Dora.eats.food's Profile

聽聞呢間法國餐廳好出色，想食好耐。其實佢唔算難book，基本上星期五比較難book之外Weekday其他日子都OK！我星期二book咗八點但係七點三就已經到咗，諗住搏一搏有冇人取消我可以早啲到，點知佢真係full house,我哋揀咗坐最埋邊嘅吧枱，其實除咗最埋便嘅吧枱之外其他吧枱位都坐得唔係幾舒服。Menu大部份都係法文有啲英文解釋，其實我睇完都唔知道係咩嚟，所以我索性開佢哋個Instagram然後指住啲菜嚟嗌。叫咗個牛骨髓，兩個人食嚟講已經好大份，因為真係好肥膩、好油、我夾埋啲麵包食已經食到好飽。跟住嚟咗個焗螺肉，啲汁好好味，個螺肉焗得有少少濃所以都好香，啲汁送埋麵包又係一流。以為淨係嗌咗兩個前菜，一個主菜會唔夠飽，點知個主菜係個煎鵝肝加牛肉又係好膩一碟菜。佢嘅伴菜有焗香咗嘅栗子好好味，好有驚喜嘅伴菜，應該話佢係啲細節位都有擺心機。個薯條冇乜特別純粹係鍾意食薯條呢個係熱情果cream brûlée, 佢係偏酸特別又滑身。可以平衡返之前幾碟餸嘅油膩感， $88來講我覺得價錢非常合理。我一食完第一次就已經book定七月尾再食多次，因為有太多野想試但係太飽唔可以一次過試唔到咁多。…Read More

聽聞weekend好難食到喂，又或者要排三個鐘先有得食。所以我今日weekday 中午12點鐘佢開舖我就到咗，仲坐到Tatami打卡位。嗌咗佢個signature Mont Blanc Chestnut, 面頭係栗子蓉裏面係雪糕，侍應姐姐提我地唔好打卡咁耐如果唔係啲雪糕會溶晒。跟住再嗌咗兩杯飲品，一杯係黃豆黑糖豆乳，另一杯係朱古力。我個杯黃豆黑糖豆乳上面粒mochi 好味嘅，豆乳都OK。但係杯朱古力真係好普通，真係好似沖粉嘅朱古力油上面再擺番啲朱古力粉喺d泡上面。最後等咗15分鐘先來嘅綠茶Tiramisu, 唔知係唔係中午食唔慣咁多咁甜嘅嘢我覺得麻麻地，幾滑但係綠茶味唔算濃。整體來講嘢食同飲品都屬於中上質素，但係如果要排隊多個半個鐘就不了。排三個鐘更加係冇可能嘅事，建議大家今年我得去旅行用啲年假平日泥試吓，唔使排隊嘅話就值得嚟。…Read More

用OpenRice訂位已經見到有個Summer So Journ Menu, 話星期一至四先有得$448一位，比起佢哋兩個Tasting Menu $580 同埋$980好似抵啲。基本上都試到好多嘢，同埋飽到食唔晒。個Starters係for sharing嘅, 我覺得佢個hummus好好食,配炸紫菜食但係啲紫菜好明顯係炸咗一段時間再翻炸所以偏硬，但係因為hummus太好食個紫菜我都食晒。個waitress介紹食spicy tuna tartare, 我唔係好食到辣嘅吞拿魚味因為俾佢既炸紫蘇葉搶晒風頭，不錯不錯。另外新鮮油甘魚配個汁太濃，搶晒Focus，唔知係咪由金魚唔新鮮要用啲汁冚嗰陣味呢？個芝麻醬菠菜正常，唔算好特別。最普通就係嗰個炸雞，唔凍唔熱唔脆，但係個汁甜甜哋都好易入口。我哋加錢每人$24要生蠔，正常味道。我本身鍾意食生蠔，所以要求比較高。跟住係天婦羅西蘭花配松露豉油，真心佢啲天婦羅做得好好。一碟咁普通感覺好似呃錢嘅菜但係我都食得好開心，同個松露豉油好夾。嚟到壽司，感覺上跟餐叫嘅壽司好普通，好似想質飽你咁。有可能琴日食完間靚嘅壽司特別覺得呢間啲壽司麻麻哋。Li個係teriyaki salmon, 一舊特登加teriyaki sauce 嘅西式煎三文魚, 佢煎得舊三文魚剛剛好唔算太熟好滑身。我反而覺得個sauce減咗佢少少分。最後嚟到甜品，個綠茶流心蛋糕好好味，好熱辣辣咁拎出嚟。不過另外嗰個柚子curd我完全成唔到有滋味，淨係有啲蛋白碎加雪糕。整體來講環境唔錯，只要唔好坐喺中間張大枱（間左三四個兩人位，感覺太開陽），坐卡位或者bar枱都OK。侍應生非常有禮貌好友耐心咁解釋Menu，不過價錢有少少overpriced for the quality (quantity is fine)。…Read More

