abnormal in normal's Profile

呢日同朋友約左係mikiki 一齊食飯，見到呢間餐廳係之前未試過嘅，仲要食物有富士山造型望落好吸引，就一齊入左去。呢間餐廳主打素食，我同朋友都點左一個富士山定食。我就揀左野菜炒雞柳配咖喱汁，番薯條，蘑菇忌廉湯，昆布關東煮同萵筍凍豆腐。先講野菜炒雞柳，呢度用嘅係素雞柳，食落有嚼勁同豆香，配上咖喱汁味道不錯。蕃薯條就不過不失，如果可以粗一啲口感會更好。蘑菇忌廉湯，飲落好大陣蘑菇味，仲可以食到一啲蘑菇嘅粒粒，我認為店家如果可以改良個蘑菇湯變得綿密啲會更好。關東煮好食，萵筍凍豆腐可以多一點醬汁。總括黎講，呢個富士山定食的確打卡一流，但同時都兼具味道，唔會有傳統素食嘅味道，如果經過值得一試。…Read More

呢日係母親節前一個星期，為左避免母親節生日出街食飯太多人，所以一家人決定提早慶祝。萬豪金殿嘅環境十分安靜，員工服務良好，見到杯入面無茶就主動幫手斟茶。四個人點左5樣菜，1個甜品，分別係叉燒，炸子雞，蝦籽柚皮，黑松露野菌炒蘆荀，萬豪炒香苗，蛋撻。除此之外，餐廳仲有送前菜話梅青瓜，洋蔥檸檬汁，同甜品芒果布丁、酥餅。叉燒肥瘦均勻，味道香甜，令人忍唔住一口接一口。炸子雞外皮香脆，顏色均勻，味道適中。蝦籽柚皮，我唔太推薦，雖然醬汁味道不錯，但柚子皮的口感實在不是我喜歡的，大家可以因應自己口味而點。野菌炒蘆筍，蘆筍經過烹調仍可以保留口感，與多種菌類一起炒，味道很好，但是黑松露味道較少。炒飯，十分足料且乾爽，入面有叉燒、烤鴨等配料。蛋撻，蛋漿與蛋撻皮比例恰當，可是略嫌蛋撻較凍。其餘附送的餐點不過不失。回訪機會大，可再點叉燒與野菌炒蘆筍。…Read More

呢日係朋友生日，所以就去到呢間朋友之前已經想食嘅壹小店，因為我地全部人都無食過西班牙蛋餅。店面裝修別緻，牆上貼滿金庸小說，充滿特色。我地有5個人，其中一個朋友就叫左窩夫，其餘全部都叫左西班牙蛋餅。窩夫不過不失，而且有好多配料，價錢公道。4個人分別有4個蛋餅，1個傳統西班牙蛋餅，1個係吞拿魚，兩個煙燻三文魚。傳統西班牙蛋餅，味道清淡，而且配料比較少，所以唔太建議。吞拿魚蛋餅就正正同傳統蛋餅相反，味道對我來說有點太鹹，適合重口味人士，不過蛋餅上個烤麵包幾好食。最推薦嘅就係三文魚蛋餅，鹹淡始終，蛋餅內有菠菜，不會太膩。每個蛋餅都附送一個黑醋沙拉和羅宋湯。沙拉似乎黑醋落得太多，有啲刺激喉嚨嘅感覺，如果之後店家有得自選沙拉醬就好。總括來說，我認為大家可以係呢度點煙燻三文魚西班牙蛋餅，其他就可以睇下自己嘅個人口味啦。…Read More

有睇我上一篇對逸東軒食評嘅朋友應該都知道我對佢嘅晚市評價好高，環境味道服務都係十分優秀。呢一次就唔係試佢嘅晚市，而係試佢地嘅早茶，前一日就打電話去訂左兩個位。去到當日，門口已經好多等緊11點半安排入座。早茶當然就要喊點心啦。兩個人叫左六款點心，有帶子蒸燒賣，春風得意腸，叉燒腸粉，婆參瑤柱菜苗餃，脆皮流沙酥，小籠包。先講叉燒腸粉，入面餡料豐富，啖啖肉，十分足料。另一條春風得意腸粉，入面就係蝦春卷，春卷唔會因為腸粉而邊num，繼續保持香脆，兩者我比較喜歡春風得意腸。帶子蒸燒賣，每粒燒賣上面都有一舊帶子，但係我就覺得呢個燒賣就鹹左少少啦。婆參瑤柱菜苗餃，入面真係可以食到粒粒嘅婆參，但瑤柱係呢度就唔係好明顯，調味剛剛好。最後嘅脆皮流沙酥，一咬落去，熱騰騰嘅奶皇流心就流曬出黎，但相對比較膩，一人食一舊就好。總括黎講，我好滿意呢次嘅體驗，服務優秀，味道不錯，相信之後會再黎。…Read More

