亞瑜(AYU)'s Profile

環境及食物一流。中午有午餐。油醋汁沙律，菜蔬新鮮，伴以豆腐蓉點綴。前菜炒煙肉鮮薯條。主菜炙燒和牛，牛香濃而不膩，帶點燒香，肉質軟滑柔細，午餐數量有12 片，好夠食。白飯好夠熱，米香濃，飯可添加。魚湯蒸蛋，用料豐富，魚香十足，味道驚喜。期後有味噌湯，及選了cookie雪糕。食到好飽。另一set 係吞拿魚兩食。 燒過的toro片，香氣迫人，油脂非常豐富； 另外一個吞拿魚肉剁成蓉，配以魚湯煮嘅豉油， 帶甜味。…Read More

29/1   要買自拍棍所以出左城, 午餐去左呢間響開飯網寫新開的餐廳。我好早去所以唔使等位,不過無訂位,安排坐出菜廚房門口旁位個位, 本身係出入主要通道,已經好窄又硬要加張枱, 其實不該。店員不斷往往來來,入面廚房D洗碗聲,店員追單聲,我聽到令我覺得好煩躁。如果坐門口有令令擺設位置或窗口位對海景絕對感受係會好好多。海鮮蕃茄醬蛋包飯，所有海鮮好淡味，蛋滑但無蛋香，飯用過蕃汁炒, 但都好淡。青森蘋果梳打，唔錯, 蘋果粒新鮮, 杯野唔太甜.係細杯左D.極·日式布甸船，我一心想食日式布甸,但想影D相好看就叫左最貴的呢款甜品。賣相吸睛，布甸勁好食，好滑，唔過甜,真係想食多個，而配搭的水果都好新鮮，。隔離個件餅都幾好食,但食食下覺得好膩,食剩左少少.店員好多,茶記式服務，以呢間餐廳定價我認為服務水準是應該要做好D.…Read More

行到過嚟海之戀 全部都係人，想搵間嘢食都難，跟住就走咗去如心廣場都係人山人海，咁見呢間得幾個人等位就拿拿聲等，反正超口渴想飲珍珠奶茶。好多都係三人行所以我一個人等咗唔駛五分鐘，好快趣。 中午食咗成盒叮飯唔太肚餓 , 就叫咗個牛腩牛筋麵 .一人套餐可以選擇湯或者 仙草甜品，不過係熱嘅，我唔太鍾意食熱仙草就飲呢個貢丸豆腐湯， 個湯好清爽，入面好多芹菜粒，仲有少少豆腐，貢丸冇雪藏味，幾好食。牛肉麵估唔到都唔錯喎，除咗牛筋就唔夠淋之外，牛腩軟淋鬆化，，麵條好彈牙 , 個湯好味，飲到有八角味，同埋食到麵豉粒，最後飲曬啲湯。 另外叫咗個甜酸青瓜，都好味青瓜好爽，醬汁甜酸啱啱好 ; 跟住珍珠奶茶走甜，個冰度配得啱啱好， 飲完杯野d冰塊都剛好溶曬 ,茶味幾香濃，只係珍珠比較淋。服務好好， 呢餐一百三十蚊 , 都唔錯 .一路食一路都好多人等緊位。…Read More

下晝冇嘢做就走去又一城行下，都五六年冇嚟純粹想睇下個鐵罩商場係點，不過嚟到已經冇曬鐵罩。將商場成個行勻曬 ,跟住搵凍檸茶，見到呢間有埋西多士，咁岩想食。 兩點幾行過冇乜人，到三點先正式去食，排隊排幾耐排排左三十分鐘先入得。原來係有下午茶餐廳怪唔之得咁多人。 輕輕咁飲咗杯凍檸茶同西多士，冇乜特別。不過帶位個阿叔就幾有脾氣，入餐廳要量溫度同搓手液 ,大家都慣哂手續，我行緊之際，阿叔好惡話"唔使我講啦！自己自動波做啦！"我即刻火黎，話返佢囉"阿叔唔使咁急呀，我行緊入黎咋，唔使你講我都識做既！ 好彩之後坐低咗，幾個女仔服務員就好正常。…Read More

