foodiegenie's Profile

食開魚肉豬肉燒賣嘅我，第一次接觸雞胸肉燒賣都有啲猶豫。自從朋友介紹咗Nood的雞胸肉燒賣，每次做運動前肚餓都會揀佢~ 有四個口味：Original, Black Truffle, Coriander, Ma-La Spicy，個人最鍾意麻辣味🤗 食完除咗滿足到食燒賣嘅口癮，又可以補充Protein，就算食晒6粒都冇guilty feeling🤭至於飲品，呢杯Iced Americano 好酸，失望。之前都飲過nood food 嘅latte，朱古力等等，都係冇得同其他連鎖咖啡店相比。不過，nood 既shake 係唔錯，特別推介Berry Pump🫐🥤…Read More

雖然店舖名係老表雲吞麵，但個人認為這裏的豬潤比雲吞更出色🤭我哋叫咗「雲吞豬膶麵」和「雲吞煎魚餅麵」。湯底非常清淡，可以說是無味的，要靠其他配菜帶出味道，還有不可缺少的辣椒油。雲吞好大粒，內有粒粒蝦肉，不過我認為唔夠爽口，肉質有點實。煎魚餅好大塊，冇腥味，一塊切開三件，只有一塊有煎燶，我自己鍾意食煎燶嘅魚餅，所以覺得另外兩塊比較清淡。豬潤夠厚身，味道濃郁，洗得幾乾淨。P.S. 不少食評都讚辣椒油，真係唔錯…Read More

唔係有人帶路，都唔知道街市隱藏住一間咁好味嘅堂食荳品店🤭豆腐花帶有豆香，口感順滑，仲要價錢唔貴，可以話係暫時食過最好味嘅豆腐花😳 至於煎豆腐，店家一直用溫火慢煎住d豆腐，但係又唔會煎燶、又唔會有油膩和翻煎嘅感覺，控制得好好。魚肉冇腥味，但可以厚番少少就好啦。一碟四件簡直唔夠喉🫢見到有唔少街坊幫襯，唔係活躍於呢頭真係未必識得搵。趁仲未俾遊客發現，要幫襯多幾次🤭 下次有機會會試吓其他荳品，如豆漿、腐乳、豆卜。…Read More

見咁多人講劉興記，喺週末下午排咗半個鐘入座，在充滿期待之下終於試到啦！豆漿係免費任飲，濃郁嘅豆味，似乎係無糖/低糖🥛招牌生煎包之前幫襯堅信號，上碟嘅時候竟然係凍嘅，好離譜🥲所以劉興記熱辣辣上碟，已記一功！店舖講明唔爆汁可以換過隻俾你，事實上個包都幾Juicy肉味好濃，單價$10/隻，合格啦👌🏻排骨蔥油拌麵排骨炸得不錯的，唔會太過乾身硬梆梆，仍然保留到排骨的肉汁和肉味。同行友人覺得咁樣煮個排骨好似吉列排骨，同平時食開嘅上海排骨唔同，呢樣就各花入各眼啦👋🏻至於蔥油麵，麵的份量太細，蔥油唔夠，色香味欠奉🥺招牌擔擔面麵條比一般食開嘅粗身，口感唔同。最主要係個湯底真令人失望，好淡、沒有花生味。雖然配料有大量肉碎和櫻花蝦，但係完全突出唔到應有的味道😟蟹粉小籠包小籠包嘅皮夠晒薄，肉餡好大舊。不過，熱食的時候仍食到蟹粉有點腥，要連同薑蔥絲和醋一齊食比較好。店舖座位唔多，亦都好迫，天花嘅射燈照住塊面，用餐時感覺又熱又焗，堂食唔係好舒服。食物質素平平，價錢係抵嘅，如果唔使排隊又想平平哋一餐都有得諗。…Read More