其實好間中都有喺龍津買過魚蛋食，今次唔再買魚蛋諗住食啲鹹鹹地嘅椒鹽魷魚，真係好失望呀！落完單，阿姐幫我再炸嗰啲魷魚，熱辣辣加埋鹽加胡椒其實係冇可能唔好食。點知一咬落去，成口都係粉，再咬返條魷魚出嚟係¼嘅size。阿媽話咁平係咁啦，其實都$25 㗎，貴過其他嘢食。其實之前試過佢尖沙嘴分店既炸燒賣都好難食，是但將啲蒸熟咗嘅燒賣揼咗佢個油喎度炸，我諗大家食返咖喱魚蛋算。元朗燒賣皇后啲煎炸野好食好多，但係分店比較少起碼觀塘冇啦。…Read More

以為門面咁粉紅色，會係一間打卡為主only既餐廳，點知野食好睇又好食。主要係台式fusion 西式，意粉煎炸都有。我個男仔friend話自己一個男仔一定唔敢行入Li間餐廳（因為太粉紅色），但係入到泥食d台式蛋餅食得好開心。Li一杯係桂花奶蓋懸浮棉花糖，凍既係有奶蓋，熱既會係奶泡，大熱天時當然飲凍。奶蓋好厚（好肥但係好正）,桂花味都好濃。我朋友叫左Li杯蜜桃烏龍茶，我地覺得佢偏甜，但係用泥配之後個鹽酥雞煎餅（好濃味，熱辣辣）就balance番。我仲叫左個紫薯麻薯煎餅，但太肚餓唔記得影相。我覺得佢d野食好食喺佢一煮完熱辣辣拎出泥大家可以試試！我係weekday下午4點去食，間餐廳都接近爆滿，你可以先打電話泥叫佢留位。…Read More

睇雜誌見到有得食沙嗲牛肉西多士，先知道海防道熟食檔裝修之後已經重開。嗰日30幾度嚟到冇冷氣嘅熟食檔，風扇好大所以都唔算太熱。老闆娘好好招呼，同我哋講個沙嗲牛肉脆脆麵喺中午12點鐘之前已經賣咗18份，有三個人朝頭早八點鐘就食。我哋再嗌左一份沙嗲牛肉西多士，老闆娘話餐牌上面未有因為佢太忙未得閒整餐牌。佢又話因為好多人食所以隔離d檔口都跟佢整一模一樣嘅西多士。我都嗌咗個胸油雞扒撈公仔麵，我覺得呢一個比較普通，佢冇蘭芳園整得啲公仔麵咁濕潤同有姜蓉味，太乾嘅話比較難吞。最後埋單$150兩個人做午餐但係食唔晒，非常滿足。…Read More

K11 Musea不嬲都係我好鍾意嘅商場，啲餐廳大部份都係非集團式。今次嚟到呢一間位於商業大廈Lobby咖啡室，環境非常好，樓底好高、裝修精緻、環境寧靜。講嘢都要好細聲，唔好打擾到隔離啲人。一間硬件咁好嘅咖啡室，點解啲咖啡咁難飲？點解啲Tiramisu 咁難食？點解佢剩係得一次性餐具咁唔環保？呢一間咖啡室真係得個樣我哋叫咗一杯coffee tonic, 一個tiramisu 同埋一杯Okinawa Black Sugar Almond Latte。coffee tonic 正常（加左tonic water之後其實差唔多每間coffee shop都係差唔多味），tiramisu 個蛋糕底唔夠濕好似普通戚風蛋糕。杯Okinawa Almond Latte 可以用難飲泥形容，本身都有成日飲杏仁奶，但係呢一杯Latte好似落咗好多水咁非常淡口，同Coffee Academics 杯Okinawa Black Sugar Latte 差天共地，就算人哋用普通牛奶同杏仁奶嘅味唔會相差咁遠，係應該落得太多水嘥咗杯飲品。 總括來講食物咖啡質素唔得嘅話硬件有幾好都冇用，出面太多好嘅選擇，可能佢主要做喺呢度返工嘅人嘅生意，不過佢難飲嘅程度我諗啲人情願飲Starbucks😅…Read More