今日無野好做就搭新巴士線A33由屋企到屯門轉車站再行返屋企.行左廿幾分鐘到黃金海岸商場,因為未食晏所以就去睇下有乜好食.睇開飯見呢間是新開,我就拎張飛等....點知一等就等了60分鐘...餓到呢...等位時已經諗定食乜, 呢個係鹿兒島黑毛一口和牛定食$148, 和牛份量唔多, 我講明要全熟, 肉質唔會整到好鞋,肉有微牛味,但呢款牛唔算是特別好食,似一般牛肉, 汁醬是酸酸味味, 配料有煮冬瓜和雜菜絲。定食的飯可以添,可是飯粒好乾硬,唔知係落水少定係米的質素, 因為肚餓就添飯, 添個都是一樣乾硬.碗湯就反而幾好味.飲品叫了百香果茶,少甜,味道清甜,有好多百香果籽,夠解渴.心思思食芭飛定新地,但聽到其他枱追甜品,職員詬甜品多單要等,我見都差唔多要返屋企所以轉呔叫最簡單的軟雪糕。期間限定是夕張蜜瓜味,另一邊是牛奶味, 不過兩種味都唔濃香,好普通, 雪糕質感好水仲食到有微冰碎.得個筒最好食...  屯門區少有呢類日式CAFE,如果下次黎開黃金海岸都會再去呢間, 試其他野.…Read More

12月頭睇睇下FB見到呢間餐廳的聖誕餐廣告,跟住CLICK入去睇,見套餐都幾抵.其實呢間餐廳響多年前我都知道有不過就一直都無幫襯過(主要是消費唔平),反正聖誕食好D就去馬。不過佢地網站BK極都BK唔到,我就響FB提問,店家和我之後就透過電郵處理訂位,過程非常順利,而店方都好幫手,我講明我唔識講英文,怕去到和職員溝通唔到,店方話有店員可以講廣東話,我就好放心BK位了.12點去到,店員先 安排我坐窗邊位,但太陽太勁曬到椅子好燙,熱到坐唔到, 店員細心就立即問我坐唔坐返入面?除了門口店員是香港人之外,原來入面店員們都是外藉的,但他們沒有因為我唔識用英文講而白鴿眼我,或給面色, 相反是態度好歡容, 我用單詞落單及溝通,他們也GET到.這個POINT是要讚的.落單後無耐就上了一碟麵包, 食落有些香草蕃茄味, 麵包熱熱的,好吃。跟住原來仲有餐湯,(我都唔知原來包餐湯)充滿松露雜菌味道,十分可口.前菜我要了蟹餅,份量都唔細, 一切開入面全部係蟹肉, 鮮味滿足, 配埋他他醬,塗在麵包上食好正.旁邊係酸酸地的菜沙律,開胃.主食是牛扒(全熟), 肉味濃香,煎到剛好 全熟但又唔柴口, 唔會食到成口渣,中間肉位仲有D彈口。 旁邊劈糊,食到有紅蘿蔔和南瓜的味道.跟餐會有杯飲品,而甜品是要加$35,要左呢個聖誕布甸,上面係芒果雪糕,下面啡色的底我唔知點講,有提子杏仁加D酒味,苦苦地,我自己就唔係太鐘意.只係純粹見識下外國的聖誕甜品係咩黎.飲完凍野個人都開始震震凍,拿拿聲埋單出去曬太陽暖返自己.…Read More

