FoodGodFatFat's Profile

🐔花膠花雕醉香雞泡飯 ($60)———————————————————————- 份量正常，有花膠、切雞粒、生菜、金菇、豆腐，養生之選，多啲飯就更好。- 酒香好濃，花膠都有幾塊，咁嘅價錢算足料。- 雞湯清甜，飲落冇味精，真材實料。- 切雞粒幾多，但可能浸咗湯嘅原故，感覺啲雞係白烚完再加入，冇咩味道同唔夠嫰滑。…Read More

🍔2人套餐 ($208)- 1 x 前菜；2 x 主食；2 x 小食；2 x 飲品———————————————————————🧀經典芝士漢堡- 賣相正常，配搭芝士、蕃茄、生菜、茄汁。- 味道唔似純牛肉，欠缺牛味，亦冇牛肉嘅彈性同韌性。- 疑似混入豬肉，味道似茶樓嘅牛肉球，非常失望。———————————————————————🍟芝士薯條- 普通粗薯條，份量正常。- 芝士醬溝得較稀，質感較水，好難喺薯條上點層厚醬，搞到芝士味唔夠。———————————————————————🥔香脆薯角- 外層脆，但內裡唔夠蓉，質感較實。———————————————————————🐔日式炸雞- 4件厚粉炸雞粒，冇咩調味，重油味，較劣。- 雞粒Size較細，作為一個主食就有啲搵笨。- 一般鹽酥雞會好食過佢。———————————————————————🤔總結- 芝士漢堡冇講明話用牛肉，所以佢牛溝豬係吹佢唔脹。佢另外有個安格斯漢堡 (貴啲)，嗰個應該會用純牛肉，所以其他評價話好食。- 價錢唔平，失望位多，唔會再食。…Read More

[🇯🇵居酒屋🏮] 富士山🗻———————————————————————今個禮拜又想食日本野，喺銅鑼灣就去咗金巴利廣場睇睇，呢間居酒屋望落入面啲環境都唔錯，又夠空間坐得舒服，而午市定食都係做緊抗疫價$49連野飲😱，佢嘅選擇都唔少，見到咁平就入去試下。———————————————————————火炙魚生飯 🐟 ($49)魚生款式同份量都唔少，三文魚都幾新鮮又肥美，生熟程度都唔錯，佢嘅燒汁都幾好味，成個飯都好好食，不過比想像中細碗，唔洗一陣就已經食哂。———————————————————————日式豚肉炒烏冬 🐷 ($49)賣相有啲頹，一開始會有種中伏嘅感覺。不過食落就知，佢嘅燒汁做得好好，而且加埋紫菜碎，味道上Carry哂成個烏冬。而烏冬係用咗幼身果種，冇煮到淋哂，呢種質地用嚟炒嘅效果原來幾好。豚肉半肥瘦食落少少彈牙都幾正。不過成個份量都係偏少，當下午茶食就OK。…Read More

[💛黃店漢堡💛] 嘉寶漢堡🍔———————————————————————位於尖沙咀嘅黃色漢堡包店，長久以嚟都受人吹捧👏🏻，事因佢賣嘅價錢的確比出面平一截(唔計連鎖快餐店)，而水準亦唔輸蝕，全部即叫即整，確保新鮮熱辣🔥。另外，肉類款式都算多，有牛、雞、豬、蝦、羊，可以滿足唔同人嘅口味。———————————————————————芝士牛堡 🧀🐂🍔 ($39).第一次食就試下最原始版本嘅漢堡，唔搞咁多花臣嘢，去試真啲佢咩級數。漢堡Size適中，有最基本嘅牛肉、芝士、蕃茄同生菜。牛肉嘅厚度比出面嘅厚，較軟身同淋口，食落冇咩筋，牛味亦幾重，都算Juicy，呢個價錢都算上品喇。芝士同沙律醬都好足，味道較重，間唔中會搶到啲牛味，食得耐會有少少膩。可能因為即叫即做同外賣紙包嘅關係，熱力令到個包比較扁塌同偏濕。整體嚟講都幾好食同有驚喜，雖然賣相一般，但味道唔差過出面賣$80-100嘅牛堡，可以話係實而不華嘅表表者。———————————————————————蜜糖芥末菠蘿雞堡 🍯🍍🐓 ($39).呢個Size就比牛堡大，主要因為雞扒夠大塊，菠蘿亦係厚切。雞扒唔係M記或K記用好厚粉炸果種，佢只係就咁炸，望落偏乾硬，但內裡肉質非常嫩滑多汁，食得多都唔會話好膩。雖然雞扒味道偏鹹，但配合甜甜酸酸嘅菠蘿同蜜糖芥末醬，就完全中和返，感覺啱啱好。菠蘿有輕微燒過，暖暖哋又勁多汁，食落好開胃，唔洗幾分鐘就食哂成個包，仲有種想再食嘅感覺。———————————————————————跟餐配飲品🥤+ 炸薯條 🍟 ($15) + 炸蕃薯條 🍠($20).薯條同蕃薯條都係即炸、熱辣辣、外脆內溶，分別係一個鹹一個甜，份量亦啱啱好夠飽，味道正常。蕃薯條可以較長時間保持脆度，如果外賣去遠啲地方食，建議配蕃薯條。———————————————————————黃店 + 平 + 好食 + 漢堡，諗唔到有咩理由唔再幫襯。🤩🤪…Read More

