thomasKwan's Profile

一入到餐廳，最令我地驚訝既係充滿時尚感既裝修同埋特高既樓底，望著水泥色既牆上掛著一幅又一幅畫，勾劃出餐廳既主題，未食野已經叫人拎出相機拍下照片。跟住走黎既就係禮貌周周，熱情介紹餐牌上不同食物的年輕女侍應。她嘗試了解我們的口味，推介了不少餐廳熱賣的菜式，令我們覺得很親切。先黎既係咸蛋黃雞翼，呢個送酒一流，新鮮炸起，散發住濃濃既咸蛋香，加上JUICY既雞翼，叫人食指大動，暢快！要講西餐當然唔少得BURGER，呢個軟殻蟹BURGER份量好多，軟殻蟹好大件熱辣辣，每一啖咬落去個漢堡都有餡既，唔錯。同埋最驚喜就係雙色薯條，係薯仔同埋蕃薯，都係厚切既。而最好食係蕃薯條，佢甜甜地，食落口感札實D，亦似係唔會太熱氣。其實兩個人食都差唔多了，不過店員推介呢個素食斧頭扒就試埋佢啦。聽講d豬係食素，食落口感嫩d，同埋豬味較濃郁，都好食既。同埋本身都係就咁煎，調味料同醬汁都唔多，食到佢既真味。食飽飽啦，真心推介呢間唔錯既小店。…Read More

有日放工落好大雨，原本諗住搵個位避雨既，無意之中發現呢間酒店basement開左個food court，就入去搵下好野食。呢度都好多選擇，揀左呢間越南野，睇落好似好一般，不過食落都幾有驚喜。叫左個越式雞絲沙律，個名好似好普通，不過一出黎真係好驚人。份量好大，有大量菜同洋蔥，雞絲都好多，好清新，絕對係健康之選。黎到呢度當然要食越南河粉，叫左個最貴既特式牛湯粉，有分普通size同大size，賣到$98同$128。點解咁貴，因為有六樣餸，生牛肉、牛坑腩、牛筋片、牛腩邊、手打牛丸同牛柏葉，真係好好好牛。除左個湯底有好清甜既牛味外，牛既配料都好用心，牛肉岩岩好熟而仍然軟稔、牛腩好有牛味、牛筋切到一片片容易入口、牛丸好彈牙，所以呢個絕對值回票價，而且兩個人食都唔算少。另外個蝦餅都要讚，熱辣辣脆卜卜，蝦滑彈牙同埋真係有隻蝦係入面，很不錯。我仲好中意個豬頸肉，肥膏既部份都幾多，好甘香，配碗白飯就一流。最後個米紙卷就正常啦，都ok既，不過實在太飽了。總括黎講，呢度性價比都幾高，而且food court黎講都算十分好坐，得閒可以返黎encore。…Read More

其實係見到ig既相覺得環境唔錯特登揸車過黎食既，好就好在泊車既地方都好大，同埋四週被樹木包圍，真係幾森林架；不過我地揀左坐戶外，都有蚊，店員貼心地係食到一半既時候黎點蚊香，後段就好d啦。講下食物，其實選擇係極少，主食真係得burger同沙律，意粉同飯都無既，小食有雞翼或者魚手指個d；野飲還好，咖啡都有幾種，味道就還可以啦，說不上係專業水準。不過個環境都令我想再返黎既，帶本書坐一個下晝都可以，而且靜靜地，傾下偈亦得。…Read More

呢間野最近都好多人講，見沙田開左就走黎朝聖下，期望都高架，點知入到去就發現感覺落空了。- 阿嬤魯肉飯其實味道真係唔差既，配料都多種類，而且個半隻溏心蛋都唔錯，可惜個肉都係鹹左少少，同埋份量唔大，亦唔算好台味。- 三星麵呢個算唔錯呀，有牛腩、牛筋同牛肚，餸既份量算多既，牛肉湯味道香濃，不過同台灣地道既牛肉麵相比始終爭少少。- 魯肉乾麵呢個係拌麵，其實只係個飯轉左做麵，麵質算彈牙，不過亦偏鹹。- KTV香腸/盪青菜/鹽酥雞小食類全部都係太鹹，同埋係唔係都加炸蒜或碎蒜，口味都幾重，而且我真係覺得overpriced，有咩理由呢碟香腸要賣$45，痴返埋都係得兩條台灣腸。- 肉鬆配皮蛋豆腐一般般啦，呢個味道好難會有差錯，賣$52。總括一句，味道鹹、不夠台味、價錢偏貴而份量不多，準備好返屋企飲多幾杯水啦。…Read More