因為疫情Work from Home好耐冇見過我嘅好同事，今日大家一齊放下晝假想搵間靜靜地又舒舒服服嘅餐廳傾吓計。記得Lee Garden Two有間有天台嘅餐廳，就去OpenRice搵，跟住就搵到呢間餐廳。喺OpenRice book咗2:45pm, 跟住朝頭早有人打咗兩三次電話俾我原來係想同我講餐廳3:00先有位。點知我同我個friend早到咗，我就打俾個餐廳可唔可以早啲去，佢話冇問題啲人早走咗。我諗一路以嚟都係同一個服務員打俾我同埋接我電話，佢好好態度要值得讚下。去到之後佢有好大嘅地方都係outdoor嘅位，其實望落去好舒服，但係因為太陽太曬我哋冇可能坐到出面。我哋坐入面望出去好多綠色，感覺非常之舒服。其實我哋側邊得兩台人喺度食緊午餐，得我哋兩個入嚟食下午茶，所以嗰啲食午餐嘅人走咗之後成間餐廳得返我哋兩個。可能今日係平日冇乜人嗌下午茶我哋等咗好耐啲嘢食先至嚟，不過我哋傾住計都OK。跟住個下午茶嚟到啦，望落去冇乜特別但係佢啲hot dish係新鮮滾熱辣咁樣焗好整好，我好鍾意食個蛋撻又滑又熱辣辣，我個朋友鍾意食個漢堡包仔，佢話好Juicy。我覺得個煙三文魚撻都好食，食得出個煙三文魚唔係好cheap喺超級市場度買嗰啲。另外甜品我就覺得比較普通，塊曲奇餅食唔到落口，個香蕉蛋糕就好好食好moist、個scone就中規中矩啦。比多個close up你睇個afternoon tea。其實佢個環境好食物質素又好，我唔明白點解冇乜人去。我樓下開咗兩間coffee shop，可能啲人鍾意下午茶去飲杯咖啡食件蛋糕。如果唔係呢間餐廳靜靜哋傾吓計坐兩三個鐘頭都好抵坐。不錯不錯…Read More

朋友提議去工廈食受喜燒，見到晚餐Menu要三百幾蚊一位，係觀塘工廈來講我覺得價錢唔平。去到之後環境同工廈非常有反差感，睇得出老闆希望用平嘅租金但係俾返中環嘅食飯感覺俾你。門口望入去已經好有日式風味。裏面總共得四張枱，非常闊落。貴精唔貴多！主menu得4款揀，有其他小食但係我哋冇叫。個前菜居然有海膽、帶子、蟹膏同和牛。一見到已經好開心，真心冇諗過觀塘工廈有啲咁嘅餐廳。我哋叫做一個A(美國牛$308/set) & 一個B (澳洲M9和牛$358/set), 雖然澳洲和牛貴啲但係我同我個朋友都認為美國普通牛好食啲，可能佢肥少少味重啲。有個哥哥仔幫我哋燒牛同埋蔬菜，佢好有禮貌。我嗌咗呢杯柚子汽水，飲落去好似杯甜甜哋嘅水咁。可能要落少啲冰會好啲跟住食完肉同蔬菜個哥哥再幫我哋炒個飯，佢拎呢盆野嚟嘅時候仲會好細心咁問我哋有冇對海鮮敏感。個炒飯影相影得唔靚，但係好快就食完因為好好味。最後豆腐雪糕好重豆腐味，感覺上係自家製嘅雪糕。整體嚟講我真係會再嚟食，正價比非常高嘅一餐。之前食過海港城間日山壽喜燒，係佢嘅三倍價錢，冇錯環境係爭好遠但係食物質素都係差唔多，起碼我食完覺得好飽。…Read More

