sandi's Profile

見佢歷史悠久，喺般含道時期未幫襯過，而家開返，都應該要試吓。先講服務：唔係話差，是晚係由位女侍應招呼，明顯係遊魂嘅。佢落 order 時冇問客人啲扒要幾成熟，最後由廚師喺廚房走出嚟問，有趣。上菜時又要逐碟問邊個食邊樣，佢都好明顯唔係做開西餐。去得呢類餐廳，我 expect 侍應要有基本餐桌禮儀， 客人刀叉拍住放埋一邊即係食完，侍應唔需要問客人係咪食完先收碟，尤其係你同人傾緊偈嘅時候問，其實會騷擾客人。不過唔怪得侍應，本身餐廳定位都奇奇怪怪，係咪唔應該用西餐標準去 rate 佢？食餐包係冇牛油刀，係不嬲冇定侍應冇上？不過個侍應睇住我哋用切肉刀搽牛油佢都冇行動，咁我 assume 佢哋係冇牛油刀嘅。我直頭 “meet” 開個麵包，逐少逐少隊落盒牛油度食就算，用切肉刀搽牛油我真係做唔出。去椰林閣食個平價午餐都有牛油刀俾你用，咁嘅要求唔過份啩？！定係俄國菜唔提供先係正宗哈哈？！衛生：食前菜同主菜都係用同一隻叉同刀，食完前菜啲刀叉又要放喺枱等食主菜，呢樣我真係幾唔鐘意。其實食前菜你俾一隻叉我，我就唔會覺得咁唔衛生。我又不敢問自己，俄國菜係用一套餐具，好似我哋用筷子咁？另外上餐飲隻匙羹“立”痴痴，明明我飲咖啡，都唔知點解佢會“痴”到糖水……環境：是晚坐卡位，不過唔好坐。啲位有啲迫，不過最致命係個椅背。後面嗰枱個男人係咁郁，我就全晚冇貼過椅背坐。有得揀，大家揀入門口嗰邊坐會好啲。最緊要嘅食物質素：是晚食咗個炭燒肉眼扒、牛脷同埋羊扒。先講前菜。有兩塊肉同一舊薯蓉。侍應聽到我哋主菜配薯菜，都唔提醒我哋前菜都有薯蓉。如果一早知，我就食返意粉啦！另外有一塊肉同我平時喺超市買開嘅金妹火腿係一樣味，嗰刻已經覺得太搞笑。希望係我食錯，哈哈！之後上嘅係被推上神枱嘅羅宋湯。其實我好少飲羅宋湯，不過嚟到唔飲就錯晒。佢當然比其他餐廳濃郁啦！不過又唔係好味到會想 encore 嘅程度~ 果然我唔係羅宋湯嘅粉絲。最後上主菜啦！肉眼扒同羊扒都係要七成熟，可惜出到嚟絕對唔對版，燒扒工夫未到家。扒嘅質素亦唔好，完全冇肉味，唔講都唔知自己食緊牛扒。牛脷我冇食，不過聽講三個餐當中係最好食。評語係脷唔夠入味，不過好過扒嘅質素。其實所有嘢都冇咩味，但係食完呢餐已經 7 小時，我個口仲渴到死，真係食唔出啲味精放咗喺邊。其實食嗰 $200 幾蚊一位，唔使咁高要求嘅！可惜我哋抱住太大期望去食，結果再一次印證，俾傳媒吹捧得太高都唔係一件好事。記得以前去諾士佛臺食嘅俄國餐，到今日間嘢都冇咗，我依然懷念佢哋啲包。食個前菜已經令人念念不忘到咁嘅地步，咁就係成功。價錢諾士佛臺嗰間都唔係貴好多，但有得揀，我真係唔會想食莎厘娜呢種中國化嘅俄國菜。劣評睇得多，我有時會覺得其實係咪我食唔中人哋啲拿手嘢，所以先中伏呢？如果有好食推介，麻煩通知一聲。最後，如果食情懷嘅朋友可能會繼續幫襯。不過冇感情包袱如我呢類客，的確冇咩吸引我再行入去食。亦正如上一篇食評所講，我寧願俾多 $100，落海記食海鮮還比較滿足。…Read More

