Jengtsui's Profile

在social media睇左某網紅介紹短片，約了同行4名友人，友人山長水遠，一齊到元朗總店食雞煲，本來期待滿滿，來到門口已經大打折扣，因為食客並沒有很多，心諗今次中左廣告伏，但openrice 食評又好多好評，朋友難得專程入到黎，都係入去一試真假。店舖在後街小巷， 地點有點難找。當天，晚上約6點幾，店舖只有1枱客，店面好細，但坐位尚算坐得舒服。1坐低，職員就拎出醬汁盤，加完之後就會收走。醬料選擇有金銀蒜，蔥，芫茜，xo辣醬（鍾意佢d渣），辣椒，豉油 。每位14蚊。其後發覺，根本無咩需要用到醬汁🤣我們當晚叫了1隻的招牌魔鬼雞煲加魚標加雞雜， 百花炸蝦滑， 椒鹽粟米， 田園雜菜籃，牛小排， 胡椒豬肚丸。原本想試羊腩煲同蠔，明明當日無客，1早黎到，但都已經無貨。其實打邊爐配料選擇少，唔多吸引，雞蛋都10蚊隻！！？而且無註明可以生食同產地。👄主角，招牌雞煲加魚標加雞雜，叫了手抱bb辣，等同坊間嘅bb辣。 1隻雞，分量黎講算少，都唔係一煲，係一個深平底鑊咁，味道唔麻，係泰式嘅甜辣，有檸檬葉調味， 鍾意 泰式甜辣嘅人應該會鍾意， 但香料層次唔算好出，都係麻辣好食d。 廚師加埋魚標落去炒，魚標好厚身，彈牙，好食。雞雜就 雞潤雞腎另加半粒雞心？分量唔多，無雞腸，正常質素。👄小菜百花炸蝦滑 （6粒）， 其實就係類似長洲嘅魚肉釀豆卜，以前一串五顆魚肉釀豆卜($15)，鮮味無窮。 現店舖改為蝦滑，味道都唔夠鮮， 配以雞醬，味道可以，但炸得太乾身 。炸栗米就失色，栗米老身， 顆粒唔飽滿（唔知係咪炸太耐，唔甜，只有鹹香既蒜粒味，味道單調。加上放左一陣先食，唔脆。👄配料當晚菜種類都唔齊全，問了店員，然後他表示雜菜籃都係嗰啲菜啦，然後 隨便講了幾個菜名，但發現明明當中某d菜單顯示無貨, 店員都唔係好熟自己餐廳既供應咁。基於 鹹魚白菜各有所好，決定叫個雜菜。 有油麥菜娃娃菜生菜，都係d平價菜，分量一樣唔多，每人一小夾就食晒左。菜中間既心位都係成舊上，並不是圖片顯示切開。例牌安格斯牛小排，分量好少，每人約3小塊完左， 而且當中有啲肉係有d啡色，唔太新鮮。平時凍肉檔一塊嘅牛小排， 開咗四咁上下。肉味淡，肉質就正常質素，淋既 ，唔淋就唔係牛小排。半份堅胡椒豬肚丸，得4粒（但圖片有5粒），得3粒食到豬肚碎，少少胡椒味，粉感重，粒丸好軟爛。 期後發現1份同半份張圖都係5粒總結原本沒有諗住寫食評，所以沒有影低太多食物嘅相，加上食到後面都冇乜心情，但基於去性價比同質量太差， 為免有更多人中伏，同希望店加改善一下，先決定開post。雖然話， 元朗係總店屯門係分店， 但係食物種類原來屯門多好多， 另外七點半前走八點半後入座有優惠， 去到先知。有d食評話店員會幫手撇油，其實食客自己黎都得，同埋根本唔會太多油，因為吸引唔到你叫好多野繼續食落去。加湯時用個小膠牌擋（真係好小， 湯殼都大過佢 ， 唔知擋到啲乜 😂。同埋店員見你食完就拿拿林清枱，趕客咁，執枱果時，餐紙上的食物碎屑彈起曬，整到衫都係，都無表示抱歉。問關於餐單既資訊，又唔熟，我睇唔出有咩服務可言。最後，4個人食左好少野，共付1074HKD。分量唔多，用料中下，菜單圖片又失實，地點偏遠，無咩特別好既服務，呢個價錢完全唔值。 之後去附近糖水舖再食填肚。其實，元朗有好多好食有誠意既本地小店， 唔靠廣告，保持住質量好， 靠口碑， 靠人情味，將來依然會繼續元朗探店。👄但呢間就唔會再有下次。推薦指數：0/5…Read More