我哋嗌咗兩個套餐：「豬頸肉 x 西班牙豬五花 x 富士蘋果地雞肉」 ＋「牛五花 x 牛小排 x 日本雞頸肉」，追加牛舌。個人認為舖頭走嘅路線同燒肉like差唔多，肉類選擇更比燒肉like多，不過價錢都貴啲。總括嚟講，肉類排名：🥇牛肉 + 雞肉 > 豬肉 🐮牛小排有牛味，不過略嫌切得太薄，如果有返啲厚度就Perfect了。🐮牛五花 有牛味，正常發揮，如果可以再揀會只叫牛小排。🐮牛舌食落有彈性又唔韌，但係味道一般。🐣富士蘋果地雞肉肉質嫩滑，醃料令到肉味好清新，十分推薦！🐣日本雞頸肉同富士蘋果地雞肉一樣，肉質嫩滑。🐖豬頸肉爽口，厚身。🐖西班牙豬五花肉質有點韌，每件好大塊，若可切細啲會更加好。兩個餐都升級咗紫菜溫泉蛋飯，感覺蛋味和紫菜不足，越光米亦食唔出有咩特別，都係牛角嘅最好食。配菜方面，泡菜嘅份量非常多，可惜只有辣味，唔好食。沙律都算新鮮，蔬菜爽口。麵豉湯出奇地好，唔會太鹹。…Read More

由開張食到而家，試過晒牛奶冰室嘅早午晚茶餐，最好食嘅都係晚餐小菜。見證餐廳品質越嚟越差，每次都諗住可能係一時失手，再俾多次機會，但係食完今次認為除非冇選擇，否則幫襯機會不大。今日嗌咗星洲炒米，$68的份量的確好大，足夠兩個人食。賣相係唔錯，配菜又多，但係食落就真係中晒伏。首先，炒米太濕太腍，麵條黐住晒一舊餅咁。雖然配菜種類和份量都算多，但係味道不夠辣，亦沒有黃薑味。這個星洲炒米比較似「星洲濕米」🥲至於餐廳環境還是不俗的，有大玻璃讓自然光透入室內，感覺柔和。餐廳都用手機自助下單，餐具和斟水都係自助，所以侍應與客人的互動位唔多。雖然味道未去到難食，但的確叫人失望。若餐廳打算以份量取勝而捨棄味道，睇嚟會流失越來越多嘅客人。…Read More

每次見到一大班遊客排隊食紅茶，心諗「茶餐廳都要排？！」。當時仲未知點解D遊慕名而來，最近食完幾次終於明白紅茶性價比真係高，屬於高級版茶餐廳，我都食過返尋味，試過一星期食兩次🤭▫️板燒黑椒西冷牛扒 $72▫️兩塊薄牛扒，大量嘅黑椒汁，意粉又多，餐廳出手好大方。相比友人的鐵板西冷，我呢塊嘅肉質唔韌，雖然有鬆肉粉味，但味道唔錯👍🏻 意粉有少少蕃茄蓉襯托，最主要都係撈黑椒汁嚟食，所以蕃茄蓉少啲都冇所謂。平時出去食扒餐都會遇到醬汁唔夠嘅情況，但係紅茶出手闊綽，d汁多到滿瀉🤭 若要挑剔的話，黑椒汁有少少鹹。▫️蒜蓉美國西冷牛扒鐵板 $125▫️叫咗5成熟，但係上碟時已Overcooked。足足1寸厚的西冷，沒有比平價版的好味😟 肉質有點韌和鞋。不過，蒜蓉汁幾出色，好好味又唔過鹹。綜合兩款牛扒、醬汁和配菜，個人認為平價西冷嘅性價比完勝鐵板西冷。另外，之前都有幫襯紅茶嘅晚飯小炒，唔錯！P.S. 只收現金，如可以提供其他支付方式更為方便。…Read More

