CrystalTsui8515's Profile

店舖細細，但有家的感覺，店員成日溫馨提示我哋唔好比個蒸鍋燙到手。叫咗個$308一個人嘅蒸海鮮套餐（假期前夕要加多$20），一盤有龍蝦、大頭蝦、鮑魚、帶子、蟶子、青口、扇貝、生蠔（全部各一），花蟹就二人一隻，海鮮盤只限叫一次。龍蝦彈牙鮮味，不過蟶子就麻麻地，其他海鮮都可以，火鍋配料就任食，亦無限時，牛肉種類都多，有M5和牛，還可以啦。其餘就魚、丸類、蝦、蠔、大頭蝦可以任叫。如果呢個價錢嚟講，相當親民，唔算好好食，不過不失啦！勝在抵食！…Read More

好耐冇去大阪食壽喜燒，唯有喺香港食啦！壽喜·關西位於尖沙咀，雖然舖仔細細，不過都坐得幾舒服，店員仲教埋我哋點樣煮靚靚嘅和牛，以免過熟。壽喜燒套餐有三個選擇，我哋全部都要晒大盛，每個餐跟一隻蘭王旦。精品赤身、特選肩胛、極上肉眼，全部都係十勝A4和牛，只係部位唔同，每個肉嘅部位各有千秋：赤身就啱唔愛油膩嘅人，但肉味都唔錯；肩胛就肉味濃啲；肉眼油花多，所以肉質軟滑，肉又甘香。由於肉眼太好味，我地都追加多三塊先夠喉，大滿足呀！…Read More

無論食物質素、環境、服務都極好，Marina Grill@AMC朋友一致點咗Signature Menu Set，有5道菜，非常之飽1. Smoked Salmon brioche 煙三文魚下層忌廉幼滑，麵包鬆軟2. Blue Swimmer Crab Cake 我最喜歡菜式，超多蟹肉，啖啖肉又鮮甜，配上法式Tarragon cream，好好味！3. Lobster Bisque 濃得來好creamy嘅龍蝦湯，湯內有少量龍蝦肉，彈牙爽口，不過飲曬成碗都幾漏4. Steak au Poivre served with French Fries and House Salad 牛係Black Angus Tenderloin, 肉質軟腍，配上干邑黑椒汁5. Valrhona Chocolate Foundant 好濃味嘅朱古力心太軟，飽到食剩一半…Read More

餐廳提供兩款套餐，最後我揀咗平啲嘅每個人$598和牛而立二人餐。1. 日本頂級A5和牛刺身，我本人對於牛肉刺身比較抗拒，但因為油花同紋理實在太靚，衝破心理關口試咗一塊，亦有油香，點埋watabi一點都不油膩，肉質好軟熟。2. 招牌極生牛肉佐帕瑪森芝士，多士上鋪滿生牛肉，配上pamersan cheese, 鮮肉味中帶點鹹香，好夾。3. 日本頂級A5和牛月見金磚，厚厚的肉身，蛋汁混和油脂，超級大滿足！4. 日本頂級A5和牛牛小排，一樣咁好味，但口感當然不夠和牛月見金磚咁正啦！但肉質味道不遑多讓！5. 美國厚切牛舌（另加$100），味道是濃郁的，如果可以再厚切會更滿足！6. 松阪豚都好好食，肉味好甜，唔會有朕雪藏味。7. 日本山藥（准山）、櫛瓜（翠玉瓜），從來對准山冇特別感覺，但呢個堅好食，爽脆清甜，帶有少少滑潺潺，正！8. 美國醬漬封門柳，可能之前幾道牛肉太好食，加上我對封門柳一般，呢個就普通咗啲9. 菲力牛排佐香蒜奶油，西式醬汁，蒜味不會太重又有奶油香，同件扒幾夾。10. 日本刺身帶子，由於係刺身，輕燒就可以食得出鮮味！11. 法式奶油生蠔，奶油甜味配上蠔嘅鮮味，好味！12. 真理丼（另加$140），內有三款矜貴食材，日本海膽、黑松露、黑魚子，同埋和牛粒同蛋黃撈埋一齊食，正到冇人有。不過我又係唔太鍾意食生肉，我就將啲牛肉粒燒咗先拌飯，啲牛脂滲入飯內，又香又正，不過就係漏咗啲。冰芒果沙冰真材真料，用咗大量芒果做一杯，不過個餐唔包㗎！如果唔計升級，$598/位呢個價位絕對可以接受，食物高質，服務優質，我同朋友成晚都食得開心又滿足呢！…Read More