個半月前睇youtuber介紹呢間點心話唔錯，攪到我心思思，跟住我上網book最快要到12月26日先有位。 卒之等到今日， 仲差幾分鐘先到11:30,知客叫我和另一枱食客入去梳化位坐等等， 我玩玩下電話，店員奉上一杯熱羅漢果茶，好好飲，唔會太甜( 後尾先知係羅漢果菊花茶).裏面環境裝潢十分精緻，餐具精美，book枱時候我話留在窗口位，慶幸今日天氣非常好， 陽光充沛~! 入座冇耐就奉上六款醬料，三款辣醬，豉油 ,紅醋和甜酸醬，小食甜核桃好好食，後尾我食完，店員立即奉上一碟。(正) 今日唔係好肚餓所以冇叫粉麵，首先食呢個香芋鴨肉 酥皮包$81, 切開嘅時候我見咁似係叉燒包？問咗店員話呢個 餡整法同叉燒酥一樣，不過就係用鴨肉，咁我覺得呢個味道好一般，食唔到鴨肉味又食唔到芋頭味。跟住就係youtuber推介嘅鮑魚蟹肉蓋$138(唔記得咗個正確名), 鮑魚好食好入味好腍， 入面全部係蟹肉，不過鮮味唔夠足，呢個食一次就可以。蒸點叫咗兩個：金魚蝦餃$90&紫菜素菜餃$75。 蒸餃品質好高 , 首先個金魚餃賣相非常可愛，冇走樣，入面食到蝦肉同埋有啲大帶子粒，十分鮮甜。 素菜餃 餡料有好多紫菜再撈左d菇類馬蹄粒之類， 很爽口，素餃黎講呢個係相當有味道(平時食素餃偏向淡茂茂)估唔到食到呢度已經好飽，不過youtuber推介個甜品芋泥 燉蛋白 $68話一定要試，咁既然黎到飽都照食，大約等咗十分鐘( 期間店員就奉上羅漢果菊花茶 ,見我飲完又加畀我★.☆) 果然好味， 芋泥幼滑，芋味濃香，少少甜唔會搶走芋頭味，蒸蛋白滑嫩，不過甜， 兩者配合得啱啱好。服務和態度都頂級，而且非常細心， 適時會埋黎換抹手毛巾，換碗碟，最神奇係茶壺快冇水佢地就會行過黎話拎去加水，唔需要叫唔需要拎起個蓋 XD(我諗過係咪佢地睇住客人沖左幾多杯出黎就知個壺幾時冇水@.@)最後仲有包茶葉送。走個陣經理仲問我使唔使去廁所？(我仲諗住出返k11先去), 咁一場黎到又見識下，廁所極乾淨，平時我唔敢搽商場廁所提供啲潤手霜，見呢個廁所咁乾淨就夠膽試塗D， 點解隻潤手霜咁好用嘅xDDD 清潔大叔仲揮哂手byebye我。…Read More

月頭見有八折優惠就book咗今日食lunch buffet。 因為船期唔岩 就搭機場巴士去東涌再喺纜車站再轉巴士，跟住行過去大約幾分鐘。( 下星期日屯門去東涌機場巴士就經屯赤隧道，所以今次係我最後一次經青馬大橋去) 餐廳響酒店一樓，入到lobby啲職員好有禮貌， 感覺已經唔錯。去到餐廳門口reception啲職員都好有禮貌，十二點先可以入坐，帶位嘅人都好有禮貌，仲會一路行一路同你講既食物區分佈，我都係第一次遇到呢個情況都幾特別。 地方好大，坐位好多，窗外景睇到港珠澳大橋 ..以lunch黎講數量款式都ok啦，不過就冇嘢飲任飲。(包一杯餐茶) 食物味道係真係唔錯大部分都啱我食，尤其是蝦餃好好食， 炸春捲同埋叉燒包都好食； 西蘭花蝦球同炒麵都好有鑊氣，呢度啲中菜感覺唔錯，攪到我對樓上間酒樓都好有興趣。意大利菜湯好飲，足料夠味，入面仲有啲通心粉；燒牛肉，燒火雞，不過我就唔好呢啲，另外有 即整嘅大阪燒同埋 墨西哥餅卷，餅卷入面有好多牛肉條，加埋d 醬，幾好食。 甜品款式都多，不過我就唔係好食甜品， 松露朱古力蛋糕最深刻，好重朱古力味又夠滑， 最特別仲有即整雞蛋仔。折 咗再加一300蚊，呢個價錢食到好飽，服務又良好，咁我覺得呢度黎得過。不過下星期呢間酒店會做檢疫酒店 ,如果再嚟都要再睇情況。…Read More