馬鞍山難得有新開嘅拉麵舖，好期待去試吓！店舖座位唔多，平日下午幫襯都坐滿，間唔中見到要排隊。唔知係咪新開張，廚房有啲做唔切。今日order咗一碗拉麵，落單後等咗25分鐘先有得食🥲好彩今日唔趕時間，但係相信這個等候時間應該對很多顧客造成不便，亦解釋到點解店外會出現人龍。叫咗期間限定的「海老濃湯叉燒拉麵」，湯頭ok 唔會太鹹。拉麵就煮太過腍，沒有口感，份量較少（可能預咗客人免費續麵）。叉燒好大陣醃製的酒味，蓋過晒叉燒本來的味道☹️至於配菜木耳絲和蔥絲份量唔多。個人認為味道一般，可取的是份量和不過不失的品質，$59呢個價錢總不能要求太高吧。另外，店舖需以手機落單兼即時付款。付款時，顧客需輸入信用卡資料。對於已將信用卡捆綁手機而唔帶卡出街嘅客人來說，實在有點不便。如可加入google pay/Apple Pay，讓客人免去輸入資料的麻煩會更好。…Read More

陳儀興品牌越嚟越多副線，以前食過牛腩麵覺得唔錯，今次就試試朋友介紹嘅火鍋店。好好彩，冇book位嘅情況之下5分鐘就入座。✅胡椒豬肚 x 潮州沙嗲湯底呢兩款都係店舖推薦，試過之後果然冇介紹錯👍🏻胡椒豬肚湯有大量鹹菜和豬肚，胡椒湯好暖胃，如果可以加入枝竹就更加好！沙嗲湯內有豆卜，吸晒湯底嘅精華。兩款湯都越滾越入味，但係食落又唔覺得鹹。✅招牌手切肥牛（大）肉質細軟，有油香，牛味突出。侍應話係用安格斯牛小排，好味！✅西洋菜餐廳得意將較老嘅根部切除，只保留大部份鮮嫩嘅菜葉，好細心🫰🏻✅豬粉腸粉腸洗得乾淨，冇好大浸內臟味，冇一條係苦嘅。✅脆皮午餐肉煎封厚切長條型嘅午餐肉，份量十足。不過味道略鹹，似乎係來貨問題。👋🏻炸魚皮粉漿好厚，感覺一般。✅素生根正常發揮。✅潮州手打魚麵爽口又有魚肉味，感覺好似食緊白魚蛋嘅長條版！👋🏻蟹籽墨魚滑口感爽口彈牙，不過墨魚味欠奉。👋🏻新鮮黑柏葉似係用急凍嘅柏葉，雖然爽口，但跟真正新鮮黑柏葉還有距離。侍應服務殷勤，熱心介紹有咩好食但唔hard Sell。幾欣賞呢度大部份嘅菜式可以雙拼，啱晒d 食得唔多，但係乜都想試嘅客人😌 餐廳越夜越多人，而且多數都係一大班人幫襯。雖然今日冇預約都能成功入座，但係都建議有興趣幫襯嘅朋友穩陣起見book咗先。今餐好滿意，食得飽價錢又合理。陳儀興火鍋將會被加入我嘅日常餐廳list ✍️…Read More

細細個就開始食Pizza Hut，講緊係仲有自助沙律吧嗰陣已經幫襯。以前幫襯真係覺得好好味，而家個味道大不如前，新品更加係伏伏伏。所以咁多年來，多數都係叫經典食物。今次叫咗個下午茶餐，價錢係抵，不過味道一般。酥皮忌廉蘑菇雞湯👋🏻忌廉湯嘅蘑菇只得兩塊，湯水好稀，自己整金寶湯仲好味。唯一可取就係塊酥皮，唔係周圍都有酥皮湯。香蒜肉絲意粉👋🏻份量算多，以一人份量嚟講足夠有餘。不過今次個意粉太過濕，豬肉粒又有臊味。幫襯過唔同分店嘅Pizza Hut，都發覺每次嘅食物水準都唔同。今次食完個意仲感到好口渴。雖然對於今次的份量滿意，不過味道的確令人失望😕辣味雞翼👍🏻呢度嘅辣味雞翼味道唔錯，係出面食唔到的！侍應服務一般，上菜嘅時候為求就手將餸菜擺埋一邊就算，擺入少少方便個食客都唔識。至於環境衛生，餐具有啲污糟，要用紙巾抹過先可以用。餐廳對於員工培訓和衛生方面需多加留意。…Read More

