mushroom918的個人專頁

呢間啲食物無加味精，仲有湯水送，夜晚唔想煮，又想食啲家常便飯，其實呢間絕對係一個非常好嘅選擇。1️⃣麻辣雞腎 $28其實都好大份，而且麻辣醃得好，前菜好開胃。2️⃣香煎豬頸肉 $42豬頸肉好似泰式煮，仲配埋泰式辣醬。3️⃣梅子金沙骨 $50呢個梅味較重，帶點酸，我嚟送飯都好正。4️⃣真.手撕雞飯配沙薑汁 $48一般手撕雞都係配麻醬，但呢個係沙薑汁，個人都係鍾意食返麻醬多啲。5️⃣香煎蓮藕餅豬扒飯 $50豬扒有啲香茅味，而且肉質都好林。6️⃣慢煮豬軟骨飯 $48炆得好琳，豬軟骨嘅部份好似已經變咗液體狀，連小朋友都好鍾意。…查看更多

新開左間打邊爐，打邊爐之前佢會有幾樣野。首先可以任食雞煲，有唔同辣到揀，今次揀左小辣，下次可以挑戰吓中辣。下一樣餸係最期待嘅，就係蒜蓉粉絲蒸海鮮，即使係兩個人個盤都好大，當食完呢一樣之後其實已經覺得有啲飽。係打邊爐之前佢會有個湯底俾你，嗰個係蟲草花花膠烏雞湯，個湯好甜好養生好足料，當飲完個湯之後就可以加水打邊爐。打邊爐嘅料其實都好靚，有牛頸脊，蝦滑，墨魚滑等等。到最後仲有一份甜品，椰子燉雪燕都好好食，所以都要留返啲位食甜品。…查看更多

平時都好鐘意食韓國烤肉，但因為疫症嘅關係冇得飛韓國，唯有喺香港食。點知而家香港又爆！好彩上個星期爆發前食左一次咋！唔係都唔知又要等幾耐先有得食！.韓式烤肉店我食得最多就係喜來稀肉，因為啲分店都係喺我行開街嘅地方附近。呢次我地兩個人嚟食，叫左兩款肉同埋兩樣主食，本身怕唔夠，但原來食食下都好夠飽，因為佢啲前菜、爐邊蛋同生菜係任refill～我個人就好鐘意食佢個kimchi，酸辣適中，我不停叫佢加。.《護心肉（豬）》$158護心肉係比較矜貴嘅部位，每次嚟我都必點嘅，一係牛一係豬。牛就快熟啲快啲食得，但護心肉嚟講其實我鐘意食豬多啲，份量會多啲之餘亦比較厚身有咬口，但又唔會韌，沾上醬汁真係非常惹味。呢個我覺得唔包生菜就咁食，更原汁原味！.《喜來烤肉》$138呢個係牛嚟，份量相對較多，肉捲成花嘅形狀，一上碟已經覺得好靚🤗碟上有特制嘅烤肉醬汁等你點完先燒肉，每塊肉都好薄身，好快速咁燒幾秒已經食得。燒完唔駛再點醬汁都好夠味！牛肉味好出，肉質嫩滑，夾喺生菜入面，既有生菜爽脆嘅口感，又有熱辣juicy 嘅烤肉，真係lam lam脷😛.《海鮮蔥餅》$90非常大，每人都食到極大塊！好足料，煎得夠香脆，唔會太厚粉，點埋佢個醋就更加開胃！.《炒年糕》$75食韓國嘢唔叫炒年糕硬係美中不足咁。年糕都幾彈牙，我自己好鐘意將佢沾滿晒辣醬，再夾埋魚片一齊食！入面仲有幾粒飯卷，浸喺啲汁度太耐會好易散㗎，大家記得早啲食！.服務黎講，覺得銅鑼灣店係比較attentive啲，refill都好快手，會再嚟食㗎❤️…查看更多

食糖水，係疫症下嘅苦中一點甜。.想甜嚐甜係位於西環嘅黃店，一入去就見到四周嘅牆身、櫃檯都貼滿文宣，仲有一個好吸睛，戴住豬嘴嘅假人公仔，真人咁高呀。介紹呢度，除咗因為係黃店之餘，最重要係佢真係幾好食。始終食店黎講，開得舖，食物質素都要好，先對得住食客嘅真金白銀嘛！.芒芋($40)我自己好鐘意食芋圓，亦鐘意啲好似楊枝甘露呢類以芒果為主嘅糖水，呢個芒芋一次過滿足我對芒果同芋圓嘅craving呀！用鮮芒果汁做base，配料有芋圓、地瓜圓、紫薯圓、小丸子、水晶珠、芒果粒。芒果汁濃稠，芋圓唔會好死實，煙韌軟糯，水晶珠咬完會爆汁，總之就口感滿滿！.黑糖仙草芋圓（$40）怕芒果濕熱嘅話，可以食呢個黑糖仙草芋圓。個base係黑糖，浸住啲仙草，有種台灣古早味涼茶嘅感覺。同芒芋一樣，都有有芋圓、地瓜圓、紫薯圓、小丸子，唔同嘅係西米、珍珠同埋仙草，同樣係口感滿滿，而且感覺養生。大家一齊去支持黃店啦！💛…查看更多