一踏入餐廳，樓底極高，好有空間感。12人試了10道菜如下：文苑飯莊三前菜（龍眼蜜餞金蠔·蜜汁叉燒皇·蘋果蜜餞雞肝撻），金蠔煎完，口感依然軟熟又鮮味，加上龍眼蜜餞，甜甜哋，好食。蜜汁叉燒皇肉質柔軟，豬肉肥瘦適中，推介。至於蘋果蜜餞雞肝撻，因個人不太愛雞肝，所以就不作出評論。堂剪迷你乳豬燒得非常香脆，乳豬帶有少少肥膏，混和脆卜卜嘅外皮同嫩滑乳豬肉，一流！羊肚菌竹笙杞子響螺燉雞好香嘅一個燉湯，不過略為鹹咗啲桂花片皮鴨外皮燒得好好食，肉質不鞋不乾，恰到好處。配以薄薄的磨磨皮，除咗一般都會有嘅烤鴨醬料，仲有我喜愛的桂花醬，大愛！崧子仁金蠔鴨肉生菜包好特別嘅鴨肉生菜包，崧子仁香脆，仲有金蠔粒，好矜貴。陳皮欖角脆鱔球我好鍾意食鱔，呢度嘅鱔球好厚肉，好有口感，再配以陳皮欖角，好夾，如果炸粉槳可以薄番啲會更好。豉油王煎蝦碌豉油醬汁調教得好惹味，蝦碌爽口彈牙！杏汁鮮腐竹浸菜心好杏汁有好濃嘅杏汁味，似係無糖杏仁露，不過我還是喜歡清炒/上湯浸。桂花艇王炒新竹米粉炒得夠乾身，唔錯！陳皮紅豆沙，懷舊芝麻卷 ，馬豆糕紅豆沙嘅紅豆好足料，煲到起曬沙！好難得食到懷舊芝麻卷同馬豆糕，好耐冇食過，亦都整得好水準，完美嘅一餐。…Read More

突然燒肉癮發作，第一次試咗燒肉801，味道都唔錯呀！叫咗個二人套餐志盛$498，加$38一碗叫咗兩個冷麵，適逢有信用卡優惠仲可以減$100，埋單$500幾，晚餐嚟講價位可以接受。套餐有六款肉，包括鹽味牛舌、黑毛和牛小排、黑毛和牛上肩肉、極尚厚切牛胸腹柳、黑毛豚無骨小排。最好食係黑毛和牛小排，入口油脂甘香，肉質甜美。鹽味牛舌是薄切的，味道濃郁帶點嚼勁，唔錯！值得一提，冷麵煙靭，帶啲酸味，好開胃呢！環境及服務方面，可以接受。…Read More

