fd_foodmonster's Profile

諗住好熱食啲輕食 行行下去左碼頭附近見到哩間野諗住叫個啡菇芝士漢堡配豆漿試下點解佢無 叫牛角包又無本身都算架啦點解呀姐突然態度好差講左句有既時候又唔食。。。🤷🏻‍♀️我都係第一次入去鬼知你無咩你又唔貼個紙寫住售罄做咩無啦啦 食個lunch都要受你氣喎 叫麵又係咩都無 又無西蘭花又無芒果每樣都要問佢 收銀又聽住個耳筒 咩都要講兩次係遊客區都咁樣服務態度 香港真係多得佢地唔少呀無論價錢幾平都唔會再去食第二次呀。。。…Read More

泰國菜一直係生活不可缺少既菜系，今日去左K-11對面既《新泰》試一試，係門口已經裝修得好泰國風，有架迷你嘟嘟車可以打卡，落到樓下原來別有洞天，座位幾多，裝修走泰國宮殿風，大概12:20去到都已經8成滿座。．燒豬頸肉份量好大，每片都大大片而且肥瘦剛好仲燒得有少少燶邊，配上泰式酸辣醬，唔會太辣，開胃小菜．鴨肉生菜包一般生菜包都係雞肉/豬肉，好少會見到炒鴨肉，生菜好新鮮大大片，鴨肉炒得好香而且好乾好惹味，唯一係偏辣少少，但食食下又會想繼續食．冬蔭功 (小)上榙時已經好香，有原隻大隻同草菇非常足料，一個細既份量都可以分到大概4碗，酸辣好平均，唔會偏酸或者偏辣．泰式蝦炒金邊粉賣相好吸睛，用蛋漿整左個大罩罩住啲金邊粉，金邊粉方面都好足料，芽菜每條都好飽滿，金邊粉都炒得好入味，大蝦亦都好彈牙，可以再encore．芒果沙冰食辣野必點，成杯都好杰身，啖啖都芒果味，而且好夠凍…Read More

今次book左位於木球會對面既《寿々乃》，位置幾方便，時代廣場行過少少已經到，室內環境清優，再配上一個室外小庭園，真係好似置身日本一樣。今次嚐試既係佢地既Dinner Set $1880/位(未連加一)首先個先付已經好深印象，擺盤好似一個秋天盤景，鮎魚一夜干配宮崎縣宅蟹仔脆脆的好香口；再配上黃色京都腐皮卷，秋意十足；水雲醋物少少酸酸微微非常開胃。全晚師傅都以”白蝦”貫穿全晚既舖排，白蝦刺身鮮甜、炸白蝦好脆口、炸白蝦丸子大大粒，好足料彈牙，同一款食材但以三種唔同既烹調手法，非常有創意驚喜。全晚既highlight係一條半個人高既八爪魚腳同吸盤，師傅調配了一個wasabi e漬物，配合吸盤爽辣的。全晚我好喜歡既菜式係”三文魚筋子”，不時不食當日係筋子當造既第二日，完全無平時食到只有咸味既醃製，新鮮既筋子真係好甜，打破左平時對三文魚子咸味既印象。壽司方面，鮎魚、伊豆既金目鯛作為頭兩件壽司非常新鮮；青森既帆立貝非常飽滿地包住壽司飯，好滿足；另一款好鍾意既菜式係北海道甘海老壽司，三隻甘海老放入口咀嚼後會好似蝦滑一樣起蝦漿；中拖亦都有出現，依然無令人失望，油脂十足，非常肥美；最後以一件北海道根室市馬糞海膽手卷，一啲腥味都無，海膽十分creamy入口即溶，止到我掛住北海道既旅行癮。甜品方面，係時令既富良野蜜瓜，甜度十足；十勝紅豆水羊羹，無印象中既死甜，淡淡既紅豆香配以一杯熱茶，非常滿足既一晚。…Read More