[🇯🇵居酒屋🏮] 味道樂居酒屋———————————————————————疫情之下👾，趕到喺全面禁堂食之前嘅一個Weekend出街食Lunch。今次嚟到尖東站出口，行幾步路就到嘅一間居酒屋🏮，見到餐牌嘅選擇好多，有20多款Lunch Set，價錢喺尖沙咀區都算平民。下午2點幾，店入面食客唔多，坐得好舒服，而店舖內嘅裝修都似居酒屋嘅🎎，有唔少日式傳統裝飾🎏，成個氛圍都令你置身於日本嘅小店一樣。———————————————————————跟餐配送：中華沙律、胡麻沙律、日式蒸蛋、味噌湯、飲品/甜品.食Set最緊要就係有豐富嘅前菜啦，呢到嘅前菜就做到喇，夠多元化唔孤寒，質素正常唔求其。有啲嘢墊下胃，確保食到飽飽先走😋，就算要收加一都抵比啦！———————————————————————火炙芝士三文魚丼 ($68).芝士🧀比想像中多，完完全全覆蓋哂啲三文魚，仲癡實哂好似成餅嘢咁。芝士整得唔夠熔，當分開兩者嘅時候，就明顯見到係超市買到嗰種片裝芝士。如果連埋三文魚食就偏鹹同有啲寡，攞嚟撈飯就OK嘅。.三文魚🐟份量都唔少，而且都新鮮美味。不過可能比大量芝士覆蓋哂先用火槍燒，有部分三文魚做唔到嗰種半熟出油嘅效果，但整體都好食又飽肚。.白飯🍚係好大碗嘅醋飯嚟，暖暖哋亦有啲芝麻碎，令我諗起喺日本食嗰隻暖醋飯，幾開胃。———————————————————————加洲反卷 拼 野菜豬骨湯烏冬 ($68).加洲反卷🍣一共6件，上面有大量蟹籽同沙律醬，入口有種好爽嘅口感同味道。不過佢嘅用料就得青瓜、蛋、蟹柳，而且飯嘅比例較多，食落有啲單調。.豬骨湯烏冬🍜就大大碗，湯底一般啦，清清地唔算重味。烏冬就正常嘅，不過冇咩配料食落就有啲悶。.呢個餐嘅澱粉質好多，但配料唔太豐富，比較單調，適合一啲想食飽飽就得嘅人。…Read More

[🥘咖哩吉列🍤] 阿四車仔麵———————————————————————一間喺豉油街好當眼位置嘅車仔麵店🚗，下午茶時間去到，見到有飯食又有麵食。由於當時太熱，冇諗太多就入去，應該點都有嘢啱食嘅。.店內裝修都算新淨，非常光猛🌟，空間感十足，枱與枱之間都隔得好開，就算坐耐啲都舒服又放心。———————————————————————咖哩吉烈豬扒飯 連 飲品 ($38)咖哩南瓜薯餅飯 連 飲品 ($38).本身嚟到應該要試下車仔麵，不過咁啱唔想食麵，見餐廳亦有做下啲日式小食，最後叫咗咖哩飯🥘，應該伏極有限。.由於下午茶時段食客唔多，落咗單就好快有嘢食嚟。兩碗飯都係大大碗，用珍珠米🍚，飯嘅份量就好多，但係咖哩汁就相對少，唔夠用嚟撈勻啲飯。咖哩汁味道正常，偏濃帶微辣。另外配菜用咗菜芯，其實有少少格格不入。.吉烈豬扒🐷溫度夠熱，皮夠脆口，粉嘅厚度適中，豬扒都醃得夠味，而且份量都充足冇欺場。不過略嫌偏乾，食落亦冇咩肉汁，整體發揮都OK嘅。.南瓜薯餅🎃就有驚喜，大大舊，熱辣辣，擺明就即炸即上。口感外脆內溶，粉亦唔會太厚，入面全部都係南瓜溶，食落偏甜但又唔覺奇怪。一共有兩件，而且大大舊，基本上食完都飽飽哋，幾滿足。…Read More

