Lau Joseph's Profile

假日為朋友慶祝生日 ，有人就提議打邊爐 ，有人就提議鋸扒， 又有人提議食自助餐，都真係一個食野大辯論呀﹗傾咗咁耐，最後一致共識食自助餐， 並選定帝景酒店 ﹗到黃昏，我地就搭地鐵去荃灣站，再轉酒店穿梭巴士 ，話咁快就到。到酒店坐好後，因為我第一次來， 不知道食物水準如何？所以每樣先拿小小試一試味道。食物種類好多，我喜歡的有燒羊架，燒黑毛豬，燒牛肉 ，翡翠螺 ，蒜蓉焗蠔 ，牛筋腩， 蒜蓉焗龍蝦 。燒羊架味道不錯 ，師傅燒得啱啱好， 不會太韌。燒黑毛豬汁酸得好入味，非常好味 。燒牛肉翡翠螺都有一定水準。 蒜蓉焗蠔和牛筋腩味道也不錯，蒜蓉焗龍蝦非常之好，好合自己口味。之後不斷進食，食得很飽。甜品緊係唔少得，好多選擇，嘩真係唔點揀好，款款都想食，咁阿叔我就緊係忍下手啦，年紀大更加要養生嘛，同埋做個好榜樣比啲後生嘅睇。無多無少就係食咗枱面咁多炸。今餐無得彈，好食，交通方便，抵食，等我隨時有時間再來都好喎。…Read More

金記冰室我都去過好幾間，價格相宜，食物有水準，所以時不時都有去食。估唔到今日經開apm都見到有金記冰室，看到餐單甚有驚喜，正好朋友仔同我都要醫肚，咁就立刻要入黎試試有乜新美食啦。最吸引我係呢個金記招牌煎烏冬($68)，印象中未係我去過既分店見過呢，一上桌原來比想像中大塊咁多，而且好多塊，足夠幾位朋友分享，好抵食。煎得脆卜卜，既有蛋香又有烏冬的柔韌口感，好好食，推薦！呢個鐵板美式雜扒餐，有齊牛扒、豬扒丶雞翼、腸仔、煙肉、竟然才$78！相信如果要有同樣的份量和質素，出面幾乎無可能搵到呢！肉類都好新鮮，嫩滑多汁，很有BBQ的即食風味，附送的羅宋湯亦香濃惹味，值得一讚！飲品方面，相信大家睇餐牌時個目光一定移不開呢杯熱情果果茶(熱$34)(凍$38)。杯內的水果除了熱情果，仲有草莓、檸檬等，非常鮮甜，加上冷熱都咁大杯，冇可能唔試吧！…Read More

酒真係上帝嘅一個偉大發明，阿叔我年紀大，難免有時身體有D小毛病，又或勾起一些過往嘅絲絲哀愁飲完杯酒，真係寧舍精神爽利，好似種種煩惱都睇得開咗香港多啲人飲酒，真係自殺率都低啲架呢日有咩煩就唔覺啦，總之我就去咗呢間野飲杯好酒比利時嘅KWAK啤酒，加上用呢隻獨有酒杯真係特別有味道聞落有蜂蜜味，大概由於隻杯嘅關係，倒落有唔少氣泡，好特別飲落有麥香，帶點苦味，但之後會有輕輕甜味，好似人生咁，通常都係先苦後甜，但回味返總係好有層次同味道有好酒點少得好菜，呢大條香腸就一流，香脆又肉質可口，正咁又一晚，所謂一醉解千愁，我無千愁咁慘不過都諗通左好多…Read More

同老婆大人行街行到累，都要食個甜品嘅，雖然老夫老妻，情趣都不可少其實都唔平，決定兩公婆一個套餐最後決定食JUMBO芒之丸子套餐 $75小食就要XO醬蘿蔔糕同香脆薯角JUMBO芒之丸子套餐都唔錯，芒果味都幾香小丸子咬口都幾OKXO醬蘿蔔糕，幾軟腍，不過唔係好夠香，但都OK啦，太香又唔知有無味精香脆薯角都OK香但就唔夠脆，唔記得影相食完繼續行街，呢餐幫我地行到累叉叉電都幾好綜合黎講$75就都係有D貴，六十蚊度會比較合理…Read More