今日同朋友嚟咗呢一間位於鰂魚涌間餐廳食飯，喺地鐵站附近好方便。餐廳好新淨，坐位主要以卡位為主，好闊落，坐得好舒服，而且食物價錢亦都唔係好貴。餐廳選擇都好多有好多唔同嘅套餐可以選擇，而且亦都有好多小食點。而我們二個人就點了兩份套餐同埋一個小食。隨心海南雞飯，海南雞肉質很嫩滑多汁，不會乾柴，油飯亦都香，有三個醬汁，而且配埋杞子雞湯，雞湯味都很濃郁 。另外一份係點左馬來西亞肉骨茶配白飯，肉骨茶大約有四大舊，炆得好淋，肉骨茶亦都好入味，而且仲有有冬菇，同埋其他配料最正係有埋油炸鬼!而我地亦都點咗一份小食，就係手打墨魚餅，有四大粒，外脆內嫩，而且真係好紮實充滿墨魚，食落好有口感 。飲品方面，我哋就點咗兩杯熱飲，一杯係熱紅棗茶，好滋潤。另外一杯就係熱生薑茶，有少少辣，又有少少甜，驅寒一流。性價比高，值得再光顧！…Read More

一直都想試呢間Next Shikaku牡蠣白湯麵，餐單只提供三款麵食，除咗牡蠣白湯麵，仲有牡蠣清湯麵同沾麵。由於喜歡雞白湯，我毫不猶豫選擇咗牡蠣白湯麵。頭兩啖飲個湯底係幾有蠔味，見到將啲蠔打成碎粒，麵質亦算彈牙，但個湯底就愈食愈咸，我最後都食剩咗啲麵，亦飲唔曬啲湯。塊叉燒係幾厚下，但唔算甘香，如果將塊叉燒炙燒，我諗會好味好多。仲有兩隻好細好瘦弱嘅蠔，亦唔係好食。性價比好低，一碗麵連加一都要$170有多，試過就算。…Read More

船記榮獲2024香港澳門米芝蓮指南必比登推介，一向鍾情中菜嘅我，躍躍欲試，約番三五知己食就可以試多幾款菜。不過要留意，某啲菜式需要預訂，好似乳豬、海鮮。1. 堂剪原隻乳豬（需預訂，可叫半隻）乳豬熱辣辣，外皮燒到卜卜脆，伴有肥膏帶點甘香，豬肉柔軟。2. 花膠爵士湯（需預訂，6-8人份量）湯味濃郁帶蜜瓜清甜，仲有大大隻花膠。3. 船記XO小炒皇是必點，炒得香口之餘，最鍾意內有炸脆咗嘅芋頭絲，增加脆脆口感，佐酒一流4. 豉油王吊桶仔，豉油鮮味，吊桶仔非常軟熟。5. 咖哩脆皮牛腩，偏乾身，一般。6. 蝦多士（需預訂），件數可按人頭叫，大蝦爽口，多士外脆內軟，好好食。7. 胡椒大芥菜粉腸蝴蝶腩煲，胡椒湯底好夠味，不過蝴蝶腩（豬肉）都係偏鞋。整體覺得海鮮、乳豬、燉湯較出色，服務比想像中好，我哋最後點了桂花糕，店員好熱情提我哋要留肚食奉送嘅糖水，要求幫手影相亦好用心影每一張相，下次會再幫襯試其他菜式。…Read More

鏞鏞· 藝嚐館是我餐廳清單內其中一個選擇，因其環境闊落，光線充足，確實是坐得舒適的地方。不過服務就有待改善了，坐了良久也沒有服務員主動問需要開什麼茶，亦等了很久才奉上茶，若以這個價位來說，服務着實不太到位。食物方面，燒賣、煎蘿蔔糕、紅燒乳鴿屬正常水準食物賣相吸晴嘅有龍鳳呈祥金魚餃（$78）、鏞鏞·手捲雪茄（$80），前者確實好靚又可愛，內裡蝦肉份量可接受。後者則是雪菜鵝肉春卷，炸得不香脆亦偏咸，打卡是可以的。金玉滿堂灌湯餃 （$78）味道可以，湯也清甜。至於索價$220的粵式脆皮燒腩仔，個人覺得雖則皮脆但好咸。整體來說，我覺得試一次就可以了。不過如果想搵一間有戶外而又舒適嘅餐廳飲茶，呢度可能會適合你。…Read More