70蚊，食左碗大馬路35蚊連野飲質素既牛腩河，好多肥膏啊，得好少肉，分量也偏少。網上廣告聲稱是騸牯牛？！但牛味淡到差d食唔到。清湯底真係清，無咩香料味，有點甜味。蘿蔔有點生，係落左糖水煮既蘿蔔。1邊食, 1邊聽到打住如意算盤既老闆娘與下屬既對話，心諗呢個女人都幾HARSH🤣，1心只為要賺錢，洗人洗到盡。70蚊價錢，但食唔到70蚊既質素，可能去左蔥花芹菜調味料任加既成本到。 食了碗急攻近利，商業味道既牛腩河，不會再回頭。PS. 只有辣椒油味道不錯。推介指數：（0/5）…Read More

尋日去深水埗，本身行過明利，但對面見有樹記，就行左過樹記買。因為記得樹記係出名好味。問姐姐煲腐竹糖水買邊款好。佢介紹買左半斤碎腐皮，諗住煲腐竹白果雪燕糖水。點知煲左成個鐘都唔溶，明明之前係大埔果間買既腐竹煲一陣就溶。上openrice先知原來呢間係流野。真係好失望！預備左成晚，連材料都浪費埋！😡 好彩無幫襯買其他野。我為左要俾負評佢，點都湊夠200字！！大家如果想買好味既樹記，都係番去大埔果間正版！！…Read More

糖森林比較多特色款式嘅甜品食，價錢都唔會太貴。但唔係個個甜品都好食。鐘意呢間分店多d, 少d人，靜d。尋晚就試咗龍珠二世同榴槤班戟。等候時間都唔算太耐。 見有啲人話態度差，我諗係應該係個人style，唔係專登西你，就好似區內一間腸粉店老闆娘咁😂。不過尋晚唔係果個老闆番工，反而係幾位公公婆婆，都好NiCe. 唯一唔鍾意就係呢到會直接將隻匙羹放喺枱面🙉 每次都要鬥快接住，再唔係就用紙巾抹🙄。龍珠二世龍珠二世有龍眼，芒果，水晶珠，黑珍珠，雪糕同芒果沙冰底。雪糕有幾隻款揀，我揀咗朱古力，佢原配。 雪糕有朱古力粒粒係入面，都夠香濃。 芒果有啲酸，可能唔當造。不過加埋沙冰，一齊食都可以清晒既。 水晶珠卜卜脆，口感好得意。 黑珍珠並唔係普通珍珠，而係用黑糖煮過嘅珍珠， 好煙韌，咬咬下，啲黑糖味就滲出嚟，唔會好甜。 呢個組合幾好食，又有口感。 之前食過都係芒果類既清湖映月就好麻麻。 佢係由黑糯米，椰果，芒果，雪糕同紅豆組成。 咁嘅配搭冇咁好嘅口感中，同埋調味不足，成碗沙冰都冇乜味。 所以唔係個個甜品都好食。 榴槤班戟榴槤班戟面外皮好螢光綠😆好似平時都係咁既色？舖頭話係用D24榴槤肉製成。 見menu好多榴槤嘅甜品都係有D24榴槤肉。 諗起上次係松記食榴槤甜品，只係味得陣味又貴。 呢個榴槤班戟d cream都幾滑，中間有一嚿榴槤容，香甜好味😋。下次再黎可以試下其他野…Read More