難得黎開銅鑼灣，真係想試一試大熱既老虎堂，閒日夜晚九點零去到，人唔算多，十零個啦，店員落單都算快，等野飲都唔耐啦。不過好彩行快一步，就黎到十點既時候，有個店員企係龍尾話截單啦，手快有手慢無。叫左呢度既招牌虎虎生威厚鮮奶，係好好飲，其實係鮮奶加黑糖再加大細兩種珍珠。鮮奶夠香，黑糖唔會死甜，甜度剛好，大珍珠就平時既倍半咁上下，好彈好q，細既就平時一半度，唔係好咬到就吞左了。其實出名真係唔係無原因，真係好好飲，排都抵。…Read More

天文臺道8號一整棟大廈內有不少新開的食肆，花木便是其中之一。地方環境舒適，檯與檯之間的空間甚為寬闊，空間感十足。如果人數多的話應可安坐一個開放式的小廂房。店員服務態度殷勤，主動為客人推介餸菜添加茶以及刺身醬油。而我當日去食既前菜有：醬油小魚、炸小蟹、紅酒蕎頭，蕎頭味道酸酸甜甜，正好來開胃。以下特意推介部分一試難忘既菜式：大蝦無花果拌生菜沙律已去殼的鮮蝦經煎香後加少許黑椒和鹽，味道鮮味香口！再配雙色蕃茄、紅蘿蔔、生菜伴麻醬，口感清新。偶爾咬到幾片的無花果乾，咬落煙煙韌韌，味道清甜。整個沙律為味蕾帶來豐富的感受。梅刺身四點當中包括有種刺身，分別有：中吞、深海池魚、牡丹蝦、赤貝。池魚的肉質比中吞稍為結實，有魚脂甘香，即使平常不太愛好魚肉的我，亦推薦大家一試！牡丹蝦刺身，口感厚實，鮮甜味慢慢在舌頭中化開。舞茸茶壺湯茶壺湯的確是指用茶壺呈上來的湯，湯料充足，有一隻如假包換的鮑魚在內，再配舞茸和其他雜菜，湯汁味道清甜，後隨一陣菇菌香氣。沖繩豚肉炒苦瓜沖繩苦瓜沒有苦澀味，不愛吃苦的朋友也可放心大口大口吃，餸菜看似家常便飯，但確實好吃。苦瓜和豚肉經香滑的蛋漿包裹著，瓜肉伴隨蛋香送進口裏，令人停不下口！原來有訂檯會有額外是日甜品贈送：白玉丸子配紅豆蓉+黑糖蕨餅+指令水果，並為今天晚餐畫上完美的句點。By 羅倫斯…Read More

係尖沙咀又想平平地咁食一餐，openrice 一下之後就發現左呢間食「冒菜」既烏繩館。咩野係冒菜？原來冒菜係一種黎自成都嘅小食，製作方法就係：將準備好嘅蔬菜同埋肉類放入辣味嘅湯底入面後淥熟食用，其中口味有麻辣和香辣。呢度就用左冒菜嘅湯底去食車仔麵咁，可以提供選擇嘅配料都有唔少，其中比較特別嘅有鴨血、海帶結、豆皮、鮮淮山、鵪鶉蛋等。鍾意重口味嘅人士就啱晒啦，麻辣湯底充滿芫荽、蒜蓉、芝麻等香料，好有四川風味！而我選擇左嘅主食麵底係土豆粉，土豆粉嘅粗幼好似稻庭烏冬咁，口感十分特別，煙煙韌韌得黎但又唔似紅薯粉咁似橡筋咬唔爛，誠意推薦給大家！唔食辣既可以揀清湯，味道亦很濃郁。食啲咁重口味嘅嘢當然想飲杯野潤一潤。我叫咗杯熱嘅茉莉蜂蜜，佢哋嘅自家飲品一啲都唔Hea，花茶分量都唔少，店員送上嚟嘅時候，茉莉花香芳香撲鼻，飲落去正好舒緩下辛辣所引起嘅喉嚨不適～聽店員講佢哋嘅湯底配料主要都由四川當地運送過嚟，遲下再過嚟試下隻「藤椒」湯底先！By 羅倫斯…Read More