其實都係佢響香港開我先知呢個品牌牛肉麵δ_δ之前已Google睇定，睇到流口水，所以好期待。。。香芋珍珠奶茶(走甜) $26： 極度難飲，d奶粉粒浮哂出面( 好耐未試過飲台式嘢中伏) 鹽酥雞$48：好難食，雞完全冇味，塊炸野好厚，面頭加大量少少辣味粉，只係食到味粉味。炒椰菜(走辣)$48: 唔錯, 主因每餐想食菜番茄燉牛腱心手工麵$80：手工麵好食，好q彈， 牛腱心有三條，份量足，肉質有d 似牛展，但未算入口即溶， 入味差少少。 :(個湯好濃厚，但冇乜牛味，因為有蕃茄響度咁就會好食啲。( 偷聽搭枱夫妻，一個食紅燒牛肉麵，一個食番茄牛肉麵，佢哋話番茄牛肉麵個湯好飲過紅燒牛肉，紅燒牛肉個湯係冇味)整體嚟講，食蕃茄牛肉麵同飲珍奶都係去返春水堂。空間：非常窄 , 全店滿座。(冇政府現規定嘅50%入座率) 同隔離位只係 幾cm距離， 冷氣唔夠，食到出哂汗。服務： 店員多，每個態度幾好。不過有店員衛生意識麻麻地 , 我坐正出菜口，見個店員跌咗個餐牌落地，又響垃圾桶邊，佢掛住整其他嘢 ,隻鞋又響個餐牌旁，整完野 跟住先拎起(唔知佢有冇消毒番畀客用) 跟住經理返到 負責出餐位，係咁 提佢哋分好毛巾嚟用=.=…Read More

中秋話咁快又到了，趁節日就買盒月餅應應節。上年吃過酥皮奶黃月餅，今年不重覆了，於是試下黑松露果仁月餅。網站已列明所有材料：意大利黑松露醬，秘製焦糖，優質進口合桃，美國榛子、杏仁，伊朗開心果，加州日曬提子乾。我本身不喜歡食焦糖，而月餅所用到焦糖並沒有我不喜歡的苦澀味，而是香而不過甜，幾種果仁煙韌可口，黑松露醬味道對我來說就淡口少少，如果不喜歡太濃味的話就應該會覺得剛好吧。將月餅用微波爐加熱一分鐘，酥皮會乾身些及鬆化些，更為可口呢。…Read More

想平平地食餐晏於是由市中心行去安定商場，最後選擇經濟而算是較好坐的Cafe 1950。之前都有帶友人在這店光顧晚餐，那個啤酒雞味道是蠻不錯的，重點是幾十元大大隻，夠哂飽肚﹗尚有半小時才有下午茶餐，所以不等了。午餐價約三四十元，含湯，有飯有麵選擇，某幾款凍飲亦不用加錢。店子旺場都不得了，不過人手好似比當年開張少了，店員們忙不過來，最後自行走去櫃台取水飲。飲品和主菜都吃緊了，餐湯要追問後一陣才出現。香煎魚柳配黑椒汁，魚柳夠大件，肉嫩有汁，配有少少伴菜，而跟餐薯條算是香口。友人吃雜扒飯配白咖哩汁，有豬扒﹑炸蝦﹑雞肉腸及雞扒，四十幾元來說份量絕對足夠有餘了。白咖哩汁似白汁，還是沙爹王的白咖哩好吃些。紅湯香濃，蕃茄味足，雜菜亦有不少，好味道。至於凍檸茶是好大杯，不用加錢堅抵。之後看過下午茶餐牌，二三十元吃多士﹑麵包類，湯麵﹑飯餐三十幾元但沒有餐湯跟的，那麼還是午餐抵食好多了。…Read More