唔係我老豆睇報紙介紹呢間餐廳，住咗喺呢區咁耐都唔知有間咁嘅嘢~成家都鐘意食海鮮，啱啱喺台灣旅行返嚟，仲好懷念佢哋嘅彈牙龍蝦、鮮味花蟹…… 所以就嚟海記試吓菜。一行三人叫咗一隻蟹、一碟蒜蓉蝦、一條魚、一碟豆苗同一碟避風塘三寶。盛惠 $800 幾。先講服務：可能我哋都算早食飯（未到晚上 7 時已到），人未係咁多，所以叫人問嘢落單都冇問題。食到咁上下，人開始多，見幫襯嘅都係熟客多，所以老闆都唔使點招呼。我哋第一次幫襯問長問短，老闆都唔嫌我哋煩哈哈！廚房阿哥出菜時仲同我哋傾咗兩句，交流台灣海鮮心得。一致認同台灣海鮮靚，但佢哋煮得唔夠好，嘥咗啲靚海鮮。最緊要嘅食物質素：海鮮係冇問題，好新鮮，係靚貨。豆苗都清晒，好嫩！三寶個蝦膠彈牙到呢~ 我不嬲唔食三寶，因為唔鐘意食外面個青椒紅椒，通常淨係食個魚肉哈哈！海記呢個我可以成個食！不過真係唔夠避風塘，我哋仲攞咗碟辣椒醬嚟點。如果呢碟可以整得惹味啲，呢餐就可以俾足 100 分！衛生：雖然係熟食中心，不過碗碟筷子各樣都乾淨衛生，食得安心。環境：真係天氣涼先可以幫襯，熱啲我都唔得。是夜一路食一路有涼風吹送，正。可惜香港係熱天多呢……價錢：可能你覺得食熟食中心要 $800 幾蚊係貴，但係比起啲所謂西餐廳，食個 set dinner 都要 $200 幾，仲要唔一定係好食；而家只係 $800 幾，可以一枱海鮮，仲要啱食、好食，我覺得係值回票價。食完呢餐，我老豆隔咗唔夠一星期又心思思想去食！海鮮雖然好食，但都唔可以食得咁密呀！題外話，老闆娘是晚找錯錢。雖屬無心之失，但都提醒我去到邊度，都記住睇清楚找續。…Read More

路過見掛出嚟嘅燒臘檔好似唔錯就試吓~環境：坐得幾舒服，唔會好迫夾。多人得嚟又唔會好嘈，唔通西半山啲食客斯文啲？嘩哈哈~ 同坐得超唔舒服嘅水街周記比，真係舒服好多。衛生：滿意，枱面、餐具同擺餐具嘅櫃桶都幾乾淨。因為我好易會腸胃不適，所以我都幾睇重衛生。食完都冇事，ok。服務：侍應服務有質素，多謝前多謝後，落單都溫馨提示蒸飯要等耐少少先上到。比起上個月食翠華，成個場唔夠人手，想搵個人落單都難要好得多。今次嘅標題係「中伏」，所以我刻意寫啲我滿意嘅嘢先。食物：作為一間食肆，食物質素始終係最緊要。選擇種類都幾多，一般茶記嘅嘢有，雲吞麵又有，沙冰都見幾多人飲。是日先上燒味飯，要咗燒肉同燒鵝。如圖所見，燒肉啲皮未食已經甩晒出嚟，啲皮亦都唔脆。燒鵝都有啲硬。呢個燒味飯最致命嘅地方係啲飯，又「鞋」又「卓」，同埋啲燒味雖然都落咗唔少味精，但啲肉都係冇味嘅，有味都係來自個酸梅醬。另外要咗個籠仔蒸飯，因為見多人食就試吓。一樣啦，飯都係嗰啲飯已經唔想食，呢個籠仔系列標榜冇味精，我好開心，但見到個肉餅我就有啲驚，因為標榜冇味精啫，唔等於你可以唔醃肉啩？！啲肉白到~ 成個肉餅嘅味就係靠土魷，可惜份量唔多。個飯本身佢都已經加咗豉油，不過都係冇咩味~ 對於食飯冇飯味，食肉冇肉味，食物本身原味都欠奉，就真係幾耐人尋味。枱面有調味架嘅，但係相信醃嘅味同後加嘅係兩回事。呢兩個飯，正街潤匯比佢好食太多。價錢：二人同行，$103 落樓。咁嘅價錢，食啲咁嘅質素，對唔住，冇下次。行返落正街，更平，更好食嘅選擇，大把。…Read More

