Terrisin's Profile

深水埗街坊串燒小食店，粉麵飯都一樣有🤓小編今次主要嚟食串燒，串燒價格上都親民，食物款式都多，肉類、海鮮、素食同丸類都有串燒整體調味都係中式孜然風格為主，有辣度選擇，肉類底味醃得偏甜～整體香口度唔算高，未做到外脆內juicy，雖然食材用材上唔算高質，但都價格上以CP值嚟講，想親民價又坐底止下串燒癮，係唔錯嘅選擇👍🏻比較推薦：豬頸肉雞軟骨肥牛娃娃菜卷 - 肉較薄身香口，娃娃菜爆汁豆腐皮 - 外脆內有汁豆卜 - 香脆韮菜原隻茄子 - 軟腍濕潤又惹味生蠔 - 多蒜惹味🙈小編平時食串燒嘅話，雞皮、燒白鱔同五花肉都係必點嘅選擇，小編就呢間小店呢幾款就比較失色....…

同屋企人慶生揀咗今次呢間西班牙餐廳試試，環境雖然唔大，但乾淨企理之餘氛圍都唔錯，又唔會嘈，店員服務亦都有禮又細心，食物方面整體都滿意😊-芝士焗粟米片配芝士醬、酸忌廉、牛油果醬 $138-🦑酥炸魷魚鬚配紅椒青檸醬 $98加有海苔碎嘅脆漿，脆得嚟唔會油淋淋，魷魚質地比較結實但唔韌，醬汁都幾杰身，但唔濃味-加拿大鮮海膽配手工豆腐，芥末柚子汁 $128預料之外嘅係手工豆腐應該係混有蝦膏，所以有蝦膏嘅鹹香鮮味，地質綿滑帶微微結實😋醬汁上調味都係會比較輕，唔怕搶過主角味，但存在感較低-🦐🦑🍋傳統西班牙海鮮炒飯 $378外觀十分靚仔，好啱打卡😆亦都好足料。整體上冇其他地方食到嘅西班牙海鮮炒飯 咁重口味，酸味會重啲，油膩感冇咁重-北海道帶子野菌黑松露忌廉意大利麵 $168正常西餐廳質素，忌廉香濃有奶油香，麵Al dente唔會過腍-🔥碳燒西班牙伊比利亞黑毛豬架配香醋燒肉汁 268🤩碟豬一擺低聞到好香碳燒味～食落脂肪分佈都多，一啲都唔鞋，口感爽彈似厚切豬頸肉咁，帶有啲啲甜甜地同豬油香😋醬汁清爽解膩，酸酸地，覺得有啲近似日式沙律醋嘅感覺。配有少少蔬菜同松露薯蓉…

除夕及元旦午餐香草麵包配橄欖油黑醋汁麵包外層輕輕烘過，外層微微金黃偏乾身，散發香草香味🦀蟹餅配他他醬拼沙拉唔算鮮甜，但每啖都食到絲絲蟹肉，口感軟綿，配帶酸嘅他他醬中和膩感。沙律味道清淡，但唔係酸汁，所以唔會用作解膩。🥩澳洲草飼牛柳配香煎鵝肝，薯蓉及蘑菇醬整碟菜式調味適中，各樣食材都食到原有味道。牛柳本身叫咗Medium Rare，但嚟到明顯熟過頭，估計應該有Medium Well😅，同枱嘅朋友都係比自己原本oder嘅熟度更熟🙃但好在嘅係用料唔錯，所以都唔會好鞋，同埋都keep到牛味，牛柳外層脆面。而鵝肝煎得唔香口，薯蓉質地偏杰身幼滑，充滿牛油香，另外蘑菇醬都充滿菇香，係蘑菇粒製成，並唔係流質液態。🥥🍫椰汁慕絲蛋糕配椰絲脆脆椰絲脆脆屬硬脆，椰絲味唔重，咬到芯有啲啲唔夠透，就嚟黐牙硬硬哋嘅感覺。上層係質地較實嘅朱古力慕絲，朱古力味同甜味唔會霸道，下層椰汁慕絲質地比朱古力慕絲幼啲，帶有輕微彈性，味道更淡。整體食材優質，調味都適中，但烹調可能有失手，因為朋友之前食過都冇overcook，今次食都覺得牛係過熟。同埋上菜速度都比較慢…