[🚗本土車仔麵🍜] 極滋味食階———————————————————————位於土瓜灣嘅車仔麵檔，每逢Lunch Time都有唔少人排隊，今次因為趕時間🕜先揀佢。叫得車仔麵，當然要又快又多選擇啦！呢到除咗有60多款餸料揀😱，更可以選擇沙嗲、腩汁等湯底，配搭千變萬化🍜，可以話食極都唔怕厭。———————————————————————四餸車仔麵 連 飲品 ($40).揀咗黑椒雞扒、牛根腩、白菜仔同紫菜，配米線。不論配料定係米線嘅份量都係非常非常之多，而佢本身用嘅碗都係大Size嘅，感覺好足料同老實。.黑椒雞扒🐔有一大塊，醃得夠味。牛根腩🐂好入味，接近入口即溶，腩汁令成個湯變得好飲。白菜仔🥬淥得啱啱好，新鮮清甜。紫菜👾成餅咁比你，份量極多，成個湯變咗紫菜牛腩湯勁正，每啖米線都癡住好多紫菜，口感同味道都好正。.另外睇過網上其他食評，話叫菜類同扒類嘅餸會比得好多，而丸類或餃類因為一粒粒容易數住，就比得冇咁多。所以我首推鐘意食紫菜一定要叫，因為真係成大餅咁比你。…Read More

[💛黃店系列💛] 加藤屋———————————————————————一向出名抵食嘅黃店加藤屋，走日式平民快餐路線🍱，食物質素本身唔錯，選擇勁多，牛肉煎雞、咖喱、鐵板、鍋物、炸物小食都有🤩，未試過就一定要去試下，總有一款啱心水。😋今次竟然有新搞作，推出鰻魚飯，仲要50幾蚊有交易，事關佢嘅對手吉野家都出過鰻魚飯，當時都成70蚊先食到(仲要伏伏哋😅)，今次平到咁，到底會係中伏定賣大包呢？———————————————————————炙燒鰻魚飯 連 飲品 ($53)淨睇賣相，已經見到舖滿大量鰻魚🐟🐟，鰻魚係剪開咗唔係條型上，份量十足。更加入唔少紫菜碎，散發濃濃香味。第一印象都加哂分。鰻魚十分肥美，食唔到有碎骨，食落啖啖肉勁滿足。😱燒汁甜咸適中，同鰻魚好夾，配埋紫菜，送飯一流。🤪鰻魚份量實在多到令你飽，甚至食完飯仲有幾嚿鰻魚淨。整體發揮絕對唔失色於某啲賣$80-100嘅餐廳，有啲想像唔到香港有咁抵又有咁上下質素嘅鰻魚飯。我諗而家做緊新推出優惠先賣$53，遲下要賣返$65左右先合理，想試就要襯早喇。😉———————————————————————鍋物 - 日式豚肉雜炊 壽喜燒湯烏冬 連飲品 ($44)呢到嘅鍋物可以自由配搭飯/烏冬、豬/牛/雞、唔同湯底。食過好多次之後，發現呢個組合係最夾最好食。😝首先一定要試壽喜燒湯，出面都好少食到，基本上嚟到有8-9成人都係食呢個湯。個湯有神奇嘅味道，少少偏甜味會令你飲完一啖又一啖，勁開胃。🤩另外佢個鍋物係包你食得飽，勁多嘅野菜，例如椰菜、牛蒡、金菇、磨菇、粟米等，仲有半隻蛋、蟹柳、撕紙狗、腐皮，淨講配料都勁豐富啦！🤓鐘意食一鍋鍋嘅，嚟到必定要試。———————————————————————正正正，抵食又好食嘅店舖買少見少，希望可以開多啲分店啦！🥺當初吉野家都唔係差，但加藤屋真係完爆咁囉！🤷🏻‍♀️…Read More