早前到韓印紅旗下第一間的餐廳嘗新。 見OP好評不絕。 餐廳地方寬敞，坐位很闊落，坐得舒服。 人流亦不多，環境很安靜。侍應服務態度也很好，有不少是韓國人，是靚仔Oppa。Lunch menu 只有很少選擇，價錢也偏貴。 於是揀了一個很多人也在OP推介的海鮮豆腐鍋配麵，另一個簡了辣炒豬肉。先來的有4個配菜，分別是芽菜，小魚干，泡菜和海藻。配菜是任添的。比較特別是這個高級海藻，未見過這食材。這看似有點像在文具店賣的壓制和紙，薄薄的， 纖維互相交疊在一起 。只有這個不設任添，食完再添就是普通紫菜。這海藻第一口，很香海藻味，但口感有點像食頭髮絲，粗粗硬硬的。之後試過加到湯面裡食，有點浪費了它的清香味道，但口質還是差不多。介紹文中建議可配粥食，應該也不錯。再來是主食，這裡的上菜速度很快。先是炒辣豬肉配飯( HKD78) ，豬肉醬味濃，飯分量有點少，唔夠配，味道普通，不算太辣。這個整體分量比較適合細食女孩子。第2個主食就是網紅打卡級的海鮮豆腐面（HKD88) 。話就話面，黎到係米線，湯底都幾辣，配料當中有魷魚， 界花墨魚 ，藍青口， 剝咗殼嘅蝦， 嫩豆腐，大量蔬菜配米線。 食既時候， 侍應會幫手剪將魷魚剪開。雖然配料多，但湯底並唔鮮甜，海鮮食落都無咩味。 只有辣同咸味。 豆腐挺滑，有d 豆香。最後加d泡菜落去反而好味d。最後有1支迷你乳酸飲品送俾你。幾有心地將佢整成左沙冰，應該係韓國益力多。 解辣一流。這像是間試業中的餐廳，lunch的選擇很少，也不是以套餐方法提供，價錢也不算吸引。 晚餐menu較多選擇，可惜lunch無得叫，因為話廚師整唔切。小食也只提供炸雞，不過半份都要90幾蚊，睇圖都唔算大份，有點貴。也沒有煎餅及卷飯，有點可惜。希望佢遲d 上左軌道可以做得更好，menu選擇會更多，配搭會更好，定價會更貼地，像韓印紅一樣， 價廉物美。但短期內應該唔會再試推介指數：💋💋（2/5）佢服務好，俾2分支持下。…Read More

無意中發現的好味道。標注湯底無味精既車仔麵店。睇門面以為無咩特別，食完真係有種禾桿冚珍珠既感覺。😳💋北海道3. 6牛乳炒蛋蕃茄濃湯米線配海南切雞，得獎鹿兒島豬軟骨🍜米線淋滑，湯底濃郁，係真材實料既🍅蕃茄湯，有少少蕃茄肉，仲配左芽菜、豆苗和豆卜，口感豐富。尤其豆卜吸晒d湯汁，啖啖入口都係爆汁。牛乳煎蛋好香蛋味，估唔到佢咁滑，份量都好大。🐷豬軟骨好軟淋，好重膠質，醬香味都好濃郁，好入味，與蕃茄濃湯好夾。🐥海南雞酸甜開胃，皮脆肉滑，仲配搭左幾條醃白蘿蔔。不過我食個時有咖哩味，雞肉背面又真係黃黃地😳💋沙爹豚骨湯油麵配茶香豬紅，泰式香草豬柳，口水雞中翼🍜沙爹湯底香濃， 油麵爽口彈牙。沙爹配豬紅好夾。豬紅好嫩滑，茶味就唔多覺，但係好入味，唔會淡某某。🐷豬柳比較乾身鞋口，有香茅味。🐥口水雞翼，好多白芝麻同四川香料既汁浸住，但唔太入味，淡口，因為凍食，肉質唔太嫰滑。🍹是次叫夠3個餸，免費贈一杯凍/熱金柚茶。呢杯野飲一d都唔hea， 好濃郁，酸酸甜甜，好消暑，不過我覺得可以淡少許，有點過甜。另外仲有唔少特色飲品可叫。雖然價值比平常既傳統車仔麵貴，但呢間車仔麵店，配料和湯底都極多選擇，份量足，而且好多都係出邊無既自創款。每樣配料都有心機制作，款款唔同口味。睇番其他人既食評，發現食店既菜單時不時會更新，另外再見落單紙有不少標示為新產品既菜式，創意同新鮮感都足。另外店員服務態度都唔錯。不過希望店舖清潔可以加強，另上的配菜碟邊都沾到醬汁，一掂到，成手油淋淋。 另外當日地上發現一隻小強🥶🥶🥶。不過食物出品是優質的。推介指數：💋💋💋💋💋 （4.5/5）…Read More

經過K11 musea, 不防到呢間法國過江龍的Bakery試試其出名的牛角包🥐。不過，並不是每一種都好味，價錢也有點小貴。不過勝在多人買，必定新鮮出爐，買到手好多時都暖立立。今次想食甜食，所以選 了這款香甜的杏仁牛角包。食到一層層酥脆口感，杏仁片焗到好香脆，面頭有一層甜薄脆，中間包住杏仁餡料，多重口感，甜度完全滿足了我的嗜甜的慾望。 不過食完好想飲杯酸酸甜甜既飲品中和下🌝以前也試過原味的牛角包，不過我還是最喜歡M&S的，更重牛油味，價錢也較便宜。推介指數：💋💋💋💋 （4/5）…Read More