早前元氣開了條副線叫高速線，食的東西其實都是元氣出品的壽司不過重點是有火車仔送出食物，感覺得意。趁今日在荃灣就去看看是什麼境況都好。荃灣廣場元氣店已轉到地庫舖，在門口望入去見到一條又一條的"軌道"以及火車仔出出入入，這情境好攪笑。雖然等位的人是超超超級的多不過照樣排隊去吧。等下等下一等等了兩小時，餓到肚都凹了。坐下後興奮地研究這研究那，迴轉帶上沒有壽司轉來轉去，這裡是由客人負責落單，每個座位前都有一部電腦，有圖有字相當易用，如果有些配料或醬汁是不吃的話就要在電腦落單後另通知職員知道。看到車頭躲在廚房裡STANDBY，當有ORDER時它就奔出來。XD到站後火車會自動停下，客人取走食物後要襟一下路軌上的燈，之後它就會走返入去，火車是前後推進的形式。狂風掃落葉之下食食食，經典的有腐皮壽司﹑軟殼蟹手捲﹑蒸蛋(用會員免費券)﹑厚燒玉子壽司及榮螺壽司。高速線額外有一批特別款式食物，我勁推介是炸蝦卷連頭，元氣的炸蝦卷基本上是不可不吃的項目，而原條蝦相當大條，蝦肉仍有微暖，入口脆而不油，壽司旁沾滿好多紫菜碎，令白飯增添紫菜香味，很是好吃。另一款是炙燒芝士皇帝蟹柳，我覺得這款芝士味過太濃，我還是喜歡蟹柳棒壽司。友人吃的壽司有飛魚子軍艦﹑香蔥吞拿魚腩軍艦﹑加州小卷﹑海膽墨魚軍艦及槍魷魚壽司，看賣相都覺得食材都新鮮。煎三文魚皮一盤有十多片，夠哂份量，香脆而不油膩。元氣壽司向來都不差，而高速線添加了玩味，相信大人和小朋友都能被討好到。…Read More

下午在THE ONE看完戲後感覺有點餓，想吃點輕食才回家，這時間又想起大大塊薄餅呢﹗由THE ONE行去隔離條街就有分店，好方便。差不多5點都好旺場，等了一陣位才去叫野食，明明在門口櫥窗見到有我們所點選的兩款薄餅現貨，但都要等十幾分鐘先有得食。我今次食素菜薄餅，素菜味道清新，有蕃茄粒﹑菠菜﹑青椒﹑洋蔥﹑蘑菇﹑橄欖，批底塗滿大量蕃茄醬及灑滿超多芝士，剛剛出爐熱力十足，芝士都全溶變了"芝士海"。而批底超鬆脆，我最鐘意食批邊的鐘意有韌度的麵包。$40一片足料又大件，配以一杯芒果汁$10(當然不是鮮榨啦)，今餐TEA絕對滿足﹗…Read More