[🥘石鍋粉麵🍜] 十三姨/呢間位於旺角嘅人氣小店，特色係一人一鍋嘅粉麵。一向都鍾意食熱辣辣🔥又大大份嘅野食嘅我，見價錢又合理，就去試下呢種得意麵食。/炙燒手撕雞湯粉絲 🐔 ($62)-一嚟到見到賣相都唔錯，同餐牌上嘅相差唔多。配料有蔥同糖心蛋🥚，仲帶有少少腸粉，感覺幾新奇。-雞湯味都幾出，係偏鹹果種，胡椒味🌶亦偏重。雖然呢間店嘅湯底係主打冇味精，但食落都幾重味精😂，食完都幾口渴下。-粉絲幾有咬口，雞絲就有啲嚡，兩者本身就冇咩味。咁啱濃味嘅湯底就可以中和返，令整體味道適中。粉絲嘅份量都唔少，食完都幾飽肚。-至於熱度就十足喇，石鍋非常之熱又保溫👍🏻，食得慢嘅朋友都唔洗怕啲粉凍哂唔好食。…Read More

[🇭🇰高檔茶記🇭🇰] 四寶食堂/喺銅鑼灣食個Lunch，閒閒地都要七八十蚊💰，今次就想簡簡單單食個茶記，咁啱呢間嘅評價係大件夾抵食，就去望望。-店舖內人數都幾多，接近爆滿，但座位之間都有充足空間，唔會比人一種好迫嘅感覺。而且店舖裝修都好新淨，燈光光猛💡，風格清新，有文青Cafe氣息🌿，嚟到淨係為打卡都抵。-食物種類都幾多，基本茶記一日四餐有嘅都有。佢連沙律、意粉同Pizza等西餐🍽都做埋，而西餐嘅價位就貼近樓上Cafe，可以滿足唔同食客，而且佢嘅環境都配得起。/蜜汁叉燒滑蛋飯 ($58)-😍 望落就知份量十足，一大片厚厚嘅滑蛋可以覆蓋所有飯 (已叫多飯)，估計有2.5-3隻蛋。-😋 滑蛋非常嫰滑，蛋香濃郁，帶些少蛋汁。厚度足夠，確保每啖飯都可以撈蛋食。-🤔 叉燒略嫌唔夠甜味，加上豉油偏多，整體感覺少少偏咸。/常餐 - 蕃茄薯仔鮮牛肉通粉 + 嫰滑炒蛋 + 丹麥牛油厚多士 ($50)-😍 不論炒蛋定蕃茄湯嘅顏色都好靚，鮮艷嘅顏色反映到佢夠濃度，可以增加食慾。-😋 炒蛋比上面果個更加嫰滑，半熟狀態令佢更多蛋汁。份量充足，約有2隻蛋。-😋 蕃茄薯仔湯真材實料，蕃茄同薯仔都唔少，味道甜酸適中。而通粉都好夠份量，食完成個餐會飽肚。-😋 牛油多士嘅牛油係預先熔化咗落去，牛油味好香。-🤔 多士帶微暖，唔係平時食開焗脆果隻。入口鬆軟，麵包帶甜味，感覺接近牛油排包多啲。/整體嚟講，以銅鑼灣地段，又要食飽飽，呢間嘅包裝同CP值都唔錯。-不過服務就麻麻地，入到去已叫我2次調位😤，拎完餐牌唔夠1分鐘就催落單😅，食淨一半嘅野食會問收唔收得 (食咗15-20分鐘左右)😂，最後埋單比錢一句野都冇講🤯。不論炒蛋質素同服務都有啲澳牛Feel😨，希望會有啲改善。…Read More

[🇰🇷韓式飯捲🇰🇷] O’taste/烤牛肉紫菜飯捲 🐂 ($48)飯捲入面非常足料，有牛肉、胡蘿蔔、黃蘿蔔、蟹柳、玉子、生菜，全部蔬菜都帶麻油香味。材料嘅份量就勁多🤯，佔咗三分之二，相對飯量就唔係好多，不過切得較厚，食落都好有滿足感。-材料入面，有一半都係牛肉，所以食落去嘅口感主要係牛肉🐂。另一半口感爽脆嘅蔬菜🥬，完全反襯咗牛肉結實嘅質感，整體嚟講就係好正。-如果同Hungry Korean比，佢價錢就貴啲，但質素亦同時好啲，感覺足料食得爽啲。…Read More