新大光燈位於尖東既一條巷仔，沒有華麗裝修和門面，沒有太多宣傳，是一間好低調既港式粥面店，但卻有大家口中廣傳既美食，豬潤和雲吞。極大極厚切既薑葱豬雜湯麵，好得意既口感，好軟淋。特別係豬潤，好細嫩，無筋無腥味。無諗過佢咁大舊食落係咁creamy，好似柔情大漢🧔咁， 是一舊有內涵既豬潤😂 麵都好爽口彈牙。湯底是鮮甜的大地魚湯。最令人回味既係佢既招牌火鴨絲豬潤腸粉。 腸粉皮透薄，口感都好特別，唔係走軟滑路線，而係軟糯。火鴨絲香口，豬潤粒似爆爆珠，再配上甜豉油，口感配合得天衣無逢。友人食的是豬雜撈麵，配搭蠔油，份量更大，更配上一碗大地魚湯，食完表示很滿足，卻又已經開始期待下一次再來試試雲吞麵😋。推介指數：💋💋💋💋（4/5）…Read More

由於當晚打風，原本想食的牛大人無開，APM附近的火鍋店都排晒長龍，就試試呢間可以比較快入座既火鍋店。這間火鍋是主打重慶火鍋，配料有別於普遍既港式火鍋店，例如有黃喉、牛軟骨及牛肝等，但選擇相對港式少。店座位貫徹內地火鍋店的特色，就是很寬敞，坐得很舒服，而且有圍裙提供。不過繁忙時段是限時1. 5個鐘，有點趕。一入座，店員會先送上每人一份免費的雪耳糖水，分量多而且很足料。既然主題是重慶，就要叫個🌶️麻辣鍋試試。以防太辣食唔到，當然要叫鴛鴦鍋，另一半選了大骨滋補鍋，湯底位位38。湯底不會過咸，中途店員應會幫忙加水，不是加湯，我比較喜歡這樣，唔怕湯底愈食愈咸。🔴紅鍋唔麻只辣，而且愈食愈辣，會嗆喉嚨的辣。唔食得太辣，最好一開始拎走d辣椒。另外紅湯聞落有d藥材味，有別於台灣麻辣火鍋既香料味。⚪白鍋看似配料豐富，有大骨，紅棗，紅蘿白，栗米，但其實又唔係好食得出鮮甜。不過栗米很甜。可惜大骨骨髓有點豬騷味，不過都有油香。這裡的食材都是Apps落單，有半份和一份可選擇，所以少人都唔怕食唔晒。而且各食材也有建議🧭煮食時間，不過有d有支🚩旗仔提你，有d又無，apps都無寫，枱上無Menu，所以建議入座前在門口拎份紙Menu入去睇。當晚2個人食，都是叫半份。當晚無意中，竟然叫出了個💰888. 8元既價錢出來😂特此開post記念一下。每張枱都有熱麥茶，蔥蒜，豉油，麻油提供。店員會先提供一碟預制的麻油醬料碟，說可以幫助解辣，豉油自己加，不過係咸豉油，唔好落太多。麻油的解辣效果不錯。當晚食物有：🦑黑松露墨魚滑黑松露味偏淡，正常墨魚滑。🐂美國Prime牛小排看似油花靚，肉質沒想像中軟滑，有牛味。🐂嫩牛肉比牛小排好食，夠嫩滑。🐂千絲百葉爽口彈牙，本身無咩味，靠湯底醬料提鮮。🐔嫩肉絲去皮雞肉，較健康，肉質不如其名。🐖大刀豬腰片有冰底，保持新鮮，不過當日的豬腰質素一般，有少少豬騷味。🐖鮮黃喉夠爽口，黃喉本身無咩味，靠湯底醬料提鮮。🐖長城小白豬午餐肉這個竟出奇地食食，是食到豬肉絲的午餐肉。🐖黑豚腩肉普通。🐏紐西蘭精品羊肉卷有少少羊味，普通。🐟白鱔肉厚，爽脆，夏季鱔少了冬季鱔的肥美。🐟季節限定鮮活-海聖肉質鮮甜爽口，無咩沙，6隻有2隻開唔到口，開唔到口既有少許沙，不影響肉質。🌱現炸豆皮有點似比較厚身而且攤開左既響鈴，待煮淋晒，吸晒湯汁比較好食，否則會太硬。跟住建議煮的時間就對了。🌾稻庭烏冬彈牙，就是是稻庭烏冬。😋食尾水，外邊無人排隊，所以都唔會吹交枱。呢個價錢其實有點貴，而且食物質素一般般。加上限時，上菜速度也不算快。有人說服務好，其實我覺得正常，只是完成職責所在，沒太多感覺。我少食重慶火鍋，未能評定質素水平，以上只是根據個人口味而評價，以作參考。推介指數：💋💋💋 （3/5）…Read More