鱷魚恤中心嘅餐廳大換血之後都無黎試過，今日就同屋企人到7樓嘅滿福庭飲午茶。得兩個人所以都點得唔多，叫咗一碟叉燒腸、燒賣、蝦餃、蛋黃千層糕、瑤柱翠苗餃。先講食物味道，叉燒腸同蝦餃不過不失。翠苗餃係咁多款點心入面比較好食嘅一款，有蒜蓉味，但真係食唔出有瑤柱。燒賣似超級市場買到嘅急凍燒賣。而蛋黃千層糕係我最唔推薦嘅一款點心，面層似蒸包嘅皮，下層嘅蛋糕同椰蓉鹹蛋黃嘅味道完全唔夾，一用筷子夾起，全部野散曬。另外講上菜時間，除左叉燒腸粉同燒賣上菜時間正常外，其他3樣差唔多等咗45分鐘先到，途中有揾過服務員問點解咁耐，但佢哋都唔跟進。明白茶樓工作忙碌，但都要以客人嘅安全思慮一下，加水後嘅茶壺，服務生大力咁樣撻上枱，入面嘅熱水都漏咁啲出黎，差啲淋到屋企人。認真講，以呢個價錢，除左方便性之外，暫時搵唔到會再去呢一間茶樓嘅原因。…Read More

同朋友生日就係Holam Bakery買左4件千層蛋糕，本身打算買焦糖燉蛋味，點知當日去到無，所以當日就買左曲奇流心，烏龍茶，伯爵茶同海鹽檸檬味。曲奇流心，味道不過不失，不過流心效果做得好好。烏龍茶，本身對呢個味道期望唔係好大，點知係我係呢四隻味之中最鍾意嘅，味道清新，同埋我係其他地方都無試過呢隻味，我會回購嘅味道。伯爵茶，呢個味係大部分千層蛋糕店都有嘅味，味道濃郁，食完口腔內充滿伯爵茶嘅香氣，但欠缺驚喜。海鹽檸檬味，因為個名有檸檬，所以期望呢個蛋糕會偏向清爽，但食後覺得呢個味道都幾膩，同埋充滿檸檬香精味道，品嚐唔到有海鹽。Holam bakery 價錢合理，而且每日都有多款千層蛋糕選擇，我暫時只會回購烏龍茶和伯爵茶味，或者試下其他味道嘅千層蛋糕。…Read More

中學畢業大概1年，以前嘅中學係藍田，午飯時間都經常會黎小明珠食佢地嘅學生餐。依家無得再點學生餐，但呢日同朋友到藍田有啲野做，就一齊係小明珠食個午餐懷念下。我就點返我以前最鍾意嘅菜肉雲吞酸辣米線（小辣）。雖然話就話小辣，但小明珠嘅辣同常都比出面辣，所以都食到我地流曬鼻水。菜肉雲吞入面有豬肉同白菜，米線都好有嚼勁，連埋湯底嘅酸辣，真係令人回味無窮。唔知係咪因為有中學濾鏡嘅關係，所以我真係覺得好好食，因為入面有嘅唔單單係酸辣米線，仲有滿滿嘅中學回憶。…Read More

呢日有屋企人生日，就一早預定左黎尖沙咀呢間古琴雅苑食晚餐。之前我其實都係灣仔嘅古琴雅苑食過一次，覺得味道不錯，今次依然無令我失望。呢日四個人就點左6個菜，但係擔擔麵同乾煸四季豆就無影到相，所以呢到就show唔到俾大家睇啦。擔擔麵嘅話，麵條偏粗身，有嚼勁，但係唔索味，所以麵底同湯底味道有些分離。乾煸四季豆就不過不失，味道偏鹹。意大利黑醋骨，我唔太喜愛，但我嘅屋企人對佢嘅評價一致好評。跟住就係必點嘅北京烤鴨，配上甜麵醬、哈密瓜、青瓜、餅皮，味道濃郁但清爽。而今餐最愛就係松子魚，酸酸甜甜，十分開胃。炸過嘅魚配上酸甜嘅醬，炸皮唔會變到軟曬，食落仲係好脆，魚肉都好滑，覺得都係必點嘅菜。唯一可惜之處就係，壞境比較逼，但係waiter 嘅服務都好好，倒瀉水佢都話「唔緊要，唔緊要」然後幫我地清理。…Read More

呢日貪方便就係屋企通過Deliveroo叫外賣(非廣告),之前係觀塘就試過龍鳳號嘅米粉覺得不錯，所以今次就外賣下其他餐點。兩個人點左一個三杯雞套餐同涼麵。三杯雞，味道不錯但無咩辣味，如果可以辣少少就好，雞肉都算軟嫩。但係涼麵就真係唔會再點，麻醬無咩，而且成個面都無咩調味，可以話係食緊一個無味嘅面，所以真係唔建議大家點涼麵。另外一點，Deliveroo 上面龍鳳號可以選擇嘅餐點真係好少，加上係星期一至五嘅午餐時間，可以揀嘅就更少，希望店家之後可以提供更加多可以外賣嘅餐點啦。…Read More