呢排有得繼續work from home，少左好多出街食，唯有睇下電話啲嘢食相望梅止渴啦。嗱，咁就發現原來食左好多間但都冇介紹過添。既然而家幾得閒又冇乜細藝，一於揸下筆寫多幾篇！.小妹好鐘意食牛🐮嘅，上網見openrice呢度咁多like，好似幾吸引咁，所以有日lunch time 就嚟試吓係咪真係咁好食。嗰日畀老細話完，有啲唔開心，想食豪啲氹下自己，所以自己一個人lunch食二百幾蚊嘅扒! (我好少可lunch會食咁貴🙈🙈).《澳洲黑毛安格斯西冷 5成熟》 $258西冷扒的牛肉味🥩較濃，五成熟岩岩好，外層燒得乾身微脆，能夠鎖住肉汁，切開中間嘅肉，係令人垂涎欲滴嘅嫩粉紅色。牛扒旁邊有蒜鹽同燒汁，兩者都令肉味更加出。我個人就比較喜歡燒汁。跟餐有個飯，飯比較黏🍚加左木魚，紫菜，芝麻，口感豐富，味道濃郁，單食飯都唔覺得寡，同埋牛扒一齊食，味道更有層次。.總括黎講食物係唔錯，因為除左牛肉有質素之外，連飯都有咁多配料，幾有誠意，不過午餐黎講係貴左啲🙈，所以我只係畀ok🤭…查看更多

呢排少左好多出街食，食少左正餐之餘，甜品就更少。呢日止不住口痕，好想食個甜品令自己開心啲。.呢個甜品，食完超超超滿足，好足料，好似食左個正餐咁飽！ .點解會咁飽，因為一個椰皇入面有三樣食得嘅嘢，分別係椰子肉、用椰子水整嘅啫喱同焦糖布甸。.焦糖布甸椰皇子$45焦糖布甸蛋味濃郁夠滑溜，椰子水啫喱有啲似大菜糕嘅口感，食到有椰子水嘅清甜，椰子肉亦同樣非常清甜。.呢個價錢黎講，我覺得幾抵，平時食個普通嘅燉椰皇甜品，都差唔多$50起跳，仲要冇呢個咁多配料。大愛！推介！😁😁…查看更多

往日經過呢間「金峰靚靚粥麵」，經常都見到大排長龍。我呢啲重口味人士對粥品冇話特別喜愛，所以見親條隊都會心諗：粥姐，值唔值得等咁耐呀？.而家終於畀我遇到唔駛等嘅機會，於是就入去試下個粥底係咪真係名副其實咁「靚」先。.見枱枱都有叫炸兩咁滯，應該係必食嘅，然後有個街坊推介豬紅粥，所以我就叫埋啦。.《豬紅粥》$32個粥底嘅質感的確係好綿滑，不過我個人覺得除咗呢樣之外，味道方面冇乜特別。豬紅有啲鬆散，啲粥聽聞係用瑤柱同腐竹嚟煲，但我就覺得冇話特別鮮甜，可能加魚腩魚片嘅話，味道會出啲。.《炸兩》$16相比之下，我覺得個炸兩比較出色。腸粉皮薄，入面包住嘅油炸鬼非常香脆鬆化，放左一陣先食都冇變淋！總括嚟講，炸兩好食，粥底質感綿滑，唔駛點等位嘅話都食得過嘅，但要等好耐嘅話我就唔會再戰。…查看更多