環境：舒服，裝修又靚，唔似啲連鎖咖啡店咁嘈，同朋友嚟傾偈真係唔錯！後面有露天位可以坐，適合大伙兒或吸煙人士。唯一要彈就係，始終對住馬路，有啲車行過真係幾嘈，慶幸第三街本身唔算話有太多車行。或者等天氣涼啲，坐露天位會靜啲。飲品：都幾有特色，試咗個五味子茶。入口係酸酸哋又有少少苦苦哋，不過就搵唔足五隻味哈哈！第一口覺得怪怪哋，不過飲落又覺得幾好飲。可能因為我要冷飲，啲冰融咗溝淡咗所以易入口啲啩！店員話呢個飲品喺韓國係幾 popular 嘅飲品~ 另外我朋友嘅 berries 茶佢話係 2nd popular 喎！俾佢講完，搞到我哋好似好有眼光咁，揀晒啲好嘢嚟試哈哈~食物：因為唔肚餓，所以冇試。不過見其他人有叫泡菜飯同 burrito，我望落就唔算吸引，同埋份量都唔算大，啱女仔多啲~ 可能食返 cake 之類嘅甜品會吸引啲，見佢有綠茶卷蛋都好想試，不過飲品同卷蛋唔 match，所以冇叫到。下次我都想試吓佢個心太軟配柚子咖啡。有個女仔叫柚子咖啡，我聞到啲咖啡都幾香！服務：其實都冇服務可言，order 完嘢飲都要自己攞。除非你坐露天位或者你背住阿靚仔店員坐，佢嗌你唔到，咁佢先會攞去俾你！其實真係冇諗過要自己攞~ 不過呢個問題不大。衛生：乾淨，我冇嘢挑剔。洗手間一打開係香的，就算露天位啲枱櫈都唔會摸落一手灰塵，已經好滿意了！價錢：可以接受嘅程度。$28 買杯特別嘅飲品，值！起碼我都係第一次接觸五味子茶，點都好過連鎖的，飲勻晒，冇乜驚喜可言了……總結：住附近久唔久攞本書落去坐吓，又或者同朋友吹吓水，的確係一個幾唔錯嘅地方！不過啲櫈因為冇椅背，所以坐得唔係幾舒服，要挨住牆坐先至坐得舒服啲。值得一試嘅小店，區內朋友不妨可以支持吓！…Read More

價錢其實唔算貴，不過啲嘢食嘅份量就好少。好彩我哋兩個女仔都食好少嘢，所以都食到要打包。1. 泡菜餅。好好食！係我喺香港食過咁多間韓國餐廳最好食嘅一間！十分香脆~ 自己喺屋企都會整，當然整唔到佢咁好味啦！見佢請廚務助理，真係有啲心思思想去應徵偷吓師哈哈~2. 韓國粉絲。足料已經好心足，麻油味香得嚟又唔會食到成口油。呢個打包咗，第二日翻炒都冇變到一 pat pat，讚~以前想食韓國菜就一定去尖沙咀韓國街，諗住啲嘢會正宗口味啲。不過食完呢間之後，似乎我嘅想法都唔同咗。正如喺外國食唐人街，其實啲中菜真係唔好食嘅情況一樣，睇嚟呢間餐廳係我嘅韓食首選。要彈嘅話就係餐廳環境，不過我食嘢都係食物行先。附近 k-roll 環境裝修靚啲，價錢又差唔多，一般人行過都會揀 k-roll。不過論食物款式，k-roll 嘅選擇就唔係咁啱我口味。…Read More

