覓食達人's Profile

來到澳門3天遊第二日既尾站 - 華軒美食雖然剛才食晚飯既時候已經講明唔要食得飽, 連細水蟹粥都只係叫了一碗兩份分, 但係男朋友始終都係忍唔住叫多碟炸鯪魚球, 所以最終都食到7成飽呀! 算了, 唯有逛一陣再去食下半場喇!! 因為唔熟地方又未去過, 我地最終都係"打的"去食細龜炒河... 真開心, 一路上仲有司機叔叔同我地講"細龜"既威水史tim! 原來目的地都好易搵咋, 下次可以慢慢行過黎喇 一落車已經見到有個路邊攤係街角, 砰砰彭彭, 火光紅紅...終於見到細龜(老闆) 喇! 真係好勁呀!! 淨係望見佢炒野既功架已經好想食喇!!! 唔好睇細龜個人細細粒, 佢炒起鑊上來真係唔講得笑架!! 見到佢逐樣材料按次序放落鑊, 然後用猛火起勢炒呀炒, 唔只雙手有勁, 簡直係揮動全身既細胞呀! 要知個大鐵鑊幾重喇, 但最厲害係佢一直都保持從容既神情, 不消兩分鐘就炒起一碟麵.....連我都睇到目瞪口呆呀 ! 好, 快d入去舖頭度試試先!我地一行二人只叫咗炒花甲&乾炒牛河...炒花甲:呢味係由店內廚房炒既....都幾惹味, 個汁少少辣, 好有大排檔風味! 只係個汁少少偏鹹, 但也是可以的....唔錯! 乾炒牛河:此店既炒河和炒麵都係由細龜親自操刀, 剛才已經係街邊欣賞過佢既"表演", 所以真係好期待! 牛河上枱時依然係好熱好多煙, 而且仲好香tim!! 試一試先....好好食呀!!!!! d河粉真係炒到條條分明, 唔似某d地方咁炒到幾條黐住架! 唔好以為要炒到呢種效果就係勁落油喇, 錯晒!! 講真我自己由細到大就最怕油膩野, 所以好少食牛河....但呢度真係好野, 碟底係唔多油, 而且河粉炒得好彈牙可口! 至於芽菜同牛肉既比例都好恰當, d牛肉好好食呀! 一食就知冇用梳打粉醃, 而且厚薄適中, 肉質軟焾有牛味, 只係稍為落多咗少少味精! 我覺得呢碟乾炒牛河既精髓, 係在於佢真係非常有鑊氣, 令我想起兒時跟屋企人穿街坊裝吃大排檔既味道...好耐冇試過食牛河食得咁開心喇 臨走前, 忍唔住又再睇多次細龜既炒鑊絕技, 細心觀察之下, 原來佢係先炒牛肉, 然後快速用大湯"殼"鏟走d油...唔怪得唔多油喇!! 遇著有揸電單車既食客來買外賣, 仲見到原來個外賣盒已經事先加咗層錫紙係入面tim ! 咁咪唔怕岩岩炒好既熱辣辣牛河, 會直接整溶個發泡膠盒lor! 估唔到細龜唔只炒野得, 仲好會為客人著想呀 我下次一定會再來既!…Read More

11月29日, 係第二日既澳門遊了! 因為今日既早餐同午餐都食得好肥好豐富, 所以想晚飯食得少d清淡d...食水蟹粥都好wor!其實已經係第二次來食肥仔文既水蟹粥喇, 記得之前上過一些澳門既美食網, 發現呢間既粥係本地既口碑唔錯, 一試之下真係有驚喜, 幾好食! 水蟹粥好綿好鲜甜....事隔一年再來食, 粥依然夠綿, 但好似冇上次咁好食, 冇咗之前好鮮既蟹味 或者下次去試試誠昌既水蟹粥比較吓, 希望呢度下次可以做返之前既水準喇!…Read More

今次已經係第3次來陶陶居, 我地係預早幾日前係香港打電話訂枱, 所以一來到就有位喇!仲記得第 一次來係跟舊公司既全體同事來既, 果時公司來澳門上training, 有個部門既manager出名識飲識食, 係佢介紹黎呢度食晚飯, 果次就係我第一次係陶陶居邂逅"古法瓦煲雞燉翅"喇...從此就算再食別家既翅, 不管是任何煮法, 我都只會對它情有獨鍾, 念念不忘! 幾乎每次來澳門都要拜訪呢度....講番我地今次食既野, 只係order咗3樣...1. 古法瓦煲雞燉翅 ($550, 有六両) 2. 魚湯浸豆苗 3. 蟹盒 ($12/個, 最少4個起)蟹盒:雞燉翅同蟹盒都係呢度既招牌菜, 之前一直都好想試蟹盒, 加上早排阿蘇都係節目度激讚師傅整蟹盒既炸功, 所以今次我早早就預訂了! 淨睇賣相確實唔錯wor, 食果時可以點少少紅醋, 第一啖咬落去....嘩, 真係好脆wor!! 而且呢種"脆"係同一般既炸物好唔一樣, 因為個炸皮係超超超薄, 好鬆化, 最難得係冇乜油膩感tim!! 照道理咁薄既皮, 一咬落去裡面d餡好易會hold唔住跌咗出黎, 但呢個蟹盒冇呢個情況, 功夫真係好好! 不過講到個餡, 真係要扣吓分, 乜"蟹盒"入面會冇蟹肉既??! 只係有豬肉同蝦, 咁冇蟹肉仲算唔算叫蟹盒呢? 唔係好明白點解....可能係因為咁, 所以冇咗我預期中既鮮味, 但未試過既都可以一試! 古法瓦煲雞燉翅:呢個真係我既至愛之一, 因為個湯底同翅都一樣咁出色呀, 係絕配呀!! 我覺得真係冇野可以彈架! 食既時候, 我會建議唔好落任何野住, 首先原汁原味咁試一啖湯先....嘩, 真係好純, 好有濃郁雞味 (注意, 係濃唔係鹹!), 雖然我唔知佢除咗雞之外仲落乜野去燉, 但一喝就知係燉咗好耐, 所以d湯係呈奶白咁色....好欣賞佢個雞湯底, 真係好少可以喝到咁"精華"既濃郁味....yummy!! 之後放少少莞西, 大紅折醋增加佢個鮮味, 再夾起一排排既翅...唔好以為佢俾咁多排既翅你食, 就會用d好幼既翅來將貨就價....錯! d翅真係好粗架!! 之前我帶男朋友來食, 可能得我地兩個食喇, 佢竟然話未試過食翅會好似食麵咁食架! 證明係有幾多翅呀!! 不過而家隔咗成年再黎食, 感覺上d翅好似冇上次來時多得咁誇張喇, 哈! 不過水準依然冇變魚湯浸豆苗:都幾好, 豆苗都幾嫩, 個湯清清地....總括今餐真係非常非常滿足呀, 因為又係要留肚陣間去食消夜, 所以今次冇試其他野, 下次有機會要試吓佢地d小菜…Read More