哥倫比亞作家馬奎斯有一本著名嘅小說叫做《愛在瘟疫蔓延時》，而家香港人出街食飯搵命搏，絶對稱得上係一場冒險，真係可以寫返一部《食在疫症蔓延時》。.其實呢排真係最好唔好出街食，避免飛沫傳播，以察萬全，但萬一好似我呢啲「無飯家庭」，冇辦法一定要出街食嘅話，就唯有盡量食清啲同健康啲。.呢間位於上環嘅confusion 都係一個好選擇。.《Tofu Steak with Rice & Teriyaki Veggie》$100呢個飯好好食！豆腐扒好厚身，外皮略略炸過，頗為香口，調味應該係用左印度菜經常用嘅黃薑，所以有少少印度風味，配埋沾滿左日式Teriyaki燒汁嘅白菜同菇，原來咁夾，餸飯一流，真係想添飯唔係講笑！《Hummus Wrap - Hummus, Cucumber, Bell Pepper, Spicy Carrot Slaw & Rocket》$75好多人嚟到都食wrap，所以我都叫左一個。其實我本身係飯筒嚟，唔算太鐘意食wrap，因為成日食親都好易漏汁好論盡，但呢度啲wrap個皮唔會好淋好易穿，只不過呢個hummus wrap嘅配搭，真係中「椒」了🙈hummus完全被搶fo，食完之後我剩係記得有bell pepper嘅味，其他乜都唔記得。點解我會揀左呢個嘅？🤔可以再揀嘅話，我會揀牛油果同tomato salsa嗰類。提提大家，呢間嘢間唔中都會轉menu，唔知去到仲有冇以上兩樣嘢，有嘅話不妨試下🌿🌿…查看更多

泰國菜係我最最最鍾意嘅菜系（沒有之一），諗唔到想食乜嘅話，我永遠都會話泰國嘢啦，入到餐廳再諗唔到有咩特別想食嘅話，一係就會嗌Pad Thai，一係就係香辣肉碎炒飯。.不過我通常食開嘅泰國餐廳都係街坊小店為主，實惠又地道。平時飲泰式奶茶椰汁冰就多，呢次喺中環飲住cocktail🍸聽住pop music 🎤食泰菜真係第一次。.Pomelo salad with prawns🥗🍤 $108好鐘意呢個salad，平時嘅柚子大蝦沙律通常係mix 魚仔脆脆，有咬口啲但會比較鹹，但呢度就用左火龍果同菠蘿黎取代，泰式辣醬配合水果嘅甜味，仲食到lemon grass香茅嘅味道，清新之餘仲更加健康。而且啲蝦非常新鮮，不過只有3隻，size比較細。.Buttered Chicken Finger $68🍗飲嘢又點可以冇香口嘢黎送酒呢？本身都有諗過叫炸蝦餅，但啱啱食完大蝦沙律，又想叫下其他嘢，所以就叫左呢個牛油chicken finger。啖啖肉，食到有洋蔥同牛油嘅香味，但唔算重，同頭先個salad比，可以話係比較清淡，鐘意香口又唔想食太䶢可以揀呢個！.Fried Green Beans in Thai Style $68平時出街食嘢好少食菜，但我食親泰國嘢必定會叫馬拉盞炒通菜。由於是日冇通菜嘅關係，我退而求其次叫左馬拉盞炒豆角。馬拉盞相當惹味，但又係冇外面食開嘅咁鹹，食完唔覺口渴，豆角軟硬度啱啱好，美中不足係爭咁碗白飯😢呢度似乎只有炒飯，冇得齋叫一碗白飯。.ChiangMai spicy beef fried rice $98🍲-呢個炒飯口感豐富，有豆角、辣椒、西芹、牛肉粒、炸蒜，仲有流心蛋。飯炒得乾身，食落唔會好黏，粒粒分明，不過都幾辣，類似冬陰功炒飯嘅辣度，但冇佢嘅酸味balance返，所以有愈食愈辣嘅感覺。.Margarita & Gin Sour $120 each (H.H. 半價）🥂有鹽同lime嗰杯係Margarita，有lemon嗰杯係Gin Sour。兩杯都fruity ，有lime juice 同lemon juice 嘅味道，易入口，女仔都啱飲。…查看更多

