lichuishan's Profile

幾年前試過齋啡嘅灣仔店同糖廠街Pop up 得知佢喺長沙灣重開後專登過嚟試吓當日係平日2:30左右 計埋我有4組客 店面細細 有三張大枱 對面就擺放左幾個一人坐位同細枱 好彩我嚟到嗰陣仲有一張大枱 如果坐細枱 食主食就比較狼狽當日叫左素三文魚竹炭bagel同一杯黑芝麻latte 由於係純素店 latte選用燕麥奶 芝麻味夠濃 微甜 同燕麥奶幾夾 如果用牛奶反而有浸奶蘇味 好似我呢啲唔飲得太多咖啡嘅人可以一試主角係素三文魚竹炭Bagel 一上枱就俾佢澎湃嘅沙律份量震撼到 素三文魚同牛油果份量非常慷慨 我最欣賞嘅係個醬汁 好似刺身嘅豉油再加少少酸酸甜甜嘅調味 非常醒胃 個竹炭bagel烘得夠熱 口感非常煙靭 當日只有店主一人主理樓面同廚房 服務態度親切友善 食物高質之餘份量足夠 我呢d零儀式感嘅人對嗰d淨係啱打卡，但食物貴又唔飽嘅Cafe冇乜興趣 齋啡呢類樸實無華 用心專注品質嘅小店反而吸引到我 希望店主繼續加油 大家多多支持…Read More

我地叫左炒金邊粉，冬蔭功豬頸肉湯河同一人椰子雞湯海鮮火鍋⋯⋯個炒金邊粉初初食落酸酸甜甜咁係唔錯既，但之後食埋啲海鮮，就覺得有啲伏伏地，因為啲魷魚有啲腥，其他海鮮又好似白烚咁冇調味🥺個火鍋份量足材料正常，一個人食一定夠飽，湯底清甜但唔太夠椰子味，不過食食下其實都有啲愈食愈淡既感覺，朋友試左少少話覺得太清淡，好似清水烚肉咁......最大敗筆係個位金髮戴眼鏡嘅女店員，我地唔係要求你要笑面迎人海底撈式殷勤招侍，但起碼要有基本禮貌同尊重顧客，我地一入門口佢就西口西面，我地話book左4位，佢就目無表情，硬邦邦就咁彈幾個字出黎：「掃安心出行，量體溫」，好似命令緊我地做野咁，果陣我地個心已經嚇左一嚇...到食完之後我地去門口埋單時，自問都有禮貌講哂唔該，佢依舊一粒聲都唔出咁同我地找續，塊面西過葉劉，多謝都冇句。如果呢位店員當日係身體不適或失左聲先會咁對待顧客，我地絕對諒解，唔係嘅話希望你地可以嚴正提點佢注意自己嘅態度，我地明白今時今日飲食業難做，所以都好想身體力行支持多d良心店舖，但你地都要做好本份，提供返有質素嘅服務先得架！…Read More

朋友3月生日，疫情關係一直都未能同佢慶祝，而家適逢確診數字回落，就把握時間出黎同佢食生日飯，見網上推介呢間餐廳環境幾靚，就揀左係呢間。今次係朋友2022年第2次出街食飯，我地都好期待，但佢最終好失望...朋友叫左個軟殼蟹鹹蛋黃忌廉汁意粉同埋一杯髒髒朱古力，個意粉賣相好靚，佢食第一啖意粉都覺得好味，食到鹹蛋黃個味道，但個蟹真係唔多掂，愈食愈腥，朋友仲話之前食過元氣軟殼蟹手卷好好食，完全唔腥又香口，換言之連元氣都好食過呢度既軟殻蟹！朋友仲話啲殼咬唔爛，佢食食下都食唔到落去...個意粉唔計隻蟹，真心講其實好食，忌廉難免有d膩但可接受。杯朱古力就正正常常幾好飲，賣相都靚，但要重申一次，今次隻蟹作為主角真係令佢大失所望，唔知係佢唔好彩遇中呢隻蟹唔新鮮定點…😵😵‍💫我就食左個泡菜雞肉墨西哥卷，味道微辣唔算太鹹，配埋沙律酸酸地幾開胃，個卷烘得夠熱同脆，份量對女仔黎講都夠飽，對比朋友個意粉算係不過不失但冇乜驚喜嘅safe choice。呢類打咭餐廳開係地鐵站隔離嘅黃金位置，不出所料地勝價比唔太高，所以我地都未必會再幫襯，最後，當日我地發現水吧員工有一段時間拉低左口罩，希望佢地留意返。…Read More

9/7星期五我哋四個人大概7:30pm去walk in, 好彩唔洗等位，朋友話呢間新鋪闊落過駱駝漆分店，所以想同朋友舒服D慢慢食住傾嘅最好去呢間分店。 而事實上，上菜速度之慢令我地有充裕時間傾到天荒地老…我哋叫左1個醬油豚肉丼同3個牛油果三文魚丼，除左個醬油豚肉丼之外，牛油果三文魚丼要等起碼半個鐘到先有得食，店員話因為當晚廚房4個都係新人所以冧哂檔，建議冇乜耐性或肚餓嘅人最好有定心理準備。 我朋友叫左醬油豚肉丼，見佢價錢最平，佢唔係”慢煮”所以唔係招牌菜，好彩好快有得食，而且個汁幾好味，唔會好淡，但啲肉全部肥膏黎，可能有人會話豚肉梗係會有肥膏，但其他地方食既豚肉飯最多係肥肥地，唔係齋肥膏，我朋友食食吓都唔敢再食落去。本以為慢工出細貨，個慢煮三文魚丼應該唔差，點知係淡而無味，雖然三文魚外面僅熟內生，恰到好處，但食得出只有少少鹽調味，得一兩滴甜甜地嘅醬油係面，加上溫泉蛋同牛油果本身又係淡味，我自問食野唔重口味，都頂唔順問店員攞支岩鹽加料先食得落。如果有多啲汁/日式醬油會好食啲，牛油果大概只有半隻中size牛油果嘅份量，作為牛油果控嘅我係絕對唔夠喉。反而個麵豉湯就偏鹹，如果兩樣野balance返就好。 整體而言今餐飯令我哋失望，但從食材嘅質素同店員態度睇得出呢間係有心經營嘅小店，值得支持，希望員工上左手後可以改善上菜速度。…Read More