[🇰🇷韓式便當🇰🇷] O’taste/一共有3間分店嘅O’taste，雖然主打韓式外賣便當，但入面都有些少座位堂食。同時都有唔少小食可以選擇，例如：炒年糕、煎餃子、泡菜餅、海鮮餅、紫菜卷蛋等等，款式比想像中多，價錢亦較大眾化。/烤牛肉拌飯 🐂 ($62)盛載嘅碗都唔細🍚，而材料就極之豐富同份量充足🍱；有一半係肥牛，肥牛量多得驚人；再配上紫菜、泡菜、生菜、芽菜、翠玉瓜、洋蔥、雞髀菇、蘿蔔絲，淨係數下都知營養十足🌈，而飯底就用咗紫米飯。-牛肉脂肪比一般肥牛少，咬落啖啖肉更實在，肉質更有彈性，食落冇咁肥膩。燒汁嘅味道都好濃郁，甜咸適中，好夾個牛😋，亦都好帶出到濃濃嘅牛味，令成個牛食落好Juicy💦。牛肉嘅份量真係多得太誇張，味道都好足夠，雖然飯量唔少，但應該要再多啲飯先可以撈哂嚟食。-其他配料就用麻油醃過，麻油香幾重，容易入口，用嚟撈飯一流。配菜款式極多，提供到多種口味同新鮮感，唯獨是偏油，令成個飯濕度較重💧。泡菜係偏辣果種，帶有酸味，極度開胃🤩。…Read More

[💛黃店系列💛] 一冰廳/土瓜灣從來都係數一數二藍😓嘅地區，今次去呢區都幾人氣嘅黃店茶餐廳，招牌菜係芝士咖哩日式蛋包飯🍳，第一次嚟就試試佢。-中午12:30，最繁忙嘅食飯時間，店舖入面早已滿座，十分擠迫，亦冇咩阻隔措施，喺疫情期間的確唔太衛生👾，好唔容易先搵到一個角落頭坐下。而店員都忙到踢哂腳🙇🏻‍♂️，唔太得閒招呼我，要自己畫紙點餐。/芝士咖喱日式蛋包飯 配烤雞 🍛 ($53)-賣相都幾唔錯，明顯有舖排過，一邊係芝士汁，另一邊係咖哩汁，中間就係蛋包飯🍚，兩邊顏色有個對比🌓，幾啱打卡用。初時以為芝士咖哩係一款汁嚟，原來係分開兩種汁，好似鴛鴦飯咁。炒蛋紋理分明，富有層次，蛋汁豐富，屬半熟狀態🤩，顏色鮮艷，極為吸睛。-咖哩汁帶有濃郁嘅咖哩香料味🥘，入口偏辣，非常惹味；帶微酸，格外開胃。佢同預期嘅日式咖哩有出入，冇帶甜味，亦冇薯仔同蘿蔔等配料，偏向似印度咖喱👳🏾‍♂️，食得辣嘅我，食到一半都要飲水。-芝士汁🧀比較似一般出面食到嘅白汁多啲，芝士味唔濃，味道較淡，用嚟中和香辣嘅咖哩汁就啱啱好。-炒蛋出奇地表現出色，最初以為繁忙嘅茶記冇閒情逸致炒個靚蛋，估唔到呢度可以食到。炒蛋質感嫰滑而軟綿，帶濃郁嘅蛋奶香味🥚，半熟狀態帶來豐富蛋汁，反映廚師火喉控制到位🔥，冇過熟情況。份量都好充足，用嚟送飯簡直完美。-烤雞🐥實則為煎炸雞扒，外皮略為乾硬，硬度接近中式燒肉皮，比較刮口。肉質亦較乾同嚡，口感煙韌，易攝牙縫，唔夠嫰滑，似炸得過龍。-呢間店強調白飯使用金象米🐘，質素的確比一般茶記嘅飯靚，都幾有誠意。/環境就麻麻地，大熱天時☀️，擠逼嘅座位帶點汗味💦，影響咗食慾，下次拎走食就最好。-50蚊左右可以嘆到高質蛋包飯，而且係真·半熟炒蛋，份量充足，飯底靚，CP值都幾高。…Read More

