Born to be fat's Profile

小弟見識少，呢間係我人生暫時食過最好食嘅清湯腩麵。平日七點幾去到唔洗排隊直入，啲枱唔算好迫，都坐得幾舒服。坐低嗌左個清湯蘿蔔牛腩麵$63，另外仲有崩沙腩，坑腩等唔同腩位選擇。同朋友吹左幾句水，等左兩，三分鐘就有野食。先講湯底，本身唔知佢係藥饍湯底，一入口好清甜，帶少少當歸味，驚喜地好飲。牛腩煮到好淋好軟同時又唔會散，而且有好多片唔孤寒，不過同行友人話略嫌無牛味。蘿蔔無渣又入味。成碗麵份量足夠，正常成年人唔會唔夠食。不過侍應哥哥態度有少少差，餐牌餐具就咁放（掉）落枱面唔講嘢就走左去，我覺得可以溫柔少少。今時今日香港$63食碗麵已經唔算好貴，唔洗餐餐洗幾百幾千蚊食好嘢，簡簡單單一餐呢個價錢食到呢個質素真係已經好滿足。…Read More

突然想鋸扒 同區好似無其他選擇 六點去到無乜人 menu寫住龍蝦無貨 轉左大虎蝦 嗌左個虎蝦拼牛肩扒.落左單唔夠30秒 侍應已經將預先準備好嘅沙律，粟米忌廉湯同醬汁上枱 配菜真係不過不失 唔算好食亦唔難食 但個醬汁有奇怪 三種汁分別係黑椒汁 黃芥末 西檸汁 頭兩隻配牛扒好正常 但西檸汁（個味exactly係食西檸雞個汁嘅味） 配牛扒完全唔夾 唔明點解會出現 我寧願要多格黑椒汁 因為唔係好夠 食到最尾幾舊唔夠汁點.跟住到主菜 虎蝦 牛扒 同蕃茄意粉都好快 大概等左5分鐘就上枱 先講個意粉 本身以為係肉醬嗰種 點知係意粉加少少蕃茄水 好慳皮 然後到隻大蝦 蝦身ok嘅 熟度啱啱好 但唔知係咪唔預人食蝦頭 居然係生 啲肉係透明嘅 搞到平時鐘意啜蝦頭嘅我都卻步 雖然彈左咁多 塊牛扒係真係超出色 勁淋 火侯啱啱好 5成熟 配埋個黑椒汁超好食.總括來講 份量好足夠 一個男仔食都好飽 牛扒真係超出色 但其他方面如果可以再加強就完美…Read More

係香港真係無見過有賣嚤囉雞飯嘅地方 睇社交平台見到有人推薦 澳門嚤囉雞飯四大天王之一 所以試下 舖頭裝修好有特式 復古懷舊風格 但本身舖頭比較細 環境有啲逼 等左唔係好耐食物已經上枱 嚤囉雞飯的確係唔錯 雞髀炸到好脆又唔dry 個汁薑黃味好重 唔似一般咖哩 價錢唔貴 又係澳門特色食品 值得推薦比其他人但個辣魚包真係一般般 同行友人覺得ok 個包外脆內軟 但我就覺得太乾 可能係本身喜好問題總體來講食物係唔錯嘅 但本身係local野 地理位置唔係好啱遊客去 唔係好方便 有機會順路可以一試…Read More

本身諗住去食第二間葡國菜 上到的士 司機推薦左呢間 主要係本地人去 又平又好食 帶住半信半疑嘅心情去到 喺門口排隊等咗5分鐘就入到去（聽後面啲人講佢哋等到25分鐘 睇黎食好嘢都需要運氣）入到去即刻對間餐廳好有信心 入面坐滿晒人 外賣電話不斷響 生意好火爆 但即使生意咁忙 大概等咗10至15分鐘 嘢食已經送到 鐵板黑椒生蠔 - 蠔味好重 連啲汁都充滿蠔味 上到台出晒煙 好正馬介休球 - 味道好複雜 好香馬介休 香草 牛油味 但整體味道比較清淡 如果作為前菜 第一樣食會好正葡式豬手 - 蕃茄汁 雜豆 炆豬手 豬手唔會太淋太爛 有咬口 個汁幾特別 酸酸甜甜幾開胃辣魚炒飯 - 炒飯軟硬適中 唔會太濕 不過比較普通 亦冇乜辣魚味酥皮魚翅忌廉湯 - 酥皮湯而家真係買少見少 酥皮酥脆 忌廉湯濃郁 不過就搵極都搵唔到條魚翅最後亦都係最重要一點 食咁多野埋單都係$355超級抵食同場仲見到好多枱都有嗌黑椒牛柳 可惜發現太遲 胃口有限 唯有留返比大家試…Read More

最近轉左工黎上環返工，一直好憧憬上環呢個地方，有好多有歷史嘅餐廳店舖，所以趁呢個機會想好好探索呢個地方。係網上睇到好多人推薦呢間餐廳，openrice 都有好多笑哈哈，於是決定試下。呢間餐廳最出名係豬扒飯（$49），梗係要試下。另外仲嗌左個蛋牛治（$16）同熱奶茶。做晒資料蒐集知道要等好耐，於是一早打定過去嗌外賣攞返公司食。返到公司一打開個外賣就知上當了。個豬扒飯份量係唔錯，但就只係普通煎豬扒加個好普通嘅生抽汁。啲豬扒懷疑鬆肉粉落太多，食落好梅，咁嘅質素都可以叫招牌仲咁多人讚真係有啲難以置信。跟住到蛋牛治，塊蛋薄過紙，普通茶餐廳一份蛋牛治起碼都用兩，三隻蛋去炒，但佢應該用得一隻蛋。咬落去淨係感覺到塊包，完全食唔到有餡嘅感覺，真係會唔會孤寒左少少。不過我都唔係咩都彈，杯奶茶係唔錯嘅，唔會太甜，奶味茶味幾平衡，叫可以接受。或者係本身期望太高，我作為一個對食物無乜要求，求其乜嘢都擺得落口嘅人都食得出咁多問題，呢間餐廳可以有多人推薦真係令我百思不解。不過一間餐廳偶有失準都係常事，或者我會再做多次水魚，比多次機會佢，但如果下次水準都係咁，真係永遠唔會再返轉頭，呢個世界仲有更多更好嘅餐廳可以選擇。…Read More