講到豬扒，新景園嘅炸豬扒係小編內心佔一席位，每次出灣仔都總會諗起🤤但奈何佢店面太細，去得食都要排好耐🥲同埋份量太大，就算叫咗少飯冇一次食得晒（建議嚟食最好帶個食物盒😂）。另外要注意嘅係會設有每人最低消費：$80🙌🏻怕份量太大而想share食嘅朋友就可能要叫啲飲品去湊夠數啦～咖哩豬扒飯🍛🐖$96（＋$10配焯青菜一碟＋湯/汽水）嚟到新景園必嗌嘅嘢我覺得一定係咖哩豬扒飯😍豬扒厚身又juicy，薄薄一層幼麵包糠包住外層炸得金黃香脆，一淡淡炸麵包嘅香味😌咬落感受到肉嘅纖維帶嚟嘅微微爽脆，整體調味亦到啱啱好，就咁食都已經好好味🧡再配埋港式咖哩又另一風味，咖哩質地比較稀但味道香濃惹味偏辣（小偏食辣程度BB級別），咖哩入面會有薯仔，薯仔粉感較重。性價比 🌕🌕🌕🌕🌕干炒牛河🐂🥢 $88牛河有鑊氣帶啲微焦香，每條河粉都有層油包裹住唔會黏住一舊舊，但碟底唔會有多餘嘅油流出嚟🫡芽菜同韮菜亦冇出晒水～上色亦好均勻，醬料味唔算重，如果鍾意重口味嘅朋友會覺得落未必夠。牛肉片先唔講味道，佢嘅份量係❗好多❗😧仲要切得又厚又大片，保守估計起碼有十幾片。但牛肉味冇咩，勝在唔鞋冇筋又多。新景園呢兩碟名物，小編仍然覺得咖哩豬扒飯完勝❤️其實呢區嚟講，90幾蚊食到咁大份量又好味嘅一餐，都明點解要長期排隊🤡唔介意打包又唔大食嘅你，一餐分兩三餐食絕對冇問題😂性價比 🌕🌕🌕🌕🌑新景園咖喱小廚📍灣仔春園街20號地舖…

芫茜菠菜湯米線配菜：芫茜、蒜香豬紅、啫喱豬軟骨個麵一嚟到成個面都係個湯芫茜菠菜打碎嘅青綠色，所以一路食麵個陣麵會有呢啲碎渣掛住麵上面，呢個樣對於怕青人士嚟講應該相當驚嚇😂🍲湯底底味似係普通食港式湯底嘅清湯，加上有淡淡菠菜同芫茜嘅味道，唔濃烈，如果當日想食清清地其實係個唔錯嘅選擇。由於小編係芫茜控，生芫茜味道同香氣上一定重過熟嘅，所以其中一項配料加咗芫茜，令成個芫茜味升華返～但啲芫茜可能冇晾乾透，所以有啲啲嗡味🫢🐽蒜味豬紅，豬紅表面會包住一層偏透明又少少杰身嘅蒜醬，好輕微嘅辣，食落覺得有啲似膠袋撈冷麵小食個種蒜蓉味，豬紅正常發揮，唔會有怪味，同埋唔會好鬆散，會食得返豬紅嘅質感🍖而個啫喱豬軟骨，本身係比「啫喱」兩個字所吸引，對於豬軟骨要炆到啲骨好軟，呈啫喱膠質口感，定係有少咬口脆骨口感，呢兩種口感小編都會食，但會偏好膠質多啲。但呢個啫喱豬軟骨係完全冇做到膠質個質感，係屬於脆骨個邊🤥，而味道方面係合格嘅，同埋都入味。…

整體幾好食。係睇到有心機嘅小店👍🏻老闆會細心問要唔要芫茜同辣⭐️法包脆，⭐️肝醬而香濃，⭐️豬手唔柴調味適中，質地微微膠爽，⭐️蘿蔔絲清淡微酸甜，唔會好霸道，配料（包括肝醬）會放遍全個包，唔會食到頭同尾冇配料👍🏻😋，呢種細節都做足但啲蘿蔔絲上面會再灑上胡椒粉，胡椒味有啲啲搶…