《杣 ‧YASHIMA》係九如坊對面，門口裝修已經好日式庭園，非常好認。入到店內樓底好高，無平時omakase店既焗促感，配上輕音樂及枯山水細竹，成個人都好放鬆。前菜係魚子醬松葉蟹肉蕃茄杯，對於平時唔食鮮茄既我有少少改觀，酸味赤水母配合得宜加上松葉蟹既一條條口感，好開胃；另外一道前菜係九條蔥煮日本鴨肉，鴨肉係omakase比較少見，見師傅用高湯慢慢焯熟鴨肉，肉質鮮嫩，而且鴨皮亦都唔會好肥。刺身方面，印象深刻既係炙燒鏗魚配上濃蛋汁、手磨wasabi 同柚子醬及蒜片，因為魚皮位用火燒左幾下，再配蛋汁口感好似食緊一舊好淋既牛肉好特別，而且因為有炙燒過再配上蒜片，好少會用香口來形容一片刺身。季節燒物係伊勢龍蝦配赤鯥魚及茄子味噌燒，伊勢龍蝦燒同赤鯥魚都燒得好香，茄子更加有油香，非常入味，好驚喜係粒栗子超級甜，係秋冬既氣色~油物係天婦羅炸物，有鮑魚、青椒同吉列松葉蟹配以銀杏串，松葉蟹經過油炸都唔會啖啖油，食到一疏疏既蟹肉好滿足，師傅好細心用上左cones吸油，又唔會影響整體賣相蒸物係A4和牛昆布湯，和牛又係用昆布湯過水焯熟，所以又係好嫩滑，入口即化壽司方面金目鯛燒一燒所有油香出哂泥、中拖羅同大拖羅都好肥美，唔會過肥大滿足、最後既海膽杯同左北海道海膽好鮮甜由於我對芋頭類過敏，所以無試到玉子燒甜品時間有甜到漏汁既北海道哈蜜瓜、秋天獨有既柿同繼續好甜既栗子，好滿足，亦都非常飽~…Read More

平時lunch hour都會去K-11附近睇下有咩新餐廳，有一日經過見到新開左一間omakase店，見到個價錢尚算合理就即刻約埋朋友去booking試下晚餐。地方唔算大，但由於位置不多，所以坐得都幾舒服，當晚師傅係香港人，但對於食材既處理同知識好豐富，溝通上更加方便。我地揀左「神石」ISHI OMAKASE $1680套餐(未連加一)先附擺盤已經滿滿藝術感，當中香魚炸到脆脆好香口；而赤水母酸酸既好開胃之後去到刺身部分:． 薄切真鯛好特別，師傅加上紫蘇花令到鯛魚帶有淡淡既花香味，中和左鼔油既咸味~．岩手縣既海膽超級creamy，一定都唔腥，非常新鮮；伴碗一啲都唔馬虎，選用左富山縣迷你白蝦，同師傅傾計得知每隻都係人手剝殼，非常考功夫轉眼間去到燒物揚物既部分，師傅好神秘地拎左一個蒸籠出來，打開入眼簾既第一眼係好大個毛蟹蟹蓋吸引住，原來將要上菜既係毛蟹燒賣配上俄羅斯魚子醬，咬開燒賣眼肉可見一疏疏蟹肉超級爽~去到壽司既部分．太刀魚:非常清甜，師傅用火槍輕輕燒出皮下脂肪既油份．希靈魚: 顛覆左我對希靈魚既印象，有少少似沙甸魚既油香；中間配以梅醬中和油份但又唔會好搶味，洽到好處．北海道紫海膽: 果然係海膽既季節，一晚竟然可以試到兩款唔同既海膽，紫海膽偏向比較細滑配以淡淡既甜味，屬於一款比較溫柔既海膽．右口魚邊: 極級肥美香濃，油份被火槍燒到滲入醋飯中，成件壽司入口即溶，一件絕對唔夠喉呀甜品方面係和歌山蘋果配栗米雪糕，以金字塔既造型展示既蘋果酥非常香脆，配以唔會好甜既栗米雪糕，一脆一軟，玩味感十足，亦為全晚劃上左一個完美句號。…Read More

每次諗唔到食咩都會同朋友去太子附近行下，因為有好多人氣餐廳或者新餐廳試極都試唔哂。今次係地鐵站附近既位置發現一間新開既酒吧西餐廳，門口有好大塊板介紹自選漢堡可以自由配搭，所以就入左去試下，星期四既晚上7點左右餐廳就已經7成滿座啦，入座後店員比上menu，有時真係計劃趕不上變化，因為隔離枱既扒餐同豬手都好吸引，而且仲有set揀，價錢唔貴，所以漢堡下次先再試啦~．墨西哥脆片配五重芝士醬 $58酒吧必點之選，墨西哥脆片配上芝士醬係絕配，芝士醬唔會過鹹，正正子~．Set Dinner 蕃茄水牛芝士沙律+花椰菜湯+燒紐西蘭西冷扒8oz $218是日餐湯係花椰菜湯，完全無奇怪既草青味，cammy口感，幾好飲西冷方面我地order左5成熟，廚師拿捏得好好，外脆內軟，而且肉汁鎖得好好，最後感覺8oz都唔夠喉~而且伴碟配有黑蒜比較少見，配落去牛扒係一個好新奇既配搭．燒焗德國咸豬手配田園沙律+香草牛油焗薯角真係原隻豬手燒焗上枱，大隻到差少少個木盤都唔夠盛，豬手啲皮燒得好脆，每下切落去都係嗦嗦聲，豬手本身醃得好夠味，而且肥瘦適中，唔會有厚厚既肥膏或者太瘦得啲柴肉；配菜既薯角都好夠味，而且唔會太淋無咬口睇泥下次要再去試下自選漢堡先~…Read More