最近留意到康怡Aeon地下個層開咗間新餐廳食沾麵，仲要係我最愛嘅龍蝦沾麵，諗都冇諗就決定要試呢！喺落單counter幾步嘅距離，就有個專屬座位區，坐得舒舒服服，落單後會附上取餐通知器。作為龍蝦迷嘅我又點會唔試特製龍蝦沾麵（$93），個沾麵汁用石鍋上，湯汁持續冒泡同煙，仲有吱吱聲，適逢天氣咁凍，真係好正！沾麵汁好有龍蝦味，用嚟點粗身但麵質煙靭嘅麵條依然掛湯呢！內裡有粒粒龍蝦肉，好滿足！極上3L廣島蠔赤海老沾麵鋪滿櫻花蝦($103) ，湯汁內有粒粒豚肉，火炙叉燒肥瘦適中，經火炙後食落更甘香，連配菜鮮旬條都係咁爽脆。另外不得不提3L廣島蠔，size夠大不用說，最難得係炸得脆口但炸粉不厚，一啖咬落去，好juicy! 個人建議跟餐必點！…Read More

遲遲未試Yakiniku GREAT 係因為要留訂金之餘，時間只有晚上6點及8點兩輪選擇。不過一試之後，係甘願受到呢啲限制。有三款分別$580/680/880嘅套餐，我點咗$680夠為「松」嘅套餐，有8款唔同牛肉部位，再加一碗生蛋飯。肉類部位我記不清楚了，只記得第一道是火炙和牛壽司，肉類當中，其中一件為餐廳推介必食A5和牛板腱，仲有拜拜肉呢個咁特別嘅部位，及用來送生蛋飯嘅西冷。其實八道菜都好出色，配上特製醬汁，也有店員負責燒大部分肉，以掌握火喉，每啖肉入口即溶，油花香滑，會令人捨不得吞下。而拜拜肉這個部位太特別了，初嚐難忘它柔軟得來卻不失肉味，一試傾心。餐廳食物水準超群，服務及環境都很好，食完之後好想再光顧呢！…Read More

餐廳集團同廚魔Alvin Leung 聯手合作，BAU是洋紫荊花的縮寫，亦係Business as usual嘅縮寫，喻意疫情後全球照常營業嘅期許。如果dinner唔食$998 8-course tasting menu, 其實3-course menu我覺得夠食，我地兩個女仔各自揀咗3-course 一齊食1. 餐前麵包超好食，外脆內軟，配埋特式橄欖醬，好味！2. 餐前小食 - 雞肝慕絲，口感滑溜，混入脆米，食到最底有雞肝醬，可惜我不太愛雞肝3. 前菜基圍蝦千層酥，上層係春卷皮，將生蝦刴成蝦蓉，並夾上黃色及綠色青瓜片4. 前菜平原三黃雞翼配蜆蚧醬手工意粉，個醬有蜆蚧嘅鹹鮮味，意粉煙韌，雞翼好味😋5. 主菜紅酒香蔥汁燴牛腩，帶啲肥膏，炆得好淋，肉質柔軟又甘香，唔輸中式炆法。6. 炸豬扒大到好似我喺Austria食嗰塊，但炸得太乾…食剩一大半🫣7. Custard tart, 混埋個有檸檬味嘅cream同almond crumble, 似蛋撻，中規中矩8. 好靚嘅一個甜品，個名有林村兩個字配honey comb, 全名唔記得🫣餐廳環境走歐陸格調，昏暗燈光有情調，不過服務仍需改善。但不過呢個價位就可以食到由廚魔Alvin Leung經營嘅親民fine fine, 足以彌補服務方面的不足。…Read More