好運中心裝修後多咗啲食店選擇，經過呢間放題店決定試試。個人嚟講對放題質素冇期望，至在好肚餓個陣食可以任食同食多幾款，過過口癮。店內係QR Code落單，上菜速度接受，keep住都會有嘢食住。😳最令我驚訝係刺身方面竟然有中拖羅點幾百蚊鬆啲嘅價錢竟然仲要有中拖羅任叫？！🐟🦐🐙一於試一試伏刺身嚟到都幾靚仔，一開波當然試下令我好好奇嘅中拖羅，意外地比想像中好，雖然魚味油脂香唔係上級，但唔會有臭腥味，油脂都有嘅，有啲會有機會有筋。油甘魚都算唔錯，刺身都切得幾厚身。紅蝦同甜蝦都連頭，都算幾大隻幾有睇頭，但蝦味竟冇咩。刺身總括嚟講正常發揮，但頗有驚喜😀，起碼平常呢啲價位嘅放題，我未試有中拖羅可以點。🍣🍲熱食真係要一讚！👍🏻👍🏻全部都係熱嘅。明顯唔係全部都整定晒，有單就出個種，仲要有擺盤，相當有誠意！以天婦羅為例，平常好多放題店嘅天婦羅都淋過毛巾😩，皮好厚食唔到材料，但呢間店嘅天婦羅一嚟係熱嘅； 二嚟係廷身唔會淋滋滋；三嚟唔會外皮厚到似淨係食粉👏🏻。串燒個啲就係炸完，灑啲調味粉個種，不過不失。炸物都炸得唔錯，熱又外面唔會油淋淋夠乾身，內面唔會勁乾。🐔芝麻雞翼炸得幾好！香口而入面仲有啲肉汁。😋粉麵飯因為太易飽就冇點到，但見到出餐賣相唔錯（似平時餐廳單點）份量都幾大（小鳥胃要注意！）😜出餐區見到其他枱點咗鐵板韮菜反而比吸引落單點咗份（本身完全冇興趣）。鐵板韮菜嚟到熱辣辣，出晒煙咁，簡單用調味粉調味，夠乾身有鑊氣，唔會好濕好多醬/茨。甜品方面馬卡龍有唔同口味咁隨機比，以任食嚟講呢到嘅馬卡龍都算幾好食，唔會一舊糖咁硬咗，雖然出面嘅脆膜口感唔算好明顯，但入面都有軟熟口感，所以CP值合格有凸。泡芙雪到硬咗，所以偏向會變咁雪糕泡芙咁，但就唔似雪糕軟滑。🍮雞蛋焦糖布甸，冇咩蛋味，質地唔係軟滑布甸質地，係偏爽滑實淨啲啲（個人嚟講覺得唔使試）飲品還好，多選擇，但就唔好預會有驚喜/好好飲。⭐️整體嚟講呢間放題CP值都幾高！食物質素唔差，食物唔係整定嘅，仲會似單點咁每一份都有埋擺碟，可睇得出有心去想做好啲品質。三百幾蚊一個人嚟講有呢種質素，飲酒嘅朋友仲可以任飲酒，唔使加錢。希望之後都Keep到個質素，有望回頭再幫襯。💪🏻👍🏻…

茶餐廳嚟講一入到去感覺算比一般茶記乾淨企理，伙記服務爽手又友善。食物比一般茶記加入少少新意，但亦會不失傳統，亦有心做好食物。法蘭西多士🍞睇落好厚身，四四方方好治癒😆，溫度微暖，所以唔會一上枱牛油溶到見唔到。基礎同普通港式西多士一樣，入面係粗粒花生醬餡，炸得都乾身香口，唔會油林林。炭火叉燒煎蛋飯🐷🍳🍚驟眼望落去叉燒比較瘦，但食落係比外觀好嘅，唔係半肥瘦個種油香軟林嘅叉燒，而係爽林嘅質地，有少少爽嘅筋同肉嘅纖維質感但唔會乾鞋，但就應該唔係炭火燒過，只係名係咁叫，因為睇落冇炭燒嘅焦脆邊同香氣🤨煎蛋煎得好靚仔👍🏻蛋白熟晒又好脆口，蛋黃流心😋甜豉油會另外比你按自己需要加，整體嚟講質素唔錯，但覺得飯稍為軟咗啲，粒粒分明啲會仲好🤔炸午餐肉配蛋黃醬午餐肉上灑上砂糖去中和午餐肉嘅鹹，佢嘅午餐肉本身唔會過鹹呢點唔錯，其實配上砂糖鹹鹹甜甜又有砂糖脆脆哋嘅口感再加埋蛋黃醬嘅油脂香同微酸係ok的，而且用嘅蛋黃醬質素都唔錯，但敗筆在於午餐唔夠脆身😮‍💨，如果午餐脆啲，同埋砂糖同蛋黃醬平均啲啲落午餐肉到/蛋白醬分開上比客點會比較好😬另外叫咗熱奶茶，正常質素，都幾好飲嘅。…

