nelsonrambo's Profile

已經係第二次嚟，第一次星期六下午嚟好多人等位，所以冇食。今次星期日晚上光顧，唔駛等位，直接可以入坐。點心店地方較大，坐得舒服，有2人枱，4人卡位，4人圓枱，6人圓枱，各取所需。室內裝修懷舊，枱椅杯碟清潔度滿意，服務態度良好。點心方面，牛腩腸粉，沙嗲豬大腸，薑汁燉鮮奶，流沙芋泥包，較為特別。今次點了流沙芋泥包，叉燒腸粉，金牌炸芋角，咖哩蒸魷魚，薑蔥牛柏葉，五柳炸雲吞，黑椒牛仔骨，薑汁燉鮮奶，大至上滿意，只係牛柏葉唔夠淋，薑汁燉鮮奶唔夠滑，唔夠薑。總結茶位每人$6，冇加一，點心價錢不貴，晚上去坐得舒服，一試可再試。…Read More

星期一聖誕節假期中午，全日早餐價錢$138（7款食物），有黑松露炒蛋，日本腸，牛油果，沙律菜，雜菌，牛角包，煙三文魚，平均每款$19.7。早餐有兩款，可配煙三文魚或煙肉，兩者價錢相差$20。總結先俾錢後送餐，冇加一。炒蛋混合黑松露一切炒，啖啖黑松露，好味，不似坊間只係將黑松露擺上蛋面。早餐價錢略貴，份量偏小，輕食可以，地方較大，坐得舒服，鄰近地鐵站出口，交通方便，可坐室內，亦可坐室外，行完壁畫街，絕對係一個充電嘅好地方。…Read More

星期日晚上9點，等位等咗半個鐘，9點半終於入得，我終於明白，好嘢係值得等，食咗一個鐘，晚上10點半仍然有人等位，佩服。今次幫襯，係因為籠仔蒜蓉龍蝦蒸飯而來，點心店都有龍蝦蒸飯，真係聞所未聞，龍蝦蒸飯創意滿分，你敢賣我敢試，龍蝦不是波士頓龍蝦，應該係本地龍蝦，可惜蒜蓉過多，蓋過了龍蝦，味道一般，燉湯幾好味，湯多渣小。茶位每人$6，每叫一個絕配套餐茶位減收一位$3，套餐包籠仔蒸飯一款，燉湯或湯餃一款，另外可加兩款指定點心，每款$10，最多兩款。點心方面，較特別有龍蝦餃，三色小籠包，鮑汁花膠鵝掌，人參灌湯餃，紅菜頭蘿蔔絲酥餅，點心拼盤。總結點心店冇加一，如果冇咁多人等位，值得一試。…Read More

星期六晚上，全日早餐價錢$125＋$12.5（7款食物），有包，豬肉香腸，煙肉，炒滑蛋，茄汁豆，烤蕃茄，磨菇，平均每款$19.6。總結早餐價錢略貴，款式較小，但份量偏多，味道合格，未叫食物已經送上麵包，加$30有餐湯或沙律配汽水或冰茶，餐廳地方夠大，坐得舒服，只是二人圓餐枱過小，擺放食物很逼。…Read More

星期六晚上，全日早餐價錢$98（8款食物），有豬肉香腸，煙肉，雜菌，蕃茄，沙律菜，酵母吐司，茄汁豆，炒蛋，平均每款$12.2。早餐味道合格，最特別係可選炒蛋或煎蛋，如叫飲品冇任何優惠，冇加一，地方夠大，坐得舒服。今次飲咗杯凍抹茶，外表一流，但份量偏小，唔好以為杯抹茶上面係牛奶下面係抹茶，原來白色係泡沫，變相只得半杯抹茶，下次飲熱飲會好啲。反而小食炸魷魚配他他醬，有驚喜，夠熱夠脆。總結行完波鞋街，絕對是一個休息的好地方。…Read More

星期一下午，英式早午餐價錢$118＋$11.8（8款食物），有意大利黑松露醬炒滑蛋，黑松露豬肉腸，挪威煙三文魚，法國核桃杏脯包，法邊豆，雜菌，蕃茄，Granola希臘乳酪，平均每款$16.2。餐廳提供兩款早餐，有英式和素食，可按自己口味選擇。總結今次係第一次幫襯，有點喜出望外，早餐包南瓜湯和飲品，除咗法邊豆外，食物質素滿意，最愛希臘乳酪，好味。午餐時段設加一收費，可用QR code點餐，坐位坐得舒服，服務態度良好，只是星一至五先有午餐提供。好耐冇試過，食過一次又想食多次，證明只要有質素，下次一定會再見。…Read More