🦁獅子山下體現土地問題，一班朋友成日都要苦惱喺邊度gathering，呢間party room唔單止可以唱K🎤打麻雀，仲可以燒烤🍢或打邊爐。.樂壇名人關家姐曾經有一句歌詞講到：「家中餐枱不想招呼三五知己。」（暴露年齡系列🙈，未聽過呢首歌可以自己search下)點解唔想招呼人? 原因好簡單，就係屋企豆腐潤咁細，轉身射個三分波🏀都冇位，成班人嚟到企晒喺度，你話幾冇癮，仲要而家啲上車盤全部老鏈咁遠，黎到打兩舖機🎮食兩條腸已經執得包袱，仲gather乜鬼嘢ing姐！.所以，gathering真係要搵間就腳又夠大嘅party room。小妹以前觀塘區返工，約舊同事通常都嚟返呢頭，search到有間新party room，竟然有得BBQ！本身天氣涼涼地想去郊野公園BBQ🔥而家可以喺市區添😱10條友黎，每人只係消費$300-450，可以唱下K🎤打下牌，再加埋燒烤（有得任燒海鮮！🦐）或打邊爐，玩左成四粒鐘，其實真心幾抵玩。.呢度啲食材好新鮮，老闆話係日日清，唔會擺隔夜，個別食材會因應當日的供應而調整，今次食左大頭蝦，蠔，青口，帶子，魷魚筒🦑等。.最鐘意就係魷魚筒🦑由日本空運到港，開始收水時，塗上微甜蒲燒鰻魚汁，燒好後切條，入口彈牙而且有嚼勁，仲有少少焦香添。.另外，燒蠔，青口，帶子一分鐘後加啲自家制的蒜蓉醬，令本身已經好鮮甜嘅海鮮變得惹味，我燒左好多轉😋。而大頭蝦亦都係我最喜歡之一，我當日食嘅係大頭蝦🦐蝦肉非常有彈性同新鮮，有啲仲食到入面有甘香嘅蝦籽。.🥩肉類方面，大家燒烤通常會用蜜糖🍯但嚟到呢度我推介大家燒扒類時搽蒲燒鰻魚汁，相當夾。想讚一讚佢地啲肉冇雪藏味，唔會出晒水，而店家醃制肉類時特登唔加豉油，色澤雖然冇咁靚，但燒出嚟無咁容易焦黑⚫而且竟然又夠入味喎，我都好想知佢到底點醃。.如果你去party room除左for 一班人👯‍♀一齊玩，仲想食好西，我推介你地試下呢度。👍🏻…查看更多

啱啱過去嘅聖誕節，有人喺普天同慶嘅節日頭也不回咁離開香港去左遊山玩水，簡直係一直在玩命🙄。.當然，返到黎係要跪玻璃同補食聖誕大餐嘅😌😌😌.我地兩個都比較隨性，有時都係行行下見到有興趣嘅餐廳就入去。本身係想經呢條街行返出去比較旺啲嘅地方，但見到呢間餐廳decoration幾靚幾有情調，menu上嘅item又幾吸引，又唔駛等位同人逼，所以就入左去。.三文魚他他沙律-聖誕限定 $98呢個好味！三文魚係切粒嘅，份量極多，啖啖肉。平日他他醬通常係點炸魚柳，原來配三文魚刺身又幾夾，酸酸地，感覺似食緊秘魯嗰種ceviche😋可惜只係聖誕限定，提議要將佢擺入menu入邊做regular 嘅item!.炸水晶藍蝦配蜜糖芥末醬 $108水晶藍蝦聽落好似好型，不過炸完出嚟唔係藍色，老闆話當刺身食就會見到有藍色，到底會係咩效果，非常好奇🤔份量同樣相當慷慨，有五六隻，炸得好香脆，肉質新鮮彈牙。.鮮海膽蟹肉意粉 $128個人認為抵食，因為好大pat甘甜嘅海膽❤️ 仲有蟹肉，蘆筍， basil，同埋香濃嘅cream sauce，好飽肚同滿足～.龍蝦天使麵$198其實味道都相當唔錯，有tomato sauce，好多洋蔥，好多碎芝士，口感豐富，龍蝦亦頗大舊，不過相對黎講，我覺得海膽意粉性價比高啲。.Cinderella & Happy Ending $48 each (Happy hour價錢)發現佢mocktail嘅名都係圍繞灰姑娘呢個故仔🤔叫左呢兩杯，諗住畀cinderella一個完滿嘅ending~ 前者用cocktail glass 上，有石榴，菠蘿，cranberry同🍋juice，不過唔知點解我會飲到黑加侖子味。後者就比較大杯，係菠蘿+青檸+熱情果梳打，整體覺得兩杯味道都比較淡，冇乜特別。.Overall 覺得食物質素>>>嘢飲，不過因為我地唔飲酒，所以comment唔到alcoholic drinks🍹 又係值得推介嘅hidden gem💎…查看更多

