栗子雞翼's Profile

今次雞翼栗子又去到灣仔搵嘢食。其實今次係我哋第二次食呢間小店架喇！就係因為食過覺得好味，所以再番去幫襯。主要係做外賣生意，店外只有兩張細枱，迫迫哋最多應該坐到6-7個人啦。老闆好好客，熱情嘅招待，有問必答，人情味十足！點咗兩個肉丸意粉（＄56）其中一份加豬扒（＄12），ABC湯同埋一支山竹味飲品。先講意粉，其實係為咗再食個肉丸而黎架！應該係自家制嘅手打肉丸，味道調配得岩岩好，好好味！豬扒亦都醃得好入味👍🏻👍🏻👍🏻但今次個意粉就扣左小小分喇！因為唔夠味，而且硬身咗少少（利申：雞翼喜歡偏軟嘅麵質！所以一般人應該覺得無問題）CC評分：4/5ABC湯（＄25）係以金寶牌罐頭湯再加工，加咗鮮蕃茄一齊煮，味道偏甜，似係落多咗糖果種甜。CC評分：3.3/5而山竹味果汁（＄18）就麻麻哋喇，得個甜字，同埋係冇乜山竹味嘅⋯⋯說實話，今時今日係香港寸金尺土既小地方，就圍都係大集團經營食店，竟可以係灣仔區食到有中水準而價錢便宜嘅意粉可以話絕無僅有，有誠意既小店絕對值得支持。CC總評分：3.7/5Cheeky Pasta灣仔汕頭街4號地下B2A號舖…Read More

由於雞翼工作嘅關係，知道咗呢間Cafe嘅存在，所以襯住放假，一於帶栗子黎試吓。一入門口，第一個感覺係：嘩⋯好大呀！主要分成2部份，一邊係餐廳，而另一邊係售賣家品。而我哋去到係大約下午3點左右，雖然唔洗等位，但都好Full了。落單嘅時候，Waiter哥哥同我哋講限時食個半鐘。如果係想放慢節奏同朋友傾吓計食餐飯的話要注意呢一點啊！我哋點咗2個午餐當日既是日餐湯係忌廉磨菇湯幾香濃而且有切碎磨菇粒增加咬口感，不過如果加小小橄欖油應該會更香。CC評分：3.4/5主菜分別點咗肉眼扒配紅酒乾蔥燒汁（＄168）同埋香芒忌廉汁燴帶子螺絲粉（＄118）肉眼扒點咗5成熟，但一切開睇就知這好明顯係超過7成，好韌⋯韌到好似7成熟咁⋯⋯配埋啲汁，好似平時茶餐廳嘅味道咁，失望。CC評分：2.6/5而個Pasta呢，香芒忌廉汁食落好Fresh，酸酸甜甜好醒胃。帶子煎得幾好，Keep到本身Juicy嘅質感，但好可惜，成碟嘢唔夠熱，只係暖，所以呢到要扣分。CC評分：3.3/5餐飲喺唔洗額外再加錢嘅情況下，就可以有好多款選擇喇！我哋點咗Hot Mocha 同埋 Hot Green Tea Latte，Mocha比較重朱古力味，蓋過咗咖啡嘅味道，就好似飲緊勁濃嘅熱朱古力咁！而Green Tea Latte相對味道較平均，如果可以再多小小綠茶味就Perfect池喇！食飽飽我哋就埋單，諗住參觀吓另一邊嘅家品部。原來呢到係冇加一服務費架！唔怪得一直都唔係好多店員行黎行去睇吓有咩客人有需要LOL家品主打售賣簡約風格既木製傢私，大部分都係日本品牌，所以價錢都唔算平架，不過值得留意係產地並非日本，而係中國甚至東南亞。整體黎講，呢到係一個令人感覺舒服嘅地方，約埋三五知己上黎飲杯咖啡都係一個唔錯嘅選擇，但啲野食就相對上遜色咗小小喇！CC總評分：3.1/5…Read More

話說雞翼係極之鐘意食餃嘅呢間店係雞翼由細食到大嘅No.1餃子店。主要係售賣粉麵類製品，另有部份熟食，例如韮菜餅、燒賣、餈飯、蒸包、茶果等等，呢到最出名嘅就係佢嘅韮菜餅、雲吞、水餃同埋湯圓。而雞翼就最中意食佢嘅雲吞同水餃喇！每次去親荃灣都必定會買一盒番屋企看門口！所有嘅雲吞同埋水餃都係每日新鮮包架！由於長期都有人排隊買嘅關係，所以其實係即包即賣！全女班嘅陣容，而且所有姐姐全部都好好人，好親切！而雞翼最中意食嘅係上海菜肉雲吞同埋上海冬菇菜肉雲吞！今次就買咗上海菜肉雲吞（細盒：＄27 / 15隻）佢啲皮雖然唔係好薄，但啲餡係非一般的香，而且係好足料。菜同肉嘅比例岩岩好，食落去係果陣菜香嘅味道，食完係完全會令人有Encore嘅感覺！價錢仲相當貼地！平均＄2／隻咋，唔怪得佢長期排隊啊⋯CC評分：3.8/5…Read More