[💛黃色小店💛] Supine/夜晚嚟到充滿黃店嘅石門，去試下呢間有唔少好評嘅Cafe食西菜🍽。晚上7:45嚟到，入面Full哂，門外排咗6個人，有啲等緊位，有啲等緊外賣。店舖出面貼滿文宣🥽，亦有啲抗爭小卡牌🃏比客人拎。-好彩Book咗位，否則7:30後嚟都應該冇位。店舖空間細小，只容納十幾人，坐得擠迫👨‍👩‍👦‍👦，移動都唔太方便，而今次坐嘅枱只僅僅夠擺放食物。/烤牛肉漢堡套餐 🍔 ($90)等咗20分鐘左右，終於嚟到，外型非常架勢，色彩鮮明🌈好吸引，最適合打卡📸。漢堡堆砌得好高，用料豐富，麵包🥯、肥牛🥩、蕃茄🍅、生菜🥬嘅厚度平均，可以清楚呈現出每款材料。不過原本以為烤牛肉係指牛扒，點知係和風洋蔥肥牛，有啲估唔到，亦都冇辦法霸氣地一啖咬落去，只好用「解剖式」食法🍴。-麵包🥯質地較軟、偏濕💧，食落口有種薄嘅感覺，有啲空虛。溫度唔暖，丁點脆嘅質感都冇，繁忙時間下應該冇咩烘過。而味道就同普通麵包差唔多，冇特別調味或牛油味。-肥牛🥩就似出面和風牛肉飯嘅味道，但味道再淡啲，配合芝士🧀會有返啲味，但兩樣野夾埋就有啲Heavy感覺。肥牛唔算特別靚，脂肪比例較多，帶點筋，亦唔可以叫「烤」，因為呢種牛點睇都係煮出嚟，整體上覺得唔夾個Burger。-蕃茄🍅同生菜🥬都係正常水準，不過始終唔夾個肥牛，個人認為配搭牛扒/吉烈炸物會比較好，亦見到隔離食嘅吉烈蝦堡好似幾吸引。-薯條🍟呈長方條形，切得較薄，外皮有脆感，只簡單用鹽調味，味道正常，唯獨唔夠熱，唔似炸完即上。薯條配搭香草忌廉醬，醬汁味道正正就係「綠色曾俊華薯片」果種，味道都算濃郁好味，可以為淡淡嘅薯條加返啲味，亦帶有少少羅勒味。/美國牛柳配意粉套餐 🐂 ($90)前菜有白湯🥣同餐包🥖，白湯偏甜，冇帶忌廉味，得少少磨菇碎做配料，部分麵粉未溶化，質感為半糊狀，有種食緊甜麥皮嘅感覺🤔。餐包係室溫，呈扁狀，牛油只可以搽喺面，內裡鬆散似蛋糕，比平均水準低。-配菜🥬係生菜同白灼過嘅蔬菜，兩者都冇落調味，食落好淡帶苦澀味，輕輕食過就算，如果加返啲鹽或醋會好啲。-主角牛柳大大塊，外貌偏黑🐃，由於冇得揀熟度，初時諗係咪煎得過熟。切開之後有啲驚訝，一塊牛扒入面嘅唔同部分，竟然可以有齊3至9成熟🤨，由深紅色血水去到淺灰色嘅肉質都有😂，估計冇做好解凍，同因應厚薄度控制火喉。雖然$90都唔期望太多，但牛扒嘅筋腱偏多，有啲位用盡全力都未必切得開🔪或咬得開😬，咀嚼到一半要Lur返出嚟，成塊牛扒大概得一半係食到入肚，有啲無奈。-黑椒汁似黑椒混合燒汁，辣味適中，冇搶哂成個味，亦帶有微微酸味，十分開胃👀。由於牛扒本身牛味唔濃，配上呢個汁可以補救返啲味。-由於薯菜賣哂關係，轉咗做意粉🍝，意粉係幼身果隻，無論望落定入口，感覺只用咗茄汁輕輕炒過。味道偏甜冇酸味，蕃茄味都唔出；溫度係室溫🌀，應該擺咗一段時間；偏油，整體水平為普通茶記質素。/以晚市西餐嚟計，價錢都唔算貴，不過食落口嘅質素同想像中有啲出入，或者可能太繁忙嘅關係⏱，忙中有錯。-由於網上對呢間店嘅評價都係有讚冇彈👍🏻，本身以為今次嘅食評都係大讚為主。食完之後，有諗過係咪要求太高，但對食物冇咩要求嘅另一半都覺得麻麻地😕，或者咁啱呢兩樣嘢都唔係佢哋嘅強項啫，可能其他菜式表現好好呢。-總結今次嚟講，如果想用較平嘅價錢，去食高質嘅西餐🤩，又要材料正，又要味道好，呢度可能會同期望有落差。-但如果想支持下黃色小店💛🥽，要賣相靚🍔、份量大；打下卡📸、同朋友聚下，呢到都尚算滿意。…Read More

