jackhocw's Profile

當日有場音樂劇喺戲曲中心表演，打算去嗰到食晚餐，入到明星樓點咗個名月套餐，價錢約1000蚊，有茶壺裝嘅海螺湯、一碟叉燒、蘆筍龍躉球、秋葵炒帶子，以及四件荷葉飯。總體食物水平參差，叉燒半肥嫩口，而兩碟蔬菜炒海鮮一般，海螺湯比較淡口冇鮮味，最失望嘅係荷葉飯，雖然荷葉飯唔係用糯米做，但呢到整嘅荷葉飯一打開就比較鬆散，個飯又非常濕口，味道普通。至於服務質素，大部份職員都周到友善，但感覺比較新手，因為有好幾個侍應唔清楚餐單內容，例如當時屋企人有問佢荷葉飯有幾大舊，但當時侍應回答唔太肯定，不過都無傷大雅。然後有位女待應上咗最後一碟餸，問需唔需要加白飯，但本身個套餐有荷葉飯遲遲未上菜，我就問問進度，然後身後一位男職員上前幫手，喺我哋枱前同另一位侍應溝通咗陣就離開，聽到對話感覺好似廚房漏咗整荷葉飯俾我哋枱。然後，剛才嗰位女侍應就企喺我哋枱前唔走，企咗20秒唔知做咩，搞到我同屋企人有少少尷尬。到最後埋單時，有位女職員過嚟俾張單我，得閒到我哋枱面突然擰向後面枱同客人講嘢，遞咗張單俾我一陣，但我都未同到佢講野比卡⋯⋯另外發現隔籬枱好似有幾次都上錯菜，但當時大約六七點，樓面唔太忙。整體認為服務比較生疏，有待改善。…Read More

如題，入座叫餐野飲等咗十分鐘以上先有，我同同行有兩份主餐，分別係栗子炆雞煲飯同辣牛肉煲飯，一份等咗半個鐘，另一份直程冇嚟過要cancel😂栗子炆雞煲唔太好食，雞比較乾身又多骨同細粒，栗子又唔夠淋，唔建議食。樓面又唔繁忙又唔多客，但有其他人同樣催單。好似唔夠人手，得一兩個侍應加經理，本身感覺有啲伏，點知真係伏😅仲要有清潔工喺餐廳內推住架濕漉漉嘅垃圾桶出入，見到真係由餓到嬲到冇胃口，好彩早前喺樓下IKEA食咗少少野先再食晚餐，本身想食叉燒先黎食，但又冇哂黯然銷魂飯，呢間冇下次，去其他茶記食仲好。…Read More