前幾日雞翼同栗子放工後，見時間尚早，就去咗觀塘諗住行吓，順便搵吓有咩好嘢食。醒起幾年前（無錯係幾年前）有位朋友介紹過一間係觀塘嘅米線店，朋友仲讀緊書嘅時候經常都會幫襯，我哋決定試吓啦。點知...環境間格同一般米線店大同小異，不過店內油煙味好強烈，而且地板比較油，要扣分。雞翼同栗子今次好快就諗到食咩，因為餐牌有一款叫做小窩拼豬扒酸辣米線／上海麵－（即係大雜錦咩都有啲，岩晒有選擇困難症嘅我哋！）我哋兩個都叫左小辣同配上海麵（＄48），再加凍檸賓（＄16）。小窩其實係雜錦配菜：司華力腸、煙鴨胸、鮑片、韭菜餃同埋肥牛。由於雞翼同栗子都係唔食蔥同芫茜嘅關係，配料方面，我哋就有花生同埋酸辣菜。未食之前，我哋對呢到嘅豬扒係抱有期望，因為既然咁有信心用得「豬扒酸辣米線」命名自己店名都應該唔會差得去邊掛？點知...令我哋最失望就係佢！肉質好淋，應該係用左梳打粉「乸」過，而且完全無肉味可言， 扣分！其他配菜不作多提，因為都係現成來貨，無功夫可言，所以味道都合格。湯底 - 酸味唔夠，而麻味就偏重，失敗。麵質 -  一個字－淋，呢個係好多麵店嘅老毛病，亦都可以話係一個標準黎衡量麵店係咪有誠意有用心去做好碗麵比客人。…Read More

栗子最鐘意就係帶雞翼周圍搵新嘢食。最近，我哋去咗一間位於灣仔的拉麵店，主打雞白湯底拉麵。沿灣仔道往銅鑼灣方向直行至巴路士街口，轉右入去，大約行20秒望右，就會見到巨型紅色燈籠。店門口有個大燈籠做裝飾，其實都好易認。入到去，目測大約有15-20個座位，坐位空間尚算可以，唔會太迫。放工非常肚餓嘅緣故，好快就喺點餐紙揀好了！我倆本住一向嘅宗旨：咩都要試下嘅心態，分別點了至極雞白湯拉麵和魚介雞白湯拉麵、一客明太子雞翼（＄15/隻）同埋一客煎餃子（＄38／6隻），最後仲追加咗一碗白飯（一般香港人一定會覺得好奇怪）至極雞白湯拉麵 $88 - 據說湯底係以雞慢火烹調10小時而成。拉麵一上枱當然要飲啖湯先，雞味十分濃厚，有糊口嘅感覺而且仲好滑溜。麵條方面，栗子揀咗幼麵同埋硬嘅麵質，不過麵條掛湯能力一般而且質感似係食緊即食麵（誇張咗），呢到要扣分。至於配料就比較特別，裡面有雞叉燒、溏心蛋1隻、炸蓮藕片同埋露筍。 雞叉燒相比起豬肉叉燒少咗份油膩感，好適合女仕們，不過略嫌「鞋」咗小小。溏心蛋同露筍都合格，而最有驚喜嘅竟然係炸蓮藕片！？切成薄薄嘅藕片炸咗之後外脆內爽甜，即使被麵湯浸淋咗都依然好味。CC評分：3.9/5  魚介雞白湯拉麵 $82 - 以雞白湯做底再加入魚介粉而成，配料基本上同上述嗰碗一樣，只係少咗溏心蛋。有小許失望，唔知道師傅係唔係一時錯手落多咗魚介粉，令成個雞白湯頭都被魚介味蓋過了，浪費咗濃厚而有層次嘅湯底，有啲弄巧反拙。 CC評分：2.5/5小食方面煎餃子 $38 - 唔同一般日式煎餃店只供配餃子醋汁，呢到提供三款醬料（辣醬／咖哩醬／蔥），雞翼同栗子都推介中間嘅咖喱醬，配上juicy嘅餃子估唔到又幾夾。  CC評分：3.6/5明太子雞翼 $15 - 一開二上碟，微辣的，但係乾身咗小小。 CC評分：3/5最後食完碗麵栗子都唔夠飽，於是追加咗一碗白飯 $12， 倒落雞白湯當泡飯食， 一滴不漏盡情地食                                                                                                                                          晒佢！CC評分：3.3/5…Read More

襯住放假，栗子又帶雞翼去食好野喇！我哋去咗一間位於荔枝角嘅日本料理食午餐。由於我哋去到嘅時侯已經係三點喇，所以人客唔算多。門口其實唔太起眼，入到去，風格係比較簡樸，感覺好似小店咁，唔會太商業化。午餐Menu內，全部都係定食，價錢由$65 ～ $128 不等，價錢合理啊。睇哂成個Menu，由於樣樣野都好想食嘅關係，我哋都係決定揀最最最足料果款，一於一次過滿足哂自己嘅食慾啦！先講前菜。有味噌湯同埋沙律，比起平時價錢相約嘅餐廳黎講，呢到嘅味噌湯味道更為濃郁。而沙律就係普通嘅生菜沙律，但用咗酸酸嘅沙律醋調味，味道適中，幾開胃！極上雜錦魚生飯定食（$128）好。足。料。有三文魚籽、海膽、拖羅、"魚立"魚、油金魚、玉子、帆立貝、赤身吞拿魚、三文魚同埋牡丹蝦！有成十款咁多。所有刺身都好新鮮，拖羅都有2片啊！真係好好味。唯一比較遜色就係個玉子，乾身咗小小，食落有啲似蛋糕。仲有餐飲添，呢個午餐真係大滿足嘅呢！ 另外仲見到佢哋有一個特別的Menu，係一個吞拿魚宴（＄800／位），唔好俾個價錢嚇親先，再睇埋有咩食先，其實真係幾抵食！淨係睇頭四樣已經完全地俾佢吸引住。好可惜果一日雞翼同栗子都唔得閒，希望佢會再有下一次吞拿魚宴啦！…Read More