這是一間味道不錯的米線店，主打酸辣炸豬扒米線，其他的菜品，都只是為提供不同選擇而生，試過數款都不太合心意。另外九龍灣分店也試過幾次，質素都較這間低。因為喜歡食蠔，所以都會加蠔仔，過下口癮。這店的酸辣較特別，都是用酸菜來帶起的，而且有麻麻的感覺。我都喜歡另上，方便自行調較自己口味。 湯底是普通清湯，酸菜才是靈魂，配搭莞茜蔥花生，香味更上一層樓。花生夠脆夠咸香。豬扒鬆軟，醃得入味，炸得啱啱好。 不過，最近食，豬扒已變得較薄身，量相對少了。 蠔仔有少許蠔殼，鮮味一般，size有大有細。我喜歡這米線軟諗滑身，不過較幼身。量偏少，一碗剛剛飽。在這經濟環境下，真是生意難做。比起現在，我較喜歡食經濟好時的炸豬扒米線。夠厚身，有啖啖肉，食晒碗米線，都仲未食完肉。薄身的沒什麼滿足感，而且分量較少了。不過麻辣酸菜依然好味。推介指數：💋💋💋 (3.5/5)…Read More

💋滬菜🍜想食小龍包，就會諗起黎呢間連鎖滬菜館。 上菜快，出品質素不錯，選擇也多，環境坐落舒服寬敞。另外，不得不讚是日侍應🙍‍♀️Chrsitina，有禮招待並工作勤快！在繁忙於出菜落單時，更不忘觀察場內客人用饍情況，未開聲，已主動為客人添熱茶，並為完饍後客人遞上牙籤。不得不讚她的用心服務小籠包每次也是新鮮出爐，熱辣辣送上，湯汁鮮味可口。 以往都習慣加浙江醋落薑絲碟，然後蘸一蘸醋，原粒拍，享受湯汁在口腔爆出既感覺。絕不會連薑食，因為本人很討厭薑，但一般用於配菜我還ok,，但講到食就不了。不過，今日意外發現，原來連薑絲一起食，更好味，更有解膩作用和增强口感。鮮肉鍋貼是後上的，所以沒有影相，但一樣是必食推介。‼️特別警告，小心內有香濃熱湯‼️唔好一上菜就食。底部煎得十分香口，皮唔過厚。水煮牛肉面，比起上次食水準不一樣了。 上次鮮麻香辣，牛肉嫩滑，配搭豆芽芹菜，好味。可惜今次辣搶晒風頭，已經食唔番舊時味道。擔擔面湯底夠香濃，花生香配搭微辣，有少許肉沫芹菜粒。跟餐加炸豬扒一份，夠厚身，啖啖肉，味道正正常常。酸辣湯配料充足，夠酸，少辣，但我個人不是太習慣這味道，雲吞很飽滿，外皮滑溜。這是豐富既一餐，而且味道多元，或者，這就是滬菜的吸引力。推介指數：💋💋💋💋（4/5）…Read More