上次經過大角咀見到有間泰菜裝修超級泰國風，今次終於約到朋友去試下啲野食係咪都係咁泰正先~當晚大概7點去到已經見到有人係門口等位，我地好好彩等左15分鐘左右就可以入座啦店舖裝修比起外面睇更精緻，部分卡位仲係以嘟嘟車做主題，怪唔之得間舖叫泰嘟嘟啦Menu 選擇有好多，我地兩個人好貪心咩都想試下，所以就揀左二人套餐$248 (可以選三款)．炭燒豬頸肉真係有個炭爐一邊食一邊燒住，而且唔會因為係套餐，份量會減少，份豬頸肉超大份，而且口感爽軟，唔會燒到好柴，再配上泰國酸汁，真係100%還完泰國既味道呀．泰式小食拼盤(小)有泰式春卷、蝦餅同串燒再配以泰式辣醬同沙嗲汁，對於咩都想食又唔識選擇朋友係必叫之選，上枱時春卷係酥脆，明顯係新鮮炸起唔係一早整定，非常加分呀．鮮蝦炒金邊粉上枱時已經聞到好香，加上金邊粉炒得好乾身唔會係碟底已經見到成pat油，魚露唔會太咸，大蝦都好多，加上伴碟既花生粒食落多左一重味道之外仲有咬口，好正．芒果椰汁糯米飯$58無論正餐食得幾飽，都一定要以一個糯米飯作為全餐既結尾，今次都唔例外。雖然唔係芒果既季節，但芒果都唔會酸酸的(唔係浸糖水果種甜)，椰汁比得好慷慨，所有糯米飯都有汁可以撈到，而且椰奶好香。整體成餐飯都食得好滿足，真係好似身處泰國一樣，而且價錢平，CP值高呀見到每枱都有order泰式經典明爐烏頭，下次都要試下先!!…Read More

媽咪鍾意去寶琳行街貪佢幾個商場連住好好行又多小店，有日行到攰佢就揀左間近近地既拉麵店試下都幾抵食 $128 有拉麵+小食+飲品．綠虎拉麵係四國香蔥拉麵，上枱時滿滿蔥花，而且湯唔算太濃又唔油，好適合想食比較輕身拉麵湯底既朋友，麵配上兩片大叉燒同流心溫泉蛋，食完唔會覺得好大罪惡感，偽瘦身人士可以考慮一下．嗚海老拉麵同綠虎好唔同，個濃係極濃蝦湯，食每一啖麵都蝦味十足，雖然佢係偏濃味湯底，但唔會果種食完需要飲好多少既死鹹湯底，叉燒係厚身叉燒，吸哂啲蝦味非常入味；麵質係幼身拉麵，可以自行選擇麵既軟硬程度，絕對係心機之作．肉餃子我以為配套餐既小食餃子好可能只有3隻，但上枱有5隻大餃子絕對喜出望外，片薄而餡多，份量已經高出預期既CP值．芝士魚餅(2件)魚肉味突出，口感QQ彈彈，芝士都好好食，連隔離枱冒小朋友都話佢魚餅好食~題外話: 除左價錢平之外，如果有小朋友同行，店家仲會好貼心咁提供有卡通人物既膠叉比小朋友方便進食，真係好貼心呀!!…Read More