星期五晚上光顧，先講整潔評分，地下冇垃圾，枱面和茶具都清潔滿意，整體良好。有4人卡位，有6人圓枱兩張，有4人長枱，長枱合埋可坐8人，坐得算舒服。點心方面，一般蒸飯炸物甜點都有，種類算多樣化，還有套餐供應，幾款炒飯和蒸魚，包豆漿一杯，最特別係有壽包預訂。茶位每人$10，有QR code落單，夠方便。星期一至五早午晚冇加一，其它日子要加一，所以識飲要平時光顧，唔計較加一隨時幫襯都冇問題。今次叫咗10樣點心，除咗糯米飯較硬，羅白絲魚餅過腍，味道大致滿意，只是點心款式過於傳統，所以只為食點心，可以一試，如想試一啲特別嘅點心，恐怕會失望。點心每款價錢不同，不是用小點中點大點計算。傳統酒樓蒸嘅點心，好多時都會墊底，墊底嘅意思係，例如牛肚下面會墊芋頭，山根之類。這裏嘅蒸點心，都有墊底，一碟點心，兩種味道，好唔好就見人見智。總結最滿意係枱椅餐具十分整潔，晚上套餐價錢略高，點心未加一價錢尚可，平時幫襯較着數。…Read More

支前寫過10多篇全日早餐，唔知係唔係食得太多，患上了全日早餐厭食症。所以今日我要介紹嘅係全日點心，All day dim sum。顧名思義，由早上至晚上都有點心食。酒樓同點心店可否共存，我有以下見解。酒樓有加一，點心店冇加一。酒樓多點心，點心店應該只得酒樓嘅一半點心。酒樓點心多數係蒸好（除了高檔酒樓），點心店即叫即蒸。酒樓可以坐3至4個鐘都冇人理，點心店視環境而定，如果有人等位，可能食完就走，冇得留低，因為坐得耐，會俾人眼望望。酒樓有炒飯炒麵食，點心店有蒸飯食，有啲都有燒味提供。酒樓晚上冇點心食，點心店全日都有點心食。酒樓有12人大枱，可以一班人坐，點心店地方有限，2至4人最為合適。最終結論，就算點心店附近有酒樓，因為大家嘅客路唔同，只要點心好食，都可以並存。講回正題，是晚光顧御點，環境整潔，地方淺窄，可容納約22名顧客，枱與枱之間較近，算是小型點心店。一般點心蒸飯炸物甜點應有盡有，成功嘅要點，係要人冇我有，做一啲特別嘅點心，才會事半功倍，客似雲來。餐牌中較為特別係御點四小碟和御點九宮格，一個價錢可以食幾款點心（類似坊間嘅點心拼盤），一個人嘅可以叫御點四小碟（8件點心每款1件），兩個人嘅可以叫御點九宮格（18件點心每款2件），悉隨尊便，如果點心可以自由選擇，或會更親民。總結御點九宮格打卡一流，點心不錯，唯獨叉燒酥唔夠酥。茶位每人$5起，另有冷泡烏龍，冇加一，點心即叫即蒸，有創意，夠細心，下次可以再嚟。後記今次叫咗款御點九宮格，送上點心後發覺點心唔同咗，春卷變鮮蝦腐皮卷，粉果得1柆，燒賣多1粒，經查問後原來春卷賣晒，粉果只剩1粒，所以服務態度有待改善，應該叫點心前提醒客人，有點心賣晒，可否轉其它款式。…Read More

是日星期日晚上，明太子雞翼全日早餐價錢$128＋12.8（8款食物），有明太子雞翼，黑糖麻糬窩夫，茄汁焗豆，焦糖香蕉，炸薯寶，炒蛋，炒雜菌，凱撒沙律，平均每款$17.6。餐廳提供三款全日早餐，有經典，有明太子雞翼，有加拿大龍蝦，可按自己口味選擇。全日早餐味道不錯，食物夠熱，窩夫好味，凱撒沙律分開擺，要加分，唯獨凍抹茶鮮奶，嘅細杯而且抹茶粉唔溶，要扣分。餐廳環境滿佈人氣偶像海報，fans必到。總結價錢略貴，可以一試。…Read More

