多多貓's Profile

假期中午光顧，等咗大概五分鐘就可入座。用手機落單，唔使五分鐘，所有嘢一次過嚟晒。張枱60cm x 60cm左右，放到已經放唔到 (如相中所示)。我哋已經有表示唔夠位，職員無回應，照塞晒落嚟，全程我哋都係要拎住隻碗嚟食。先飲燉湯，入面有鳳爪同土雞，都係要𦧲骨，我哋就用咗一隻碗仔嚟裝骨。飲咗1/3，實在太熱，冷氣又唔多夠，兩條友正面、背面全部流緊汗。咁抖抖食蒸飯先啦，問位職員拎隻碗啦 (因為其中一隻裝咗骨)。我：「唔該，我哋想要個碗仔。」孖辮姐：「我好忙㗎！你慢慢等啦！」哦，嘩，咩料？？結果我哋等咗大概三分鐘，佢都真係唔攞嚟，縱使見到佢企咗喺出餐位置無嘢做。另一位姐姐職員見我哋咁迷惘，反而主動問我哋有咩需要，就攞咗俾我哋。呢間餐廳喺一直我哋Openrice嘅bucket list入面，今次係專程嚟試，畢竟個位置唔算係好方便。成個過程都食得唔開心，感覺好壓迫。都有諗過可能係餐廳假期想快啲翻枱，所以一次過上晒所有嘢，催你快啲食完走。但望吓旁邊，又唔係喎，兩個大人加個B，坐四個位。媽媽買隔離SUBWAY入嚟慢慢食，爸爸叫咗個蒸飯，BB叫個布甸，that’s it，食得不知幾悠閒。所以⋯ 真係唔知。或者我哋叫個二人餐太多嘢，我哋衰，搞到職員好忙囉。…Read More

每次嚟都超開心，食材新鮮，氣氛又好。🦐蝦：即捉嘅，明顯比餐廳一早預備好擺喺枱嘅好食啲，肉係爽同鮮嘅花甲(大硯)：鮮甜juicy，但我哋無一粒擺啱方向，粒粒一打開啲汁就流走晒😅🙈🦴雞軟骨：好脆，有雞油香，認得竹籤上面印住個牌子，平時食居酒屋串燒雞軟骨都係呢個牌子鮑魚：彈牙唔靭👍🏻🦪蠔：又甜又滑扇貝：味道唔算突出，加埋新鮮蒜茸、牛油、粉絲之後，粉絲吸晒味正正😋🧄🍞蒜蓉包：香脆夠味，烘一烘就食得，不過成日兼顧唔到，燒燶咗佢環境呢，嚟過好多次，坐到蝦缸旁邊啲枱會舒服啲，通道隔離啲枱就迫夾少少，不過都明，人多無得揀。都見平日夜晚或者唔太full嘅時候，餐廳都自動會安排裡面蝦缸旁邊啲枱🙂👍🏻…Read More

間舖中午12:00開門，12點鬆啲去到，坐咗一半人左右。入到去，同收銀職位個姨姨講「一位」，望一望之後無理我。企多10秒，都係無人理，卒之自己行去圓枱問人哋可唔可以搭枱。坐低咗兩分鐘，依然無人理，餐牌都係要自己行過隔離枱攞。睇好食咩喇，揮極手都無人理。最後係要叫破全場「唔該寫嘢～～～」，頭先收銀位個姨姨先埋嚟。佢又犀利喎，我同講要啲咩，佢「哦哦哦」，然後原來件事就完咗。等咗一陣，有位身型豐滿高大嘅男職員，察覺到我無落到單，又坐咗喺度，所以叫咗另外一位職員埋嚟問我需唔需要落單。到嗰刻至知，由入嚟嗰刻到而家，完全無心想做生意。新店未run得smooth？都開咗差唔多成個月啦⋯⋯住樓上，先佢menu都幾吸引，諗住今次試完蝦頭油炒飯，下次帶埋啲frd嚟試肉餅飯。但無下次喇，多謝晒…Read More

出餐位個職員喺崗位剪指甲，嗰個範圍全部餐具、杯杯碗碗，周圍彈好核突，隨時加料剪指甲啲啪啪聲啪咗成三分鐘，已經乜胃口都無晒。見佢剪完仲要唔洗手，繼續執餐，祝大家好運…Read More

職員寫單無轉到個餐包做丹麥多士，落完單拎張單返嚟見到，同佢講返，佢話落咗無得搞，同埋丹麥多士要加$3。我話我知道要加錢，而家唔係唔俾錢，係你無幫我轉。然後又繼續講埋啲落咗單無得改之類嘅說話。之後收銀嗰個就話，而家改一係加$6，係咪要改。黐線，夾硬嚟！老實佢個丹麥多士係好食嘅，不過咁樣對客，留返做大陸遊客啦。…Read More

住附近，真係試過一日三餐都食佢。收工又凍又攰唔想煮，地鐵去到佐敦站已經㩒定外賣平台自取，當時19:17，諗住返到去攞得，或者唔使再等好耐。19:32到餐廳，當時唔算好忙無爆場，堂食都可以直入。問企喺收銀位職員，個外賣準備好未？佢睇勻所有外賣，無一個係經外賣平台叫嘅。反覆睇咗收銀位、廚房對出，都真係無。原因？個order仲連住喺外賣平台部機度無人接過囉⋯⋯都算，成個人幢喺門口等啦。再重申，當時並非平時爆旺嘅一日三餐：出面排長龍等堂食、幾個外賣員等order嗰種景況，而只係我一條友幢咗喺正門口。好喇，再等咗10分鐘，見到有袋外賣ready，但只係俾人放咗喺廚房門口張枱置之不理。入去問，先話係我份餐。真係無言。漏咗order都仲可以咁hea，好嘢！…Read More

｛ 明太子沙律法包 + 薯餅 ｝｛ 賞花杏仁露 ｝ 之前買過｛ 珍寶全餐｝外賣，塊薯餅同其他食物放埋一齊，同一個盒焗住，結果薯餅變咗一pat嘢，淋到叉都拮唔起⋯⋯ 超失望，嘥咗塊薯餅！現場食，法包又熱又脆，薯餅都係香脆嘅😋 凍冰冰嘅早上，食完先返工，成朝都特別滿足😁♥️…Read More

阿姐逐張枱fill緊櫃桶啲餐具。Fill到埋嚟我嗰張，整跌咗啲牙簽，執起就好順手丟咗落我兜雞翼度。我帶住十億個??????嘅眼光望住佢，佢就笑住話：「你都唔要㗎啦可」。我答佢：「你都丟咗落嚟嘞，我仲點要？」然後佢竟然仲可以當無事，我話咁你就收走佢啦。奇怪，係咪仲要個食客望住條跌過落地嘅牙簽，喺自己份餐上面。…Read More