時代強's Profile

今晚朋友請客到呢間（碼頭故事）重慶火鍋，一入到餐廳店內裝修都幾有風格，環境算幾闊落，叫左個鴛鴦鍋，湯底都幾香濃，麻辣就一路食一路滲出，都算係愈食愈麻辣，不果都覺得算係接受範圍之內，至於食物方面就真係比較內地既同類型火鍋店新鮮優質好多，食材比想像中高質，特別係黑柏葉爽脆新鮮，新鮮海帶一般火鍋店少有，安格斯牛肉油花充足，海蝦新鮮彈牙，牛筋丸爽彈多汁，雞子選用新鮮本地雞子，絕非一般急凍火雞子……唔講咁多，大家睇下相片，自行比較。…Read More

裝修前已經試過午餐同晚餐，其實真係好一般貨色，我有點唔明白，元朗區鋪租已經平過銅鑼灣好多，但價錢都要收$1480/位，可惜食材仲要比呢d咁普通既貨色，真係要賺到咁盡嗎？還是覺得元朗區既人唔識野容易賺佢地錢？不能理解。當晚入坐點了晚餐最貴個廚師發板$1480/位，大概係 蒸蛋 5點刺身 7件壽司 3件海膽壽司 湯 生果先唔好講整晚安排既食物設計冇驚喜先，首先服務員非常一般，只係企埋一邊自己傾計，唔會留意到客人想要咩？要客人舉手先有反應，如果係茶餐廳咁既服務當然冇問題啦！但呢度係賣緊高級日本壽司店呀！食材真係一般得好緊要，5點刺身幾乎都係白身魚，味道都差不多，冇層次安排大拖羅只得1件壽司既出現，連吞拿魚茸手卷都冇，如果你有呢樣既期望又會非常失望。縮短黎講啦！最激氣係坐隔離枱既客人同一個餐，但比既食材又唔一樣喎，真係百思不解。特別特別係3款海膽，隔離枱係有1款既白海膽，但我冇喎，之後佢堅持話我其中有款係白海膽，隔離格個師傅拎出黎既一板板海膽之中，嗰款白海膽我地都冇食過，大佬呀！白海膽都有分級數，唔好又當客人唔識之得架，今時今日互聯網資訊咁發達，仲邊可以當客人水魚架，我真心覺得好搵笨咁埋單，全程只用左75分鐘用餐，係我食廚師發板以來第一次可以咁快食完埋單。出門後我同朋友講點解咁既，一路行一路諗總結2個可能，1）其他客人係熟客所以有所不同，但我又覺得隔離枱應該都係第一次去食，因為佢地都好陌生。2）我諗番起，會唔會因為我一坐低就叫佢換左枱前隻壽司碟，因為真係好多塵好污糟，但我都好細聲叫服務員換左佢，但原來係要師傅係入面換，嗰刻留意到個師傅面有不悅，可能咁樣會有影響佢既出品。但點都好啦！到最後2位埋單連加一$3256，真心唔值呢個價位。我只覺得係殺雞取卵式做生意，可能貴店真係以為掛住壽司之神既招牌就當自己真係神，真可惜。以上全部都係親身經歷，我肯講出黎係要貴店收到以上訊息，從而改善，而唔係想唱衰貴店，祝壽司之神生意蒸蒸日上…Read More

完全唔係之前食評講既咁樣，手打牛丸我自己覺得絕對唔係手打，冇選擇得牛食，仲要得幾片薄到冇可再薄，價錢一d都唔平，絕對唔抵食，冇下次，唯一贊只可以講係有d服務同裝修特色，但真係唔值得再試，唔明點解d人贊到天上有地下冇，我估呢間野想做集團，但真係攪好食品先啦！…Read More

大人唔會食，後生仔唔會去，點解？我2個人去試，叫左3碟牛，1碟菜1個烏冬，埋單差不多300蚊，但係并唔係佢講到d牛咁神化囉！只係得2個評價，無其他野食選擇，大人又點會去呢？後生仔又會覺得貴，其實呢d牛肉好多火鍋店都有，只不過佢地想拎黎做gimmick ，但睇情況我估唔成功囉！而裝修方面係幾有特色既，服務都餐還可以（可能無咩客既關係啦！）牛肉方面個人口味覺得一般，份量太少整體2.5分😣😣😣…Read More