當年鼎泰豐風靡唔少香港人，啱啱喺香港開舖都慕名而來，覺得唔錯。時隔多年，今日再幫襯，已經不是嗰個味道了。滷水牛肚作為冷盤餐前小食，份量算多。牛肚唔韌，切到薄薄的一片好易咬開。 不過，滷水味有點過鹹。高湯炒豆苗豆苗食水好翠綠，炒得唔老。清清地用高湯炒，感覺健康👍🏻排骨蛋炒飯炒飯未能做到粒粒分明，炒得有啲濕。至於排骨，這個醃料令到排骨有點臊味。整體來說非常一般。蟹粉小籠包小籠包唔算大粒，感覺上豬肉的份量比蟹粉多，未能突出蟹粉味。豆沙小籠包呢個甜品係友人必點，食一粒半粒OK嘅，再食落去覺得豆沙偏甜🙂‍↔️埋單500幾蚊，性價比唔高，但出奇地生意唔錯，可能係商場/位置吸引人流，但我諗下次再幫襯嘅機會都唔大。…Read More

本身以為呢間係萬豪集團旗下嘅餐廳，諗住萬豪會員有折，點知餐廳只係租用酒店內嘅單位，並唔屬於集團旗下餐廳，所以冇優惠。不過，見到OpenRice咁多好評，就算冇discount都想試吓🤭👍🏻招牌白胡椒蟹炆飯底上碟嘅時候，濃濃嘅白胡椒香飛撲埋嚟！侍應再將白胡椒汁灑落個鍋，與炆飯撈勻，令到粒粒炆飯被白胡椒汁包圍！加上係用瓦窩上碟，炆飯有飯焦，食落惹味有咬口。至於白胡椒蟹，大隻又多肉，肉身新鮮甜爽口，白胡椒味入味。餐廳好貼心會有手套提供，方便食蟹使用。呢個菜式好適合秋冬天食，夠暖胃。👍🏻秘製瓦罉蔥油雞由於忙住食蟹，隻雞上碟我哋攤咗一陣先食，但係食嘅時候仲係熱㗎，抵讚！$98 食到全隻雞，算係性價比唔錯，雞隻某些部份質地比較嚡（我個人鍾意食柴肉，所以覺得OK），有D部份又比較幼嫩（肉質微微粉紅色） ，滿足晒唔同追求不同肉質嘅朋友。🆗椒絲腐乳唐生菜賣相OK，但係偏甜，椒絲味唔夠。炒出有鑊氣，食到生菜嘅「爽口」，如果鐘意食淋晒嘅生菜，需要落單時同侍應備注呢度嘅份量都算幾大，打包咗炆飯和蔥油雞，第朝整返熱依然好好味👍🏻整體認為味道唔錯，侍應服務殷勤，招呼周到。不過，價錢屬於中上，地點唔算好方便。幫襯當日係3號風球嘅晚上，未知是否天氣關係，全場只係坐咗六張枱的感覺有點冷清。有機會嘅會再幫襯午市點心，這裏的味道值得更多人留意🫰🏻…Read More