夜晚唔想食澱粉質，但又想食啲嘢填肚嘅話係個唔錯嘅選擇。可以揀沙律菜底/飯底/一半一半都可以👏🏻餐牌除咗可以點佢配搭好嘅選擇外，可以自己自行配搭，而我就揀咗 - 三文魚🐟、蛋絲🍳、櫻桃蕃茄🍅、芝麻海帶🌊配山葵乳酪醬，而基本配料/調味料除咗辣椒碎之外，全部都揀咗。一碗裝得滿滿，睇落幾靚仔，好啱打卡，但係撈起上嚟就會有啲困難。本身諗住沙律底應該唔會太飽肚，但食完就知原來都幾飽，可能再加上三文魚同醬汁始終會膩啲，如果叫其他主配菜同輕身啲嘅醬汁應該會食落輕形啲😗🍴一開頭食嘅時候感覺唔錯，醬汁有微微山葵味，唔會好搶喉，乳酪醬有啲啲奶脂香味配上三文魚令油脂味又重，當然呢個配搭食到尾始終會有啲膩。配料上每一種都食到原有嘅味道，唔會調味過重/過淡嘅情況出現，亦都食得出一啲小細節。比如芝麻有烘過嘅香，有脆蒜嘅香脆，配上其他配料嘅口感變得豐富，味道都多啲層次👍🏻…

男朋友生日決定book食想試好耐嘅後街牛扒，因為未食過嘅關係所以book食lunch試一試水溫先😜訂位只需佢提供嘅網站就OK，到到食嘅前一日會再有msg確定booking。一入到去雖然店面細細唔係啲咩高級感重嘅裝修，但乾淨企理有個性。好彩地雖然我哋得兩個人，但被安排到四人位，所以空間都好足夠。我哋分別點咗：美國 BRANDT BEEF PRIME 荷斯登牛腰扒🥩配法式忌廉牛油薯蓉美國 BRANDT BEEF PRIME 荷斯登短骨牛肋眼🍖配法式忌廉牛油薯蓉＋（upgrade）牛骨髓🦴、炸薯條🍟套餐亦會包咗前菜小食、沙律、餐湯、麵包、甜品同餐飲（可選擇upgrade）但今次我哋就點咗最基本嘅首先講講前菜、沙律、野菌湯、麵包：前菜係吞拿魚🐟同酥皮乳酪盒子（唔太記得個名😂），我哋按照咗餐廳嘅建議先食吞拿魚後食盒子。🐟吞拿魚係半生熟嘅，上面片蒜同橄欖，味道上比較偏鹹，我估係橄欖醃製過嘅關係；酥皮乳酪盒子酥皮層次分明，比較硬身乾身個種，配合埋乳酪醬酸酸地有微微奶香，清淡調味，減輕返啱先吞拿魚嘅鹹味，好似清一清咗膩感咁。沙律係凱撒沙律，醬汁比較濃稠同重味，黃芥末醬偏向重啲啲。🍄湯都係濃稠，都香菇菌味，都係比較偏向濃郁同會有啲啲飽肚感。面麵包出面烘熱過所以會有微微脆嘅軟麵包，但包底會占到碟上嘅黑醋醬，所以食落黑醋醬味道會比較突出。牛腰扒🥩（三成熟）肉香又嫩，唔會見到明顯嘅脂肪，睇落似牛柳，但食落會都適量油脂同肉香👍🏻👍🏻短骨牛肋眼🍖（餐廳建議八成熟）肉味比牛腰扒更加濃郁，外面有層脂肪被燒到焦脆香口，但因為比較濃味同有油脂相對上會比較易膩，追求濃郁牛味嘅朋友可以一試，雖然8成熟，但唔會因為咁而鞋口，入面都係會有粉紅色👍🏻👍🏻法式忌廉牛油薯蓉🥔食落好香牛油香同忌廉味，幼身薯蓉但比較杰身，但亦都比較易膩同飽肚，配牛腰扒🥩還好，但配短骨牛肋眼大家要濃味變相更易覺得膩。本身以為牛肉都唔算太大份，所以再upgrade加咗牛骨髓🦴​同薯條🍟事後覺得都唔需要加，因為就咁set都好夠飽😂加上兩樣都係易膩嘅嘢，再加埋牛肉同薯蓉嘅膩下次點餐前真係要諗諗😂如果一班人share食少少應該好好多。牛骨髓🦴​上面會有啲調味香料脆脆，入面係好滑凝固咗嘅油脂咁嘅骨髓，好香油脂味，但真係好膩😂薯條🍟係粗身原隻薯仔切個種薯條，乾身唔會油淋淋亦唔會過份調味🤓但就唔算好脆身個種，當然粗身薯條就食得到薯仔嘅質感甜品🟠🟡🟤馬卡龍正正常常，唔會擺到又硬又乾個種。生日個位仲會有爉燭✨，職員仲會同時送上餐廳準備嘅生日禮物🎁❤️相當窩心有心思👍🏻整體嚟講我哋都好滿足今餐用餐體驗，食物足料有質素，由其肉類真心有質素，加上店嘅心思，期待下次再嚟食嘢😋😋題外話，廁所都算幾乾淨，又唔會濕𣲷𣲷，由此可見廳餐除咗對食物上有要求，衛生都有注意👍🏻…