上星期看到有BLOGGER介紹有一個點心自助餐於是平時好少看BLOG的我都忍不住CLICK入去看看。閱後令我即時對這自助餐產生了濃厚興趣，一來自己好鐘意食點心﹑中菜，二來價錢不算貴，於是即時打電話訂位。廣告頁上的電話原來是訂位專線，我再查問清楚餐價及食物內容，接線小姐好有耐心解答所有問題，完全不會覺得我煩。自助餐分兩個時間，我當然有早食早。我們準時11點到東海薈，一眾食客已經開緊餐了﹗我早四日前訂位不過知客只安排到門口旁邊的位置枱給我們。我都估不到食客至少有九成，相當旺場，幸好地方大，枱與枱有一定的距離才不會構成壓迫。而且細枱可以坐到六個人，我們只有兩人當然坐得好鬆動，夠舒服。反而侍應人數較少，他們雖則忙到飛天，不過服務及態度都保持良好，至少一揚手就有人過來跟單，不會像大部份酒樓只懂得叫人等陣或轉頭過黎(最後當然唔黎)。點心款式雖然較少但有蝦餃﹑燒賣﹑帶子腸這些平時去飲茶收"頂點/特點"的點心，如此落本我絕不嫌三嫌四啦。因為時間只有1.5小時所以坐下後先剔點心單，遞單後才出去櫃台取小食。三款冷盤均雪得好凍，手拍青瓜，青瓜清脆多汁，另有雲耳，蒜香味可以加重些，現在只有醋汁，亦較為嗆喉，食落感覺不多舒服。四喜烤麩，有雲耳﹑冬菇﹑竹荀﹑紅棗，烤麩吸盡醬汁後變得香甜可口，而荀片爽脆多汁，我都吃了不少呢。看過其他東海食評見好多人寫東海叉燒好吃但價錢不平，既然自助餐中有得任食我又點會錯過呢﹖蜜汁叉燒的味道不錯，甜味均勻﹑自然，而我偏愛吃瘦叉，可是肉質又乾又鞋，難以吞嚥...就算是瘦肉都不應該乾硬到如此﹖另一款是金箔叉燒，每件亮晶晶的實在漂亮。夾起一件打橫看看發現原來亮晶晶的原因是....每一小件有七成都是肥肉﹗(冒汗中)因為我不吃肥肉就舔一舔好...哇，十級甜，厚厚一層麥芽糖黏得好厲害，我自問就吃不消了。枱上放有三窩分別是海鮮粥，是日中湯(粉葛湯)及是日糖水(木瓜雪耳)。海鮮粥真材實料，有超多蝦粒及帶子粒，粥底加入了瑤柱煲添，綿密鮮甜，這粥好吃。木瓜雪耳糖水，打開窩蓋那陣熟透的木瓜味香到呢，如果不是吃到太飽都想試一碗。非常少人問津的沙律菜...估不到有咖哩魚旦豬皮蘿蔔，咖哩汁香濃惹味，意外地好吃，魚旦爽口，無腥味，如此時有白飯就可以...鮑汁雞腳﹑豉油皇炒麵﹑雞扎及糯米雞都好受歡迎，不過我要留QUOTA響其他食物上，所以就算了。風沙雞翼肉嫩多汁，配上炸蒜香味更濃，甜醋小排骨也好吃，甜酸味適中，每粒排骨都有肉並不是肥膏，食得好安心。鐘意食肉的人可以攻擊豬脾，大大件大大片﹗肉質比我想像中嫩滑好多呢。基本上食幾轉小食都半飽了，而點心在半個小時後都陸續送來，保證新鮮熱辣。雪山叉燒包，剛才的叉燒就麻麻地喇，幸好叉燒包內的叉燒正常好多，好吃得多，叉燒粒鬆軟，而且主要是肉不是肥肉，甜味又剛好，皮子脆脆地帶少甜，的確好味道﹗蜂巢芋角，炸層不鬆化反而勁硬，餡料超多肉好少芋蓉，相當油膩，硬食半個好了...由細到大都好鐘意食壽包，我食前習慣係將"粉紅屁股"放在自己咀上按摩幾下才開始進食...聽起來很變態吧。XDN年前已聽聞東海壽包好有水準，率之今日能食到了﹗33週年迷你奶黃壽桃包，外間的壽包多數是連蓉餡而這款是用奶黃，奶黃餡不太甜，中間包有少少鹹蛋黃，油潤味濃，連我不太鐘意食奶黃餡的人對此餡有追食的衝動﹗好美味，要推介~黑松露粉果是無肉的，菜粒瓜粒夠多，清甜兼清新，反而黑松露味超級薄弱...完全食不出來。晶瑩蝦餃，蝦肉鮮甜爽口，內含少量肥豬肉，油汁豐富，餃皮薄而煙韌。高質素的蝦餃竟然是任食，勿錯過呀﹗自助餐會另送一湯及一海鮮。黑蒜花膠燉湯的色水黑麻麻，應該是黑蒜煮出來就是這樣吧，白蒜頭我經常食但黑蒜就第一次，所以我不知道黑蒜應該是什麼味﹖此湯的酸味好重，我本身食得酸都覺得此酸味好嗆喉，每盎有原粒黑蒜﹑冬菇及花膠筒，最後我只吃配料就不飲湯。蒜蓉開邊蒸龍蝦，一人有半隻波士頓龍蝦，龍蝦灑滿香蔥及蒜粒，香氣滿瀉，蟹肉鮮甜，很彈牙，蟹鉗打得夠爛，我們可以輕易地拔出蟹鉗肉。甜品選擇都不算少，西式中式都有。最受歡迎當然是一整櫃Häagen-Dazs啦，味道有朱古力﹑士多啤梨和曲奇妙趣。朱古力慕絲蛋糕，朱古力味濃而不甜，好味。我鐘意這芝士蛋糕，糕身軟綿綿，芝士味道輕輕的好配合我口味，不是又硬又黏腍腍兼好膩那種。椰汁糕都不錯，椰味香濃，質感QQ。出面酒樓好少提供的白免仔和白糖糕這裡都有。燕窩蛋撻，撻皮凍左都依然脆口，蛋味濃，驚喜在甜度，好少蛋撻會如此少甜，食兩個都得。點心紙內的荔蓉地瓜丸，炸糯米皮脆卜卜，內是芋頭蓉，芋頭蓉如流沙般流出來，特別又美味。臨近中秋，連月餅都出動了，聽聞東海月餅又是不錯但我的確太飽了，可惜可惜。雖則1.5小時是有點趕，不過始終都食得齊自己想食的食物。需知道在這地段只需$256就可以吃到飽，還有龍蝦吃，點計都其實化算有突呢。…Read More