記得好耐之前有個朋友介紹我試呢間舖頭食豆腐花, 印象中的確係好滑! 佢仲話呢間豆腐花舖既豆腐花係全澳門最滑最好味tim!!所以我同其他人黎親澳門, 點樣都會黎呢度食番碗! 不過今趟就有少少唔同, 自己一心想試多d之前仲未試過既食品, 所以起初冇諗住食喇! 點知男朋友話今次好想再食...咁又黎食喇!舖頭十年如一日冇變過, 有時都覺得澳門有呢度好, 無論新建設與舊景物都可以互不相干地一直並存下去, 相映成趣! 舊有既街道商舖就好似永遠凝結在某一個時光一樣, 要幾時重溫就幾時重溫得到....講真果句, 李康記既豆腐花其實係冇乜豆味既, 如果一心想黎食一碗豆味好濃既豆花就請去別家吧! 但講滑溜程度, 呢度確係一絕!! 其實我相信無論本地人或外來客點解咁多年都咁長情要來吃豆腐花, 當中一定有其原因既! 大概都係鍾意佢既滑溜口感同佢係清甜! 十居其九既食客都會order要加花奶, 冇錯! 加花奶真係更加好味架!! 記得我第一次帶男朋友黎食既時候佢話冇豆味麻麻地, 但今次佢竟然主動話黎食真係有少少意外架, 哈! 佢話因為真係好滑好清好解渴wor! 佢仲一口氣連食兩碗tim, 勁!! 我自己就食一碗喇, 雖然真係幾正, 但要留肚食其他好野嘛 我地會再來既!…Read More

想唔到身為香港人既我, 係Openrice寫既第一篇食評, 就由澳門呢間隱世既食店--青洲劉記開始....落咗船坐shuttle bus到路環那邊取酒店房之後, 因為太肚餓喇! 同男友係船上面又講好咗第一站要先食豬扒包, 所以個心已經飛咗去青洲劉記喇! 一於出發去尋找久仰大名既豬扒包...估唔到由路環去青洲, 路程係咁遠wor! 但之前聽好多澳門人都話佢d豬扒包好正, 咁都冇計喇! 係坐車既途中, 就連個司機都話: 我個女都有試過佢地既豬扒包, 佢話真係好食架!講番食物, 我地坐低之後, 當然係先黎一個豬扒包再加支汽水喇! 可能真係太餓既關係, 我地仲試埋辣魚包, 魚蛋和魷魚...首先係黎咗魚蛋和 魷魚: 魚蛋原本唔係香港食開果d, 係炸鯪魚球呀! 食得出係即炸, 好熱! 但就唔係話好彈牙; 魷魚都算一般...不過後尾我叫阿姐俾d咖哩汁, 佢都肯俾半碗我地! 態度亦好友善!食到一半, 終於都到辣魚包和主角豬扒包出場! 阿姐好好人, 見我地兩個人, 所以主動幫我地將兩個包都分別切開一半...個辣魚包其實只屬一般, 因為係用罐頭魚嘛, 我自己就覺得冇乜特別, 但個包真係出奇地好食...好熱好脆呀! 真係外脆內軟....so good! 我地兩個好快就食晒喇! 跟住到豬扒包....一咬落去, 嘩! 真係唔知點形容果一刻....點解會整得咁好味架!! 個包同塊豬扒真係配合得無話好說! 同樣個包都係勁脆勁鬆軟, 熱辣辣, 真係百吃不厭! 但塊扒都係同樣出色呀! 無論味道和厚薄都做得岩岩好, 好軟熟, 仲好juicy!! 連我男友都一邊食, 一邊讚好! 只係一個咁簡單既麵包再加一塊豬扒, 無再加其他配料上去, 但都可以做得如此出色, 兩個字: 正! 回味! $11個豬扒包, 仲要咁好味, 係邊度搵呢! 全部加埋都係四十幾蚊!如果唔係要留肚食下場, 我地肯定食多個....下次再來澳門, 一定要再次光臨呀! 坐咁遠車都係值得既! 我唔需要再去大x來食豬扒包喇! …Read More