話時話葵廣賣台式野飲既都真係有十間八間，係唔係間間都好飲呢，我就唔知啦，不過呢間算係新開而且有黑糖珍珠賣，又係地下咁方便所以就揀左佢黎試。叫左個髒髒茶，三十二蚊，度度都係咁上下價錢，其實真係發死佢。講返正題，其實呢個係黑糖珍珠加奶，即是無茶既。原本個樣係好似其他好出名既黑糖珍珠咁，有老虎紋係杯身，不過等左陣就已經沉曬底啦。味道既話呢，其實好香奶味，而且黑糖珍珠好好食，夠曬甜我中意，所以杯野半糖已經夠啦。雖然唔特別impressive，不過一試無妨。…Read More

要數香港既美食風景，一定唔少得大排檔，不過夏天熱辣辣，要係戶口食又好似會大汗疊細汗咁。而呢間妹記就岩曬啦，可以係室內嘆住冷氣咁食到大排檔既味道，一流。去得大排檔就梗係叫香口野啦，炸豬手都幾好，好大份，似足德個餐廳個d原隻上，炸得香口而肉質唔乾，點返兩支大啤送酒一流。除左炸豬手，黃金蝦都可以推介。鹹蛋黃炒到好綿，唔會一粒粒散開，均勻咁包住每隻蝦，好香口。不過煎蠔餅就麻麻地了，炸粉厚，不過蠔都有唔少既。另外要推介既仲有安格斯牛柳粒，牛肉嫩，薯仔入味，又係送酒之選。仲有叫左其他野食，都唔錯既，大家自己望下。…Read More

咁大個仔都未喺呢度食過野，聽講係老牌酒樓，咁岩經過奧海城，又想食中菜，就嚟呢度試下啦。我地一行二人叫咗兩個餐，一個係帶子皇魚扒餐，另一個係豚肉叉燒配佛跳牆。呢個set由頭食到尾都只係188，認真超值。亮點有二，個帶子好大粒，係要用刀叉食既，而個汁其實係西汁，類似燒汁啦，都夾既；而個魚並唔係出面茶記食嘅魚柳，食得出係真魚起肉整既，先走走油再淋汁，外脆內軟，算係高質而且大份。荷葉飯都好好食，唔只係有味既飯咁簡單，食下食下都有唔少料，蝦呀雞肉呀，我真係唔明點解呢個係一人份量，淨食個飯都夠飽。仲有個菜同乳鴿。另一個餐係豚肉叉燒飯跟佛跳牆，叉燒原舊無切既，好吸引，半肥瘦，唔會好似快餐店咁咬落去一絲絲會攝牙。跟埋燶邊流心蛋，食落去係感動，蛋汁豉油汁撈飯加埋舊叉燒，絕對可以慰藉到放工寂寞既心情。另外個佛跳牆既賣點係足！料！大家有眼睇唔駛我多講。最後食埋個糖水就好美滿啦。…Read More

朋友上網搵到呢間掌門重慶麻辣火鍋，就約我呢隻辣腳去試食。老實講，我本身預佢係連鎖火鍋店，海乜撈、小肥乜、小肥物，果d 預計得到既味道，點知佢竟然意外地出色。首先，佢雖然係小店，但衛生清潔一d 都唔馬虎，圖中左上角既係清潔公司放置既誘蟲劑。湯底方面，掌門人推薦我地食呢個重慶翡翠麻辣鍋，好貼心地有麻度同辣度揀，我地揀左中麻小辣。值得欣賞既係佢用左青花椒去炒個麻度出黎，所以個湯底帶d 綠綠地既色。懂川菜既人，就會知道青花椒係既麻又香，唔會一味死辣，估唔到向香港會食到咁有內涵既湯底，真係心心眼之選。第二樣吸引到我既，就係呢個帶骨既魚皮。話話呢個先係傳統既魚皮，同依家一般坊間食到既魚皮好唔同。平時d 魚皮，淥兩三秒就要拎起，否則就會謝曬皮，最多咪當薯片咁食囉。但呢個有骨版魚皮，係要炆一陣先食既，但食落口，除左脆，仲會有平時d 魚皮無既魚味，推！再黎就係芫茜餃，個餃子既調味真係不得了。食落口除左有芫茜味之外，個肉餡仲好Juicy，咬落去要小心燙口。最絕個位係佢落左些少酒去調味，食落去辟曬芫茜唓草青味，仲有酒香氣，連我朋友都讚話，連唔食芫茜既人，都會食到呢款餃子。因為佢食物質素都幾好，所以我地追加左個手切肥牛同豬眼根。兩碟肉都好新鮮，肉質好軟淋又有肉既甜味。掌門既價錢雖然唔算係平，但以佢既食物質素黎講，都好公道。同埋難得有間小店咁有心機做，梗係要開po 支持下啦！！我都唔想過多幾年，食火鍋就得返連鎖店，去邊區都係果d 食肆，仲要係用香港既價錢，食大陸既火鍋>_<By市井大文豪同場加映…Read More