天天海南雞我細細個就聽過哩個名，之前去新加坡好熱既天氣見到條長長既人龍最終放棄左，成為叼旅程既遺憾之一。行開銅鑼灣唔知食咩好就決定去填補一下我地遺憾。餐廳有份室內外位，空外每枱都有暖爐同電視，就算冬天去唔會太凍；空內既裝修一入眼係大大個天天海南雞既招牌，好有新加坡熟食市場既風味。．鮮大蝦冬陰公(2隻蝦) $89大蝦係真係新鮮大蝦，店員會用gas 爐滾到個湯熱先再放大蝦同配料落去煮，所以大蝦真係好火喉岩岩好，好爽口彈牙；個湯好足料，但唔會太酸太辣剛剛好，份量多到就算我地叫細份應該可以分到5個人飲．天天海南雞(例牌) $189+ 雞油飯(細窩) $39同店員查詢左天天海南雞同正宗海南雞既分別主要係烹調同有無骨，由於想用海南雞拌飯食，所以揀左無骨既天天海南雞再加選細窩雞油飯，師傅好用心地去哂所有雞既肥膏，變左雞皮都可以食埋，雞身好滑切成細細舊好易送飯；另外油飯係用石鍋連蓋，食到最後啲飯都仲保溫，而且細窩都可以同4個人分。．新加坡麥片大蝦 $189本身想叫黑椒炒蝦，但見到有麥片蝦即刻唔洗諗，麥片蝦好大隻，每隻都均勻沾上奶粉同麥片同埋師傅係蝦背已經界開，所以好入味甜甜咸咸好好食，而且每隻蝦除左好大隻之外，仲隻隻都好多蝦膏，絕對有驚喜呀．芒果三色糯米椰漿甜飯 $89芒果當造所以好甜，三色飯包括紅色火龍果、白色原味同綠色斑蘭味，椰香濃用甜品畫上一個完美既句號．恐龍美綠(凍) $26份量超大杯，果然食星馬菜最適合既一定係美綠~…Read More

無辣不歡既朋友今次搵到一間有100萬倍辣辣椒餐廳想試下傳說中既變態辣，佢好醒目咁樣訂左位同預留左店家出名既《皇牌烤爆汁雞》，睇片就睇得多人試變態辣，親身試上陣都真係第一次呀~餐廳位於大角咀但好近奧運站，大貓銀行花園平台樓梯對面就到，位置好方便；餐廳係以酒吧形式，但吸引我既除左係佢型格既門面，仲有係門口當眼位風乾櫃入面轉轉下既雞，同店員八卦得知原來每隻雞要風乾2-3小時再搬去烤爐塗上滿滿既蜜芽糖烤上30分鐘先可以出爐，怪唔之得要預訂啦!!．皇牌烤爆汁雞 $288 (需預訂)原隻雞以支架站立支撐，除左打卡一流之外，更可以流出部分油分；除左雞係主角之外，仲有一盤調味料都係重點之一，亦係我朋友今次既目標。一碟以輪盤造型既辣粉，分別係-  100萬倍辣辣椒油(博士級數) : 唔好講笑，自問平時都算食得辣點少少已經可以令條脷麻同標汗，完全滿足我試一試既心態~-  20萬倍辣椒粉 (碩士級數):  唔知係咪因為粉同油既關係，20萬倍的確麻度輕微少少(但依然係變態辣級數)，總之都係好麻好麻既一種辣粉~-  蒜味辣粉 (大學year 2): 比起上面兩樣款算係再溫和少少(只係少少)，係辣味中間都食到蒜味-  海鮮味辣粉(大學畢業生) : 以為再過一格辣度會更輕微少少，果年少年就係太年輕，顏色同位置唔代表一切呀~-  煙燻辣椒海鹽 (準備考DSE): 係辣粉果5格入面最鐘意既，少少辣味配以少少鹽，兩者比例平均，同烤雞肉好夾-  水牛城醬(小一級數) : 唔會太酸唔會太辣，係一個會不斷點既醬汁-  蜜糖芥末醬 : 對比起其他醬顯得有少少普通，但如果唔食辣既朋友，就會多一個選擇-  甜酸醬(幼稚園級數) : 酸酸辣辣，非常開胃-  薑蓉蛋黃醬: 好新既配搭，真係好似平時燒味店切雞飯果種味道，朋友推推-  煙燻茄汁醬 : BBQ醬，配烤雞非常適合，我既個人推推~不得不提既係餐廳選用既辣粉係香港製造既X1493品牌辣椒粉，我都係第一次知道香港都有自家製變態辣椒粉~講返隻雞先，隻雞size大，但火喉控制係真係啱啱好，因為皮脆肉嫩超juice~皮脆既程度係好似燒鵝一樣嗦嗦聲，烤得非常香口；肉身滑嫩多汁，連雞胸雞柳都唔係柴既，而且餐廳好貼心咁準備左手套同較剪方便支解成隻雞，加分加分~有個有趣位係調味盤上面有隻轉轉雞公仔，方便一大班朋友飲酒食飯既時候可以玩啲小遊戲，大懲罰當然就係100萬倍辣油啦~．魔鬼魚塊 $88係一碟炸魚球既菜式，魚肉細滑，而且無骨，方便唔識食魚既我；個醬非常開胃，係甜酸醬+柑桔味，保留左南亞風味加配上柑柑中和左辣味，入口食到少少酸到後期先會感受到辣，係一個神奇既醬汁．香辣豬軟骨煲 $78小小一煲，但分量十足，豬軟骨煲到好淋，花椒紅油汁一齊煮，每一粒豬軟骨都好入味，值得一提既係配料既洋蔥好煮到好好食~．甜甜蕃薯條 $68新鮮橙芯蕃薯切成條炸，脆脆外皮配上黑松露沙律醬係一個無得輸既酒吧必點之選．Bloody Mary 生蠔(配Tabacco) $168小小一shot bloody mary加入大大隻生蠔一口飲落去好滿足，生蠔肥美新鮮一啲怪味都無，bloody mary 蕃茄味較重，就好似平時食生蠔加少少茄汁一樣，所以味道上超夾呀~．New Jack $58 Order 左一杯mocktail 叫New Jack 係菠蘿汁+可樂，大大一杯菠蘿味突出但唔係糖水既死甜成為左我全晚既救命水呀~…Read More

