Miffys2020's Profile

我對牛扒向來好挑剔，但呢間真係我食過最正嘅港式牛扒！港式牛扒向來肉質爽滑、肉香夠晒濃郁，再配埋熱辣辣嘅鐵板，淋上香到痹嘅黑椒汁或者燒汁，真係未食都流口水！我哋點咗貴族牛扒餐同招牌牛柳餐，扒餐可以揀黑椒汁定燒汁，，加咗之後味道直接升華，好食多幾倍！佢哋嘅牛扒又嫩又香，完全啱晒我口味，咬落仲有肉汁爆出嚟。套餐仲包埋牛油餐包、羅宋湯或者忌廉湯，仲有咖啡或者茶，凍飲都唔使加錢，性價比算几高。我哋仲轉配咗兩款特色懷舊飲品：「紅牛」係士多啤梨角雪糕加利賓納，「金牛」則是芒果雪糕配忌廉，甜而不膩，同牛扒好搭。…Read More

香港有兩間米其林一星燒鵝店，甘牌燒鵝就係其中之一，仲連續十一年攞到香港米其林一星評級，實力真係冇得彈我哋工作日中午一點二十分左右開始排，大概排咗四十分鐘先入座。感覺周末排隊時間應該仲要長，見好多人話通常要排三十分鐘到一個鐘。主要因為鋪頭細，淨係得十來張枱。我哋點咗半隻燒鵝、兩份皮蛋酸姜、兩份太子撈麵，仲有一罐零度可樂。講返食物本身，甘牌嘅燒鵝真係好肥美，皮脆到咬落「咔嚓」聲，油脂同肉汁都好足，但又唔會覺得油膩，肉質軟嫩入味，味道確實幾出色。不過始終要排隊，而且價錢都算略貴，大家可以根據自己嘅行程同預算揀啦～…Read More

兩款蛋挞真係睇見都流晒口水！先講抹茶蛋挞：個抹茶餡夠晒濃郁，仲帶住少少甘香，咬落仲有流心芝士同紅豆粒，軟綿綿嘅口感夾埋酥脆嘅朱古力撻底，甜得來又唔會膩，抹茶控一定鍾意！至於焙茶蛋挞：色水雖然深啲，但焙茶個香氣好醇厚，流心部分更creamy，帶住陣陣焙茶嘅焦香，撻底同抹茶款一樣脆口，味道比抹茶更沉穩，鍾意濃郁茶味嘅朋友會愛上～兩款都各有特色，邊個都唔輸蝕，食完真係想再encore！…Read More

平時就好鍾意飲新鮮椰子水，見到喜茶出呢款即刻試下，結果冇失望。入口個椰子水好鮮甜，清爽得來又唔會寡淡，比起 cococean 的椰子水，感覺多咗份自然的椰香，冇半點雜味，飲落好順喉。上面層抹茶奶蓋好加分，質地綿綿密密，抹茶味不會太濃搶戲，反而同椰子水的清甜好匹配，中和得剛剛好。裡面仲有唔少彈牙的椰子凍，咬落口感好豐富，每一口都有椰香、奶香同抹茶香，層次好分明。整體飲落好舒服，清新又唔會覺得膩，感覺同直接劈開一隻新鮮椰子啜飲差唔多，又多咗奶蓋同椰凍的額外樂趣。依家飲完仲想再試，真心希望喜茶可以將呢款抹雲椰青常駐，以後想飲清新解渴的飲品，就有固定選擇啦～…Read More

肥姐小食呢，其實都算幾有特色嘅。佢個冷鹵串味道幾特別，鹵水味幾夠，但可能因為係冷嘅，確實帶少少腥味，唔係人人都接受到。個芥末醬同特調醬勁度幾足，鍾意刺激口味嘅人應該會鍾意，但對我來講有啲過火，食多兩啖會覺得有啲頂。話雖如此，佢嘅食材算新鮮。如果係想試新口味嘅朋友，其實可以一試，但建議一開始唔好點太多，先睇下自己受唔受得住呢種風味啦。…Read More