有晚行完金魚街經過呢間文華，就入去醫下肚。聽講佢係老字號翻新裝修再開業，而餐牌好多都係唔同既常餐選擇，即係粉麵炒蛋多士之類，而我想食得邪惡少少，就叫咗個煎蛋豬扒飯。好有驚喜，煎蛋打孖上有兩隻，都係流心既，撈飯一流。而塊豬扒大大塊，不過整得好tender完全唔會攝牙同咬唔開，值得一讚。而個蔥油更係錦上添花，根本佢就係配咩都好食，可以撈曬成個飯。四十零蚊配埋野飲，一個人係旺角食到質素咁上下既晚餐都真係好難得。…Read More

今日去開沙田有事，仲有少少時間可以食個快飯，見店入面都幾多人，就黎左連城上面呢間冬蔭公公一試。呢度係主打湯麵撈檬個d，選擇都唔少，而且侍應反應快、上菜速度高，好岩食個快飯。我地首先叫左個冬蔭公湯薯粉，好似車仔麵咁樣一個一個餸叫，又可以揀辣度同唔同粉麵。呢個冬蔭公湯底好特別，同一般既唔同，好甜同唔會太酸，食落好順口，唔刺激，岩曬我呢d喜歡口味清淡既人；而且配料都好豐富，有大量花生粟米同莞茜，同埋薯粉絕對係地盤佬份量，認真抵食。朋友叫左個撈檬，都係好大份，配料都係多；不過我最欣賞既係佢既蔥油，就好似燒味飯個d咁，完全無諗過出現係呢度，不過又意外地好夾，搞到好飽都仲想食。之後又心思思想叫下小食，先黎個青木瓜沙律，酸酸甜甜好醒胃，而且仔細睇仲有唔少蝦皮係入面，為佢既味道增添左唔少層次同鮮味。牛串燒都唔錯，牛肉大件而且唔會嚡，夾埋個沙爹醬，甜既亦唔會辣，實在太好味，一啖點一下，轉下眼就食曬，係今晚亮點。最後黎既係蝦餅，新鮮熱辣炸起，好香好彈牙，望落蝦都唔少，抵食！認住佢個logo啦…Read More

本身好少黎奧海城，今日咁岩經過就搵下有咩好野食，不過好多餐廳都係其他商場常常出現既，見呢間lemongrass門面幾靚又少見，一於就入去試下。呢間係食泰菜既，門口都擺左好多泰式零食飲品玩具擺設等等，嘗試製造泰式風情。首先叫左個沙律，青木瓜酸酸辣辣好惹味，個汁仲落左蝦皮，令味道更豐富層次更多；鳳爪都唔少，撈埋落青木瓜個汁就變得好好食，鬆軟爽口。之後有諗過點冬蔭公，不過見到呢個冬蔭煮花螺，就即刻叫左了。其實佢唔算好冬蔭，反而似泰式酸辣醬，個底係濃稠既，酸酸甜甜既，幾好味。值得一提既係佢既花螺真係太多，食到手軟！黎食泰菜點可以唔食咖哩，叫左呢個瑪沙曼咖哩加鬆餅。咖哩唔辣，甜甜的，配菜有洋蔥蕃茄等，牛腩都唔少，切得細件食落好方便。當然配埋鬆餅啦，佢真心鬆同酥，熱辣辣上枱好好味，一啖接一啖根本停唔到口，仲encore 左一碟，為全晚高潮。另外推介呢度既蟹，半價呀！睇落都好好食，亦得店員熱烈推介，不過同行友人唔食蟹，今次就無叫囉。…Read More

雖然上次經驗好差，不過今日行過都想再俾次機會佢。不過，再一次，我好唔明白，點解呢杯野可以咁難飲。愛情動作草莓牛奶，佢係under［鮮蔬現打季節果昔］系列，諗住係奶昔咁啦，點知係沙冰黎既。唔緊要啦，沙冰都ok，不過重點係唔夠三兩分鐘，佢溶到好似水咁，變左好稀既士多啤梨水，好難飲，完全無真士多啤梨味，甜味為主，認真怕怕，飲到唔夠一半就放棄左。$32，我係附近個幾間茶飲店都可以買到杯好好飲既，大家買之前三思。…Read More