阿叔我搵食最鐘意食性價比高，呢間四十幾蚊有野飲送，都算OK好快就落左單，朋友都有ORDER，不過唔講咁多啦，遲D可能佢地都寫食評唔幫佢地寫，唔好睇小我地，我班FD雖然都一把年紀，但個個都有返咁上下潮架寫食評，都唔係好難者，好多"文老"都寫得一篇好文章呢個就係我食嘅咖哩牛腩飯$45係好食嘅，呢張圖唔作得準，我只係筆左少少落去啫，其實份量都OK多牛腩夠腍，咖哩香濃，係好食嘅呢餐真好食，食得抵食下次再食過先朋友都話食得開心…Read More

阿叔我呢排得閒，就黎食個LUNCH寫篇食評個FEEL好企理有格調，台灣菜一樣可以好浪漫睇下MENU先，價錢又好似貴左些，阿叔不嬲慳家慣架嘛，何況依家只係自己一支公食，唔想咁豪正想走架啦，點知睇下呢個餐，幅圖睇落又幾吸引喎，同埋百零蚊有野飲有小籠包，如果夠高質，都制得過個套餐$108，總共有：金牌鮮肉小籠包﹑紅燒牛肉麵﹑珍珠奶茶紅燒牛肉麵牛肉好軟滑，高質好有牛味，麵條軟滑金牌鮮肉小籠包小籠包汁多餡靚，又係高質，不過得兩粒少左D杯珍珠奶茶都好味，夠香滑，唔係街邊粗製濫造之作一句講哂好食，百幾蚊，豪比佢!…Read More

食日叫人要食得健康嘅阿叔我，今日被迫要黎食餐好，呢餐邪惡又唔健康，不過老婆大人叫到，緊係要識做啦入到黎，嘩個環境堅係靚，個FEEL仲要鬼咁浪漫，難怪老婆大人咁識擇食物就當然係唔健康架啦，不過又唔係咁肥膩喎，勁好食得黎又唔油，真係一分錢一分貨高檔野係唔同，食物都好新鮮好似圖中嘅長腳蟹同青口咁，咁好味，又真係好難忍口，結果都係要破戒一再食壽司同雞肉串燒呢類又點笑得，又幾好味，肉質上乘，香氣撲鼻，而且那種鮮美唔係靠味精非一般普通小店可比三文魚+餅乾+芝士水準高質，一樣好好味今餐食下飯睇下靚景吹下水，愉快嘅一晚趁仲同老婆行得走得食得，有時對自己好D都唔係過份嘅…Read More

呢間野，其實已經係9月時食架啦，但點解要寫呢，因為都有紀念價值，食完呢間之後，我就唔知點解那個月起係咁有人約我食泰國野言歸正傳，呢間野堅係好高嘅，其實都出名都成日聽啦先要講下呢個生菜包肉碎 $92，有得DIY自己包，其實幾好玩，D肉碎又勁好味飛天炒通菜 $65個名都幾霸氣話要飛天，不過又係好食，通菜係我最愛嘅菜之一，所以我話佢煮得好食，就一定好食青咖哩 $85唔太辣，溫柔嘅青咖哩好岩我口味，好似老婆咁有時會花少少辣脾氣但總體都好溫柔泰式炒金邊粉 $82呢個又係無得輸，大碟又香唔駛講，炒得恰到好處，勁爽口好味咁又一餐，可能太好味，朋友都想我想回味泰國野所以成日約我了…Read More

人大左，食野都實際左，健康第一，所以呢餐都唔例外叫左個菜先黎個菜先，菜係最有益健康食落，都OK喎唔錯，唔係油，蒜香都夠香，清爽可口炒粉，麻麻地啦，味道唔係好夠，都唔緊要阿叔我食下輕口味都OK，不過菜仲多過D炒粉，我就唔係好理解呢個雪糕甜品，本來好正嘅，倒D野跟住點火真係唔食得都睇得食落，嘩倒那D野原來係苦架，藥水咁於是一路"筆"上面D野就要小心唔好跌落碟底D苦藥水度阿叔我唔識呢D後生仔野，真係唔知佢地點食唔係計D苦水，其實應該係好食嘅一句講哂，阿叔我年紀大，真係唔多識欣賞，不過都唔係真係差，比個OK啦…Read More