排隊係常態，我地都等咗成個鐘先入座。其實期望值唔使太高，試過之後覺得算係中規中矩啦。​味道上同內地茶餐廳差唔多，冇話特別驚艷。現烤菠蘿包外皮算鬆脆，不過牛油味淡咗少少，內地做得好嘅店都有類似水準。番茄通粉湯底酸甜度適中，通粉軟硬度就見仁見智，我覺得仲可以。咖喱豬扒飯份量幾足，豬扒炸得唔錯，咖喱汁濃郁度就一般，拌飯夠用。​兩個主食加一個菠蘿包 165 蚊，以呢個水準來講，價錢都算係偏高少少。如果剛好在附近，又唔使排太耐隊，試下都無妨；但如果係專登為咗佢去排長隊，就有啲唔值啦。…Read More

干炒牛河，一上台就闻到阵镬气，明显系即点即炒，镬气够晒香。豆芽放得好多，咬落爽脆多汁，中和咗河粉嘅油润。最惊喜系牛肉，块头够大，分量又足，啖啖都有肉香，真心推介！​咖喱吉利猪扒饭都系必食之选！猪扒炸得外脆内嫩，外皮卜卜脆，里面啲肉厚身又 juicy，咬落超满足。咖喱汁调得岩岩好，唔会过咸，香料味好浓郁，送饭一流。里面仲有炖到腍腍嘅土豆，吸晒咖喱汁！​菠萝油配红豆冰套餐都好有惊喜，热辣辣嘅菠萝包夹住冻冰冰嘅牛油，一啖咬落去，冰火交融，外皮酥脆带住牛油香，甜而不腻。不过男友话食一口就觉得滞，我就觉得啱啱好，可能每个人口味唔同啦。总体嚟讲，呢餐真系食得好开心！…Read More

呢间铺头嘅葱油饭真系有惊喜！先讲个蒜香蜜汁叉烧葱油饭，绝对值得五星推荐！可以免费升级成三蛋，我就拣咗两个流心同埋一个太阳蛋，切开嗰下蛋液冚住成碗饭，粒粒分明嘅米饭吸晒啲汁，加埋甜甜地嘅蜜汁，一口落去香到痹！不过要提一句，钟意清淡嘅朋友可能会觉得略甜，食多咗亦都有少少腻，呢个时候点返杯佢哋嘅冷压柠檬茶，就啱啱好解腻啦。​至于巨人鸡扒劲香葱油饭，都算唔错，但对比起叉烧款就稍逊一筹。鸡扒系一整块好大份，不过要自己用刀叉切开，食起身有啲麻烦。最紧要系葱真系多到离谱，唔食葱嘅朋友千祈唔好乱试，惊住你一口都顶唔顺！整体嚟讲，两款都各有特色，钟意浓味同埋蛋嘅，拣叉烧款实冇错啦！​…Read More

呢间店嘅泰奶真系有惊喜！我点咗正常冰少糖，建议大家都拣少糖，因为佢本身甜味好足，少糖先至系刚刚好嘅程度，饮落喉唔会觉得腻。不过要留意，冰量系固定嘅正常冰，唔可以调整，夏天饮其实几爽，但如果唔钟意太冰就可能要谂下啦。​除咗泰奶，佢哋嘅泰红都好值得试！纯粹嘅泰式红茶，茶味浓到一入口就感受到，唔会被其他味道盖过，反而有种独特嘅茶香喺口腔度散开。平时钟意饮浓茶嘅朋友，应该会钟意呢种够晒「茶底」嘅感觉。​整体嚟讲，两款都各有特色，泰奶带住奶香同甜味，泰红就突出茶香，钟意东南亚风味饮品嘅话，呢度都算系个唔错嘅选择，下次应该会再试下其他款。…Read More

叫咗佢哋兩款招牌：凍紫米杏仁茶小丸子同埋凍椰汁西米露小丸子。上台嘅時候賣相都幾吸引，紫米一粒粒睇落幾飽滿，小丸子圓碌碌咁浮喺上面，影相確實幾靚。但係一入口就覺得，但杏仁味好淡，紫米咬落去仲有少少硬，唔夠軟糯；椰汁西米露個甜度就啱啱好。兩款嘅小丸子都係普通水準，冇話 Q 咁誇張。但真係到唔到網上話嗰種「驚艷」嘅感覺。可能係期望太高嘞。…Read More