一共點咗兩款牛舌飯試，咖哩牛舌飯同鹽燒牛舌丼兩款牛舌飯都切得好厚身，應該差唔多有2cm厚。咖哩牛舌飯個牛舌係比較爽口一咬完個切口係齊口嘅，鹽燒就出面個面有鹽同黑椒香口啲，但肉質冇咖喱個牛舌咁爽，係比較淋有一絲絲肉質😋😋。兩款牛舌都juicy。米飯煮得飽滿有光澤，唔會太濕太淋。整體唔錯👍🏻希望有機會再試埋其他同埋keep住水準😆…

睇到食評評價唔錯，相睇落都幾好，所以決定一試，原本滿心期待最後失望而回⋯一共叫咗兩個丼，慢煮黑豚盛丼🐷200g同香煎頂級牛肉牛配鵝肝丼🐮同朋友share食，所以兩款都有試到。加咗套餐會有湯同嘢飲配埋。湯係比較淡得嚟偏甜嘅港式羅宋湯，唔好飲，但係唔算難飲。檸檬茶茶底係比較淡但有啲啲茶香，似英式紅茶底，檸檬片比唔夠所以督完都有咩酸味同檸香可言。慢煮黑豚盛丼🐷本身睇到個樣都幾好，驟眼睇肉質粉嫩，第一塊食落還可以，唔鞋口但始終唔同平時食厚豬扒個種慢煮之後再煎香，少咗份香味反而覺得味道變得一般，冇預期中好食，不過不失但未必會想再食。食第二塊問題開始嚟！好難咬，個心係生豬肉嘅質地🤮🤮之後睇真啲有一部份豬肉根本冇熟透！生嘅豬肉食落口感太嘔心啦～～而醬汁係普通日式麻醬味，冇特別，另外白色嘅應該係乳酪醬？🤨一開頭食只係覺得滑滑地但食唔出咩味，之後再試真啲有好輕微嘅酸，所以估係乳酪。因為味道淡到唔太食到，唔知個醬落落去有咩用處。*但生豬肉真係最不可接受*香煎頂級牛肉牛配鵝肝丼🐮牛肉食落算有牛肉味，肉嘅部份嫩嘅，但就有筋，而筋嘅位都有啲難咬，尚可接受。鵝肝就不過不失，煎得唔係好香口，但又冇油淋淋。整體而言，碗丼唔算大，但正常食量女仔嚟會飽嘅，講餸嘅份量比較少質素平平，cp值較低。如果唔係食到生肉嘅話都未必會再幫襯。…

