Halo Ki's Profile

話說之前食過東涌間QUE，覺得嘢食好食，環境舒服，一查之下原來元朗Yoho都有分店，就喺今日去試下元朗分店係咪一樣咁好。遠處望過去餐廳，見到有堆人喺店外等候，我地都加快腳步行去攞籌。我同老公同仔仔3個人行到埋去就同餐廳女經理(着黑衫黑褲，戴眼鏡，染金髮紥馬尾)講要攞籌for3個人。女經理唔耐煩地叫我地等陣，之後佢就開始嗌籌號，當佢嗌晒幾個籌之後，等晒啲人排隊入餐廳，佢仲施施然走埋入去幫佢地落單(但其實樓面已經有人負責執枱落單囉)。個女經理完全無視有批人喺出面仲未拎籌，唔係等嗌籌號，係連籌都未拎呀！我地足足等咗10幾分鐘佢都仲未肯派個籌俾我地。其實佢只需要花1秒按個制就派到籌，佢真係分明玩嘢，做嘢無效率，唔識分先後次序。我都算有耐性，肯用10幾分鐘嚟等你派個籌，有啲客真係等唔切，轉食其他餐廳。呢個女經理真係趕客，間餐廳真係多得佢唔少。做嘢咁低效率唔用腦，仲咁有性格。結果就喺佢10幾分鐘搞完一大輪嘢之後，返到嚟接待處，梗係唔記得咗我係第一個排隊攞籌啦，拎籌嘅先後次序佢都唔知啦。企喺我隔離有個女人同女經理講要攞籌，個女經理仲好惡咁問返我係咪同個女人同一枱，串串貢咁，個款好似佢係老闆。我話唔識佢㗎，我係第一個排隊等拎籌，table for three.如果我係食街邊茶餐廳，女經理用咁串咀嘅態度招呼我同處理客人要求我都可以理解同忍受，大佬，呢間喺商場入面嘅連鎖餐廳，等你派個籌都等咁耐又要受你氣，仲要俾你加一服務費，換來係啲咁嘅服務，香港嘅飲食業真係俾個女經理搞彎晒囉。我都無撩交嗌，又無黑口黑面，淨係想攞個籌都要咁樣俾人串，咩事呀？我都唔期望個女經理笑到四萬咁口嚟招呼食客，躹晒躬咁講多謝唔該呢啲客套嘢。做返基本嘢，喺接待處做好本分，處理好派籌工作啫，都搞唔掂，態度又惡又串，好似全世界得罪佢咁，要我地俾錢買難受，就算嘢食幾好食都彌補唔返。睇返其他食評，原來唔止我一個對呢位女經理有負評。大家食呢間之前真係要諗清楚同有心理準備。如果個女經理仲想繼續做落去，真係要改下啲態度同處事手法，我諗佢啲下屬都慘㗎啦，每日返工都睇佢面色受佢氣。不過如果你係食客，你就有自由意志揀一間服務水準一流嘅餐廳了。…Read More

行葵涌廣場行到夜晚8點，攰攰地，自己一條友就去咗廣場地下呢間茶餐廳"新釗記”食飯。我叫咗個菠蘿雞粒炒飯，期間已經見隔離枱阿伯催個夥計，問佢碟飯嚟未，坐我對面個男仔又問佢碟炒烏冬嚟未，個夥計例牌敷衍叫佢地等下。結果我等咗20分鐘，都忍唔住催個夥計，佢又係諗都唔諗，串串咀話炒飯係要耐啲㗎啦，你等下啦。佢連扮入廚房問廚師都費事。好，我又等，等多10分鐘，真係火都嚟，諗住走人。我就同夥計講如果碟飯仲未炒就同我取消張單，個夥計又喺度苦苦哀求我等多1分鐘😪5分鐘後，千呼萬喚，碟炒飯終於嚟啦~唉，我等咗咁耐餓到死，已經唔理碟炒飯好唔好食(飯太濕了🤕🤮)。喺一間普通茶餐廳都等35分鐘，好命啲去隔離啲茶記都已經食完埋單走咗啦，再好命啲去新都會廣場嘅餐廳食飯嘅話都食到一半啦。本身去得茶記都唔指望嘢食會好好食，環境會好舒適，但係連最基本嘅上菜時間都掌握唔到，侍應態度又懶散惡劣，點做生意呀？新釗記，估唔到我第一次劣評會奉獻咗俾你😡各位朋友，想去呢間茶記食嘅話，要有等十世嘅心理準備！😌…Read More

同朋友行上環，路過呢間餐廳，見佢門面裝飾精緻吸引，幾有格調，加上行完成日街個肚好餓，就入去食個晚餐。我地點咗黑椒吞拿魚做前菜(有大小份量選擇)。我地揀咗細size淺嚐，一試不得了，吞拿魚非常新鮮，配埋黑椒粒食落去更加香口。同待應傾開計，原來呢道黑椒吞拿魚好受食客歡迎，不過我地仲要試其他嘢食，所以唔叫咁大碟啦店員推介我地食三文魚扒配甜薯，果然無介紹錯。三文魚扒煎得恰到好處，再配新鮮沙律菜，中和返魚扒嘅油膩，完全係perfect match呀! 杯blueberry lime soda都好好飲，微酸微甜又清新，加上薄荷葉嘅點綴，完全將夏天嘅悶熱一掃而空，好開胃呢! 餐廳有好多款burger供應，啱晒唔同人嘅口味，待應推介最新推出嘅全麥牛油果檸汁乳酪和牛漢堡，好啱追求健康同怕油膩嘅人士。可惜我朋友唔鍾意牛油果，所以最後點咗餐廳嘅皇牌88 The Lot Grand Burger。主角出場，我地見到咁足料咁厚嘅burger都呆咗，唔知何從入手。親切嘅女店員見到我地咁疑惑就走過嚟“教路”，教我地如何優雅而有效率地切開burger。一食就知無偷工減料，塊和牛好鬼juicy，隻老虎蝦烤得好香。食埋個burger已經好飽好滿足，牛油果控嘅我下次會試下新出嗰款burger！估唔到上環都有咁高質嘅西餐廳，值得再嚟…Read More