見到佢係咁賣廣告話任食和牛，我即管試試。喺社交平台有條link book位，唔算難book。一入到去裝修好cyber, 好大間，不過個抽風做得唔算好因為好大陣味。佢總共有A到F嘅任食二小時餐牌，我今次揀咗最平嘅A（平日$298，weekend $348)嚟食再加左$48要佢啲沙律甜品同埋飲品。其實嗰$48都一定要比㗎啦，因為佢個餐牌上面冇得比你單點非酒精類飲品，佢啲甜品果汁同埋沙律都非常之唔吸引，不過佢啲雪條係非常之出色。嗰$48當食雪條，同埋飲coke zero我覺得接受到嘅。跟住一泥就打卡位既肉船，出晒煙咁都幾開心。我哋試咗和牛刺身同埋壽司，可以一試。見到隔離枱有好得意嘅鳥巢生雞蛋，發現最少係B餐先有，我覺得大家可以最少試B餐。泥完第一輪嘅食物之後，激氣嘅時間就嚟喇。我哋落咗單嗌咗幾樣可以燒既牛肉，佢嚟咗一樣之後就冇再嚟過。我嗌左一碟生菜諗住包住啲燒牛肉嚟食，跟住個枱面有25分鐘都係無牛肉燒。我好肚餓所以開始燒啲蔬菜，其實真係好嬲，你任食兩個鐘有差唔多四分一時間係冇得燒牛肉，如果淨係燒蔬菜我使乜比呢個價錢。佢最正嘅係同我講話last order, 我之前嗌嗰啲肉一路都冇泥但係你同我講last order (嗰陣係9:10pm, 10pm關鋪）？！我地好嬲所以行咗去廚房睇吓有冇人切緊牛肉，見到廚房啲人企晒喺度等放工（因為已經last order咗）最後我摧左3次之後佢9:20pm泥左幾舊牛！其實呢個價錢可以去食牛角，多款式又上得快仲有app落單快靚正，呢度落單要搵侍應慢慢落。忙嘅時候得鬼閒同你落單？講真試完一次真係唔使再泥，如果你繼續孤孤寒寒咁俾人任食，你泥一間一定做得唔耐。或者佢d租真係好平冇所謂，喺佐敦d舊樓，架lift好舊好舊。如果你問我食牛角buffet定呢間？我一定同你講食牛角，食靚和牛俾$9xx一位唔使食你泥一間服務配合唔到又孤寒既餐廳。其實不如你position 自己喺一間普通日式放題（$2XX嗰隻），因為你真係唔值over $300 Li 一個價錢。我希望你會有進步，如果唔係就祝你好運喇。…Read More

以為佢係一間普通嘅Cafe，點知佢係一間好好味嘅越南菜。其實佢Menu上面得好少嘢食，但係我會話佢貴精唔貴多。我公眾假期大概下午1:00嚟到等咗5分鐘就有枱，我坐到最入所以想好迫夾。我食完就見到門口有條龍排隊，所以我估平時係要排下隊先有得食嘅Cafe。呢個火車頭牛肉粉要$98 ，初頭覺得偏貴，但係後尾見到佢好足料，四粒大牛丸、生牛肉、牛展、最好味係佢主導好林好入味嘅白蘿蔔。呢間餐廳好有心，我哋坐吧枱所以見到佢會用熱水一路熱主個碗，所以碗麵拎到上枱仲可以用餘溫去煮熟啲生牛肉。呢一個係一個加分嘅細心位。跟住你會見到差唔多每張枱都有人食緊呢個留心蝦多士，其實焗芝士係冇可能唔好味。佢個份量好大但係因為真係好好味所以我全部食晒。不過側邊啲蝦片好硬，我覺得呢個佢哋要改善。因為我見到旁邊啲人都普遍食剩啲蝦片，佢可以再做好啲買啲現成脆身啲嘅蝦片或者直情自己炸。Cold Brew Lemonade & Morning Viet我會話兩杯飲品都幾有特色，起碼同出面嘅coffee shop唔同。記住攪勻左杯飲品先飲呀，我哋兩個差唔多飲晒先記得搞個底所以下面個底就偏甜。我自己鍾意morning viet多啲佢落咗啲Cinnamon powder 同埋Cinnamon Stick, 唔算好濃味但係吊少少味。個老闆娘唔想態度好好，可能太忙啦。你見到佢成間餐廳個廚房加清潔都係女性，可能佢都係想呢間餐廳比啲女仔嚟打卡，Feminine d。雖然價錢唔平，但係值得再嚟！…Read More