係1點幾去食小火焰，雖然仲係午餐時間，但比起12點嘅時段已經少人好多，加上疫情，所以唔需要等位就可以入內食午餐。我點左一個泡菜炒豬肉飯，其實味道不錯，但係就越食越鹹，可能因為泡菜本身就已經好濃味，加上醬汁，所以就變到好鹹。即使呢個係午市套餐，但係份量都唔算少，一個人絕對夠飽。希望小火焰可以見到呢篇食評，餐點嘅鹽/味精可以落少啲。對比我同朋友之前係小火焰食過嘅冷面，酸酸地開胃，呢個飯真係遜色同有啲小失落，下次唔會再叫。…Read More

呢日係尖沙咀去完cafe之後見到樓下就有鮮芋仙又唔使排隊就去試下。我點左芋圓4號，入面除左芋圓之外，仲有紅豆、珍珠同芋頭。可能因為叫熱嘅關係，所以芋圓偏軟，但芋圓嘅蕃薯同芋頭味都幾濃郁。另外係紅豆融入糖水之中，但仍未可以更加濃稠。珍珠偏細粒，但幾有咬口，唔會因為熱而變得太軟。成碗最欣賞就係芋頭，好粉同好有芋頭香氣。雖然我無食過台灣嘅鮮芋仙，但我認為呢間香港鮮芋仙嘅份量同佢嘅價錢符合，味道都不錯，唔會太甜，如果可以成碗糖水可以再熱啲就更好。…Read More

同朋友出街梗係揀間可以影到靚相嘅cafe 啦所以就搵左呢間好似食得又影得嘅餐廳，我地兩個人就叫左一個富士山黑豚肉咖哩飯同柏士圖青醬雪糕海鮮意大利麵。個人認為咖哩飯好食過意粉，咖哩有啲似沙爹王嘅白咖哩比較重香茅味道，但肉真係偏少。雖然飯係藍色，都其實只係普通飯嘅味道。另外意粉方面，雪糕球其實就係cream cheese ，雪糕筒似超市買到果啲唔脆嘅雪糕筒，將cream cheese 攪勻就可以食，食落cream 味好濃，但無咩青醬味，偏膩。海鮮唔會過老，意粉偏向食佢個樣多過佢個味，個人推薦富士山咖哩飯，意粉要睇自己對於cream 嘅喜愛程度。…Read More

一直都無去過重慶大廈，呢日一班朋友興起就話去重慶大廈食咖哩，上網一搵就係呢一間7E咖喱王。去到重慶大廈，當然我地係唔識路嘅，同門口嘅南亞裔人士講話我地係去7E咖哩王就有人出黎帶路。我地四個人總共叫左兩個咖哩同兩個烤餅，分別係特色香料雞，馬沙拉燴雞，蒜蓉烤餅同牛油烤餅。兩款雞其實各有特色，馬拉沙燴雞椰汁味比較濃，我個人比較鍾意。烤餅方面，蒜蓉烤餅無咩蒜蓉味，反而牛油烤餅比較香，所以我比較推薦大家點牛油烤餅黎同咖哩一齊食。…Read More

逸東軒的晚餐都非常熱門，這次趁母親生日就提早一個月預定黎食飯。四個人總共點左5樣，分別有豬肺湯，鴨，話梅車厘茄，菜同一個燒味拼盤。每一道菜都十分有驚喜同味道好好。話梅車厘茄，酸酸地十分開胃。而燒味拼盤係必叫嘅，十分出色，燒腩仔個皮十分之香脆，比起坊間買到嘅好食，叉燒調味都好適當，無豬騷味。我地仲點左豬肺湯，雖然洗得幾乾淨，但仍然殘留少少豬騷味。鴨有兩食，分別係炒飯同片皮鴨。炒飯好香鴨味，片皮鴨整體幾清新，符合佢嘅價錢。質素黎講，逸東軒真係無得輸，好推薦大家如果要節日慶祝嘅時候食。…Read More

呢日同朋友在重慶大廈食完咖哩之後就係尖沙咀周圍行下想搵間甜品食下糖水，呢個時候就搵到嚐仙啦。一行四人各自都點左唔同嘅糖水，分別是雙芋仙草奶凍、黃金地瓜泥仙草奶凍、雙芋布丁和黃金地瓜泥豆花。我地大家都交換黎食，品嚐之下發現芋頭類別嘅都比較好食。雙芋系列嘅甜品上都有一坨芋頭泥，細滑而且幾香，值得一試。同樣地，黃金地瓜泥系列上面都有一坨蕃薯泥，但好明顯地，蕃薯泥不太細滑而且有好多顆粒感，蕃薯亦唔夠甜香，無左蕃薯原本嘅香氣。除左芋頭泥同蕃薯泥之外，配料都幾好食，例如係芋圓同仙草，所以總括黎講，我比較推薦大家可以點選雙芋系列嘅餐點，而黃金地瓜泥系列就要睇個人鍾唔鍾意顆粒感。…Read More