呢間裝修比較好少少嘅茶記，菜式類型和相片都算幾吸引，所以冇睇食評就決定一試， 點知就中伏了🥲🚫香煎美國牛小排牛小排有三件，叫咗七成熟，但係嚟到差唔多全熟。我都知呢間係茶記，唔可以要求太高，但係塊扒沒有牛味，亦沒有牛油香，質地還有點柴，我喺HKTVmall買嚟自己煎都好食過佢。伴碟嘅炸薯仔粒外皮淋晒，菇亦淡而無味。唯一可取之處，就是份量與價錢成正比。🚫美國封門柳封門柳叫咗五成熟，呢塊火候控制得唔錯，真係做到五成熟。封門柳的肉味比牛小排突出，但仍未能談得上好味。配菜方面有薯蓉、炒菇、大蕃茄。如果可以讓顧客彈性選擇配菜，如意粉或薯菜，會更好。👌🏻脆薯條伴黑松露醬成餐最好味嘅就係薯條！個名改得冇錯，真係脆口，又熱辣辣。Around $50有呢個份量，十分公道。黑松露醬應該都係來貨嘢，好好味。兩個人食咗四百幾蚊，認真唔抵。下次會去返十步之隔既「紅茶」，性價比高幾班😟…Read More

黑糖包曾經為咗Outback無限任添嘅黑糖包而幫襯，相隔一排再嚟，黑糖包已經冇當初咁好食了，覺得偏甜。不過，熱辣辣黑糖包配上自家製牛油這個經典配搭仍然好正🥖澳洲和牛紐約牛扒牛扒竟然比沙律早到。牛扒上碟時，好似出面啲扒房咁連餐碟都係熱㗎，確實抵讚。伴碟嘅薯條都夠熱，但係唔夠脆，麥當勞薯條仲好食。塊扒嗌咗五成熟，好明顯Overcooked。塊扒有筋，所以食落好韌😮‍💨炸蘑菇成餐最滿意就係炸蘑菇！炸粉唔厚，炸完仍然保持蘑菇嘅水份，感覺清新不油膩🍄香煎黑椒日式黃鯨吞拿魚沙律沙律菜品種好多，不過切得有啲碎，啲菜有點霉，感覺不太新鮮。不過，牛油果生熟程度剛剛好！至於主角吞拿魚，份量非常多，不過黑椒味太重，食落有點辣。沙律配有兩個醬汁（千島醬和酸酸的汁），兩個都麻麻哋。其實簡簡單單落橄欖油和黑醋， 效果可能會更好🥗食食吓，經理行過嚟問我哋覺得食物如何，我哋反映返塊扒唔係我哋嗌嘅5成熟，經理主動話幫重新整過一份🫢 聽到經理咁樣回應，覺得好surprise，因為出面好多餐廳聽完意見通常答你：「哦，會幫你同廚房反映吓」，之後不了了之。所以，今時今日遇到呢種服務態度確實難得👏🏻第二次上碟嘅牛扒終於係五成熟啦！不過，肉質仍然係好韌...感覺員工服務和廚房已盡力，係食材嘅問題吧😥雖說係steak house，Outback已經大不如前了。牛扒唔掂，竟被其他菜式反客為主。…Read More

馬拉盞炒通菜馬拉盞通菜係廚師推介，可惜馬拉盞味道不突出，菜的份量算多嘅。冬蔭功 (小)份量啱晒兩個人，每人大概有兩大碗。雖然冇得揀辣度，但係呢個預設嘅辣度啱香港人口味。不過，味道酸咗少少。 內裏的冬菇和蕃茄仔都好多，大蝦就有一隻半。炸蝦餅拼魚餅上碟時兩樣嘢都係熱嘅蝦餅兩件切半，入面有少少馬蹄增加爽口感，正常嘢。魚餅偏硬少少，係正宗個款泰式魚餅，好重香料味。清邁豬肉生菜包上碟熱辣辣， 肉碎和生菜嘅份量都好多， 兩個人食唔使追加生菜。不過，肉碎實在太鹹了，食完呢餐飯嗰晚好口渴🥵生蝦刺身生蝦都算大隻，個人認為肉質比較硬，未夠爽口，係新鮮嘅，印象中好似得6隻定8隻，泰汁唔係向泰國綠色個款，但友人都已經覺得好辣五樣餸加可樂，埋單395蚊，價錢算係咁。不過味道一般，相信同區會有更好的選擇。…Read More