好少去愉景新城，因為幾隔sip，咁啱嗰日去嗰度玩VR (有生日優惠可以免費試玩），玩到肚餓，所以就喺度搵嘢食。.行過見到有間日式木系風格嘅餐廳，我一向都好鐘意呢類型嘅裝修，所以冇諗太多就入左去。.叫左個慢煮封門牛柳同蒲燒鰻魚，+$20升級左做定食，有麵豉湯、沙律同埋飯。個人幾鐘意呢個慢煮封門牛柳，慢煮嘅方式可以鎖住肉汁，唔破壞牛肉嘅組織，食落果然係原汁原味，睇落粉嫩，肉質好tender好juicy。另外，個沙律醬有榛子嘅nutty香味，從來都未食過呢隻味嘅醬配沙律菜，好特別！蒲燒鰻魚滑蛋好似好受歡迎，枱枱都有人嗌，好似話呢度嘅鰻魚係原生態養殖，但我就唔係好知即係有咩特點，我諗應該係健康啲，所以肉質會新鮮啲同有彈性啲？味道同平時食開嗰啲差唔多，都係用傳統嗰種蒲燒鰻魚汁，肉質係的確有彈性啲，冇骨，不過略嫌份量比較細。滑蛋奶味幾重，配鰻魚同飯一齊食，個感覺有啲似食緊玉子鰻魚壽司咁。環境係幾舒適，坐得舒服，以木為主嘅裝修總係俾到人溫馨同有屋企嘅感覺。埋單計埋加一平均每人百五蚊左右，我覺得呢個價錢食到慢煮牛柳都叫性價比高，不過男士應該唔係好夠飽。…查看更多

平日係海濱跑開步都會見到呢一間salted pig都幾多人，今晚跑完步好肚餓，唔想諗，決定就近食呢間。不過，今次兩個人叫得太多野，眼闊肚窄添! 估唔到每一樣野既份量大到咁，應該夠4個人食，可以打包食多餐添。🙈.環境係好舒適嘅，暗暗地對住個海，都好有情調架。.《迷你牛肉漢堡》 $138迷你牛肉漢堡，一共有三個，不過最大敗筆係上菜嗰刻佢係完全唔熱，但的確係幾抵食嘅。.《白酒煮荷蘭藍青口配薯條》 $168藍青口叫細份好啦，兩個人食，食極都唔完，藍青口極多，仲要有埋薯條，食到宜味菜已經飽飽地。藍青口帶有少少白酒味，加上有點忌廉，D汁係個底到，記得浸下D汁，食落特別鮮甜。.《經典英式炸魚薯條》 $188炸魚炸都好脆，有一條炸魚面頭加在鹽，食之前記得搽晒兩條，或抺走面頭既鹽，如果唔係會好鹹架。《招牌德國鹹豬手》 $298叫得salted pig 點可以唔食豬，果然豬係全餐廳最好食既一道菜，鹹豬手肉質鮮嫩，個表皮炸得好脆，再加埋個醬汁，真係好好食，甚至好食過我係德國食過既鹹豬手。《Apple Delight》 $82最後，黎埋Apple Delight 作結尾，酸酸甜甜，都唔錯架！整體黎講，豬手最好食，青口抵食，但fish and chip同個mini burger 就一般。…查看更多

夏天☀️為大地帶來美腿👯‍♀️之餘，仲蒸發左我好多汗水，日日出左一陣街已經濕到呀媽都唔認得，留喺屋企又成日同屋企人講到㷫烚烚🔥，都係去商場度嘆冷氣吃杯雪糕下火算。.「我想和你無所事事」🛌，完全係我嘅人生哲學，再加上呢度有我最喜歡嘅插畫家謝曬皮嘅設計，仲有我最熱愛嘅泰式奶茶味屎型甜筒🍦添！今次我係特登黎喂謝曬皮食屎嘅！😂.《是諗旦泰式珍珠奶茶雪糕》$15.呢間雪糕嘅泰式奶茶味好濃，雪糕好幼滑，但就比較快溶，不過都證明佢應該冇加咩凝固劑去令啲雪糕「瓊」得持久啲。食到底仲有幾粒珍貴嘅黑色珍珠，幾有口感，$15蚊黎講性價比幾高，而且我相信比起飲一杯珍奶黎講，應該冇咁肥（重點）！仲有得同皮皮打卡添！…查看更多

我夠膽講呢間係全港島最好食嘅烤雞脾! .以前讀U，有時會喺hall度行落黎/坐的士落黎附近嘅新興飲早茶，有時都會順便買呢度嘅烤脾食。而家我間唔中都會諗起呢度嘅烤雞脾，真係皮脆肉嫩勁juicy，個秘製醬汁惹味無比，老闆會問你加唔加啲椒鹽喺上面，其實我覺得唔駛加都好夠味!!!! 加左我就覺得鹹左少少，不過重口味嘅朋友一定會覺得正！冇得即叫即攞，因為佢會即刻烤，所以最好預早十五分鐘打黎order 啦，否則就要喺度等幾個字.呢間小食店開到凌晨四點嫁，真係深宵時份肚仔餓時嘅救世主！…查看更多