睇完啲食評，抱住好大期望嚟試。1. 炸餃子。本身係要炸泡菜餃，但係啲侍應又唔係好識英文，我更加唔識韓文，所以食咗呢個普通餃子。冇特別，叫第二樣嘢食好過。2. 炒粉絲。唔錯，好多餸，如果粉絲多返啲會更好。3. 牛肋骨年糕。牛肋骨可以揀份量，要兩條三條四條都得。我哋要兩條，份量都多到食唔晒 。牛肋骨幾好食，啲配料白蘿蔔都好入味。年糕得四條仔，又出奇地俾咁少~4. 泡菜餅。個餅煙煙 un un，口感似糯米，唔係我食開嘅 texture。好唔好食就睇你鐘唔鐘意呢個口感啦！總括嚟講，啲份量好大份，我哋一行三人食完全部要打包。食完個口好渴，味精都幾重，最大嫌疑應該係牛肋骨。坐得都舒服，不過坐正廚房前面，窗外仲有大盞燈射到應一應，一路食一路出汗。有得 book 枱，記住唔好坐窗口嗰邊。服務唔好架，韓國餐廳係咪都係咁上下招呼？…Read More

由開店食到而家，都係時候幫老闆娘宣傳吓啦！環境：夏天去堂食會熱，所以天時熱我寧願買返屋企食。格局似熟食中心咁~食物：比起平時去三六九嗰啲老牌上海餐廳，小上海嘅口味我比較鐘意！清淡啲~ 我屋企次次去必食魚頭湯、鹹春卷、醉雞腳同甜春卷，有時會叫埋海蜇。魚頭湯：飲魚湯我最怕魚湯腥！小上海嘅就只有鮮味，正！仲有一條條透明嘅粉（我唔知正確叫乜名），好飽肚！鹹春卷：裡面竟然只係包菜（問過老闆娘係咩菜，不過唔記得 lu），但唔知點解咁好味？！？！醉系列：首選係雞腳，因為入味啲。我老豆最鐘意食醉雞腎。海蜇：我鐘意買返屋企雪一晚先食，因為會入味啲同凍啲~甜春卷：裡面係紅豆，即叫即炸，唔好等到食完正餐先叫呀！唔會太甜，好味。如果自己一個人食呢，必點煨麵~ 差不多我一入去，所有人都知我實係叫煨麵哈哈~ 有時想食酸辣，平時我會叫多個酸辣湯自己撈煨麵食。但份量實在太多，分兩餐食又驚啲煨麵會爛。所以我嘅 hidden menu 係酸辣雞/雲吞煨麵。老闆娘特登整俾我架，呢啲就係小店窩心嘅地方。有時老闆娘自己整嘢俾自己食，又會俾我哋食，唔收錢架~ 佢整嘅糯米飯好好食，可惜佢唔賣！佢上次返上海，帶咗啲新鮮年糕返香港，炒俾我哋食，連平時唔食年糕嘅我都食唔停！又係好可惜，平日提供嘅年糕始終比唔上。價錢實惠，食物又有質素，服務又好，係我一直支持嘅原因。喺西營盤嘅餐廳我都好少咁滿意~ 其實我第一次幫襯係食豬排菜飯，豬排乾得滯菜飯又唔夠熱，所以到而家我都冇再食過呢兩樣嘢嘩哈哈！烤麩、獅子頭我都鐘意食，不過就少食。因為一個人食碗煨麵已經 ko 咗，同屋企人食，佢哋又唔鐘意食呢兩味。差啲唔記得講，記住飲豆漿~ 感覺更圓滿 ^^希望老闆、老闆娘如果睇到我呢篇咁詳細嘅報導，下次幫襯會送啲嘢俾我食啦嘩哈哈~…Read More