不嬲都有聽過Holt’s Cafe 係Rosewood酒店嘅茶餐廳，見到dining city restaurant week有Offer， $398一位就嚟試吓。好彩冇平時特登就嚟食，如果唔係更加失望。其實環境唔錯，冇乜海景睇但係樓底都算高己有空間感。首先泥個Burrata芝士，其實係一間酒店嘅西餐食Burrata我要求真係會好高。一切落去成嚿芝士都係好硬，但得來味道唔係好夠。好在啲蕃茄尚算鮮甜。呢個三文魚就好味嘅，雖然薄身但係加埋檸檬汁都好開胃。呢個係一個中湯，酸辣湯，佢話係海鮮啦但係我就係食到類似鯪魚球或者魚蛋質地嘅魚塊，如果你當係八方雲集嘅酸辣湯冇咗啲豬紅咁嘅味呀。其實算唔錯嘅西湯有蘑菇湯，我會話蘑菇味唔算濃亦都唔算傑。我覺得個中湯比較出色！跟住到個signature嘅龍蝦意粉，我落單嘅時候個侍應話會辣辣地，但係我就唔覺得佢辣。如果你本身鍾意飲龍蝦湯，佢呢個意粉都非常重龍蝦湯味。都有好大份量嘅龍蝦肉，可以一試。不過個pasta偏硬少少，不過可能係我自己食唔慣。到咗呢個要加$30食嘅牛扒，叫左medium。佢係一塊好令人失望嘅牛扒，一切落去發牛扒好多水，唔係肉汁嗰啲水而係似defrost得未夠既溶雪水。因為一咬落去成口都係水，其實食唔到塊牛扒嘅味。薯條係麥當勞嘅薯條，其實個感覺好似自己煮更加好味。最後係Butterfly Room嘅甜品，朱古力合桃批係好味嘅，另外一個係藍莓撻就普普通通啦。你可能話係因為restaurant week 將貨就價所以啲嘢食普通，但係我覺得作為一間備受吹捧嘅酒店冇理由serve呢啲咁嘅質素嘅嘢食比客人。我食完今次根本冇可能返轉後俾正價食多一次。…Read More

因為之前晚市取消所以呢餐飯postpone咗一個月又一個月前後三個月先食到。其實有啲失望，餐飯真係好普通。我會話中環間Chaiwala (ard $4xx per head) 或者重慶大廈啲印度賽會更加好味。一開始為一碟脆脆餅，都幾辣㗎 ！我本身鍾意食辣所以感覺都好開胃！其實我本身唔食羊，但係呢一個indian samosa係signature dish, 我夾硬食咗。其實佢讓味同腥味都唔重，我覺得唔食羊嘅人都可以試吓。跟住呢一個Beef 煮得好林，入口即溶。我覺得係成晚最好味嘅一道餸。牛油嘅naan bread, 其實普通一家印度餐廳都超好味嘅。真係唔係好特別......其實我都唔明白點解咁難book間餐廳，可能因為大家都好鍾意Rosewood呢間酒店。如果你真係想食好味嘅印度菜就唔好嚟呢度喇，呢度食吓個環境囉！我嗌左杯Cocktail都幾難飲，不過我其他朋友就話佢個杯好飲。…Read More