行完銅鑼灣本身打算去大坑搵食，點知行到去中央圖書館準備過馬路比一間小店既人龍吸引左。係一間主打外賣既東南亞菜式店舖，雖然店小小，但菜式選擇多，而且CP值超高，所有菜式同甜品都係100蚊3盒、串燒$50/4串，由於唔貴所以媽咪就揀左好多款返屋企試下。．海南雞雞身超滑，而且分量超足，33蚊都有半隻雞，如果可以加錢配埋油飯，絕對係完美呀．泰式酸辣鳳爪無骨鳳爪個汁係重點，店家處理得好好，鳳爪好入味但又唔會過辣過酸，係餐廳既水準，已經開始明白點解咁多人排隊．蒜香雞翼尖係店員推介係必食之選，試過之後非常同意，偏辣少少非常惹味，慢慢食下食下，唔覺兒就清哂，係下次encore之選．泰式香葉肉碎好耐無食過生菜包，唔係一般死鹹既肉碎，值得一讚既係炒得好乾身唔會好油．泰式酸辣魷魚鬚除左魷魚鬚之外，仲有原隻魷魚仔，粒粒都好飽滿，而且酸辣汁醃得好入味．泰式燒豬頸肉，份量真係超出預期，全部豬頸肉都係大大塊，非常有咬口，食肉獸絕對可以盲選串燒方面都非常抵食$50/4串，我地order左牛肉/雞肉/花枝丸/燒牛丸/雞腎/雞中翼，全部都係配沙嗲汁，店家好貼心咁提供一個厚紙袋+錫箔紙內層，外賣唔會漏汁又保溫，而且醬汁分開一個兜，方便每粒肉都可以點到沙嗲醬，串燒我最驚喜既係燒牛丸，大粒彈牙仲保留到牛丸既juice~．椰汁芒果糯米飯真心勁推，份量又係超佛心，芒果係現場order時先切，保證新鮮，而且好甜，下次經過一定係必選之一…Read More

公司樓下有間唔係好起眼既泰國餐廳原來內有乾坤，裝修係峉里度假風，有一大掛靠窗座位可以對住個海慢慢食。．馬莎文咖哩牛腱飯配冬蔭公湯 $196咖哩加入八角等煮香濃不辣，而且花生味十足；牛腱煮到好淋，分量足夠再配以菠蘿沙律，生津開胃；餐湯係傳統泰國冬蔭公湯不過不失．鹹蛋黃薯條驚喜之選，蛋黃一啲都無菇寒，每條薯條都”雨露均沾”，而且炸得好脆；薯條配以一個粉紅色既紅菜頭醬，打卡一流~．燒豬頸肉配青木瓜沙律$148超大一份豬頸肉，燒得剛剛好，唔會燒到啲豬頸肉收哂水乾唒變柴；醬汁酸辣解膩．香蕉薄餅配榛子醬及煉奶 $88重量級選手，無諗過係4大片薄餅再鋪上大量煉奶同榛子醬；內餡滿滿香蕉，食時要比較小心，因為香蕉有少少蓉化，好辣嘴，但非常好食…Read More