是日星期六下午，超豐盛全日早餐價錢$118（12款食物），有煙三文魚，煙肉，大啡菇，薯巢，黑松露醬炒滑蛋，雞肉腸，德國腸，沙律菜，大番茄，茄汁豆，蜂蜜，丹麥吐司，平均每款$9.8。先付款後送餐，冇加一，唯獨送餐時間較長，需要耐心等候。餐廳環境簡潔優美，與優質嘅食物，簡直無語倫比，打卡必到。超豐盛全日早餐，絕對冇收錯名，實至名歸，早餐好豐富，薯巢好特別，加上蜂蜜食一流，飲品特別但嚴細杯。總結服務良好，食物有質素，可以一試再試，推介。…Read More

是日星期日下午，煙燻三文魚全日早餐價錢$98＋9.8（8款食物），有煙三文魚，牛油果，煙肉，炒蛋，磨菇，沙律菜，茄汁豆，牛角包，平均每款$13.4。餐廳提供三款全日早餐，可按自己口味選擇，確係不錯。鄰近地鐵站，交通方便，唯獨附近較靜。天水圍終於有一間可以食到全日早餐嘅cafe，水準同價錢可比美香港區嘅西餐廳，早餐係合格，但嚴份量偏小，餐廳室內較細，要坐外面或隔離鋪頭。總結可以一試。…Read More

是日星期六下午，全日早餐價錢$98（8款食物），有香腸，煙肉，炒滑蛋，焗豆，烤番茄，磨菇，吐司，炸薯餅，平均每款$12.25。餐廳以先俾錢後送餐，服務態度良好，早餐味道合格但冇驚喜，鄰近地鐵站交通方便，一出地鐵出口就到，飲品拉花好靚。不過餐廳有3分2坐高椅，坐得唔舒服，只有英文餐牌，冇中文餐牌。總結可以一試。…Read More

是日星期六晚上，超級全日早餐價錢$128（10款食物），有沙律菜，車厘茄，炒滑蛋，秘制焗豆，新鮮水果，煙肉，紐倫堡腸，煙三文魚，芝士大磨菇，奶油麵包，平均每款$12.8。餐廳提供三款全日早餐，有超級，有美式，有素菜，可按自己口味選擇，亦可加錢轉牛角酥和加配料，惠顧主食飲品有半價。總結全日早餐全日都有得食，抵讚，環境寧靜，坐得舒服，第一次食早餐水果有藍莓略驚喜，味道和份量，接近完美，唯獨炒蛋有蛋殼，要扣分。…Read More

Uluru主打High Tea同餐廳布置。是日星期六下午，全日早餐價錢$138＋13.8（8款食物），有松露忌廉炒蛋，雜菜田園沙律，肉眼扒開邊三文治，煙肉，龍蝦汁海鮮酥盒，日式螺肉，港式雞蛋仔，煎香草腸，平均每款$18.97，午餐時段包餐湯和凍飲一杯，特飲另外加錢。總結早餐配搭有心思，雞蛋仔加螺肉好地道，環境優美，打卡一流，海鮮酥盒好味。不過雞蛋仔唔脆好淋，唔好味，肉眼扒開邊三文治變肉眼扒法包。期待下次再去試下午茶。…Read More

是日星期五晚上，餐廳新開數日，已經坐無虛席。好彩訂了位，如果唔係又要食閉門羹。今次光顧，是為了新張期內9月30日前，二人晚餐做緊特價$368，所以一試。其次是為了佢哋嘅招牌菜，全日早餐而來，可惜早餐晚上冇得食，唯有下次下午再嚟過啦。講返個二人晚餐，有南瓜湯兩碗，一碟沙律菜，一份熱嘅迷你海鮮拼盤，一份牛扒，一碟意粉，兩杯餐飲或甜品，兩個人食份量足夠。總結服務態度良好，食物質素不錯，可惜環境音樂過大，加埋人聲好嘈，位置隔涉，不是太就腳。試業期間，仲有好多改善嘅地方，例如音樂聲過大，南瓜湯賣晒要再煲，上主菜慢，海鮮拼盤冇帶子轉蜆又冇通知顧客，晚餐甜品賣晒只有餐飲，晚市只提供二人晚餐，一個人食要散叫，餐廳電話壞咗冇得直接訂位。期待下次，會變得更好，再試全日早餐。…Read More