喺Ando未成為米芝蓮一星嘅時候已經一枱難求，weekday晚餐都要一個半月前開始book。我相信而家變咗一星應該更加難book。Book枱嗰陣已經睇咗Menu，俾咗$1000 deposit。記得以前有兩款Menu，一款$1288一款$1688。可能而家做咗米芝蓮一粒星得返貴menu ($1688)。我一坐低就去咗洗手間，佢除左有Le Labo嘅洗手液潤手霜仲好貼心咁有消毒藥水俾你噴手。佢冇將個Menu擺喺枱面但係有咁多道菜嘅明信片，等你一路食一路搵返邊張明信片代表佢道菜。記住要留意個waitor同你解釋道菜,佢哋會幫到你明信片㗎,因為都唔係咁易估。我唔多講個明信片等你到時自己慢慢估啦！我唔記得影相，但係個哥哥介紹左隻幾特別嘅酒俾我哋，佢係一隻西班牙orange wine 有啲陳皮味嘅，佢話都係用提子釀酒不過釀出嚟係橙色嘅。幾特別，不過我唔係好慣浸陳皮味。不過平時冇乜機會飲到呢隻味，可以試吓㗎！第一味係個beef tartare, 佢有啲脆脆喺度好香口不過稍稍油少，上面有啲魚子醬其實整體都好清新嘅。第二味係個士多啤梨加Cherry tomatoes，又酸又甜好夾。Li 一味一定係開胃菜！跟住就到佢嘅signature dish, 個個黎親呢度都一定會影呢一碟菜。佢有五種魚（有其中一樣係西班牙大蝦唔係魚）啦，每一種魚嘅味都唔一樣有唔同嘅食法。我最鍾意食佢個油甘魚，我食埋我男朋友嗰嚿！跟住到佢個麵包tray,好適合啲好似我好鍾意食麵包嘅人。佢有三種唔同嘅牛油配返三種唔同嘅麵包，有啲牛油係creamy d有一隻就smoky d。最好味當然係佢個隻千年橄欖油樹整出嚟嘅橄欖油，第一次食橄欖油係會覺得佢苦苦地個味好濃郁，超級好味！跟住到呢個魚，橙色黑色係整到好似隻魚眼咁樣，橙色係sun-dried tomato, 黑色係olive paste。個汁好好味，我食晒啲魚之後用麵包點埋啲汁。呢個時候侍應哥哥又介紹咗我哋飲一隻紅酒開返之後嘅阿根廷牛。跟住到佢個和牛，佢上面配左種好特別嘅蔬菜我唔記得咗個名，再加埋一樣放喺天山雪蓮側邊既辣椒。佢喺上面加咗黑松露，望落去好矜貴。和牛始終有啲油油地，我食到都好滯。跟住到成餐飯嘅高潮，呢個湯飯話係個大廚嫲嫲傳落嚟嘅Menu，用蜆煮高湯加咗啲西班牙腸chorizo同埋有啲墨魚咀。一碗完全唔夠喉呢個甜品裏面有濃嘅咖啡汁漏出嚟，令到個甜品唔會好甜。咖啡苦苦哋令到本身好飽嘅我哋都唔會有滯嘅感覺。最後有啲小糕點埋你，其實我已經飽到食唔到咩味喇！我記得粉紅色嗰舊係用櫻花煮嘅糯米飯，好好味。其他我已經唔係好記得啲味！整體來講個大廚plan Menu嘅時候係好用心, 佢好小心將西班牙同日本嘅味道加埋一齊。所有Staff都好有心，佢遲啲轉Menu我會再嚟！…Read More

之前經過幾次都覺得佢啲養生湯麵好吸引，有花膠又桃膠，今日終於的起心肝去食。我個朋友好鍾意啲辣椒油，佢話佢啲辣椒碎係水煮魚嗰啲辣椒唔係普通茶餐廳嗰啲辣椒油。我自己唔識分你哋可以試吓！先來個胡椒豬肚雞麵（我哋轉咗做薯粉），個雞好滑感覺上佢係用新鮮雞，我覺得胡椒味唔算好重。個湯唔濃，我本身唔鍾意豬肚但係都接受到嗰陣味喺個湯度。跟住嚟個油醋海蜇花，好好味吖！同平時出面啲海蜇頭唔同，呢一隻更加有咬口。$58非常足料！跟住嚟咗個桃膠椰子雞麵，我都係轉咗做薯粉。佢個湯椰子味好濃，比之前嗰個豬肚湯湯底濃味好多。桃膠本身冇乜味，但係食落好似好美顔咁。我加咗少少辣椒油吊味，我最後成碗湯飲晒。本身我驚碗麵啲湯好多味精所以我哋每人用半價加咗罐可樂（半價之後$6咋），點知我feel唔到啲味精啲湯好清新。最後飲唔晒罐汽水我同我個朋友一致認為呢間小店非常出色，佢哋出色程度我哋以為佢係有集團式經營。我哋問收銀姐姐佢話之前有一間食小菜嘅不過冇咗啦，我好希望佢哋會有機會再開分店跟住我唔使山長水遠嚟到紅磡先有得食…Read More