澳門唔知幾時又興起返雞蛋仔，而且開到成巷成市，沿路見到好多都係加入麻糬配餡好想試，但又驚會食完一底雞蛋仔就飽左唔可以繼續掃街，所以就放棄左，然後竟然係一個超級隱世(平時完全唔會去到既一個區，就係官也街再過少少既一個屋苑)發現左有葡撻味既雞蛋仔，即刻同朋友行去試下。去到店家已經有好多人排隊order同等攞雞蛋仔，係云云口味當中一定係揀葡撻味，點知去到付款店員通知要等45分鐘先有得攞，所以想試既朋友真係要預留足夠時間等候。如是者45分鐘過去，雞蛋仔超熱出爐，啲邊邊好薄脆，雞蛋仔個葡撻餡真係做到好似葡撻既流心蛋漿超好食，但小心流落手指會熱親或者辣親條脷(真人實測真係好痛)，但好味既雞蛋仔係可以蓋過苦候45分鐘既攰同辣親既痛，希望下次去到唔洗等咁 耐就好啦~溫馨小提示 : 凍左真係無咁驚豔，一定要襯熱食哂佢呀~…Read More

3年無去澳門，開心好多熟悉既舖頭仲係到，其中一間就係生利咖啡麵食，每次我都要食一包炸魚片先安樂，今次去價錢明顯貴左好多，但去得旅行講錢傷感情，所以一於咩都唔理order左一包先。(但如果下次我比港幣可以找錢找返港幣比我就好啦~)現場即炸熱辣辣既炸魚片真係好脆好脆好脆(重要事情講3次)，而且一定要加上店家特製咖喱汁，雖然真係好辣，但辣得好過癮，等朋友買葡撻期間都可以食哂成包啦!!題外話: 店家好好人見到我外賣又落左汁，主動提供餐具比我方便食~…Read More

自從土瓜灣有左地鐵之後方便左好多，亦都多左好多餐廳選擇，約左朋友睇戲，所以就搵下有咩好食，去到附近見到有條好熱鬧既餐廳街，有間好香孜然味既串燒店吸引睇睇有咩食，門口既價錢牌一啲都唔貴，所以就決定入去試試。係一間街坊小店位置唔多，但好乾淨唔算太迫，唔好以為店少少菜單就唔多野揀，涼拌粉 / 麻辣燙有成頁既配料可以選擇，串燒、小食、米線都有好多揀，所以我地問左店員都咩推介，的確係好介紹~．泡椒牛腩米線 $56 (包飲品)上枱時分量好足夠，牛腩好多而且切成一口一粒好方便配米線，一啖麵配一粒牛腩可以慢慢食。個湯顏色好清但食落就知好足料，無味精既死咸而且泡椒唔好講笑，越食越辣但又唔係接受唔到既麻辣，食得好過癮；米線麵質同朋友一致同意時間啱啱好，唔會太淋唔會太硬麵身彈牙，朋友傻到話想偷睇用咩牌子．涼拌撈麵配薯粉(滷水牛展+鴨血)BB辣 $58成碗料多到就快滿出碗，青瓜絲/莞茜/花生/菜甫份量都好多，本身加既鴨血同牛展都各4大片，CP值超高，薯粉Q彈入味，牛展都有好似水晶果凍既口感，鴨血方面唔係一夾就散既鴨血，無腥味，厚厚一片，不得不提個菜莆微辣超爽脆，令食麵期間增加左脆脆既口感。．酸辣土豆絲 $26又係大大碟，煮得好爽脆，果種脆唔係薯仔唔熟果種脆，個酸辣汁同土豆絲好夾，初初以為太大碟會食唔哂，但因為好好味既關係，夾下夾下就食哂啦．串燒(小辣) $12-18   -  豬頸肉 : 咬落非常juice同滑，係食肉獸必試之選   -  五花腩 : 配合肉上既孜然粉好入味，唔會燒到太老太嚡熠熠   -  魷魚鬚 : 超嫩彈牙，每一隻腳都好易咬開   -  鮮蘑菇 : 大大粒蘑菇上面再配上牛油蒜蓉燒，蘑菇厚肉入味，火喉真係控制得好好，唔會燒到乾哂，哩個朋友話下次會encore既串燒．洛神花茶 套餐送既 (單點$12)個洛神花茶真係不得不提，用足料煲，酸酸貼貼非常開胃，再加上加入左陳皮，多左一份甘香，所以覺得有必要開一行推介洛神花茶比大家試試…Read More