之前第一次試佢哋個招牌碗仔翅，其實味道都幾正宗，料足夠淋不過今日再幫襯，點咗咖喱魚蛋同燒賣，呢次真係畀我驚喜到！魚蛋彈牙入味，咖喱香濃得來又唔會蓋過魚肉本身嘅鮮甜，最正係個醬汁，同鴻福堂一樣係帶少少甜嘅，勁好食！燒賣就更不用講，皮薄餡靚，一啖咬落去仲有肉汁爆出嚟，我自己加咗啲辣椒油，個層次即刻豐富晒，辣中帶甜，真係停唔到口。​間鋪位置超方便，油麻地 A2 出口上嚟個樓梯就係，根本唔使周圍找。下次經過，一定會再試多幾樣！…Read More

呢間豆花店就係一間家庭式作坊，冇花巧裝潢，淨係專心做豆花同豆漿。佢哋冇搞咩創新口味，淨係堅持最傳統嘅做法，但就憑住呢份執著，做出嚟嘅豆花滑到離譜！用羹舀起嚟會輕輕晃動，入口仲未嚥就滑晒入喉，豆香又夠濃郁，真係有機會係全港最滑果間。最鍾意佢可以自己落黃糖，甜度由自己話事，唔會太甜蓋過豆味。無論冷食熱食都係 11 蚊，豆漿同豆花一樣出色，豆味濃而不澀。產品選擇雖少，但每樣都做得夠精，街坊鄰里應該都成日幫襯啦。…Read More

呢间铺头所有餸菜嘅料都畀得好足！​🍲冬阴功汤又酸又辣，味道超正宗，仲有足足四只大虾添！食得出好新鲜。​🍤虾饼入面可以睇到大块嘅虾肉，真材实料一目了然。​🍗整只烤鸡嘅表皮烤到焦黄酥脆！！撕开嘅时候仲喺度流油，真系太诱人啦，而家谂起都仲回味紧😋鸡肉亦都好嫩，一啲都唔柴。​…Read More

・鹹牛肉芝士三明治​紅了好耐嘅裕興三明治終於食到啦！！！之前成日刷到，心癢咗好耐，今日終於有機會試吓。份量大到驚人，感覺對一個女生來講真係有啲多，不過食到停唔到口，忍唔住想清盤。​鹹牛肉鹹香夠味，一啖咬落去仲有微微嘅顆粒感，唔會過韌。芝士溶到成舊，牽絲牽到好長，鹹香中帶住奶香，同鹹牛肉真係絕配。麵包烤得外脆內軟，邊邊有少少焦香。​幾種材料夾埋一齊，層次好豐富，鹹香得來又唔會覺得膩。雖然食完有啲撐，但真係好好食，下次要叫埋朋友一齊分住食先得。…Read More

而家呢啲老式饼家真系越嚟越少喇。呢间铺头系实打实嘅三十年老字号，可以坚持咁多年真系好唔容易，都足以证明佢系有啲料到嘅。最吸引人嘅就系各种糯叽叽嘅烧饼。一共有四种味道，原味、红豆、奶黄同花生。要讲最出色嘅，非红豆味莫属！块饼皮相当软糯，带住微微嘅甜味，一啖咬落去，红豆馅嘅香甜就喺口腔里面散开。呢度嘅红豆馅唔系死甜果种，系带住红豆本身嘅清香，粒粒红豆嘅质感都好分明，食落去又满足又唔会觉得腻。奶黄味都几好，夹心似奶黄包嘅内馅，奶香好浓郁。花生味会更甜啲.呢间铺头嘅产品种类好丰富，呢间铺头系实打实嘅三十年老字号都系各种传统老式糕点，比如蛋挞、老婆饼、菠萝包等等，价钱都好平.…Read More