叁樓火鍋位置喺尖沙咀一幢商業大廈內，真係位處3樓呢！餐廳走中國風裝飾設計，頗有玩味。我係一個貪心嘅人，鍾意食火鍋，但又想食啲餐前小食，店員力推大澳蝦膏單骨雞翼（$78），好多用蝦膏醃製嘅食材，普遍都重口味，但呢個雞翼一啲都唔會死鹹，炸得香脆可口，大愛😍湯底有九款（$108-$368），我就揀咗麻辣鴨血粒粒蜆鍋併薑蔥清湯，個湯煲有兩個龍頭，口噴白煙，實在太太太霸氣喇！麻辣湯底香得嚟，辣度適中，香料足料熬製。湯內有鴨血、凍豆腐、大大粒嘅蜆，一啲都唔馬虎！主菜叁樓至尊牛拼盤（$438），叫得做至尊，當然係集店內所有牛肉種類，包括手切本地牛、手切金錢展、頂級安格斯、霜降牛粒、牛舌、牛白肉。手切牛肉同霜降牛粒肉味濃郁，而且一啲都唔嚡口，好好味！安格斯牛肉就柔軟甘香，各有千秋！至於牛肉以外嘅部份，牛舌及牛白肉都有驚喜！牛舌有肉味得來又帶點𡁻口，而我好喜歡厚切嘅牛白肉，比起薄片，口感更滿足。牛肉配埋炸蒜油，絕配！即炸響鈴（$48）即點即炸脆卜卜，唔放落湯仲好食！四色丸餃- 手打蝦丸、手打豬肉丸、韮菜豬肉餃、鮮蝦手餃：蝦滑新鮮，豬肉打得幼滑，手打果然出眾啲。餃類同樣出色，皮薄餡香，特別係水餃，內有大大粒蝦肉粒，爽口彈牙。最後緊係要食返啲蔬菜中和一下，蔬菜拼盤（$88），色彩繽紛又包羅萬有。見到客房咁靚，好奇心推使下影咗張相，原來廂房有卡拉ok同麻雀耍樂，喺呢度同朋友gathering都幾好喎！…Read More

估唔到鰂魚涌都可以有咁好食嘅日式串燒店，全舖大概有4張4人枱，但唔會話坐到好迫夾。聽老闆講餐廳由擁有20多年經驗嘅師傅主理，啲串燒唔係喺工場直接攞貨，而係喺店內人手製作，絕對係串串心機！1. 芥辣八爪魚🐙 （$38）: Wasabi調得恰到好處，八爪魚刺身粒好新甜👍🏻2. 日式煎餃子🥟 （$45）: 煎到外表金黃色帶微脆，一咬開啲肉汁飛曬出嚟，要好小心食先得🤣3. 吉列炸蝦🦐餅 （$58）：外層脆口，蝦味相當出色！4. 白桃豚肉卷（$28)：一定要點！呢個第一次食，仲正過荔枝豚肉卷呀！冇諗過白桃同豚肉係天作之合🤭5. 車厘茄豚肉卷（$28)：燒得一樣咁好味，車厘茄燒得非常juicy, 不過我更愛白桃豚肉卷呢！6. 燒秋葵，燒白磨菇 （各$18）：燒過後依然保持到水份，清新又水潤！7. 美國厚切牛舌芯 （$58): 超級好味！牛舌芯好柔軟，牛味勁濃，一串唔夠喉呀！8. 雞軟骨 （$22）：燒得香脆又唔乾身，好味！9. 雞皮 （$22）：通常細細塊嘅雞皮會燒到一味得個脆字，但呢個真係好唔同，外面係脆，但內裡甘香柔軟，有驚喜呀！10. 焱一炙燒蟹膏飯 （$98）：壓軸之作！冇諗過串燒店竟然食到咁好味嘅蟹膏飯，係成碗飯都係蟹膏呀！撈埋生蛋一齊食，鮮味十足！仲有一串自家製免治蟹肉棒伴碟，單點都要$48，真係超值！以日式串燒店嚟講，性價比非常高！小店嘅優點，在於容易同老闆、店員，甚至大廚互動。下次我一定會叫清酒放題呢！…Read More