我喜歡Pret A提供不少無肉素食的選擇，趁下午去灣仔辦事又食返一轉先﹗此分店原來有樓上層，店內裝潢簡約，以木色為主調會令人感覺舒適起來。佔地甚廣，而枱櫈放得不密集，難得在繁忙的地區內有一個理想休憩地。甜薯素丸子鷹嘴豆醬沙律$3x，材料種類夠多，有甜薯素丸子、什藜麥、毛豆、青豆、鷹嘴豆醬、青瓜及車厘茄，法式沙律汁分開盒仔上。Pret A的沙律向來都有水準，基本上蔬菜都好新鮮，爽口多汁，絕不會乾爭爭或有黃葉出現的問題，鷹嘴豆醬是酸味的豆蓉，十分可口，而法式沙律汁也是偏酸的，整體味道都令人胃口大開。伴湯包是法包，$6咁大條實在好抵呢，麵包外面香脆內裡鬆軟，就算無湯伴住食都不成問題呢。我將沙律盒內的鷹嘴豆醬塗在包中，即時成為有餡麵包了。健康鷹嘴豆醬三文治$22，鷹嘴豆芝麻醬﹑ 紅椒﹑ 青瓜和雜生菜，味道主要是酸酸甜甜，蔬菜新鮮，配上穀物麵包，健康度加分﹗我絕少食街外雪櫃的三文件唯獨Pret A的出品例外，因為Pret A的三文治是食得出好新鮮，令我安心。藍莓蘋果乳酪$2x，小小一杯但份量好足，酸甜味的乳酪配蘋果粒及藍莓醬，清新又健康。最後以一杯凍檸檬有機紅茶$20作結。其實食素都可以飽肚架。…Read More