[🍡街頭小食🍡] 食記餐店/一間位於南區鴨脷洲嘅街邊小食店，開正喺大馬路旁🚕，店舖係開放式，冇冷氣🔥，座位少，空間較窄，有部分座位要擺喺街邊，有種傳統大排檔嘅感覺。有人覺得坐得好唔舒服，環境污糟💨；亦有人覺得咁先係特色，係街邊食野有別一番風味。不過快快食完小食嘅我，當然唔介意呢種環境啦🤷🏻‍♀️！/生菜魚肉 🥬 ($20)碗仔翅魚肉 🐟 ($20)-首先會講下魚肉，呢間店舖嘅魚肉做法係全港獨一無二，一般街舖嘅做法係用鯪魚肉切條，一係帶腥，一係有陳皮味，拎嚟煮粉/做餸就OK，做小食入面嘅主食就唔太吸引☹️。 而呢到嘅魚肉，係用咗鮮魚溝入麵粉，搞拌後再切條而成，然後放入熱湯煮熟。望落晶凝通透，口感軟滑、爽口、彈牙🦷，非常有趣味。而且麵粉比例得宜，食落唔會太漿或太粉。另外，鴨脷洲本身係漁民區🎣，要拎到鮮魚做原料其實唔難，所以呢種魚肉食落帶鮮甜味，冇半點腥味，成個Package係出面複製唔到。而魚肉份量好多，堆滿成隻碗，做下午茶就啱啱好，但對於細食嘅人可以做正餐。要注意魚肉入面撈咗少許蔥粒，唔食蔥嘅朋友就未必鐘意食呢個。-魚肉的確令人耳目一新，但不得不讚嘅係生菜魚肉個湯底🍲。湯底用咗魚湯，雖有加味精，但暖暖哋飲落亦好清甜，唔係淡而無味果種。配合魚肉係出奇地夾，加入少少麻油同胡椒粉，更帶出味道，寧舍開胃，好味到會忍唔住飲埋佢。而生菜選用西生菜🥬鋪底，湯底熱度適中，冇整淋哂啲生菜，做到「玻璃」效果，食落清甜爽脆，亦襯托返魚肉。-至於碗仔翅味道就同出面大同小異，甜咸適中，加入麻油更香但帶膩，建議加返醋好啲。色水深淺度都滿意，落咗唔少瘦肉絲同蛋花🥚，有嘢嚼下，唔會淨飲太悶。但係魚肉同碗仔翅本身都係飽肚食物，兩者混合埋，食到一半會有些少厭同濟嘅感覺，所以我會鐘意生菜魚肉多啲🤔。/煎腸粉 🌀($14)一嚟到就望到落咗好多豉油同甜醬，明顯重手咗，食落偏咸，就算有唔少甜醬，都中和唔返🤢。而且望落都充滿油光，可想而知入口係非常油膩。腸粉始終係外來貨，口感偏粉同實，有部分位置甚至乾硬，應該係有啲煎過咗龍，唔太推薦。/對於南區街坊，呢間開咗好多年嘅小店應該都唔會陌生，佢仲有唔少炸物都好賣得，有炸雞翼🐓、雲吞、燒賣、魚蛋、麥樂雞，甚至連蕃薯🍠都有。-每一次推介朋友嚟，都唔會失望，品嗜到「鴨脷洲原味道⛵️」。不過呢間家族小店，多年嚟累積咗唔少人氣，所以開門日子都好唔穩定，大遠水路嚟拜訪嘅朋友，就要睇運氣喇🌟！…Read More