自己一個去諗住試試佢嘅酸辣豬扒米線，而入座發現被安排坐係一張二人枱，但右手邊有一張四人格坐緊兩位女食客，其實我同佢哋枱與枱之間相隔少得可怕，只有大約幾折手指折位，之間亦冇隔板阻隔😖反而左邊就有隔板，想手移隔板過右邊隔一隔，但原來係lock實咗。疫情期間咁樣進食，令成個進食過程令我好驚🤢同埋雖然室內有冷氣，但都幾熱下。我叫咗酸辣豬扒米線同凍檸茶，得知酸辣可以另上，所以唔係咗食得辣嘅我叫咗另上，而凍檸茶侍應姐姐亦會落單時提醒係單點，同埋酸辣會係有麻嘅，而出餐速度都幾快。酸辣豬扒米線會配有脆花生同芫茜蔥，湯唔係香濃個種，米線唔會係發脹晒，質地正常👌🏻三十尾嘅價錢嚟講其實都算幾抵，豬扒份量都幾多😯但作為豬扒命名同出名嘅專門店，可能令我有所期望，食落其實並冇特別，覺得同普通茶記冰室個啲豬扒冇咩分別，首先豬扒唔係好厚個啲，亦唔會咬到豬扒肉質纖維咬斷嘅質地，味道亦都一般，唔係好食到完全天然嘅醃製味同質地。反而個酸辣有驚喜，幾啱我口味👍🏻酸菜係莖位切粒，所以會有脆脆咬口，咬落亦會有啲啲酸菜菜汁，味道上比較偏酸啲啲，加上辣得嚟會有麻，有齊酸辣麻層次，有辣香唔會太辣攪到辣到咩味都食唔到。而凍檸茶正常水平。總括嚟講，三十幾四十蚊食碗米線，份量嚟講co值算偏高，服務都幾好，只係因為疫情之間坐位安排令人不安😖，同埋冷氣唔夠，如果夏天嚟食怕熱嘅人要考慮下。…

決定買壽司返屋企做晏，但始終附近冇咩好選擇，之前有留意過呢間小店，印象中話老闆曾經有做酒店壽司經驗，所以決定一試。店舖離屋企唔算好遠，十分鐘內已經返到屋企而且一返到都即刻食，所以質素應該唔會同堂食對比好大。分別買咗幾款壽司🍣（炙燒吞拿魚腩、海膽、三文魚子、左口魚裙邊同鵝肝）首先壽司飯，醋味冇乜，但冇好軟/好實，室溫，質感正常。🍣炙燒吞拿魚腩 - 如果唔係自己點都唔覺係吞拿魚腩。偏薄，加上炙燒過所以入口比較鞋，同埋冇魚油香，魚味亦唔突出。海膽 - $19一件比巿面嚟講算平啲，所以冇好大期望。唔難食，但唔鮮甜，有少許海膽味，但有一件餘韻有好微澀味，海膽亦唔算好完整，同最面嘅飯沾埋一齊咁。紫菜完全淋晒，少少企身都冇。三文魚子 - 圓身包滿。甜，但唔係鮮甜嘅甜，唔知係咪有可能醃製過，感覺上有種加工過嘅甜味。左口魚裙邊 - 每件有兩少條裙邊，本人比較鐘意食有啲啲爽口嘅左口魚裙邊，而呢到嘅係比較質地軟林個種，冇乜油脂。鵝肝 - 正常。唔難食，配有照燒汁掃面，質地同味道方面唔係好香口濃郁，但大小合理，尚算有鵝肝本身嘅油脂香，亦冇臭騷味。整體嚟講不過不失，唔難食，亦唔係好食，仍有好大嘅改善空間，但店內職員都有禮，等候時間都幾快。…

由於未食嘢就出到西貢，經過見到呢間店好似幾唔錯咁所以就入去試試。見佢有兩面細舖位，因為人手唔夠所以見職員都一腳踢，所以出現咗漏單情況。點咗特製豬軟骨肉麵，酸辣湯微辣，寬麵同洋蔥牛肉餅。湯麵個湯睇落好似好惹味咁，但食落並唔係個回事，有啲淡帶酸，並唔係唔夠鹹嘅淡，而食唔出有其他原材料味。豬軟骨普通，係脆身軟骨，唔會有雪味/奇怪味，但亦食唔出特製/又淋又入味。麵條滑捋捋，都ok。洋蔥牛肉餅，一睇個真樣反而有啲失望，因為並唔係酥脆，千層口感（以為會有啲似手抓餅嘅質地），餅一到嘅時間已經睇外表有啲硬脆感覺，上面個層唔知叫唔叫穌皮嘅絲絲穌條未食已經甩甩地，入面洋蔥就偏生嘅紫洋蔥（個人都食到偏生洋蔥，所以可接受，但原本以為會係入味帶啲牛肉汁淋洋蔥），牛肉係一粒粒方粒嘅，唔韌，有啲會帶有啲啲根，有肉嘅質地，有牛味，但整體嚟講我唔係太鍾意。…