👄尼泊爾Fusion🥟呢間位於元朗既東南亞意大利Fusion餐廳，坐落於一條較靜既內街。這間小店裝修好簡朴，但其菜單選擇卻不少。 這是同區少有賣momo既餐廳，另有沙律，主食，酒精飲品等。店內食客不多，一進店，尼泊爾人老板娘很熱情招待，濃濃既🏝️東南亞人那種熱情。溝通一般用英語，但也可以簡單中文。我是衝着菜單上的momo而來。Momo是尼泊爾地區的餃子，並配搭香料🌶️辣椒醬汁食用，有別於平時食的餃子，momo多了些香料味。由於蒸momo需時，二話不說，先叫了份雞肉momo。 店內提供數款momo，亦有素食momo，任君選擇。由於牛在尼泊爾文化中，被視為神聖之物，因此不設牛肉餡 ，但有其他牛肉菜式供應。 新鮮蒸的Momo 皮薄，啖啖肉，餡料香料味反而偏淡。醬料惹味，辣口但唔辣喉嚨。另外也叫了份Pani Puri。平時睇Bollywood🎬既電影，見戲入邊既人都食得好滋味，好奇就試下。呢個同印度式既食法唔同。 外皮很脆，咬開有爆醬效果，炎炎夏日食一流，因為係凍食黎既。一口一啖，多重口感同滋味。裡面有香料味薯蓉, 薄荷葉，乳酪，仲有d酸甜既紅色醬料係面，有d辣，夏天食好fresh! 但食多左有d膩。2，3個人share就好d。野飲就叫左杯朱古力milkshake。好濃郁，好好味，仲有朱古力醬係杯邊，攪埋飲好正😋。其實佢仲有好多菜式供應,價錢合理，由佢既presentation睇得出佢地出品都幾用心，而且服務也很好，而且人情味很重。不過當中有些菜式是真心很辣🥵，叫前可以問清楚先落單，不過老闆娘都會好貼心提醒😉。這是一間下次仍會想幫襯試埋其他野既餐廳。推薦指數：💋💋💋💋💋 (5/5)…Read More

Burger界既巨人呢間burger經常去食，店舖小小，堂食坐位不多，高枱櫈，舒適度差d，但有貼心的設計，枱底有掛勾，可以掛隨行物品。提供既burger 同炸物都係即叫即制，一定係堂食最好食😋必食推介是特級牛肉漢堡，如果跟餐，2個女仔share 1個都夠。 隨餐會附上膠手套，另選也可問店員拎餐具。第一次食，個🍔一黎，必定會嚇一嚇，大到咁，好難用手食，所以我都鍾意用🍴食。面包外脆內軟，好挺身，牛肉好厚，而且有預先調味過，食到有d似人蔘雞湯味。 內裡肉汁極豐富， 連帶蕃茄既juicy 同蛋汁既傾盤而瀉，立即成個盤都係湯汁😍 呢個包既配搭好好，有煙肉既脆口感，有生菜既爽脆，蕃茄既水份，洋蔥既少許辛辣感，牛肉既肉味，芝士既咸香，水煮蛋既滑溜，成個包好fresh，好juicy，無咩油膩感。好滿足，不得之了！另一個是魚柳漢堡，相對遜色，較淡味，口感亦無咁豐富。但魚柳都juicy, 好厚身，呢款配搭既芝士就相對淡身。跟餐配搭小食有幾款可選，今次選了薯條和炸洋蔥圈。薯條粗身，好脆，分量很多。炸洋蔥圈外脆內軟，夠肉地，分量都很足。 飲品選擇也不少，有汽水，茶類，椰子水等。🍔既配料都可以跟個人口味選擇。Burgerlab呢個漢堡係我暫時食到過，最有驚喜同食過番尋味既漢堡。其他口味也不錯吃，但未去到驚艷級。經過佐敦，不再只懷念澳牛，同時也想念Burgerlab💋推薦指數：💋💋💋💋💋（5/5）…Read More

👄香港人既漢堡🍔早前機緣巧合已試過芝牛堡，蝦堡，菠蘿雞堡。今次幫襯，終於遇上本店最愛。黑松露牛堡，再私人加隻煎蛋，滿滿既黑松露醬，變得更creamy, 成個包即時升華晒😋生菜蕃茄都新鮮，爽脆 ，牛肉漢堡就較乾身，油份適中，肉汁偏少，味道單薄，芝士味道較淡身。面包軟熟。薯條粗身，目測量少，不過食落都夠，外脆內軟，薯味不重，有自助醬料吧，醬料任添。炸燒賣外層偏硬，煙煙unun, 夠椒鹽味。坐位不算逼夾，留意繁忙時間人多，排隊人龍較長。出餐算快。屬於香港人既漢堡包店，有屬於本地文化既特色小食，更有多款配料可加，根據自己喜好自選，各價格不相同，平有平食，貴有貴食，豐儉由人，選擇不再只有M記或西餐廳。推介指數：💋💋💋💋 （4/5）…Read More