食得多肥野，係時候食返健康D阿叔年紀大，更加要注重多D健康否則唔擺得幾耐尤其係鬼佬野，多肉又多油，所以決定食下港式茶餐廳當然港式茶餐廳一樣有肥同油嘅野，所以專登擇間有比較清D的菜色嘅，又好味嘅唔想咁多, 有菜有魚一餐先，先黎個蒜茸炒西蘭花 $55真係正，油唔多，但蒜茸已經夠香，可見真材實料清蒸海斑 $88咁好鮮美，魚肉嫩滑，魚香撲鼻歌有得唱，鹹魚白菜也好好味我呢餐，清蒸海斑加蒜茸炒西蘭花，更加無得頂!…Read More

究極點解我會黎左新滙江食飯?我都唔記得啦，連我order左個咖哩海鮮炒飯都無印像茄牛飯就應該係朋友嗌嘅，不過我好似係未同佢share食呢?又唔記得左，年紀大機器壞就咁咁，間唔中會斷片無哂記性咖哩海鮮炒飯都啦，都幾香口，而且份糧十足雖然斷斷地片，但作為食家當然對食還是講究。咖哩海鮮炒飯無錯味道係ok，但海鮮配料得咁少，我就接受唔到啦，係未可以認真少少呢，茶餐廳都係餐廳黎架今次呢餐咁偷工減料，我最後都係比ok就算，唔拆人招牌都等看倌做個心理準備。…Read More

呢餐唔講得笑，個舊同事榮休呀，咁多年老死緊係要黎捧下場啦，當年真係共赴患難絕望裡緊握你手架開席前影嘅，都SET得幾挸喎呢個舊同事人面都算勁啦，包左個房，開餐時仲座無虛席添呀，一個字勁菜式都唔少貴野架，嘩又有碧綠蚌片桂花蚌，又有釀蟹鉗桂花蚌同埋蟹，都食得出係好檔野，口感一流，味道鮮美當然我最愛都係清蒸珍珠躉，魚肉夠嫩滑，仲有當紅脆皮雞外脆內軟又係正飄香荷葉飯都真係幾香，飯又口感軟腍今餐係好味，祝福個同事退休後都生活美滿…Read More

呢餐真係食得搞笑，本來想住黎買少少野就走，點知撞到個FD，係都要捉我陪佢食晚飯既然盛情難卻於是就陪佢食返餐啦個朋友都起勢係咁ORDER，話咁快就叫左四個菜個個都大大碟，阿叔我胃口唔大，都驚驚地食唔哂朋友就話食得哂，至怕佢眼闊肚窄做大嘥鬼叫到就頂硬上，呢個炸藕餅炸得香脆，配埋個辣醬無得輸炸魷魚粒，味道香脆，外脆內軟當然唔少得呢個鵝甜品，好好味，香油味四溢今餐就咁被迫地被請左一餐，不過總括黎講係開心嘅…Read More

呢餐老婆叫到，話間野有師奶朋友食過幾正，咁我就陪佢黎食下呢頭都好多年輕人野，黎到好似個人都年輕左咁呀仲有得溜冰，諗起後生那時都成日溜冰，依家日久生疏，老骨頭都一跌都非同小可，都係唔玩啦今日我就擇左呢個，唔記得叫咩牛油菇意粉總知就好食，個意粉好軟滑，配上D香蔥好香，當然個菇都唔講得笑，又大又軟滑係好食，不過入面地方細枱唔多，真係要早D黎先有得食呀呢度都好多情侶黎食，唔係情侶黎食嘅話反而會唔係幾自在，哈哈下次叫朋友黎食，都要提佢早D先有得黎食…Read More

呢日同個老細黎睇戲，點知遲左到條，阿叔至憎人遲到，竟然自己遲到添，不過我情有可原架，阿叔年紀大D牙唔好，去左睇牙，搞得耐左，未妟左咯咁又真係時間唔多，唯有一齊食簡單D先，最後就擇左呢間德興食個米線自選最好，自由配搭，我就擇左腐竹+雞肉兩個餸咁就$35雞肉質素都唔錯，爽口，口感唔錯有雞味腐竹都正常質素，不過不失呢排食得重口味左少少今餐食返清淡，所以只係要清湯話咁快食完就準備去睇戲啦好在食得快，仲有時間慢慢行返過去戲院…Read More