阿媽去過話好食，今日佢陪我嚟~ 第一次去，滿心期待。環境：唔錯，不過因為得兩三枱客，所以唔會覺得好迫。可以望吓街，慢慢食個早餐都幾 relax 嘅！食物：一上菜就係生果。個器皿唔係之前幾篇食評相中嘅匙羹型啦！而係望落勁似飛機餐嘅四方型。相信同容量有關吧！建議生果同主菜一隻碟上，反正主菜隻碟大把位哈哈！主菜成碟望落豐富啲，又可以洗少隻碗都唔錯呀！個 egg benedict 可以揀配煙三文、火腿等，幾好味！食咗一陣先醒起有煙三文，食落口完全唔覺佢存在。我明白 $38 唔好要求太多哈哈！配菜嘅薯仔粒同焗蕃茄又意外地好食~ 美中不足嘅係，份量不足，食完都唔覺飽。可能媽媽個奄列會飽肚啲，見都幾大份~服務：能夠破壞我對呢間餐廳嘅第一印象，就係服務態度。都知餐飲業難請人，仲要喺西營盤就難上加難。但唔等於我要貼錢買難受~ 兩個人得一張 menu，要求女侍應要多張都要睇佢面色，真係莫名其妙~ $38 嘅早餐唔應該要求五星級酒店嘅服務質素，但最少要合理咯！如果 $38 買晒食物質素，呢間餐廳嘅早餐都值 4 星。下次見唔到同一個侍應，我都可能會再去嘅~…Read More

由$16食到而家$30，可惜嘅係質素差咗。河粉已經唔再係以前咁滑嘟嘟，味精又重手咗。牛腩食過幾次都俾啲硬嘅，今次話要「淋」啲，就俾啲肥到冇乜肉嘅…… 有冇一碗靚牛腩河食，完全靠斬嗰個俾唔俾到舊靚嘅你。以前唔使特登吩咐，啲牛腩都一定好食架 :( 河又唔得，腩又唔得，睇怕我以後都唔會經常幫襯咯！希望佢哋改善吓啦，話晒食開有感情，都想佢哋好！…Read More

環境：有氣派嘅地方，私人會所格局。坐得好闊絡，枱與枱之間隔好遠。啲櫈好「畸呢」，仲以為自己去咗 salon 剪頭髮。坐得唔舒服，一挨住張櫈就食唔到嘢；或者可以推埋啲張櫈嘅，不過我就推唔郁啦！三個人去，張枱最少可以坐多兩個。張枱太大就變咗夾嘢食唔方便，如果有轉盤就會好啲。食物：食物選擇唔多，但就有好多其他酒樓冇嘅嘢食如脆鵝肝卷。我只係食咗鳳爪、菜苗餃同蘿蔔糕。蘿蔔糕唔建議食，其他都 ok。唯一覺得好嘅係，食完唔覺有好多味精。辣椒醬係用西營盤名產余均益，極有衝動叫碟乾炒牛河食。價錢：茶位$20個，不過啲茶唔好飲。8個點心，食咗$333，又唔算貴。服務：幾好，四五個樓面/部長，招呼十一、二枱客，因為就係得十一二枱客之嘛！星期日唔使搵位嘅酒樓都係一大賣點哈哈！我自己就唔會去第二次啦！因為好多點心都唔啱食。你想試新嘢嘅話，都可以試吓嘅~…Read More

同阿媽兩個第一次幫襯，可惜亦會係最後一次~1) 食物佢對面街間舖裝修，所以暫時冇壽司供應。見佢門口貼住話有泡菜黑豚鍋，問咗又話：「你要我都可以整俾你嘅！」聽完即刻唔敢食！冇選擇下，就只選串燒啦！諗住食串燒難食極有個譜，風險會比較低，哈哈！是夜食咗 1)雞軟骨; 2)青椒仔; 3) 芝士雞翼; 4) 多春魚 同埋 5) 豚肉露荀。好唔好食？Sorry~ 所有嘢都只係食到鹽味，啲嘢鹹到爆炸！係雞軟骨好少少，冇咁鹹同埋有少少黑椒調味。芝士雞翼完全搵唔到芝士！千祈唔好食啦！2) 濫收費用串燒嚟之前上咗個沙律，食完埋單先知唔係免費~~ 如果要收費，係咪應該喺 menu 或者同個客講？我完全搵唔到佢有寫收費咯！咁如果我知要收錢，咁我又可唔可以選擇唔要呢？有心去食嘅朋友，你下次真係要同佢講唔要個沙律先幫襯，因為一客沙律收$20！絕對唔值！下次真係要睇吓其他人嘅 comments 先去幫襯~~ 如果我有睇，我一定唔會去幫襯！…Read More

每次都食佢嘅木槺布甸，係我喜歡嘅味道！不過今晚買就已經賣晒，所以食咗個 chocolate mousse。如果唔要個西餅底就更好啦！因為我自己唔係咁鐘意西餅啫！講真，佢啲甜品真係好食過啲連鎖店！！！…Read More

路過見到新開張，就食咗個下午茶。據老闆講，都係開咗兩星期度啦！蛋治連冷飲，$20。蛋有別於平日喺茶餐廳食嗰啲，百思不得其解。問一問，原來平時啲茶餐廳係用平底鍋去炒，佢哋係用大鍋去炒~~唔怪之得咁滑啦！食物選擇唔多，不過勝在味道唔差！同埋坐得舒服過快餐店~~平時行過，午市見佢都幾多人食~下次我會試吓佢啲飯~~佢哋出名係自家製叉燒，咁真係要試吓啦！如果唔熟灣仔，你會覺得幾難搵。我就由細出入到大，所以麥加力歌街對我就唔陌生~~即係舊郵局對面，胡忠斜對面咯！其實同金鳳都係隔一條街之嘛！不過佢四圍都冇食肆，對面仲有個地盤，附近環境就麻麻。希望佢可以捱得住，咁我又多一個飯堂食飯啦~~~~…Read More

第一次幫襯，係去元朗嗰間，食完真係有返尋味嘅感覺！今次唔使去咁遠啦，諗住又可以大快朵頤一番，點知…… 出事啦~落單唔夠 5 分鐘就上第一道菜：五味雞。雖不至於冷凍，但嗰個煮咗一段時間，蒸氣都唔多條嘅樣，未食已經冇晒胃口~食落乾淨淨，油水都唔多滴（因已攤放了好一陣子的關係），最後嘅命運係食剩 3/4 碟。第二味係香茜米鴨。叫嘅原因係因為睇咗大家嘅 comments~不過食過又真係覺得同一般燒蠟店嘅冇分別！聽說元朗食呢味餸要 3 日前預定，食嗰時先燒~又係一道食剩 3/4 嘅餸，全因又係只得微暖嘅關係。食中國菜，都不外乎係想食啲熱辣辣同有鑊氣嘅嘢啫~第三味係炸鯪魚球。新鮮炸係寧舍唔同啲！雖然有啲炸得過火，但都係唯一一碟清晒嘅餸。第四味係紅酒牛腩。都 OK！食得過~牛腩夠腍，酒味都有少少~第五味係蟹粉炒西蘭花。個獻如果唔係咁差，呢味餸都OK！可惜個獻太厚！再加上啲冷氣好凍，個獻好快就一舊舊。最後食馬拉糕。唔好話冇元朗咁好食啦，仲衰過啲酒樓！中間啲奶皇完全見唔到食唔到 :(咁你話係咪失望先？！送嘅紅豆沙又甜咗少少，不過都有起少少沙就算啦~5個人由6:30PM坐到10PM先走，星期五嘅晚上生意都咁薄弱，我相信一定有佢嘅原因嘅！聽閒灣仔會多開一間分店~但如果啲水準好似九龍灣呢間咁樣，就真係你請我都唔會去咯！…Read More

純粹路過，見個舖面陰陰沉沉咁，仲要 0 個客喎 (不過嗰時都未夠 7PM)，都真係心大心細究竟試唔試好！好彩有入去食咋！原來都幾好味喎 :)我食個咖喱牛配兩個薄餅，我係將所有汁食晒第一次可以食到一樣嘢都冇淨！大家不妨一試呀~~$40 包一罐飲品嘅晚餐，真係好過食快餐啦！…Read More